David Stuart မ့ၢ်ပှၤလၢ အအိၣ်ဒီးပနံးတၢ်ဖံးတၢ်မၤ လၢအမ့ၢ် တၢ်တ့ ကသံၣ်ဖူထီၣ်တၢ်အလွဲၢ် လၢအအိၣ်ဝဲဒၣ်ဖဲဆ့ၣ်ဒနံၤကလံၤစိၤပီၣ်လဲၣ်နံၤ ဒီး ဖဲလၢအဘၣ်ဃးဒီး တၢ်ဒီၣ်တဲာ်စှၤလီၤကွံာ် လီမ့ၣ်အူဂံၢ်အပှ့ၤန့ၣ် အဝဲအိၣ်ပာ်စၢၤလံဝဲဒၣ်လၢတၢ်မဲာ်ညါလံန့ၣ်လီၤ.
“ပစဲးဖီကဟၣ်တၢ်မၤလီၢ်ဖဲအံၤ, ဖဲ Brookvale အံၤ ပဝးတရံးမၤဝဲဒၣ်အီၤဒီး တၢ်သူမုၢ်ဂံၢ်သဟီၣ် အမျးကယၤ ၁ဝဝပှဲၤပှဲၤန့ၣ်လီၤ. တချုးလၢပသူမုၢ်ဂံၢ်သဟီၣ်ဒ်ဘၣ်န့ၣ်, တနံၣ်အဂီၢ်န့ၣ် ပဘၣ်သူစ့လၢလီမ့ၣ်အူပှ့ၤအဂီၢ်န့ၣ်အိၣ်ဝဲဒၣ် ဒီလၣ် ၂၄,ဝဝဝ ဃၣ်ဃၣ်ဒီး မ့ၢ်ဝဲတၢ်လၢအလၢာ်ကလီကွံာ်န့ၣ်လီၤ. ပဟံးလိၢ်န့ၢ်စ့လၢစ့တၢးအအိၣ်ဒီး ပဆီတလဲမၤက့ၤအီၤလၢ မုၢ်ဂံၢ်သဟီၣ်န့ၣ်လီၤ. အခဲအံၤ စ့ဟံးလိၢ်လၢပမၤန့ၢ်အီၤဖဲစ့တၢးအအိၣ်န့ၣ် ပလိာ်က့ၤအီၤတိာ်လံ. ဒီပမ့ၣ်အူဂံၢ်သဟီၣ်အပှ့ၤအခဲအံၤန့ၣ် အိၣ်ဝဲဒၣ်လၢ negative လၢအလၢၤနီတစဲးလၢၤဘၣ်န့ၣ်လီၤ.”
ဒ်သိးဒီး Colormaker Industries, ပှၤပၢဆှၢရဲၣ်ကျဲၤတၢ်အခိၣ်တဂၤအသိး လၢကဒုးထီဒါ တၢ်ပှ့ၤထီၣ်သ့ၣ်တဖၣ်အံၤအဂီၢ် Mr Stuart ပာ်ဖှိၣ်ဃုာ်ဝဲ တၢ်မၤသီထီၣ်က့ၤတၢ်ဒီး တၢ်အိၣ်စံၣ်အိၣ်ကျၢၤ လၢတၢ်ဆၢကတီၢ်ဖးယံၤအဂီၢ် အကျိၤအကျဲခံခါဒဲးတပူၤဃီန့ၣ်လီၤ.
