America tus thawj tsav meem Donald Trump cov kev xav thov kho America tsab cai the 14th Amendment kom txwv tau thiab txhob pub cov me nyuam yug los ntawm cov niam txiv neeg tsiv teb tsaws chaws mus tsis raug cai rau teb chaws America thiab cov neeg uas tsis yog pej xeem America ua pej xeem lawm.
Lub tswv yim no yog ib lub tswv yim cov nyom heev. Mr. Trump npaj yuav siv nws lub fwj chim tam li yog tus thawj tsav meem (Presidential Executive Order) coj los txwv tsis pub cov me nyuam ntawm tej neeg hais no ua tau pej xeem America ntxiv lawm. Nws ntseeg tau tias yeej yuav daws tau cov teeb meem no thiab yuav ua tau tiav xwb. Yog li no thiaj muaj cov uas pom zoo thiab cov neeg tsis pom zoo nrog lub tswv yim no tib si.
Cov pom zoo nrog America tus thawj tsav meem cav tias peb tsis xav kom tej neeg siv nqe cai 14th Amendment rau kis yuam kev kom lawv tau txais txiaj ntsim, thiab lub hom phiaj ntawm cov kev pauv hloov no tsuas yog pab kom txhob muaj cov neeg tsiv teb tsaws chaw mus tsawg rau teb chaws America xwb.
Sarah Terberville uas yog tus coj ntawm lub koom haum the Constitution Project uas pov puag cov neeg ntiag tug txoj cai raws America tej txhooj cai tswj haiv (Constitution) tau hais tias:
"Kuv xav tias yog tej yam tsis muaj laij thawj thiab tsis tsim nyog ua li no kiag li yog tham raws qhov tseeb lawm. Kuv xav tias tej txhooj cai tswj haiv yeej tau plov meej tseeb lawm tias cov neeg uas yug los yog tuaj xeem ntawm lub teb chaws no muaj cai ua tau pej xeem America lawm. Qhov tus president no tsis muaj cai ua tai yog nyiag los yog tshem tej neeg txoj cai no uas yeej tau teev tseg rau hauv America tej txhooj cai tswj haiv lawm, thiab nws yeej tsis yog ib tug huab tais yuav ua tau li hais no."
Cov uas tsis pom zoo nrog Mr. Trump ho xav txawv tej hais ntawd. Lawv hais tias nqe cai 14th Amendment yeej teev tseg tias tsim nyog pub cov neeg yug thiab xeem tau ntawm teb chaws America ua tau pej xeem America thiab yuav tsum tau pov puag lawv txoj cai thiab lawv tej txiaj ntsim uas tsim nyog tau txais ntawd.
Mr. Trump los kuj tau cam tias tsuas yog tib lub teb chaws America nkaus xwb thiaj pub lwm haiv neeg tej me nyuam yug ntawm teb chaws America ua tau pej xeem rau nws lub teb chaws.
Tab sis raws li tau muaj cov kev teeb txheeb xyoo 2010 dhau los ntawm lub koom haum Centre for Immigration Study cov kev tshawb fawb ces ho txawv qhov mr. Trump hais ntawd. Lub koom haum no qhia tias muaj cov teb chaws yam tsawg li 30 lub teb chaws uas yeej tso cai rau tej me nyuam mus yug rau lawv tej teb chaws muaj cai ua tau pej xeem ntawm lawv cov teb chaws thiab uas yeej muaj cov teb chaws North America li Mixico, US thiab Canada nrog thiab. Tab sis thaum SBS New tau mus txheeb xyuas kom ntxaws ntxiv, ces kuj pom tau tias muaj cvo teb chaws yam tsawg li 40 lub uas tau tso cai rau tej me nyuam yug rau lawv tej teb chaws muaj cai ua tau pej xeem thiab. Tab sis Australia ho txawv cov teb chaws ntawd.
