Nyob rau lub caij uas United Nations (UN) koom nws lub rooj koom txheej ntawm nroog New York uas Donald Trump thiab muaj ntiaj teb tsoom theej tswj tau mus koom tshaj 100 tawm tus.
Donald Trump tau hawv hem tias "yog North Korea tseem tua teb chaws America thiab nws cov teb chaws phooj ywg thiab, ces America yuav siv dag zog tub rog los tua teb chaws Kaus Lim qaum teb kom piam sij puas ntsoog thiab liam sim tag nrho mus."
Kim Donald Trump tau tis npe rau Kim Jung Un tias:
"Kim Jung Un yog tus txiv neej foob pob (Rocket man) uas tab tom npaj ib cov tswv yim yuav txov txo nws tus kheej thiab nws lub teb chaws ntag."
Nws twb tau kos xyeem mem tes rau ib cov cai tshiab los rau txim lagluam rau North Korea tshiab uas txwv tsis pub tej tuam txhab ua lagluam, tej tuam txhab nyiaj ua lagluam nrog lub teb chaws no. Thiab tau qhuas Suav tuam tshoj uas tau cej luam tias nws tau hais kom nws tej txhab nyiaj txhob ua lagluam nrog Kaus Lim qaum teb lawm, txawm tias nom tswv Suav tseem tsis tau tawm los qhia meej tseeb tiag tias seb puas yog li hais ntawd.
Australia tus pwm tsav lis laj fai pej kum Julie Bishop thiab Australia tus thawj pwm tsav Malcolm Turnbull los kuj tau hais tias kom ntiaj teb tsoom theej tswj txhob mloog Kim Donald Trump cov lus tab sis yuav tau mloog txog lub ntsiab tseeb tias yog vim li cas nws thiaj hais tej lus no rau teb chaws Kaus Lim qaum teb. Vim lub teb chaws North Korea no yeej yog ib lub uas nws tus coj Kim Jung Un yeej tau sim foob pob thiab riam phom nuclear tsis tu ncua ua ntuv zus uas yuam pej kum haiv cai, tsis mloog koom haum nraj nrig tim koom haiv (Koom haum ntiaj teb-United Nations) lub rooj tswj kev ruaj ntseg hais thiab tsis ua raws li tej cai nws txwv. Nws thiaj tau tsim teeb meem pheej hmooo rau zejzog pej kum haiv loj zuj zus tuaj. Yog li thiaj xav kom UN rau txim lagluam kom hnyav raws li America tus president tau hais kom North Korea rov qab feeb meej.
Donald Trump uas yog America tus thawj tsav meem (President) tseem tau hais tias cov kev sib khom pom zoo riam phom nuclear nrog teb chaws Iran yog ib cov hauj lwm ua rau America poob ntsej muag kawg nkaus, thiab nws yuav rov qab los ua tib zoo txheeb xyuas cov kev sib khom pom zoo uas ntau lub teb chaws vam meej tau koom sib khom pom zoo txog cov dej num no nrog Iran txuas ntxiv.
"Ces thiaj ua rau Iran tau tib tsis pom zoo tias tsis tsim nyog Kim Trump yuav hais tej lus tsis paub tab, tej lus ntxub ntxaug nws lub teb chaws. Vim yog ib cov lus siv txheej tiam neej nrab (Medieval) qub qub puag thaum ub uas siv tsis tau rau tiam neej vam meej zim txwv 21 no ntxiv lawm."
Thiab nws tus coj tau hais kom teb chaws America tus coj no cia li los hais lus thov txim rau nws lub teb chaws. Margot Wallstrom uas yog tebchaws Sweden tus pwm tsav lis laj fai pej kum los kuj hais tias Kim Donald Trump cov lus hais no yog ib cov lus hais yuam kev siv tsis tau hais tsis raug caij raug nyoog thiab hais rau cov neeg uas tsis xav hnov xwb.
Benjamin Netanyahu uas yog tebchaws Israel tus thawj pwm tsav los kuj tau hais tias teb chaws Iran yeej tau tsim teeb meem tua neeg rau ntau lub teb chaws ntawm cov teb chaws ntuj qhuav teb nkig ntuj nqha teb nqhuab (Middle East) no tsis hais yuav yog ntawm teb chaws Syria, los yog Iraq thiab Lebanon los yog lwm thaj chaw. Vim lub teb chaws Iran no yeej yuav tsis pub thiab tsis xav kom haiv neeg Israeli ciaj sia loj hlob huam vam tuaj li.
"Yog li Antonio Gutterres uas yog UN tus coj thiaj li hais tias kom tsis txhob siv tej lus sib cav muaj ceem heev no tsam muaj ib txhia ua yuam kev, thiab yuav tsum tau siv kev nom tswv thiab kev ua tus coj ntawm ntiaj teb tsoom theej tswj los nrog daws cov teeb meem no thiaj yuav muaj chaw mus tsis yog yuav npau suav pw tuav maum theeb hais lus kom muaj tsov rog."
Suav tuam tshoj tus nom lis laj fai pej kum Wang Yi los kuj tau nqua hu txhua tog kom tswj lawv tus kheej kom tus, thiab siv txoj kev thaj yeeb los daws tej teeb meem kub ntxhov no.
