တၢ်ကလုၢ်တဖၣ်: https://www.sbs.com.au/language/ karen/ kar/collection/podcast/0ms9u5vjn
ပှၤမူပျီဖိ Katherine Bennell-Pegg ဘၣ်တၢ်ဘိးဘၣ်သ့ၣ်ညါလီၤဝဲအီၤလၢအမ့ၢ်ပှၤဒိးန့ၢ်ဘၣ် ၂ဝ၂၆ အီစထြ့လယါဖိအဂ့ၤကတၢၢ်လၢဒီနံၣ်ညါခိၣ်ဖးတၢ်လၤကပီၤ— 2026 Australian of the Year န့ၣ်လီၤ.
Katherine Bennell-Pegg စံးဝဲဒၣ်, “တၢ်ဆွံနုာ်ယၤ ဖဲလီၢ်လၤအံၤအပူၤန့ၣ် ယလီၤကမၢကမၣ်ဒိၣ်မး, ဒီး ယမုၢ်လၢ်လၢ ယအိၣ်ဖဲအံၤန့ၣ် ယကဒုးနဲၣ်ဖျါတၢ်လၢအကဲထီၣ်သးသ့သ့ၣ်တဖၣ် လၢအကဝံာ်အိးထီၣ်ဝဲကျဲလၢ ခါဆူညါတၢ်ပိာ်အီၤသ့န့ၣ်လီၤ. ဖဲလၢယဒိၣ်ထီၣ်အခါ ဆၣ်လၢယဖီခိၣ်သ့ၣ်တဖၣ်န့ၣ် ထုးန့ၢ်ဝဲယသး, နာ်သက့ ယတူၢ်ဘၣ်လၢအဝဲသ့ၣ်န့ၣ်အိၣ်ယံၤဒီးယၤဒိၣ်မး. အပူၤကွံာ်လၢညါ ပှၤအီစထြ့လယါဖိလၢအလဲၤတုၤဆူမူဒီသ့ၣ်တဖၣ် မ့ၢ်ပှၤလၢအထိၣ် ဟူး ထိၣ်ဂဲၤထီၣ်ယသးသဟီၣ်န့ၣ်လီၤ.”
ပှၤမူပျီဖိ ပိာ်မုၣ်လၢအသးနံၣ်အိၣ် ၄၁နံၣ်တဂၤအံၤ ကဲထီၣ်တၢ်ဆဲးပနီၣ်တၢ်စံၣ်စိၤတဲစိၤ လၢအမ့ၢ်ဝဲဒၣ် ပှၤအီစထြ့လယါဖိလၢအကံၢ်အစီထီၣ်ဘး အဆိကတၢၢ် ဒ်သိး ပှၤမူပျီဖိလၢအအိၣ်ဖဲ အီစထြ့လယါကီၢ်မူဒီတၢ်ရဲၣ်တၢ်ကျဲၤအဖီလာ်, ဒီး အဝဲန့ၣ် ဒ်သိးမူဒီပှၤသ့စဲးဖီကဟၣ်တဂၤအသိး အဝဲမၤလဲၤထီၣ်လဲၤထီၣ်ဝဲ တၢ်လဲၤဆူမူဒီ အကျိၤအကျဲတဘျုးမံၤန့ၣ်လီၤ.
အဝဲဖျိထီၣ် Basic Astronaut Training ဖဲ ၂ဝ၂၄နံၣ် လၢအမ့ၢ်တၢ်မၤလိတီၤတခါလၢ ပှၤမၤလိတၢ်အိၣ်ထဲဃုဂၤန့ၣ်လီၤ.
ပှၤဃုဂၤလၢအပၣ်ဃုာ်ဒီးအီၤအံၤ မ့ၢ်ပှၤသ့ၣ်တဖၣ်လၢ အဘၣ်တၢ်ဃုထၢထီၣ်အီၤဖဲ ပှၤအဂၤ ၂၂,၅ဝဝ ဂၤအကျါ လၢအပတံထီၣ်ဝဲ ပျီပူၤတၢ်မၤလိ ဖဲ European Astronaut Centre — ယူရပၤပှၤမူပျီဖိဝဲၤလီၢ် လၢအအိၣ်ဖဲ ကီၢ်ကၠၢမနံၢ် န့ၣ်လီၤ.
