Xov xwm luv tshaj tawm hnub zwj Feej (Wednesday news 13.08.2025):
Yog lwm pab nom teb chaws tau ua nom ces nws yuav tsis lees paub teb chaws Palestine
Sussan Ley uas yog tus coj ntawm lwm pab nom teb chaws tau rov qab teev txog nws pab nom cov kev cog lus tias yuav thim tsis lees paub teb chaws Palestine yog tias nws pab nom tau los ua nom (tau los ua tsoom fwv teb chaws tshiab). (Rau qhov nws cav tias yog cov kev tsis hwm cov kev sib raug zoo ntawm Australia thiab Meskas, thiab yuav ua rau muaj teeb meem rau cov kev tsim kev thaj yeeb los yog cov kev sib khom uas Meskas ua tus txwj laug).
Australia tus coj tej ncauj lus txog cheeb tsam Middle East
Thawj pwm tsav Anthony Albanese hais tias Israel cov kev txwv tsis pub xa zaub mov mus pab tej neeg Palestinians uas tab tom yuav tuag tshaib ntawm Gaza yog ib co kev ua txhaum zejzog pej kum haiv cai. Australia kuj yog ib lub teb chaws ntawm 29 lub uas tau koom hais ib co ncauj lug sau ua ntaub ntawv nqua hu kom Israel cia li tso cai xa tej khoom pab cuam cou mus pab Gaza kom sai.
Sudan nqua hu kom Australia nws tej xwm txheej tshaib nqhis
Ahmed Abdelatif uas yog Sudan tus nom ntawm Canberra tau nqua hu kom tsoom fwv Albanese pab cuam ntau tuaj ntxiv kom thiaj daws tau ntiaj teb cov xwm txheej tshiab nqhis loj tshaj plaws thiab ua rau tej neeg tawg ua sab ua sua rau lub caij muaj tsov rog pej xeem 2 xyoos.
Nqua hu kom ua hauj lwm tsawg hnub
Lub koom haum Australian Council of Trade Unions (ACTU) uas yog lub sawv cev rau tej neeg ua hauj lwm hais tias nws yeej xav nqua hu kom tej neeg tsuas mus ua hauj lwm 4 hnub ntawm ib limtiam rau lub caij yuav muaj lub rooj sab laj economic summit limtiam ntxiv tom ntej no. Vim nws cav tias yuav pab kom tej neeg ua hauj lwm tau txiaj ntsim los ntawm cov kev ua tau luam zoo thiab tej technology vam meej.
Txo kab theem paj thiab tej vaj tse
Australia tej hlus tseem tab tom xav tias seb yuav tau txiaj ntsim los yog yuav ntsib teeb meem dab tsi los ntawm Reserve Bank of Australia (RBA) cov kev txo kab theem pajrau lub ciaj tej nqe tsev kim heev uas lawv tsis muaj peev xwm yuav. RBA tau txo kab theem paj 0.25 feem pua ntawm 3.85 feem pua mus ua 3.6 feem puaces thiaj ua rau muaj tej neeg qev nyiaj yuav tsev cia siab tias tej zaum yuav txo kab theem paj ntau zaus ntxiv rau ntau hli ntxiv no.
Tej nyiaj tsam uas txhab nyiaj khwv tau
Lub txhab nyiaj Commonwealth Bank of Australia (CBA) hais tias tej kab theem paj, tej kev txo se thiab tus kab theem nyiaj poob nqe qes zog tau ua rau tej cuab yig muaj nyiaj ntau zog siv tom qab nws qhia tias nws khwv tau nyiaj financial year 2024-25 tau txog $10.3 billion tau ntau dua tsaib ub li 4 feem pua.
Tub ceev xwm xua phom tua ib tug neeg ntawm Sydney Airport
Tau muaj ib tug neeg dua kev tau pab tub ceev xwm txhom ib tug txiv neej ntawm Sydney Aiport Terminal 2 tau piv txog lub caij uas ib tug tub ceev xwm rab phom huam yuaj rau lub caij tseem txhom tus txiv neej ntawd. Txawm li cas los Sydney Airport hais tias tsis muaj neeg raug mob li cas thiab lub tshav dav hlau no tseem ua hauj lwm li qub txuas ntxiv tom qab txhom tau tus tsiv neej no lawm.
Xov xwm ntawm cheeb tsam Southeast Asia
Australia thiab cob tsib tau pom zoo koom tes sab tub rog rau lub caij 3 xyoos mus txog rau xyoo 2027 rau ntau yam hauj lwm li sib pauv hloov tej tub rog, koom tes rau cov kev kho mob, tej lagluam cuab yeej cuab tam tsov rog, kev tswj ciam teb thiab daws tej teeb meem cuam tshuam txog tsov rog dhau los.
Nplog npaj yuav xa ntau pua tonnes txig Durian coj mus muag txawv teb chaws rau xyoo 2026, uas feem ntau yog muag rau Suav tuam tshoj.
Tau muaj Thaib tej tub rog ib tug kis hais tias yuav tsis zam rau Cambodia ntxiv lawm thiab yuav siv riam phom muas txwv loj sib tua nrog Cambodia lawm tom qab tau muaj Thaib ib co tub rog zov nyas tsuj tau mee. Thiab hais tias cov kev sib tham nrog Cambodia tsi tau txiaj ntsim dab tsi rau Thaib.
Mloog tau xov xwm ntxiv ntawm SBS Hmong lub vas sab, download SBS Adio app thiab caum SBS Hmong Facebook page.
