အးကၠ့းထံနါ မၤနၢၤဝဲဒၣ် အဲကလံး ဖျၢၣ်ထူကရူၢ် ဒီး ၂—၁ ကိ, လၢ Lionel Messi ပာ်ဖျါထီၣ်ဘၣ်အတၢ်သ့တၢ်ဘၣ်လီၤဆီသ့ၣ်တဖၣ် ဒီး န့ၢ်ဘၣ်ဝဲတၢ်လီၢ်ဖဲ ဖဲးနၢၤ—တၢ်ပြၢလၢခံကတၢၢ်အပတီၢ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၃၅သီတသီတၢ်ပာ်ဖျါအဘိၣ်န့ၣ်လီၤ.
———
ပှၤဒီသဒၢ ခၠၣ်ပံၣ်ယၣ် — ပှၤဖျိးစိ Argentina ပာ်ဖှိၣ်ထီၣ်အသးဒီးထူပြၢလိာ်အသးဒီး အဲကလံး ဖျၢၣ်ထူကရူၢ် ဒီးမၤနၢၤဝဲဒၣ် ၂—၁ ကိ ဒီးဒိးန့ၢ်ဘၣ်ဝဲ တၢ်လီၢ်ဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲ—World Cup တၢ်ပြၢလၢခံကတၢၢ် အပတီၢ် လၢကဘၣ်တိနိၣ်လိာ်အသးဒီး စပ့ၣ်ဖျၢၣ်ထူကရူၢ်န့ၣ်လီၤ.
တၢ်လိာ်ကွဲပြၢ တၢတကူာ်အပူၤန့ၣ် တန့ၢ်လိာ်သး ကိ နီတခီဘၣ်ဝံၤအလီၢ်ခံ, ဖဲတၢ်ပြၢတုၤလီၤ ၅၅ မံးနံးန့ၣ်, အဲကလံးဖျၢၣ်ထူကရူၢ် တၢ်ဒံးဆ့ ပှၤလိာ်ကွဲဖိ Anthony Gordon အံၤ, ဒိးန့ၢ်ဘၣ်ဝဲဒၣ် Morgan Rogers ဆှၢန့ၢ်အီၤဖျၢၣ်ထူဝံၤတဘျီ, တချုးဖဲလၢအးကၠ့းထံနါတကပၤပံာ်တံၢ်အီၤန့ၢ်ဒ်ဘၣ်အခါ, အဝဲထူနုာ်လီၤဝဲကိတဖျၢၣ်, ဒီးမၤကၢ်ကွံာ်ဝဲဒၣ် တၢ်အိၣ်ဆၢထၢၣ်ထီၣ်ထူၣ်သးအံၤန့ၣ်လီၤ.
ဖဲတၢ်လိာ်ကွဲပြၢတုၤလီၤ ၈၅ မံးနံးန့ၣ် အးကၠ့းထံနါ အပှၤလိာ်ကွဲဖျၢၣ်ထူဖဲတၢ်ခၢၣ်သး Enzo Fernández ထံးနုာ်လီၤဝဲဒၣ် ကိဒီးအခိၣ်သၣ်ဃံတဖျၢၣ်ဝံၤအလီၢ်ခံ, ဖဲတၢ်ဟ့ၣ်အါထီၣ်တၢ်ဆၢကတီၢ်အခါ, ပှၤလိာ်ကွဲဖိလၢတၢ်မဲာ်ညါ Lautaro Martínez လၢအနုာ်လီၤကဒါပှၤအလီၢ်တဂၤ ထူနုာ်လီၤကဒီးဝဲကိတဖျၢၣ်အဃိ ဆှၢထီၣ်ဝဲဒၣ် အးကၠ့းထံနါအံၤ ဆူတၢ်ပြၢလၢခံကတၢၢ်အပတီၢ်န့ၣ်လီၤ.
ဖဲတၢ်လိာ်ကွဲတဘျီအံၤဝံၤအလီၢ်ခံန့ၣ် Martinez စံးဝဲဒၣ် အဝဲတူၢ်ဘၣ်ဒ်သိး အဝဲမ့ၢ်ပှၤဆီတလဲကွံာ်တၢ်လိာ်ကွဲတဘျီအံၤန့ၢ် တဂၤန့ၣ်လီၤ.