“မ့ၢ်လီၤ, ယကဲထီၣ်ဘၣ် ပှၤမူပျီဖိတဂၤအဃိ လၢယဂီၢ်န့ၣ် မ့ၢ်ဝဲယတၢ်မံမီၢ်လၢယဖိသၣ်အခါန့ၣ် ဟဲကဲထီၣ်ဝဲနီၢ်ကီၢ်, နာ်သက့ တၢ်အံၤအိၣ်ဒံးဝဲဖဲ တၢ်စးထီၣ်အခီၣ်ထံးန့ၣ်လီၤ. ယတလဲၤထီၣ်ဘၣ်ဆူမူပျီအပူၤနီတဘျီဒ်ဘၣ်. ယမၤတၢ်မၤ ဒ်သိးကအိၣ်ပှဲၤဒီးတၢ်ကတဲာ်ကတီၤပာ်သး လၢမုၢ်မကအိၣ်တနံၤ တၢ်ခွဲးတၢ်ယာ်ကဟဲအိၣ်ထီၣ်ဝဲလၢယဂီၢ်န့ၣ်လီၤ. နာ်သက့ ပှၤအီစထြ့လယါဖိသၣ် ၁၂နံၣ် ဆူအဖီလာ် အဂၤ ၁ဝအကျါ နွံဂၤန့ၣ် အဲၣ်ဒိးလဲၤဝဲဒၣ်ဆူမူပျီန့ၣ်လီၤ.
Ms Bennell-Pegg အံၤ ဘၣ်တၢ်ပာ်ပနီၣ်အီၤ ဒ်သိးလၢအမ့ၢ်ဝဲဒၣ် ပှၤစးထီၣ်တ့ဒုးအိၣ်ထီၣ်တၢ်အသီ လၢအဟ့ၣ်လီၤသးမၤတၢ်ဖဲအီစထြ့လယါကီၢ်မူပျီတၢ်ရဲၣ်တၢ်ကျဲၤအပူၤ — လၢအပၣ်ဃုာ် တၢ်လဲၤပာ်ဖျါ တၢ်ဂ့ၢ်တၢ်ကျိၤ ဖဲဖိသၣ်လၢအအိၣ်ဖဲကၠိပူၤသ့ၣ်တဖၣ်အဂီၢ်ထီဘိ — မၤစၢၤ ဒုးဒိၣ်ထီၣ်လဲၢ်ထီၣ်ဝဲ ထံထီၢ်အံၤ တၢ်စးထီၣ် မူပျီ တၢ်ဖံးတၢ်မၤလီၢ်ဟီၣ်ကဝီၤသ့ၣ်တဖၣ်န့ၣ်လီၤ.
အဝဲစံးဝဲဒၣ် တၢ်လၢမူပျီန့ၣ် အတမ့ၢ်တၢ်လၢအဘၣ်ဃးဒီး တၢ်ဃ့ၢ်ပူၤဖျဲးသးလၢ ဟီၣ်ခိၣ်ဘၣ်, ဘၣ်ဆၣ်သနာ်က့ မ့ၢ်ဝဲတၢ်မၤစၢၤတၢ်လၢ တၢ်ကထံၣ်ဘၣ်အီၤ ရှဲဒိၣ်ထီၣ် ဆှံဒိၣ်ထီၣ်အဂီၢ်န့ၣ်လီၤ.
“တၢ်လၢမူပျီ န့ၣ်မ့ၢ်ဝဲ တၢ်လီၢ်ထီၣ်ထီတတီၤဖဲမူခိၣ် လၢနထံၣ်လီၤဝဲဒၣ် မ့ၣ်အူအီၣ်တပှီၤ မ့ၣ်အူအီၣ်ပှၢ်ဒီး ထံလုၢ်ဘၢတၢ်သ့ၣ်တဖၣ် ဒီး တၢ်လီၤတိၢ်လီၤဆီသကုၤပထံကီၢ်အပူၤန့ၣ်လီၤ. တၢ်အံၤမ့ၢ်ဝဲပတၢ်အံးထွဲကွၢ်ထွဲ ပှၤလၢအဟ့ၣ်လီၤပှၤတၢ်အဆိကတၢၢ်သ့ၣ်တဖၣ်အံၤဒ်လဲၣ် လၢအမ့ၢ်ခီဖျိပဘျးစဲန့ၢ်အဝဲသ့ၣ်ဒီး ခိခိၣ်ဟီၣ်ကဝီၤသ့ၣ်တဖၣ်န့ၣ်လီၤ.တၢ်အံၤမ့ၢ်ဝဲ တၢ်နဲၣ်ကျဲပပှၤထူစံာ်ဖိသ့ၣ်တဖၣ် တၢ်သူၣ်တၢ်ဖျးတၢ်အတၢ်ပီးတၢ်လီ, တၢ်မၤလီၤတံၢ်ပထံပကီၢ်အတၢ်ဘံၣ်တၢ်ဘၢ, ဒီး အိးထီၣ်နီၣ်ဝံာ်လၢ တၢ်ဃုသ့ၣ်ညါအီၤသ့ဒၣ်ထဲလၢ တၢ်ဘၣ်ဝံာ်အိးထီၣ်န့ၢ်အီၤဖဲမူပျီအပူၤန့ၣ်လီၤ.”
