Tsoom hwv America tau tawm tsab ntawv ceeb toom 18-720/CONS txij hnub tim 9 lub 7 hli ntuj xyoo 2018 no txwv tsis pub qee cov visa rau Nplog teb siv thiab muaj raws li nram no:
B1-Short term business visitors
Yog cov visa txwv tsis pub rau Nplog cov neeg mus ua lagluam nyob rau teb chaws America (Tourist).
B2-Short term tourists visitors
Yog tsis pub visa rau cov neeg mus ncig xyuas teb chaws los yog ncig xyuas kwv tij neej tsa txheeb ze.
Yog li yuav txwv cov B1 thiab B2 rau nom tswv Nplog tej coj theem siab mus txog rau Nplog lub tuam chav tswj kev ruaj ntseg tej neeg ua hauj lwm thiab lawv tsev neeg tib si.
A3-attendants, servants, & personal employees of Diplomats
Yog cov txwv tsis pub visa rau nom tswv Nplog cov neeg ua hauj lwm pab tej nom ambassador uas lawv coj tau lawv 2 tug neeg li poj niam thiab me nyuam nrog lawv siv ntxiv.
G5-personal employees, attendants, servants of & employees of international organizations
Yog cov visa pub rau cov neeg Nplog muaj cai jus ua hauj lwm los yog ua zog ntawm teb chaws America li Nplog thiab America tau pom zoo.
Cov visa hais los no yog cov uas nom tswv America txwv tsis pub rau nom tswv Nplog thiab pej xeem Nplog siv ntxiv tom qab tsoom hwv Nplog tsis kam tos cov neeg Nplog raug txim uas tsoom hwv America muab xa rov qab rau Nplog teb ntawd.
Thaum xub mas nom tswv Nplog kuj tawm los qhia tias America cov hauj lwm no yog tej yam tsis tsim nyog ua thiab yuav ua rau muaj teeb meem rau nkawv 2 lub teb chaws no txoj kev sib raug zoo rau yav tom ntej.
Tab sis raws li phau ntawv xov xwm The Laotian Times tau tshaj tawm rau hnub tim 13 lub 7 hli ntuj dhau los no, nom tswv Nplog twb tau koom tes nrog nom tswv America los txheeb xyuas 10 cov kev yuav muab ib cov neeg Nplog ntawm teb chaws America xav rov qab rau Nplog.
Raws li tsab ntawv xov xwm no tau qhia nom tswv Nplog twb los saib thawj cov kev xav cov neeg no muaj 3 cases uas twb tos 2 tug mus rau hauv Nplog teb lawm tab sis tseem yuav los txheeb 9 cases ntxiv kom tiav rau hnub tim 27 lub 7 hli ntuj xyoo 2018 no ntxiv.
Lub koom haum Southeast Asia Resource Action Center (SEARAC) qhia tias txij xyoo 1998, twb muaj ntawv npaj xa cov neeg Nplog uas yog Nplog thiab Hmoob nyob America txog 4,568 rov qab rau Nplog. Thiab twb tau muab 206 xa tiav rau Nplog lawm tseem seem 4,362 tus uas tseem tos thiab tsis pom qab cob cuab tias yuav muaj dab tsi tshwm sim pauv hloov li cas ntxiv.
Cov neeg no muaj Hmoob thiab Nplog uas yog cov tsiv ua neeg thoj nam hauv Nplog teb mus los yog cov yug ntawm tej yeej thoj nam ua ntej lawv yuav mus nyob rau teb chaws America uas tau cov npav ntsuab thiab tau ua pej xeem America uas tau raug txhim thiab twb raug kaw tsev laj cuj dhau los lawm yuav raug xa rov qab.
Tab sis vim Nplog tsis tau pom zoo nrog tsab cai xa neeg rov qab nrog rau teb chaws America ces Nplog thiaj tos cov neeg Nplog no rov qab tsawg tsawg xwb.#
Listen to SBS Radio Hmong program at www.sbs.com.au/hmong on Thursday 6pm AEST (Australian Eastern Standard Time) and Sunday 11am AEST.
You can download SBS Radio App from App Store at https://apple.co/2pLgvCX and from Google Play at http://bit.ly/2GuIRv or you can download podcasts news in Hmong and English from www.sbs.com.au/podcasts/yourlanguage/hmong. and listen to Hmong news in iTunes at https://itunes.apple.com/us/podcast/sbs-hmong/id814724207?mt=2
Besides, you can follow us, click like, share and comments at #SBSHmong website at www.facebook.com/sbshmong.
Call to have a chat with SBS Radio Hmong Program on + 61 3 9949 2259 or sent your comments to comments@sbs.com.au.