“လီမ့ၣ်အူန့ၣ် လၢပနံးတၢ်ဖံးတၢ်မၤဆံးကိးဖိသ့ၣ်တဖၣ်အဂီၢ် မ့ၢ်ဝဲတၢ်လၢၤဘူၣ်လၢၤစ့တခါလၢ ဟးဆှဲးအီၤတသ့ဘၣ်န့ၣ်လီၤ. ပမ့ၢ်ဝဲဒၣ် ပှၤအီစထြ့လယါဖိ တၢ်တ့ထုးထီၣ်တၢ်ဖိတၢ်လံၤ အတၢ်ဖံးတၢ်မၤတခါလၢအကျဲးစၢးပြၢလိာ်အသးဒီးဟီၣ်ခိၣ်ဒီဘ့ၣ်အပတီၢ်တခါန့ၣ်လီၤ. မ့ၢ်လၢလီမ့ၣ်အူဂံၢ်အပှ့ၤထီၣ်အဃိ, တၢ်အံၤကဲထီၣ်တၢ်ဘၣ်ထုးထီၣ်ကွံာ်ကျိၣ်စ့လၢ အအိၣ်တ့ၢ်က့ၤဖဲတၢ်ခံဒးအပူၤသ့ၣ်တဖၣ်န့ၣ်လီၤ.”
Mr Stuart တၢ်ဖူကသံၣ်ထံ စဲးဖီကဟၣ်တၢ်မၤလီၢ်န့ၣ် ခဲကနံၣ်အံၤ ဝးတရံးမၤဝဲဒၣ်အီၤဒီး ဂံၢ်သဟီၣ်လၢအက့ၤပှဲၤထီၣ်ကဒါက့ၤဒၣ်အတၢ်သ့ခဲလၢာ်ခဲဆ့, လၢအဂံၢ်ဆူၣ်အိၣ်ဝဲဒၣ် ၁ဝဝ ကံလိဝး(ထ်) ဒီး ကၢၤဃာ်ဝဲဒၣ်ဂံၢ်သဟီၣ်သ့ၣ်တဖၣ်အံၤဒီး လီအ့ၣ်လၢတၢ်တ့ထီၣ်န့ၢ်အီၤလီၤလီၤဆီဆီန့ၣ်လီၤ.
“ပလီအ့ၣ်ဖးဒိၣ် မ့ၢ်ဝဲပှၤအီစထြ့လယါဖိ တ့ထီၣ်အက့ၢ်အဂီၤဒီး သူၣ်ထီၣ်န့ၢ်အီၤန့ၣ်လီၤ. တနံၤအဂီၢ် ပမုၢ်ဂံၢ်သဟီၣ်အပူၤ ဂံၢ်သဟီၣ်လၢအပိၣ်ထီၣ်သ့ၣ်တဖၣ်န့ၣ် ပာ်ဖှိၣ်ဃာ်ဝဲဒၣ်အီၤ သီတနၤကျၢၤ ဒီးဝံၤန့ၣ် က့ၤထုးထီၣ်သူကဒါက့ၤဝဲဒၣ်အီၤဖဲ ဂီၤခီန့ၣ်လီၤ. တၢ်အိၣ်သးလၢ ပဟဲတုၤဖဲမုၢ်မဆါတနံၤအံၤန့ၣ် ပမ့ၢ်တဲအီၤလၢအပူၤကွံာ်ဃုနံၣ်အခါန့ၣ် တမ့ၢ်တၢ်လၢပကနာ်အီၤဘၣ်.”
မူခိၣ်ကလံၤသီၣ်ဂီၤတၢ်ဆီတလဲဂ့ၢ်ဝီကီၣ်ကးကရၢ—Climate Council ပှၤဘၣ်မူဘၣ်ဒါ Greg Bourne စံးဝဲဒၣ် ဖဲအပူၤကွံာ်တနံၣ် အတီၢ်ပူၤန့ၣ် ပှၤအီစထြ့လယါလၢ အပှ့ၤဆိပာ်လီအ့ၣ်ဖးဒိၣ် လၢအပှ့ၤစှၤလီၤန့ၣ် အိၣ်ဝဲဒၣ် အမျးကယၤ ၂ဝ ဃၣ်ဃၣ် န့ၣ်လီၤ.