မ့မ့ၢ်ဖဲအဘူး ကီၢ်ပူၤအံၤတခီန့ၣ်, သရၣ်ဒိၣ်စိ, Henry Brodaty ဒိးန့ၢ်ဘၣ်ဝဲ တၢ်ပာ်ပနီၣ် ဒ်သိး အီစထြ့လယါဖိသးပှၢ်လၢအဂ့ၤကတၢၢ်ဒီနံၣ်ညါ ခိၣ်ဖးတၢ်လၤကပီၤ ခီဖျိ လၢအဝဲတၢ်ဖံးတၢ်မၤ ဘၣ်ဃးတၢ်ဃိထံသ့ၣ်ညါ ဒံၤမဲရှါ တၢ်ဆါဂ့ၢ်န့ၣ်လီၤ. အဝဲဒိးအပၢ်န့ၣ်တူၢ်ဘၣ်ဝဲ အဲလ်စဲမါ တၢ်ဆါအဃိ ကဲထီၣ်တၢ်ထိၣ်ဟူးထိၣ်ဂဲၤထီၣ်အသးသဟီၣ် လၢအဃုသ့ၣ်ညါဝဲ တၢ်ဆူးတၢ်ဆါအံၤအဂ့ၢ်န့ၣ်လီၤ.
သးတၢ်ဆိကမိၣ်ဂ့ၢ်ဝီတၢ်ဆါ ကသံၣ်သရၣ်ဖးဒိၣ်လၢအသးနံၣ်အိၣ် ၇၈ နံၣ်တဂၤအံၤ မၤစၢၤဝဲတၢ်လၢ တၢ်ကဒုးအိၣ်ထီၣ် တၢ်ဂဲၤလိာ်ဒီး ဆီၣ်ထွဲမၤစၢၤ ကရူၢ် လၢအမ့ၢ် Dementia Australia န့ၣ်လီၤ. အဝဲတၢ်မၤစၢၤအံၤမ့ၢ်ဝဲဒၣ် တစိၤသးတၢ်မၤစၢၤတၢ်လၢ တၢ်မၤကွၢ်တၢ်ဆူးတၢ်ဆါအံၤ အတၢ်ဖံးတၢ်မၤ, တၢ်ဃိထံသ့ၣ်ညါဒီး တၢ်ထဲးဂံၢ်ထဲးဘါလၢ တၢ်ဒီသဒၢတၢ်ဆါအံၤအဂီၢ်န့ၣ်လီၤ.
စးထီၣ်လၢအမ့ၢ်ဝဲဒၣ် University of New South Wales ဝဲၤလီၢ်လၢ Healthy Brain Ageing ပှၤဒုးအိၣ်ထီၣ်တၢ်သဃဲၤန့ၣ်, Professor Brodaty မၤစၢၤသူၣ်ထီၣ်ဝဲ တၢ်ဃိထံသ့ၣ်ညါဝဲၤလီၢ်အံၤ ပှၤဘၣ်မူဘၣ်ဒါ ပှၤမၤတၢ်ဖိအဂၤ အိၣ်အါထီၣ်ဝဲဒၣ် တုၤလၢအဂၤ ၆ဝ န့ၣ်လီၤ.