———
“ယမ့ၢ်ဘၣ်အၢၣ်လီၤတီတီန့ၣ်, ယမံမီၢ်ပာ်အီၤန့ၣ်လီၤ. ဖဲတၢ်ဆ့ၣ်နီၤခးလိၤန့ၣ် ယတဲဘၣ်ဝဲဒၣ် Facu [Facundo] Medina လၢ ယကလဲၤနုာ်လီၤဒီး မၤနၢၤကွံာ်တၢ်ပြၢတဘျီအံၤ, ဒီး အခဲအံၤ တုၤလၢယသးခုၣ်လီၤ ဒီး ဆိကမိၣ်ထံကဒါက့ၤအီၤန့ၣ်, ယတဲအီၤသ့လၢ ကရူၢ်အဝဲအံၤ ဆဲးဒုးနဲၣ်ဖျါဝဲဒၣ်လၢ တၢ်တ့ဒုးအိၣ်ထီၣ်အဝဲသ့ၣ်ဒီးတၢ်မနုၤလဲၣ်န့ၣ်လီၤ. အဝဲသ့ၣ် (အဲကလံး) ခီတက့န့ၣ်တၢ်ဘှံးအသး; လၢအမံးနံး ၆ဝအတီၢ်ပူၤန့ၣ် အဝဲသ့ၣ်ဆီၣ်တံၢ်လီၤဝဲသပှၢ်ပှၢ်လီၤ, နာ်သက့ ဖဲန့ၣ်အလီၢ်ခံ, အဝဲသ့ၣ်အဂံၢ်အဘါလၢာ်ကွံာ်. ဖဲအဝဲသ့ၣ်ဒိးန့ၢ် ကိ တဖျၢၣ်တဘျီ, အဝဲသ့ၣ် ဂုၤက့ၤလီၢ်ခံ ဒီး မ့ၢ်ဝဲတၢ်တခါလၢအဟ့ၣ်လီၤပှၤ တၢ်ခွဲးတၢ်ယာ်လၢ ပန့ၢ်ဘၣ် ဖျၢၣ်ထူအါထီၣ်, လိၣ်ကွဲဘၣ်ဖဲပျီပူၤအါထီၣ် ဒီး ပန့ၢ်ဘၣ်ဝဲဒၣ်ကိခံဖျၢၣ် ဒီး အခဲအံၤန့ၣ်, သၢနံၣ်ဘျဲၣ်ဝံၤအလီၢ်ခံအံၤ, ပဟဲက့ၤတုၤထီၣ်ဘၣ်က့ၤဖဲ World Cup ဖဲးနၢၤ အပတီၢ်န့ၣ်လီၤ.”
Messi ဟ့ၣ်လီၤပာ်ဖျါထီၣ်စ့ၢ်ကီးဝဲဒၣ် အတၢ်သ့တၢ်ဘၣ်လီၤဆီသ့ၣ်တဖၣ် လၢအလိာ်ကွဲဝဲဒၣ်န့ၢ်ဂ့ၤမးဒီး တွံၢ်စိာ်ဝဲဒၣ် ဖျၢၣ်ထူအံၤဆူအဝဲအအိၣ်တကပၤဒီး ဆှၢဃီၤန့ၢ်ဝဲ အသကိးပှၤလိာ်ကွဲဖိသ့ၣ်တဖၣ်န့ၢ်ဂ့ၤဒိၣ်မးန့ၣ်လီၤ. ဖဲတၢ်လိာ်ကွဲပြၢ နွံဘျီအပူၤ အဝဲအနီၣ်ကစၢ်ဒၣ်ဝဲ အတၢ်ထူနုာ်လီၤကိန့ၢ်န့ၣ် အိၣ်ဝဲဒၣ် ဃိးဖျၢၣ် ဒီး မ့မ့ၢ်လၢ အဝဲဆှၢထီၣ်န့ၢ်ဖျၢၣ်ထူအဃိ အသကိး သွီနုာ်လီၤကိန့ၢ်န့ၣ်, အိၣ်ဝဲဒၣ်လွံၢ်ဖျၢၣ်န့ၣ်လီၤ.
