တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
အီစထြ့လယါကီၢ်ပူၤအံၤ Harmony Week — ဟါမိနံအနွံန့ၣ်ဘၣ်တၢ်နၢ်ပၢၢ်အီၤဒ်အမ့ၢ်တၢ်အိၣ်ဆိးပှဲၤဒီးတၢ်အဲၣ်တၢ်ကွံတၢ်မုာ်တၢ်ခုၣ်အနွံ အဃိ ကလုာ်ဒူၣ်ဆဲးလၤအါကလုာ် ဃုာ်ဒီးကညီဖိ လၢအဟဲတုၤအိၣ်ဆိးဖဲအီစထြ့လယါကီၢ်ပူၤခဲလၢာ် မၤလၤကပီၤဝဲနွံအံၤ ဒ်အမ့ၢ်တၢ်ပာ်ဖျါထီၣ် တၢ်ပာ်ပနီၣ် နၢ်ပၢၢ်လိာ်သး, တၢ်အဲၣ်လိာ်ကွံလိာ်သးဒီး အိၣ်ဆိးပှဲၤဒီးတၢ်မုာ်တၢ်ခုၣ်တပူၤဃီဖဲထံကီၢ်အံၤအပူၤန့ၣ်လီၤ.
ဖဲ Harmony Week — ဟါမိနံအနွံအံၤ ကလုာ်ဒူၣ်ဆဲးကလာ်အါကလုာ်ဃုာ်ဒီးကညီဖိဒီးကလုာ်ဒူၣ်လၢအဟဲန့ၢ်လၢကီၢ်ပယီၤအပူၤသ့ၣ်တဖၣ် မၤလၤကပီၤစ့ၢ်ကီးဝဲမုၢ်နံၤအံၤန့ၣ်လီၤ.
တနံၣ်အံၤ ၂ဝ၂၅နံၣ် န့ၣ်မ့ၢ်ဝဲ ကညီဖိလၢအလဲၤသုးအိၣ်ဆိးဖဲ အါရၤရဲၣ်ဝ့ၢ်ဖိအပူၤသ့ၣ်တဖၣ် တၢ်မၤလၤကပီၤ ဟါမိနံအနွံ ခံဘျီတဘျီန့ၣ်လီၤ.
ခိခိၣ်ဟီၣ်ကဝီၤတၢ်ဖံးတၢ်မၤဖဲအါရၤရဲၣ် တၢ်တိၤကျဲၤမူဒါခိၣ်, Ko Yeh Talor, တဲဘၣ်ဝဲအဲးစ်ဘံအဲးစ်ကညီကျိာ်တၢ်ရဲၣ်တၢ်ကျဲၤ လၢတနံၣ်အံၤ အဝဲသ့ၣ်တၢ်ပၣ်ဃုာ်မၤသကိးတၢ်ဖဲဟါမိနံအနွံန့ၣ်လီၤ.
ကညီဖိအတၢ်လဲၤသုးလီၢ်အိၣ်ဆိးဖဲအါရၤရဲၣ်ဝ့ၢ်ဖိအံၤ စးထီၣ်ဝဲဒၣ်ဖဲ ၂ဝ၂၂နံၣ် လၢအမ့ၢ်ပဒိၣ်တၢ်ရဲၣ်တၢ်ကျဲၤတခါ လၢတၢ်မၤလဲၤထီၣ်လဲၤထီ ခိခိၣ်ဟီၣ်ကဝီၤတၢ်ဖံးတၢ်မၤဒီး ဟ့ၣ်လီၤတၢ်ဖံးတၢ်မၤအတၢ်ခွဲးတၢ်ယာ်လၢ ကညီဖိသ့ၣ်တဖၣ်အဂီၢ်န့ၣ်လီၤ.
တၢ်မၤလၤကပီၤ Harmony Week — ဟါမိနံအနွံန့ၣ် ဘၣ်တၢ်စးထီၣ်အီၤဖဲ ၁၉၉၉နံၣ် လၢအဘၣ်တၢ်မၤလၤကပီၤအီၤသကုၤအီစထြ့လယါကီၢ်ဒီဘ့ၣ်အပူၤန့ၣ်လီၤ.