“ခဲလၢာ်န့ၣ်ပာ်ဝဲတၢ်ပညိၣ်လီၤဖဲ သနၢၣ်လၢအလီၤဆီလိာ်သးသ့ၣ်တဖၣ်အလိၤ - ဘၣ်တၢ်ကွၢ်ဝဲဒၣ်တၢ်ဟဲလီၤစၢၤလီၤသွဲၣ်, ဘၣ်တၢ်ကွၢ်ဝဲဒၣ်သွံၣ်ကျါ ပြိးတံ အတၢ်ဆီတလဲသးသ့ၣ်တဖၣ်, ဘၣ်တၢ်ကွၢ်ဝဲဒၣ် ခိၣ်နူာ်တၢ်ပာ်ဖျါထီၣ်တၢ်အက့ၢ်အဂီၤ, ပှၤဂ့ၢ်ဝီတၢ်ရ့လိာ်အတၢ်အိၣ်သးအဖီခိၣ် တၢ်ဆၢတဲာ်ဝဲ တၢ်အိၣ်ဆူၣ်အိၣ်ချ့အတၢ်အိၣ်သးသ့ၣ်တဖၣ်န့ၣ်လီၤ. လၢန့ၣ်အမဲာ်ညါ ပနုာ်လီၤပၣ်ဃုာ်စ့ၢ်ကီးဖဲ တၢ်မၤစၢၤ ပှၤကညီလၢ အတၢ်သကဲးပဝးဆီတလဲအသး ခီဖျိလၢ ဒံၤမဲရှါ ဟဲကဲထီၣ်အဃိန့ၣ်လီၤ.”
မ့မ့ၢ်အီစထြ့လယါကီၢ် Local Hero for 2026 — ၂ဝ၂၆နံၣ် လီၢ်ကဝီၤပှၤဒူပှၤဃိၤ ခိၣ်ဖးတၢ်လၤကပီၤန့ၣ်, ပှၤထူလံၤဖိ တၢ်သူၣ်ထီၣ်ဘှီထီၣ်တၢ်ခိၣ်နၢ်, Frank Mitchell, လၢအသူၣ်ထီၣ်ဆီလီၤခီပနံၣ်လွံၢ်ဖျၢၣ်, ပှၤမၤတၢ်ဖိအိၣ်အါန့ၢ်အဂၤ ၂ဝဝ ဒီး သူဝဲဒၣ်လုၢ်လၢ်ဆဲးလၤ အလုၢ်အပှ့ၤဒီး ခိၣ်နၢ်တၢ်တီခိၣ်ရိၤမဲ ပနံာ်တၢ်ဖံးတၢ်မၤတဂၤ ဒိးန့ၢ်ဘၣ်ဝဲအီၤန့ၣ်လီၤ.
အဝဲမ့ၢ်ဝဲဒၣ် ပှၤထူလံၤဖိ Whadjuk-Yued Noongar ကလုာ်ဒူၣ် ပိာ်ခွါတဂၤန့ၣ်လီၤ.
အဝဲမ့ၢ် Wilco Electrical ခီပနံၣ် ပှၤပၢဆှၢရဲၣ်ကျဲၤတၢ်အခိၣ်သဃဲၤတဂၤ, ဒီး မ့ၢ်စ့ၢ်ကီးဝဲဒၣ် Kardan, Baldjaဒီး Bilyaa, လၢအမ့ၢ် တၢ်ကူၣ်လဲၤမၤကၤဒီး တၢ်သူၣ်ထီၣ်ဘှီထီၣ် တၢ်ဖံးတၢ်မၤလီၢ်သ့ၣ်တဖၣ်အံၤ ပှၤပၢဆှၢရဲၣ်ကျဲၤတၢ်အခိၣ်ဒီး ပှၤတ့ဒုးအိၣ်ထီၣ်တၢ်မၤလီၢ်သ့ၣ်တဖၣ်အခိၣ်သဃဲၤတဂၤန့ၣ်လီၤ.
