Tom qab uas Westpac raug Australia lub koom haum Australian Transaction Reports and Analysis Centre (AUSTRAC) liam tias nws lub txhab nyiaj tau nyiam tej cai tsis pub xa tej nyiaj tsis dawb huv li siv coj mus yuam siv tej me nyuam yaus ntawm teb chaws Phillipines los yog xa nyiaj rau tej neeg phem siv txog li 23 roob zaus ntawd. Lub txhab nyiaj Westpac kuj tau tawm los qhia tias nws mam li los hloov nws tus coj tshiab thiab nws pawg tswj tshiab. Tsis tas li no qhov tseem ceeb tshaj ces yuav muaj teeb meem rau tej coj, yuav ua rau AUSTRAC los yog lwm lub koom haum li ASIC thiab APRA los yuav los nrog txheeb xyuas tej teeb meem no, tseem yuav ua rau tej neeg yuav shares ntawm lub txhab nyiaj no nrog rau tej consumers los yog customers tseem yuav coj lub txhab nyiaj no mus txheeb xyuas thiab foob nws tias dag tsis qhia qhov tseeb txog tej teeb meem no rau lawv paub thiab tseem tau nrhiav cov green bond kom tau nyiaj txog li $2 billion yuav coj los qev rau tej lagluam siv los nrog daws cov teeb meem climate change ntawd ntawm New Zealand rau xyoo 2020 no thiab.
Thiaj ua rau Brian Hartzer uas yog Westpac tus coj Chief Executive Officer tawm nws txoj hauj lwm lawm tab sis txawm nws tsis kam yuav cov nyiaj bonus los nws tseem yuav tau cov nyiaj them ib zaug rau nws tag nrho txog li $2.7 million thiab hos tus chair Lindsay Maxted los kuj so hauj lwm ntxov dua lub caij tsim nyog thiab. Westpac pawg coj los kuj tau tawm los qhia tias nws yuav txo tsis pub cov nyiaj bonus ntau rau tej coj ntawm nws lub txhab nyiaj lawm.
Ntxiv ntawd los raws li Business Insider Australia tau qhia, ces yeej tau muaj ib tug neeg ua hauj lwm ntawm lub txhab nyiaj Westpac yeej tau qhia rau tej coj paub txog tej teeb meem no thaum muaj cov kev yuam cai tsis pub xa nyiaj rau tej neeg phem los yog tej neeg coj mus siv tsis dawb huv txog li 6 roob zaus txij xyoo 2017 los ntawd tab sis zoo li tej coj yeej tsis kub siab txog tej teeb meem no li.
Yog li Westpac tej teeb meem no thiaj ua rau muaj ib txhia xav tias tej zaum yuav ua rau muaj teeb meem rau tej coj ntawm ntau cov tuam txhab lagluam uas suav tej tuam txhab nyiaj txiaj nrog tib si tau.
Yog li thiaj ua rau Sydney Morning Herald Sun (SMHS) hais tias tsam Westpac tej teeb meem no yuav ua rau muaj teeb meem rau tsoom coj ntawm tej tuam txhab nyiaj thiab tsoom coj ntawm lwm cov lagluam txhua nrho.
Tab sis raws li tsab ntawv xov xwm SMHS tau tshaj tawm ntxiv ces kuj muaj neeg xav tias tej zaum Westpac yuav raug AUSTRAC nplua nyiaj txog li $1 billion thiab kuj muaj ib tug financial analyst kwv yees tias tej zaum yuav raug nplog txog li $3 billion los kuj tau. Yog li Westpac thiaj yuav tau muag nws cov shares kom pheej yig thiab kom tau nyiaj txog li $500 million coj los them tej nqe nplua no. Txawm li cas los tseem tshuav lub koom haum ASIC tseem yuav los xyuas tias seb puas yog Westpac ua txhaum tsab cai Corporation Act thiab hos APRA los tseem yuav los txheeb xyuas lwm yam teeb meem ntxiv thiab. Ces tej xwm txheej no thiaj yuav ua rau Westpac brand tau lub npe tsis zoo, yuav poob peev txog li 14% rau xyoo 2020 thiab 3% rau xyoo 2021. Tseem yuav raug tsoom hwv Australia, tus treasurer, tej khoom tswj tej cai rau tej lagluam thiab tuam txhab qev nyiaj mus txog rau tej neeg shareholders thiab tej neeg zejzog yuav tsub nias thiab rau txim tau ntxiv rau Wespac ntxiv thiab.