“ဖဲအသီခါန့ၣ် လီအ့ၣ်သ့ၣ်တဖၣ်အပှ့ၤဒိၣ်ဒီး ဘၣ်ဟ့ၣ်လီၤက့အပှ့ၤ တၢ်ဆၢကတီၢ်န့ၣ် တဘၣ်ဘျီးဘၣ်ဒါလိာ်အသးဘၣ်၊ နာ်သက့ အခဲအံၤ တၢ်အိၣ်သးန့ၣ်ဆီတလဲအသးလံ ဒီး လီအ့ၣ်သ့ၣ်တဖၣ်အိၣ်ဝဲဒၣ်အါမး, လၢတၢ်ကသူအီၤလၢတၢ်အိၣ်ဆိးတၢ်လီၢ်အဂီၢ်မ့ၢ်ဂ့ၤ, လၢပနံးတၢ်ဖံးတၢ်မၤဆံးကိးဖိအပတီၢ်အဂီၢ်မ့ၢ်ဂ့ၤ အိၣ်ထီၣ်ဝဲဒၣ်အါမးန့ၣ်လီၤ.”
ဖဲပှၤအီစထြ့လယါဖိတၢ်ဃုထၢပာ်ဖှိၣ်နီၣ်ဂံၢ်စရီဝဲၤလီၢ်ခိၣ်သ့ၣ် — Australian Bureau of Statistics အတၢ်ပာ်ဖျါအပူၤန့ၣ် စံးဝဲဒၣ် ဖဲလွံၢ်လါတဘျီအတၢ်ပာ်ဖျါလၢခံကတၢၢ်တခါအပူၤန့ၣ် လီမ့ၣ်အူဂံၢ်အပှ့ၤဟဲအါထီၣ်ဝဲ ၉မျးကယၤ, ဒီး Mr Bourne ဟ့ၣ်သဆၣ်ထီၣ်ဝဲဒၣ်လၢ ပှၤကသူအါထီၣ် လီအ့ၣ်လၢတၢ်ပာ်ကီၤဃာ် မ့ၣ်အူဂံၢ်အဂီၢ်န့ၣ်လီၤ.
“ပအိၣ်ဒီးဟံၣ်အဖျၢၣ် ၄ကကွဲၢ်လၢ အထီထီၣ်သူဝဲဒၣ်မုၢ်ဂံၢ်သဟီၣ်ဘ့ၣ်ဘၣ်သ့ၣ်တဖၣ်လံ, နာ်သက့ ပှၤလၢအထီထီၣ်သူဝဲဒၣ်ဒီးလီအ့ၣ်သ့ၣ်တဖၣ်န့ၣ် အမျးကယၤအိၣ်စှၤဒိၣ်မး. ယအဲၣ်ဒိးလၢ အကအိၣ်အါထီၣ် ခံဆး, ဝံၤ ခံဆး ဝံၤခံဆးတဘျီကဒီးန့ၣ်လီၤ.”
လီမ့ၣ်အူအပှ့ၤသ့ၣ်တဖၣ်န့ၣ် မ့ၢ်တၢ်မၤအါထီၣ်ဝဲဒၣ် အီစထြ့လယါကီၢ် စ့သိၣ်သွံ အနီၣ်ဂံၢ်နီၣ်ဒွးသ့ၣ်တဖၣ်န့ၣ်လီၤ.
တၢ်အိၣ်ဆိးအပှ့ၤအကလံၤ အတၢ်ထိၣ်ဒွး လၢတၢ်ကိးအီၤ, CPI (Consumer Price Index) အပူၤန့ၣ် တုၤလီၤဖဲတနံၣ်အံၤလါစဲးပထ့ဘၢၣ်အပူၤန့ၣ် တၢ်အိၣ်ဆိးအပှ့ၤသ့ၣ်တဖၣ်ဟဲဒိၣ်ထီၣ်ဝဲဒၣ်တုၤလၢ ၃.၂ မျးကယၤန့ၣ်လီၤ.
