ဖဲအးကၠ့းထံနါ ဒီး အံးကၠ့ၣ် ဖျၢၣ်ထူကရူၢ်သ့ၣ်တဖၣ် အတၢ်ပြၢလိာ်သးအပူၤန့ၣ် အးကၠ့းထံနါကရူၢ် အဂံၢ်ဟဲက့ၤဆူၣ်ထီၣ်ကဒါက့ၤဒီးမၤနၢၤဝဲတၢ်ပြၢ, ဆွံစလဲဒီး ခိးလးဘံးယး ဖျၢၣ်ထူကရူၢ်တၢ်ပြၢအပူၤ ဆွံစလဲကရူၢ် မၤနၢၤတၢ်လၢ တၢ်ထူဖဲးလ်နၢၤတံၤ ဝံၤအလီၢ်ခံ, ခဲကနံၣ်အံၤ World Cup တၢ်ပြၢအပတီၢ်န့ၣ် တုၤလီၤဝဲဒၣ်ဆူ ကွးတါဖဲးလ်နၢၤပတီၢ်လံန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၂၇ သီတသီ တၢ်ပာ်ဖျါအဘိၣ်န့ၣ်လီၤ.
———
ပှၤကွၢ်ကီဟ့ၣ်ဂံၢ်ဟ့ၣ်ဘါဖျၢၣ်ထူတၢ်လိာ်ကွဲပြၢဖဲ Atlanta Stadium ပျီမုၢ်အပူၤသ့ၣ်တဖၣ် ကွၢ်ကီဝဲဒၣ် ပှၤဒီသဒၢ ခၠၣ်ပံယၣ် အးကၠ့းထံနါ ဖျၢၣ်ထူကရူၢ် ဒီး အံးကၠ့ၣ် ဖျၢၣ်ထူကရူၢ် အတၢ်လိာ်ကွဲပြၢ, ဒီးမ့ၢ်ဝဲဒၣ် အံးကၠ့ၣ်ကရူၢ် တၢ်ထီၣ်လိာ်ကွဲဘၣ်ဖဲ World Cup ၁၆ကရူၢ် တၢ်လိာ်ကွဲပြၢ အပတီၢ် အဆိကတၢၢ်တဘျီန့ၣ်လီၤ.
ဖဲလၢ ပှၤဖီၣ်ကိ Mostafa Ahmed Shobeir ဖီၣ်ဝဲဒၣ် Lionel Messi အတၢ်ထူ ဖဲးလ်နၢၤတံၤ န့ၢ်ဝံၤအလီၢ်ခံ, အံးကၠ့ၣ်အပှၤဖျၢၣ်ထူဖိ Yasser Ibrahim ဒီး Mostafa Ziko ထူနုာ်လီၤဝဲကိ ၂—ဝဖျၢၣ်အဃိ တၢ်အိၣ်သးအိၣ်ဖျါလၢ အံးကၠ့ၣ်ကရူၢ်အံၤ ကမၤသးအုးဝဲဒၣ် ဖျၢၣ်ထူကရူၢ်လၢအမံၤဟူသၣ်ဖျါတဖုအံၤန့ၣ်လီၤ.
ဘၣ်ဆၣ်သနာ်က့ အးကၠ့းထံနါ ဖျၢၣ်ထူကရူၢ်အံၤ အဂံၢ်ဟဲက့ၤဆူၣ်ထီၣ်ကဒါက့ၤ လၢအပှဲၤဒီးတၢ်လီၤကမၢကမၣ်န့ၣ်လီၤ. ဖဲတၢ်လိာ်ကွဲပြၢတုၤလီၤ ၇၉ မံးနံးန့ၣ် အပှၤလိာ်ကွဲဖိ Cristian Romero ထံးနုာ်လီၤဝဲဒၣ်ကိဒီးအခိၣ်သၣ်ဃံတဖျၢၣ်, ဒီးလွံၢ်မံးနံးဝံၤအလီၢ်ခံန့ၣ် Messi ထူနုာ်လီၤကဒီးကိတဖျၢၣ် အဃိပှၤပြၢလိာ်သးခံဖုအံၤ ဒိးန့ၢ်ဘၣ်ဝဲကိအဖျၢၣ်ပှဲၤသိးလိာ်အသးနာ်သက့ ဖဲတယံၤတမီၢ်န့ၣ် အးကၠ့းထံနါပှၤလိာ်ကွဲဖိ Enzo Fernández ထံးနုာ်လီၤကဒီးကိဒီးအခိၣ်သၣ်ဃံတဖျၢၣ်အဃိ မၤနၢၤဝဲဒတၢ်ပြၢအံၤဒီး ၃—၂ ကိ, လၢ အးကၠ့းထံနါ န့ၢ်ဘၣ်ဝဲတၢ်လီၢ်ဖဲ ကွးတါဖဲးလ်နၢၤအပတီၢ်န့ၣ်လီၤ.
ဂါနး ထံဂုၤကီၢ်ဂၤ အပှၤလီၢ်လံၤ Kevin-Prince Boateng စံးဝဲဒၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲတဘျီအံၤအပူၤန့ၣ် အးဖြံးကး ထံကီၢ်သ့ၣ်တဖၣ် အတၢ်ဒိဘၣ်အိၣ်ဝဲဒိၣ်ဒိၣ်မုၢ်မုၢ်, ဘၣ်ဆၣ်သနာ်က့ အဝဲနာ်လၢ ဖဲအတုၤထီၣ်ဖဲ တၢ်ထူပြၢ ရှူဟးထီၣ်အပတီၢ်န့ၣ်, တၢ်လဲၤခီဖျိဒီး တၢ်အိၣ်ဂၢၢ်အိၣ်ကျၢၤန့ၣ် မ့ၢ်ဝဲတၢ်ဒုးအိၣ်ထီၣ်တၢ်ဆၢတဲာ်ဖဲ တၢ်လိာ်ကွဲပြၢတဘျီအံၤအပူၤန့ၣ်လီၤ.
“ယမ့ၢ်ဘၣ်တဲအီၤယိယိတီတီန့ၣ် တၢ်အံၤကဲထီၣ်တ့ၢ်အသးဖဲတၢ်ပြၢဒီတကတီၢ်အပူၤန့ၣ်လီၤ. အးဖြံးကးကရူၢ်သ့ၣ်တဖၣ်န့ၣ် အဝဲသ့ၣ်လိာ်ကွဲဂ့ၤမး, ဒီး ဖဲတၢ်ပြၢတဘျီအံၤအပူၤန့ၣ် အဝဲသ့ၣ်အကံၢ်အစီထီၣ်ဘးဒီး ပၣ်ဝဲဒၣ်အဖု ၁ဝ. ဘၣ်ဆၣ်သနာ်က့ တၢ်အရ့ဒိၣ်န့ၣ်မ့ၢ်ဝဲ နကဘၣ်မၤဝံၤဝဲဒၣ်တၢ်ပြၢအံၤ ဒ်သိးဒီးနစးထီၣ်တ့ၢ်အီၤအသိးန့ၣ်လီၤ. ဒီးတၢ်အံၤမ့ၢ်ဝဲ ကရူၢ်သ့ၣ်တဖၣ်အံၤအတၢ်လီၤဆီန့ၣ်လီၤ. အဝဲသ့ၣ်န့ၣ်အသူၣ်လီသးလီတၢ်. အးကၠ့းထံနါအံၤ, ဘၣ်ဟ့ၣ်လီၤကွံာ်ဝဲဒၣ် ၂—ဝကိဒၣ်လဲာ်န့ၣ်, အဝဲသ့ၣ်န့ၣ် အတဟ့ၣ်ဃၣ်ကွံာ်အသးနီတဘျီဘၣ်.”
———
မ့မ့ၢ်လၢ Vancouver ခီတကပၤန့ၣ်, ဒ်သိးဒီး World Cup တၢ်လိာ်ကွဲပြၢအလီၢ်ခံကတၢၢ်တခါအသိး ဆွံစလဲဒီး ခိးလးဘံးယး ထူပြၢလိာ်အသးလၢကန့ၢ်ဘၣ်ဝဲ ကွးတါဖဲးလ်နၢၤ အပတီၢ် တၢ်လီၢ်လၢခံကတၢၢ်တခါအဂီၢ်န့ၣ်လီၤ.
အဝဲသ့ၣ်ခံကပၤလၢၤအံၤလိၣ်ကွဲဝဲဒၣ် အမံးနံး ၁၂ဝ ဝံၤဒၣ်လဲာ်န့ၣ် တမၤနၢၤလိာ်သးနီတခီဘၣ်, အဃိန့ၣ် ဘၣ်ထူက့ၤဝဲဒၣ် ဖဲးလ်နၢၤတံၤန့ၣ်လီၤ.
နီၣ်နီၣ်တခီ ဆွံစလဲခီတက့န့ၣ် အပှၤလိာ်ကွဲဖျၢၣ်ထူလၢအဂ့ၤတဂၤ, Johan Manzambi, ဘၣ်ဒိအဃိ အတနုာ်လီၤလိာ်ကွဲဘၣ်ဖဲတၢ်ပြၢအံၤအပူၤဘၣ်ဒီး ခိးလးဘံးယးအံၤ အိၣ်ဒီးတၢ်ခွဲးတၢ်ယာ်ဂ့ၤဒိၣ်နာ်သက့ တမၤန့ၢ်တၢ်ဘၣ်.
ဆွံစလဲ အပှၤဖီၣ်ကိ Gregor Kobel ဖီၣ်ဖဲးလ်နၢၤတံၤချုးဝဲဒၣ်တဖျၢၣ်ဒီး Rubén Vargas ထူနုာ်လီၤကဒါကဒီး ဖဲးလ်နၢၤတံၤတဖျၢၣ်အဃိ အဝဲသ့ၣ်မၤနၢၤဝဲဒၣ်ဒီး ၄—၃ကိန့ၣ်လီၤ.
တၢ်အဆၢအံၤ ဆှၢဝဲဒၣ် ဆွံစလဲဆူ ကွးတါဖဲးလ်နၢၤအပတီၢ်, ဒီးစးထီၣ်လၢ ၁၉၅၄နံၣ် အဝဲသ့ၣ်ကဲဘၣ် World Cup ဟံၣ်ကစၢ်ဝံၤအလီၢ်ခံန့ၣ် တၢ်လဲၤထီၣ်ဘၣ်ဆူ ကွးတါ အပတီၢ်ခဲအံၤန့ၣ် မ့ၢ်ဝဲဒၣ်တၢ်အဆိကတၢၢ်တဘျီလၢအဝဲသ့ၣ်အဂီၢ်န့ၣ်လီၤ. ဖဲပတီၢ်အံၤန့ၣ် ဆွံစလဲ ကဘၣ်တိနိၣ်လိာ်အသးဒီး ပှၤဒီသဒၢ ခၠၣ်ပံၣ်ယၣ် အးကၠ့းထံနါ ဖျၢၣ်ထူကရူၢ်န့ၣ်လီၤ.
———
တၢ်လိာ်ကွဲပြၢ ၉၆ဘျီဝံၤအလီၢ်ခံ, FIFA World Cup တၢ်ပြၢအံၤ တုၤလီၤဝဲဒၣ်ဖဲ ဖျၢၣ်ထူကရူၢ်အိၣ်တ့ၢ်က့ၤထဲဃိးဖုလၢအမ့ၢ်: ဖြၣ်စ့ၣ်, မီးရကိၤ, စပ့ၣ်, Belgium, နီၤဝ့, England, အးကၠ့းထံနါ ဒီး ဆွံစလဲန့ၣ်လီၤ.
အခဲအံၤန့ၣ် တၢ်ပြၢအံၤ ဟံးန့ၢ်ဝဲဒၣ် တၢ်အိၣ်ဘှံးအဆိကတၢၢ်တသီ, ဒ်သိးလၢအမ့ၢ် တၢ်ဟ့ၣ်လီၤတၢ်ဆၢကတီၢ်လၢ ကရူၢ်အိၣ်တ့ၢ်သ့ၣ်တဖၣ် ကအိၣ်ဘှံးအိၣ်သါဘၣ်ဒီး ကတဲာ်ကတီၤထီၣ်က့ၤသးလၢ ကွးတါဖဲးလ်နၢၤ အပတီၢ် တၢ်ပြၢ အဂီၢ်န့ၣ်လီၤ.
ဖဲတၢ်ပြၢစးထီၣ်ကဒါက့ၤ မုၢ်ဖီဖး—မုၢ်ယဲၢ်နံၤ ဂီၤခီန့ၣ်, ဖြၣ်စ့ၣ်ဖျၢၣ်ထူကရူၢ် ကဘၣ်ထူဒီးမီးရကိၤ ဒီးအကစးထီၣ်ထူဝဲဒၣ်ဖဲမုၢ်ထီၣ်နီၣ်ထိၣ် ဂီၤခီ ၆နၣ်ရံၣ် နာ်သက့ SBS ဒီး SBS On Demand ကစးထီၣ်ဒုးနဲၣ်အီၤဖဲဂီၤခီ ၅နၣ်ရံၣ် တခီန့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၂၇ သီအနံၤအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