တၢ်လီၢ်လၢတၢ်မၤလၤကပီၤဟါမိနံအနွံသ့ၣ်တဖၣ်န့ၣ် မ့ၢ်ဝဲဒၣ်ဒ်သိး တၢ်အံးထွဲကွၢ်ထွဲ ဖိဒံဖိသၣ်ဝဲၤလီၢ်သ့ၣ်တဖၣ်, ကၠိသ့ၣ်တဖၣ်, ပှၤတဝၢကရူၢ်သ့ၣ်တဖၣ်, တၢ်ဘါသရိာ်သ့ၣ်တဖၣ်, တၢ်ဖံးတၢ်မၤအလီၢ်သ့ၣ်တဖၣ် ဃုာ်ဒီး ကီၢ်စၢဖှိၣ်, ကီၢ်စဲၣ်ဒီး လီၢ်ကဝီၤပဒိၣ်ဝဲၤကျိၤတၢ်ဖံးတၢ်မၤအလီၢ်သ့ၣ်တဖၣ်န့ၣ်လီၤ.
Harmony Week — ဟါမိနံအနွံန့ၣ် မ့ၢ်တၢ်ဆၢကတီၢ်တခါလၢ တၢ်မၤလၤကပီၤဝဲ အီစထြ့လယါကီၢ် မ့ၢ်ထံကီၢ်တဘ့ၣ်လၢ အအိၣ်ဒီးကလုာ်ဒူၣ်ဆဲးလၤအါကလုာ်သနူ လၢပှဲၤထီၣ်ဘးအဂ့ၤကတၢၢ်ဖဲဟီၣ်ခိၣ်ဒီဖျၢၣ်အပူၤန့ၣ်လီၤ. မ့ၢ်တၢ်ဆၢကတီၢ်လၢအဘၣ်ဃး ပှၤကိးဂၤဒဲးပၣ်ဃုာ်မၤသကိးတၢ်, အိၣ်ဒီးတၢ်ယူၤယီၣ်ပာ်ကဲလိာ်သးဒီး လုၢ်လၢ်ဆဲးလၤ မ့တမ့ၢ် တၢ်ကတိၤကျိာ် မ့တမ့ၢ် အထူအထံး သ့ၣ်တဖၣ်မ့ၢ်လီၤဆီလိာ်အသးဘၣ်ဆၣ် မ့ၢ်ဝဲတၢ်လၢဘၣ်ထွဲလိာ်အသးဒီးပှၤအီစထြ့လယါဖိခဲလၢာ် လၢအအိၣ်ဃူအိၣ်ဖှိး ပှဲၤဒီးအီစထြ့လယါထံဖိကီၢ်ဖိအလုၢ်အပှ့ၤန့ၣ်လီၤ.
ဖဲထံလီၢ်ကီၢ်ပူၤဂ့ၢ်ဝီဝဲၤကျိၤအလီပှာ်ယဲၤသန့အပူၤန့ၣ် ပာ်ဖျါဝဲလၢ တနံၣ်အံၤ Harmony Week — ဟါမိနံအနွံန့ၣ် လီၤဘၣ်ဝဲဒၣ်ဖဲလါမးရှး ၁၇ သီတုၤလၢ လါမးရှး ၂၃သီန့ၣ်လီၤ.
တၢ်အံၤပၣ်ဃုာ်စ့ၢ်ကီးဒီးတၢ်မၤလၤကပီၤ Elimination of Racial Discrimination (IDERD) အမုၢ်နံၤ လၢအလီၤဘၣ်ဝဲဒၣ်ဖဲလါမးရှး ၂၁သီအနံၤ ဒီးမ့ၢ်ဝဲမုၢ်နံၤတနံၤလၢဘီမုၢ်စၢဖှိၣ်ကရၢ ပာ်ပနီၣ်အီၤန့ၣ်လီၤ.
ဖဲအီစထြ့လယါကီၢ်ပူၤအံၤ တၢ်မၤလၤကပီၤ Harmony Week — ဟါမိနံအနွံ န့ၣ်ဘၣ်တၢ်တီခိၣ်ရိၤမဲစးထီၣ်မၤအီၤလၢ ထံလီၢ်ကီၢ်ပူၤဂ့ၢ်ဝီဝဲၤကျိၤ ဒီး လီၤကဒါက့ၤ တဆီဘၣ်တဆီဆူ လီၢ်ကဝီၤအပတီၢ်, ကၠိ, တၢ်ကရၢကရိ ဒီး ပှၤတဝၢကရူၢ်ကရၢ တဖုစုာ်စုာ် ပာ်ဖှိၣ်မၤလၤကပီၤအီၤန့ၣ်လီၤ.