ဖဲ Australian Chamber of Commerce and Industry — ပှၤအီစထြ့လယါဖိတၢ်ကူၣ်လဲၤမၤကၤကရၢမိၢ်ပှၢ်ဒီး စဲးဖီကဟၣ်တၢ်ဖံးတၢ်မၤလီၢ် အတၢ်ပာ်ဖျါအသီအပူၤန့ၣ်, တၢ်ပှ့ၤတၢ်ကလံၤလၢအထီၣ်သ့ၣ်တဖၣ်အံၤန့ၣ် ဘၣ်ဒိဆါဝဲဒၣ် အီစထြ့လယါကီၢ် ပနံးတၢ်ဖံးတၢ်မၤဆံးကိးဖိကစၢ်သ့ၣ်တဖၣ် ဒီလၣ် ၂.၅ကကွဲၢ်န့ၣ်လီၤ.
ကရၢအံၤအခိၣ်ဒိၣ် Andrew McKellar ရှဲပၠးဝဲဒ်အံၤ.
“တၢ်လၢပနံးတၢ်ဖံးတၢ်မၤဆံးကိးဖိသ့ၣ်တဖၣ်ယၢၤထီၣ်အီၤအအါကတၢၢ်န့ၣ်မ့ၢ်ဝဲ လီမ့ၣ်အူဂံၢ်န့ၣ်လီၤ. အဃိန့ၣ်, အပူၤကွံာ်တယံၤဒ်ဘၣ် နံၣ်သ့ၣ်တဖၣ်အတီၢ်ပူၤ လီမ့ၣ်အူဂံၢ်အပှ့ၤထီၣ်န့ၣ် အိၣ်ဖျါဝဲဒၣ်ရှဲရှဲဖိလၢအအိၣ်ဒီးတၢ်ဘၣ်ဒိဘၣ်ထံး, ဖဲ NSW, Victoria ဒီး QLD အပူၤန့ၣ် ပနံးတၢ်ဖံးတၢ်မၤဆံးကိးဖိအါမး အပူၤကွံာ်သၢနံၣ်အတီၢ်ပူၤ အတၢ်လၢၤဘူၣ်လၢၤစ့လၢတၢ်အံၤအဂီၢ်န့ၣ် ဟဲအါထီၣ်ဝဲအမျးကယၤ ၂ဝဝ အဃိတၢ်အံၤမ့ၢ်ဝဲ တၢ်ဆီၣ်သနံး ဖးဒိၣ်တခါ လၢပနံးတၢ်ဖံးတၢ်မၤဆံးကိးဖိသ့ၣ်တဖၣ်ဘၣ်ကွၢ်ဆၢၣ်မဲာ်အီၤန့ၣ်လီၤ.”
ဖဲအဝဲသ့ၣ် Small Business Conditions Survey — တၢ်ဃုထၢပာ်ဖှိၣ်ပနံးတၢ်ဖံးတၢ်မၤဆံးကိးဖိအတၢ်အိၣ်သးအပူၤန့ၣ်, ပှၤကူၣ်လဲၤမၤကၤတၢ်ကရၢမိၢ်ပှၢ်, Chamber of Commerce ကတိၤတ့ၢ်တၢ်ဒီး ပှၤမၤပနံးတၢ်ဖံးတၢ်မၤဆံးကိးဖိအကစၢ်အဂၤ ၁, ၁ဝဝ လၢအအိၣ်သကုၤထံကီၢ်ဒီဘ့ၣ်အပူၤန့ၣ်လီၤ.