———
အဲကလံးဖျၢၣ်ထူကရူၢ်အံၤ တီခိၣ်ရိၤမဲဝဲတၢ်ပြၢတဘျီအံၤဒီး သွီနုာ်လီၤဝဲကိတဖျၢၣ်ဝံၤအလီၢ်ခံ ဂုၤကဒါအလီၢ်ခံအဃိ န့ၢ်ဘၣ်ဝဲ တၢ်သးသဘှံးန့ၣ်လီၤ.
အဲကလံးဖျၢၣ်ထူကရူၢ် လၢအဘၣ်တၢ်ကိးစ့ၢ်ကီးအီၤလၢ Three Lions အံၤ, တၢ်ပြၢတဘျီအံၤ ဒိးန့ၢ်ဘၣ်ဝဲဒၣ် ဖျၢၣ်ထူလၢအဝဲသ့ၣ်အအိၣ်တကပၤန့ၣ် ၃၆ မျးကယၤ, ဒီးတၢ်ခွဲးတၢ်ယာ်အိၣ်လၢ ကသွီဘၣ်ကိန့ၢ်အိၣ်ဝဲဒၣ် ယဲၢ်ဘျီ နာ်သက့ အဝဲသ့ၣ်သွီကိ လၢအလိၤဒီး ကိန့ၢ်အိၣ်ဒၣ်ထဲခံဖျၢၣ်ဧိၤ, လၢအပၣ်ဃုာ်ဒီး ကိလၢအနုာ်လီၤတဖျၢၣ်န့ၣ်လီၤ.
ဘၣ်ဃးဒီး တၢ်လိာ်ကွဲပြၢ လၢခံတကူာ် အဝဲဆီတလဲ အတၢ်လိာ်ကွဲအကျိၤအကျဲန့ၣ် အဲကလံးဖျၢၣ်ထူ ပှၤနဲၣ်တၢ်အခိၣ်ဒိၣ်ကတၢၢ် Thomas Tuchel ဒီသဒၢဝဲအတၢ်ရဲၣ်တၢ်ကျဲၤအံၤ ဒီး စံးဝဲဒၣ်လၢ အဝဲကဆဲးအိၣ်ဝဲဒၣ်တုၤလၢ UEFA Euro 2028 —၂ဝ၂၈နံၣ် ယူရပၤဖျၢၣ်ထူ တၢ်ပြၢတစုန့ၣ်လီၤ.
———
ခဲကနံၣ်အံၤ World Cup—ဟီၣ်ခိၣ်ဒီဘ့ၣ်ဖျၢၣ်ထူတၢ်ပြၢအပူၤ ကရူၢ်အိၣ်တ့ၢ်က့ၤဒၣ်ထဲခံဖုဧိၤန့ၣ်လီၤ.
မ့မ့ၢ်အဲကလံးန့ၣ် အကဘၣ်ထူပြၢလိာ်က့ၤအသးဒီး ဖြၣ်စ့ၣ်ဖျၢၣ်ထူကရူၢ် လၢခိၣ်ဖးသၢအဂီၢ်, ဒီးကဘၣ်ထူဝဲဒၣ်ဖဲ လါယူၤလံ ၁၉သီ, မုၢ်ဒဲး—မုၢ်ခီၣ်ထံးနံၤ မုၢ်ထီၣ်နီၣ်ထိၣ်တၢ်ဆၢကတီၢ်ဂီၤခီ ၆.၃ဝ နၣ်ရံၣ် (တခီ) ဒီး မ့မ့ၢ်လၢ ဖဲးနၢၤ တၢ်ပြၢအဂီၢ်န့ၣ် အးကၠ့းထံနါဒီး စပ့ၣ် ကဘၣ်ထူပြၢလိာ်အသးဖဲလါယူၤလံ အသီ ၂ဝ, မုၢ်ဆၣ်—မုၢ်ခီၣ်ထံးပူၤအနံၤ ဖဲဂီၤခီ ၅နၣ်ရံၣ်, ဒီး တၢ်ပြၢခံခါလၢၤအံၤ SBS ဒီး SBS On Demand ကထုးထီၣ်ဒုးနဲၣ်ရၤလီၤအီၤ တဘျီဃီန့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၃၅ သီအနံၤအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