America tus thawj tsav meem (President) Donald Trump tau hais rau US TV Network H.B.O rau lub caij lawv nrog nws tham ntawd tias:
"Yeej muaj neeg hais rau kuv tas mus li tias yuav tsum tau kho nqe cai no. Tab sis peb tsis tas ua li ntawd los yeej tau. Thawj nqe ces peb tsis tas ua li ntawd li. Tsuas yog Congress pom zoo los tsim ib tsab cai xwb ces yeej kho tau xwb. Tab sis tam sim no ho muaj neeg qhia kuv tias kuv yeej muaj peev xwm siv kuv lub fwj chim tam li tus thawj tsav meem (Presidential Executive Power) coj los kho xwb ces daws tau cov teeb meem no lawm."
Yog li ntawd, tam sim no Mr. Trump thiaj tseem tab tob sab laj nrog cov kws lij choj ntawm tsev dawb thiab tej kws lij choj no qhia tias lawv tseem tab tom los txheeb xyuas Mr. Trump cov kev thov kho tsab cai tsis pub tej me nyuam yug ntawm teb chaws America uas lawv niam lawv txiv tsis yog cov neeg mus rau America raug cai thiab tsis yog pej xeem America ntawd ua tau pej xeem America lawm.
Australia los yeej tau kho nws tsab cai pej xeem (Citizenship Legislation Act) rau xyoo1986 lawm thiab. Nws tsuas pub tej me nyuam yug los ntawm ib tug leej niam los yog leej txiv uas yog pej xeem Australia los sis yog tus neeg nyob ruaj (Permanent resident) xwb mas thiaj muaj cai ua tau pej xeem Australia. Tab sis tej me nyuam no yuav tsum tau nyob rau hauv teb chaws Australia no yam tsawg li 10 ntxiv thiab.
Teb chaws India los kuj tau tsis pub cov neeg txawv teb chaws tej me nyuam yug ntawm nws lub teb chaws ua tau pej xeem rau xyoo 2004 lawm thiab. Lub hom phiaj yog xav coj los pab kom txhob muaj cov neeg ntawm teb chaws Bangladesh pheej khiav mus rau teb chaws India ntxiv lawm. Tsuas yog tias cov me nyuam uas nkawm niam txiv ntawd ib tug yuav tsum yog pej xeem India xwb mas thiaj muaj cai ua tau pej xeem India lawm xwb.
Tab sis nyob rau lub caij uas uas America tseem npaj nws cov kev xaiv tsa nrab xyoo no, America tus coj kuj tau hais cov lus ua rau ib txhia neeg tu siab thiab txhawj xeeb kawg nkaus thiab, hais tsis ntsees rau cov me nyuam yug hauv teb chaws America los yog cov neeg ntau txheeb tus uas khiav ntawd cov teb chaws central America uas tseem daig ntawm Mexico uas xav mus rau teb chaws America ntawd.
Tib lub sij hawm no los America pab nom Democrats yeej xav kom nws muaj yeej rau cov rooj nom coob ntxiv tuaj kom nws tswj tau lub tsev keeb theej tswj (Senate) thiab. Yog tias America tej pej xeem ho hloov siab tig mus xaiv pab nom Democrats tiag ces ntshe yuav ua rau tsoom hwv Trump yuav mob tobhau heev thiab yuav ua rau tsoom hwv khuam daig ua tsis tau hauj lwm li tau muaj dhau los. Ces ntshe Donld Trump yuav muab nws tus tsoom hwv sawb lawj thiab yuav tau tsim cov kev xaiv tsa tsoom hwv tshiab los tswj los yog yuav tau siv nws lub fwj chim presidential executive power los lis tej dej num no lawm xwb. Tab sis nws ho puas yuav muaj peev xwm ua tau li no thiab nws ho yuav daws tej teeb meem tsis pub tej me nyuam yug ntawm teb chaws America li tau hais los saum toj no ua pej xeem America li cas.
Yog li ntawd ces ntshe peb tseem yuav pom muaj cov kev sib tawm tsam txog America tej laj fai kum xeeb, tej cai lij choj cuam tshuam txog nws tej hauj lwm tswj cov neeg tsiv teb tsaws chaws no ib ntus ntxiv tom ntej no thiab.
