တၢ်ကလုၢ်တဖၣ်: https://www.sbs.com.au/language/ karen/ kar/collection/podcast/0ms9u5vjn
ဖဲ ၂ဝ၂၅နံၣ်အဂီၢ်န့ၣ် Phan Foundation ဃုထၢဟ့ၣ်လီၤဝဲ, ၂ဝ၂၅ ပဒိၣ်မါရှၤသးစၢ်ခိၣ်နၢ်တၢ်လၤကပီၤ—2025 Padoh Mahn Sha Young Leader Award အံၤဆူ ပဒိၣ်နီၣ်လွဲထူစ့ လၢအသးနံၣ်အိၣ် ၃၃နံၣ်, လၢအမ့ၢ် ကညီဒီကလုာ်စၢဖှိၣ်ကရၢသဲစးဝဲၤကျိၤခိၣ် ဒီးမ့ၢ်စ့ၢ်ကီး ကညီတၢ်ဆီၣ်ထွဲမၤစၢၤသဲစးဝဲၤလီၢ် ပှၤပၢဆှၢရဲၣ်ကျဲၤတၢ်အခိၣ်တဂၤန့ၣ်လီၤ. အဝဲဖျိထီၣ်ဖၠၣ်စိမိၤကၠိဒီးသဲစးဂ့ၢ်ဝီဝံၤအလီၢ်ခံ ဟဲနုာ်လီၤမၤသကိးတၢ်ဖဲကညီတၢ်ပၢၢ်ဆၢအပူၤန့ၣ်လီၤ.
ဘၣ်ဃးဒီးတၢ်ဒိးန့ၢ်ဘၣ် ခိၣ်ဖးတၢ်လၤကပီၤအံၤန့ၣ် နီၣ်လွဲထူစ့ အတၢ်တူၢ်ခီၣ်ပာ်သးအိၣ်ဒ်လဲၣ် ဒီး ဒ်ပိာ်မုၣ်သးစၢ်တဂၤအသိး ဘၣ်တီခိၣ်ရိၤမဲတၢ်ဖဲ သဲစးဝဲၤကျိၤအပူၤန့ၣ် တၢ်တာ်တၢ်သ့ၣ်တဖၣ်အိၣ်ဒီးအီၤဒ်လဲၣ်, ဒီး ခဲကနံၣ်အံၤ အဝဲမူဒါတၢ်ဖံးတၢ်မၤအဂ့ၢ်အကျိၤသ့ၣ်တဖၣ်န့ၣ် SBS ကညီကျိာ်တၢ်ရဲၣ်တၢ်ကျဲၤ, ရှါဖီၤ ဆဲးကျိးသံကွၢ်ဝဲအီၤန့ၣ်လီၤ.
Phan Foundation ဟ့ၣ်လီၤဝဲဒၣ်ခိၣ်ဖးအံၤဆူ နီၣ်လွဲထူစ့အနီၣ်ကစၢ်အစုပူၤ ဖဲ ၂ဝ၂၆နံၣ် လါယနူၤအါရံၤ ၃၁ အသီ, ကညီတၢ်ပၢၢ်ဆၢအမုၢ်နံၤန့ၣ်လီၤ.
ပဒိၣ်မါရှၤသးစၢ်ခိၣ်နၢ်တၢ်လၤကပီၤအံၤ ဘၣ်တၢ်ဒုးအိၣ်ထီၣ်အီၤ လၢအဖိသ့ၣ်တဖၣ် ဒ်သိးလၢအမ့ၢ် တၢ်ဟ့ၣ်လၤကပီၤအဝဲသ့ၣ်အမိၢ်အပၢ်အသိးန့ၣ်လီၤ.
ဖဲ ၂ဝဝ၈နံၣ်န့ၣ် ခီဖျိလၢ ဒုၣ်ဒါအတၢ်ဂီၤစုဂီၤခီၣ်ဒီး တၢ်ကူၣ်အၢအဃိ ပဒိၣ်မါရှါ ဘၣ်တၢ်ခးသံကွံာ်အီၤဖဲအဝဲအဟံၣ်လၢအအိၣ်ဖဲဝ့ၢ်မဲၢ်ဆီး,ကၠီၣ်တဲၣ်ကီၢ်အပူၤန့ၣ်လီၤ.
ဖဲန့ၣ်အလီၢ်ခံ အဖိလၢအအိၣ်လီၤတဲာ်တ့ၢ်သ့ၣ်တဖၣ် ဒုးအိၣ်ထီၣ်ဝဲ Phan Foundation တၢ်ကရၢကရိအံၤဒီး ဟ့ၣ်လၤကပီၤဝဲဒၣ် ကညီသးစၢ် လၢအဟ့ၣ်လီၤသးမၤတၢ်ဖဲကညီတဝၢအပူၤ သ့ၣ်တဖၣ်ကိးနံၣ်ဒဲး လၢအပၣ်ဃုာ်ဒီးကျိၣ်စ့တၢ်ဆီၣ်ထွဲမၤစၢၤ, ခဲအံၤ ထီၣ်ဘးတုၤလၢ ဒီလၣ် ၅,ဝဝဝ န့ၣ်လီၤ.