ဖဲအပူၤကွံာ်တနံၣ်န့ၣ် ပနံးတၢ်ဖံးတၢ်မၤဆံးကိးဖိ လၢအဆိကမိၣ်ထီၣ် ကကးတံာ်လီၤကွံာ်အသးန့ၣ်အိၣ်အါန့ၢ် လွံၢ်ပူၤတပူ, လၢအမ့ၢ်ဝဲဒၣ် ၂၈ မျးကယၤ, ဒီး အဂၤ အမျးကယၤ ၃ဝ န့ၣ် အိၣ်ဒီးတၢ်ဘၣ်ယိၣ်လၢ ဆူမဲာ်ညါ ၁၂လါအတီၢ်ပူၤန့ၣ် ကဘၣ်ကးတံာ်လီၤကွံာ်အတၢ်ဖံးတၢ်မၤန့ၣ်လီၤ.
တၢ်လၢၤဘူၣ်လၢၤစ့ အတၢ်ဆီၣ်သနံးန့ၣ်မ့ၢ်ဝဲ အီစထြ့လယါကီၢ်ပနံးတၢ်ဖံးတၢ်မၤဆံးကိးဖိကီၣ်ကးကရၢ — Council of Small Business Organisations Australia (COSBOA) အတၢ်ဘၣ်ယိၣ်တခါန့ၣ်လီၤ.
ကရၢအံၤအပှၤပၢၤလီၢ်ဆ့ၣ်နီၤ Matthew Addison စံးဝဲဒၣ် ဖဲ Small Business Perspectives အတၢ်ပာ်ဖျါအပူၤန့ၣ် တၢ်ဖံးတၢ်မၤကစၢ်အါဒံအါဂၤ သူဝဲဒၣ် အဝဲသ့ၣ်နီၣ်ကစၢ်ဒၣ်ဝဲ စ့ပာ်ဖှိၣ်သ့ၣ်တဖၣ် လၢကလဲၤဝးတရံး အတၢ်ဖံးတၢ်မၤအဂီၢ်န့ၣ်လီၤ.
“ဆၢကတီၢ်ခဲအံၤန့ၣ်ပအိၣ်ဝဲဒၣ်ဖဲတၢ်အိၣ်သးလၢ တၢ်မၤမုၢ်ကျိၤဝဲၤကွာ်သ့ၣ်တဖၣ်ကီခဲဝဲဒိၣ်မးဒီး တၢ်ပာ်ဖျါအံၤအပူၤန့ၣ် ပာ်ဖျါဝဲဒၣ်လၢ မ့ၢ်ကွၢ်ဒီးအပူၤကွံာ်တနံၣ်န့ၣ် တနံၣ်အံၤ တၢ်မၤန့ၢ် တၢ်အဘျုးအဖှိၣ်သ့ၣ်တဖၣ် အိၣ်စှၤဝဲဒၣ် ၆၄မျးကယၤန့ၣ်လီၤ. ပှၤမၤပနံးတၢ်ဖံးတၢ်မၤ အမျးကယၤ ၆ဝ န့ၣ်, အဝဲသ့ၣ်ဟ့ၣ်လီၤက့ၤအနီၣ်ကစၢ်အဂီၢ် တၢ်မၤအဘူးအလဲ ကိးဘျီဒဲးတန့ၢ်ဘၣ်.”
တၢ်ပှ့ၤတၢ်ကလံၤသ့ၣ်တဖၣ် မ့ၢ်ဒိၣ်ကွ့ၢ်ကွ့ၢ်, လၢအပၣ်ဃုာ်ဒီး မ့ၣ်အူအပှ့ၤသ့ၣ်တဖၣ်နာ်သက့, Mr Addison စံးဝဲဒၣ် တၢ်ကဆီတလဲသူ မုၢ်ဂံၢ်သဟီၣ်န့ၣ် ပှၤကိးဂၤဒဲးမၤအီၤတန့ၢ်ဘၣ်.