တၢ်အလွဲၢ်လၢအမ့ၢ် တဃ့ၢ်(သၣ်) အလွဲၢ်န့ၣ် တၢ်ပာ်ပနီၣ်အီၤဒ်အမ့ၢ် Harmony Week — ဟါမိနံအနွံ ခၢၣ်စးအလွဲၢ်န့ၣ်လီၤ. တၢ်လၢ တဃ့ၢ်အလွဲၢ်န့ၣ် မ့ၢ်တၢ်ပာ်ဖျါဝဲ ပှၤဂ့ၢ်ဝီအတၢ်ဆဲးကျိးဒီး တၢ်တဲသကိးလၢအအိၣ်လၢပှဲၤဒီးအခီပညီန့ၣ်လီၤ. မ့ၢ်စ့ၢ်ကီး အလွဲၢ်တခါလၢအဘၣ်ဃးဒီး တၢ်ထံၣ်လၢအပှဲၤဒီးတၢ်ဘျ့ဒီး မ့ၢ်တၢ်ဟ့ၣ်ဂံၢ်ဟ့ၣ် တဂၤဒီးတဂၤ အတၢ်ပာ်ကဲလိာ်သးန့ၣ်လီၤ. ပှၤအီစထြ့လယါဖိသ့ၣ်တဖၣ် ဖဲဟါမိနံအနွံန့ၣ် အဝဲသ့ၣ် ကူသိးဝဲတၢ်တခါခါလၢအအိၣ်ဒီး တဃ့ၢ်အလွဲၢ် ဒ်သိးတၢ်ပာ်ဖျါထီၣ် အဝဲသ့ၣ်တၢ်ဆီၣ်ထွဲ လၢတၢ်ဆဲးတၢ်လၤလီၤဆီလိာ်သးအါကလုာ်ဒီး ပှၤကိးဂၤဒဲးအိၣ်ဆိးတပူၤဃီဖဲအီစထြ့လယါကီၢ်ပူၤအံၤန့ၣ်လီၤ.
မုၢ်နံၤဆၢကတီၢ်အံၤ ကညီဖိလၢအအိၣ်ဆိးဖဲအီစထြ့လယါကီၢ်ပူၤ တၢ်လီၢ်အဂုၤအဂၤသ့ၣ်တဖၣ်, ဃုာ်ဒီး မဲလ်ဘၢဝ့ၢ်ပူၤသ့ၣ်တဖၣ် မၤလၤကပီၤသကိးဝဲဒၣ် ဟါမိနံအနွံ ဒီး ပာ်ဖျါထီၣ်ဝဲ ကညီဖိကူကၤဆဲးလၤဒီး တၢ်ဂဲၤကလံၣ်သ့ၣ်တဖၣ် ဃုာ်ဒီး တၢ်ဟ့ၣ်နီၤအီၣ်သကိး ကညီဖိတၢ်အီၣ်တၢ်အီသ့ၣ်တဖၣ်န့ၣ်လီၤ.
ဖဲတၢ်မၤလၤကပီၤသကိး ဟါမိနံအနွံအကဆၢကတီၢ်အံၤ ကိၣ်ရဲ ဟ့ၣ်ဂံၢ်ဟ့ၣ်ဘါဒီးကွဲမုာ်စ့ၢ်ကီးဝဲ ကညီဖိသ့ၣ်တဖၣ် လၢအလဲၤဃုဖံးဃုမၤတၢ်ဖဲ အါရၤရဲၣ်ဝ့ၢ်ဖိအပူၤအံၤန့ၣ်လီၤ.
ကိၣ်ရဲစံးစ့ၢ်ကီးဝဲဒၣ်လၢ တယံၤလၢၤဘၣ်န့ၣ်တၢ်ဖံးတၢ်မၤအသီကအိၣ်ထီၣ်ကဒီးတခါန့ၣ်လီၤ.
အါရၤရဲၣ်ဝ့ၢ်ဖိအံၤ အိၣ်ဆီလီၤအသးဖဲဝံးထိရံယါမုၢ်နုာ် လၢအစီၤစုၤယံၤဒီး မဲလ်ဘၢဝ့ၢ် ကံလိမံထၢၣ် ၂ဝဝဘျဲၣ်န့ၣ်လီၤ ဖဲ ၂ဝ၂၁နံၣ် တၢ်ဃုထၢပာ်ဖှိၣ်ထံဖိကီၢ်ဖိနီၣ်ဂံၢ်စရီအပူၤန့ၣ် ဝ့ၢ်ဖိအံၤ ပှၤကညီအနီၣ်ဂံၢ်နီၣ်ဒွးအိၣ်ဝဲ ၁၁,၈၈ဝ ဂၤန့ၣ်လီၤ.