“တၢ်ထိၣ်သတြီၤကွၢ် တၢ်ဘၣ်ဟ့ၣ်လီၤတၢ်အပှ့ၤန့ၣ် ထီဘိမ့ၢ်ဝဲ တၢ်ကူၣ်သ့အကျိၤအကျဲတခါန့ၣ်လီၤ. ပနံးတၢ်ဖံးတၢ်မၤတခါလၢ အတၢ်အိၣ်သးမ့ၢ်အိၣ်ဒီးတၢ်ကီတၢ်ခဲန့ၣ်, အဝဲသ့ၣ်ကွၢ်ဃုသူဝဲဒၣ်မုၢ်ဂံၢ်သဟီၣ်ဘ့ၣ်ဘၣ်သ့ၣ်တဖၣ် မ့တမ့ၢ် ထီထီၣ် လီအ့ၣ်စ့ၢ်ကီးသ့ဝဲန့ၣ်လီၤ. ဘၣ်ဆၣ်သနာ်က့ အီစထြ့လယါကီၢ်ပူၤ ပနံးတၢ်ဖံးတၢ်မၤဆံးဆံးဖိလၢအအိၣ်ဝဲဒၣ်အါန့ၢ် အခါ ခံကကွဲၢ်ဘျဲၣ်န့ၣ်, တကကွဲၢ်တဝးန့ၣ်မ့ၢ်ဝဲဒၣ် sole traders —ပှၤမၤပနံးတၢ်ဖံးတၢ်မၤထဲတဂၤသ့ၣ်တဖၣ်, လၢအဝဲသ့ၣ်မၤဝဲဒၣ်လၢအနီၣ်ကစၢ်ဒၣ်ဝဲန့ၣ်လီၤ. အဝဲသ့ၣ်န့ၣ် လၢမုၢ်ဂံၢ်သဟီၣ်ဘ့ၣ်ဘၣ်သ့ၣ်တဖၣ်အဂီၢ်မ့ၢ်ဂ့ၤ, လီမ့ၣ်သ့ၣ်တဖၣ်အဂီၢ်မ့ၢ်ဂ့ၤ ကဘျၢနုာ်လီၤကျိၣ်စ့အဂီၢ် အတၢ်ဆၢတကတီၢ်, အဂံၢ်အဘါ မ့တမ့ၢ် ကျိၣ်စ့သ့ၣ်တဖၣ် တအိၣ်ဘၣ်.”
ဘၣ်ဆၣ်သနာ်က့ တၢ်ဆီၣ်သနံးမ့ၢ်အိၣ်ဒီး တၢ်ဒိးန့ၢ်ဘၣ်က့ၤတၢ်အဘျုးအဖှိၣ်န့ၣ်, Mr Stuart စံးဝဲဒၣ် တၢ်မၤတၢ်ဆီတလဲ ဆံးကိးဖိန့ၣ် ဒုးအိၣ်ထီၣ်တၢ်ဆီတလဲဖးဒိၣ် လၢအခီၣ်ထံးကတၢၢ်သ့ဝဲန့ၣ်လီၤ.
“ပမၢဝဲဒၣ် ပှၤသ့ဂံၢ်သဟီၣ်စဲးဖီကဟၣ်တဂၤ, ထိၣ်ဒွးကွၢ်န့ၢ်ဝဲဒၣ် ပတၢ်မၤလီၢ်ဒီတခါ ဒီး အဝဲထံၣ်ဘၣ်ဝဲလၢပလီမ့ၣ်အူဂံၢ် ၂၆ မျးကယၤန့ၣ် ဘၣ်တၢ်သူအီၤလၢ တၢ်ဆီၣ်တံၢ်လီၤကလံၤဒီး တၢ်အံၤသၢပူတပူန့ၣ် လၢၤဂီၤကလီဝဲဒၣ်န့ၣ်လီၤ. အဃိန့ၣ် ပပှ့ၤကဒါက့ၤ တၢ်ဆီၣ်တံၢ်လီၤကလံၤအသီတခါ ဒီး စးထီၣ်ဖဲပထီထီၣ်သူအီၤ တုၤလၢ ၁၂အတီၢ်ပူၤန့ၣ်, ပထံၣ်ဘၣ်လၢ တၢ်သူ မ့ၣ်အူ ဂံၢ်သဟီၣ်န့ၣ် စှၤလီၤကွံာ်ဝဲဒၣ် ၂၃ မျးကယၤန့ၣ်လီၤ. ပှ့ၤစ့ၢ်ကီးဝဲဒၣ် electric forklift — သိလ့ၣ်စိာ်ကဖီတၢ်လၢအသူလီမ့ၣ်အူဂံၢ်တခိၣ်. အဃိ, တၢ်အံၤအခီပညီန့ၣ် ဖဲပတၢ်မၤလီၢ်အပူၤန့ၣ် ပတသူ LPG လၢၤဘၣ်. ပဆီတလဲကွံာ် လီမ့ၣ်အူဖျၢၣ်သ့ၣ်တဖၣ်ဆူ LED လီမ့ၣ်အူဖျၢၣ်ဖိ. တၢ်အံၤမ့ၢ်တၢ်တခါလၢ ခီပနံၣ်တဖျၢၣ်ဂ့ၤ တဖျၢၣ်ဂ့ၤမၤအီၤသ့ဝဲဒၣ်, လၢအပှ့ၤဘၣ်သပှၢ်ပှၢ်န့ၣ်လီၤ. ပပှ့ၤစ့ၢ်ကီးဝဲဒၣ်စဲးမၤဘျဲးစးခိတခါ. အဃိ, အပူၤကွံာ်လၢညါ ပစးခိဒၢ လၢပဘၣ်ဆှၢအီၤဆူ ရံးစဲးကၢး အလီၢ်သ့ၣ်တဖၣ်ပသူက့ၤအီၤဖဲပတၢ်မၤလီၢ်အံၤသ့ဝဲဒၣ်ဒီး ဟ့ၣ်လီၤအီၤတၢ်အိၣ်မူခံဆီတဆီန့ၣ်လီၤ. စးထီၣ်လၢပသူဝဲဒၣ် မုၢ်ဂံၢ်သဟီၣ်ဒီး တၢ်မၤဒိၣ်ထီၣ်လဲၢ်ထီၣ်အဂုၤအဂၤသ့ၣ်တဖၣ်န့ၣ်, အခဲအံၤ ကိးနံၣ်ဒဲးန့ၣ် ပပာ်ဖှိၣ်ဘၣ်စ့ ကအိၣ်ဝဲဒၣ်ဖဲ ဒီလၣ် ၃၅,ဝဝဝ ဒီး ၅ဝ,ဝဝဝ အဘၢၣ်စၢၤန့ၣ်လီၤ.”
ဆူမဲာ်ညါတနံၣ်န့ၣ် တၢ်တယာ်ပာ်ဝဲဒၣ်လၢ ပနံးတၢ်ဖံးတၢ်မၤလၢအကဟးဂီၤကွံာ်န့ၣ် အိၣ်ဝဲဒၣ်လၢ ၅မျးကယၤ အဖီခိၣ်, ဒီး ပှၤလၢအအိၣ်ဒီးတၢ်ကီတၢ်ခဲ ဘၣ်ထဲးဂံၢ်ထဲးဘါသ့ၣ်တဖၣ်အဂီၢ်န့ၣ် Mr Stuart ဟ့ၣ်ကူၣ်ဝဲဒ်အံၤန့ၣ်လီၤ.
“ကမၤသီထီၣ်မၤဂ့ၤထီၣ်က့ၤတၢ်အဂီၢ်နၣ် နတလိၣ်ဘၣ်စ့ကိၣ်လိၣ်ဖးဒိၣ်ထဲန့ၣ်ဘၣ်. နစးထီၣ်အီၤဖဲနမၤအီၤန့ၢ်အပတီၢ်, နခိးကွၢ်အတၢ်ဒိဘၣ်အိၣ်ဒ်လဲၣ်ဒီး ဆဲးမၤအီၤဖဲန့ၣ်တဆီဘၣ်တဆီ.”