Frank Mitchell စံးဝဲဒၣ်, “အဝဲသ့ၣ်တဂၤစုာ်စုာ်ဒၣ်ဝဲန့ၣ် ဟ့ၣ်လီၤဝဲတၢ်ခွဲးတၢ်ယာ်သ့ၣ်တဖၣ် လၢပှၤဒီကရူၢ်ကန့ၢ်နုာ်လီၤဘၣ်ဆူတၢ်သူၣ်ထီၣ်ဘှီထီၣ် ဒီး စဲးဖီကဟၣ် တၢ်ဖံးတၢ်မၤလီၢ်အပူၤအံၤန့ၣ်လီၤ. ယပာ်ကဖၢလၢယသးနီၣ်နီၣ်လၢ တၢ်ပာ်ပနီၣ်ဝဲဒၣ် ပတၢ်ဖံးတၢ်မၤအံၤ အတၢ်ဒိဘၣ်မၤဟူးသ့ၣ်တဖၣ် လၢယနီၣ်ကစၢ်ဒၣ်ယဲဒီး ယကရူၢ်သ့ၣ်တဖၣ် မၤအီၤ တုၤထီၣ်ထီၣ်ဘး ဒီး အပူၤကွံာ် အနံၣ် ၁ဝအတီၢ်ပူၤန့ၣ် ပသူၣ်ထီၣ်န့ၢ် ပှၤအဘီးရကၠံၤ တၢ်သ့တၢ်ဘၣ် လီၢ်လၤတၢ်ဖံးတၢ်မၤ အိၣ်ဝဲအဂၤ ၇ဝ န့ၣ်လီၤ. ပဟ့ၣ်လီၤဘၣ်စ့ၢ်ကီးခိၣ်ဖး အါန့ၢ် ဒီလၣ် ၁၁ကကွဲၢ် ဆူ ပှၤအဘီးရကၠံၤနၢၤ ပှၤမၤသကိးတၢ်သ့ၣ်တဖၣ် - အဝဲသ့ၣ်တဖၣ်အကျါတခါန့ၣ် ပထံၣ်လၢအဒိၣ်ထီၣ်လဲၢ်ထီၣ် လၢအမ့ၢ် စးထီၣ်ဝဲထဲအနီၣ်ကစၢ်တဂၤဒၣ်ဝဲ ဒီး ခဲကနံၣ်အံၤန့ၣ် အိၣ်ထီၣ်ဝဲဒီး အနီၣ်ကစၢ်ဒၣ်ဝဲအကရူၢ်ဒီး အဝဲသ့ၣ်နီၣ်ကစၢ်ဒၣ်ဝဲ တၢ်သူၣ်ထီၣ်န့ၢ် အဘီးရကၠံၤနၢၤ တၢ်သ့တၢ်ဘၣ် အတၢ်ရဲၣ်တၢ်ကျဲၤသ့ၣ်တဖၣ်န့ၣ်လီၤ.”
Mr Mitchell စံးဝဲဒၣ် အဝဲတၢ်ဆၢတဲာ်ပာ်သးလၢ တၢ်ဆီၣ်ထွဲမၤစၢၤ ပှၤထူလံၤဖိ အပှၤတဝၢသ့ၣ်တဖၣ်န့ၣ် မ့ၢ်ခီဖျိ အသးလၢ အဝဲနီၣ်ဆံးခါ အတၢ်ဒိၣ်ထီၣ်ဘၣ်ဖဲ သဝီဆံးဆံးဖိတဖျၢၣ်အပူၤအဃိန့ၣ်လီၤ.
“ဖဲယသးနံၣ်အိၣ်ဆံဆဲၣ်နံၣ်အခါန့ၣ် ယတံၤသကိးခံဂၤလီၤမၢ်သဒၣ်ကွံာ်ယၤခီဖျိလၢတၢ်သူကသံၣ်မူဘှီးဒီး တၢ်မၤသံလီၤနီၣ်ကစၢ်သးအဃိန့ၣ်လီၤ, ဖဲယသးနံၣ်အိၣ် ၂ဝ ဘျဲၣ်ဘျဲၣ်ဖိအခါ ယဘၣ်သဂၢၢ်တ့ၢ်ဒီးတၢ်သံတၢ်ပှၢ်, ဒီး ဆူမဲာ်ညါယဲၢ်နံၣ်အတီၢ်ပူၤန့ၣ် တၢ်ကဲထီၣ်သးအိၣ်ဝဲဒၣ်ခံမံၤ လၢယက့ၤကွၢ်ကဒါက့ၤအီၤသ့ဒီး အုၣ်ယသးသ့ ဒီးယတၢ်အိၣ်မူ အတၢ်ဃၣ်တရံးအသးအံၤန့ၣ်လီၤ. တၢတခါန့ၣ်မ့ၢ်ဝဲဒၣ် ဖဲယသးနံၣ် ၂၁နံၣ်အခါ ယဖိခွါအိၣ်ဖျဲၣ်ထီၣ် လၢအတအိၣ်ပာ်ဒီး တၢ်ရဲၣ်တၢ်ကျဲၤနီတမံၤဘၣ် ဒီး မ့ၢ်တၢ်တခါလၢအလီၤကမၢကမၣ်လၢယဂီၢ်ဒိၣ်မး ခီဖျိလၢ ယသ့ၣ်ညါလီၤက့ၤယသးလၢ ယကဘၣ်အံးထွဲကွၢ်ထွဲဝဲဒၣ် ယဖိခွါဃံလၤတဂၤအံၤန့ၣ်လီၤ. ယဒိးန့ၢ်ဘၣ်တၢ်ခွဲးတၢ်ယာ်လၢ ယကန့ၢ်မၤလိသ့ဘၣ်ယသးလၢ စဲးဖီကဟၣ်အတၢ်သ့တၢ်ဘၣ်. စဲးဖီကဟၣ် တၢ်သ့တၢ်ဘၣ်အံၤ ယတၢ်နာ်န့ၢ်လီၤသးတအိၣ်လၢ ယ=ကမၤကန့ၢ် ထီၣ်ဘးဘၣ်, နာ်သက့ ခီဖျိလၢပိာ်ခွါတဂၤ, လၢအမ့ၢ်ယဖါတံၢ် အတၢ်နာ်န့ၢ်ယၤ, ဒီး တုၤမုၢ်မဆါတနံၤအံၤန့ၣ် အဝဲသြီနုာ်န့ၢ်ဝဲယသးသဟီၣ်လၢ ယအဲၣ်ဒိးဆဲးမၤဝဲတၢ်မၤအံၤန့ၣ်လီၤ.”
ပှၤအဂၤတဂၤလၢ အထိၣ်ဟူးထိၣ်ဂဲၤထီၣ်ပှၤသးသဟီၣ်န့ၣ် မ့ၢ်ဝဲဒၣ် Nedd Brockmann - လၢအမ့ၢ် ပှၤတဂၤလၢအဒိးန့ၢ်ဘၣ်ဝဲဒၣ် ၂ဝ၂၆ ပှၤအီစထြ့လယါဖိ သးစၢ် ဒီနံၣ်ညါ ခိၣ်ဖးတၢ်လၤကပီၤန့ၣ်လီၤ.
စးထီၣ်ဖဲအဝဲသးနံၣ်အိၣ် ၂ဝ ဘျဲၣ်ဘျဲၣ်ဖိအခါန့ၣ် အဝဲစးထီၣ် ဟူးဂဲၤမၤစၢၤ ကတိၤန့ၢ်ခဲးတၢ်ဒီး ဃုန့ၢ်ဝဲ ကျိၣ်စ့တိၢ်မၤဘူၣ်လၢ ပှၤဟံၣ်ဃီတအိၣ်ဘၣ်သ့ၣ်တဖၣ်အဂီၢ်န့ၣ်လီၤ.
Nedd Brockmann စံးဝဲဒၣ်, “ယဆိကမိၣ်န့ၣ် မ့ၢ်ဝဲတၢ်တခါလၢ ယမၤအီၤနီၣ်ကီၢ်. ယဆိကမိၣ်တၢ်အံၤန့ၣ်မ့ၢ်ဝဲဒၣ်တၢ်ဂ့ၢ်တခါ, ပမၤကဲထီၣ်လိၣ်ထီၣ်အီၤသ့ဒ်လဲၣ်န့ၣ် ပဆိကမိၣ်ပာ်လီၤတၢ်ရဲၣ်တၢ်ကျဲၤအဂ့ၤကတၢၢ်သ့ဝဲထီဘိ, ဒီး တၢ်အနးကတၢၢ်လၢပမၤအီၤသ့ဘၣ်ဃးတၢ်ဂ့ၢ်အံၤတခီန့ၣ်မ့ၢ်ဝဲ ပတမၤတၢ်နီတမံၤဘၣ်န့ၣ်လီၤ.”
ခဲကနံၣ်အံၤ Mr Brockmann လၢအသးနံၣ်အိၣ် ၂၇နံၣ်အံၤ ဃုၢ်ထၢမၤန့ၢ်ဝဲဒၣ် ဒီလၣ် လၢအကကွဲၢ်အါမး — လၢအသူဝဲ အဝဲအနီၣ်ကစၢ်ဒၣ်ဝဲ ကျိၤကျဲလီၤဆီတခါ လၢအမ့ၢ် တၢ်ဃ့ၢ်ဃံၤတၢ်ပြၢ—မၤရသိၤ န့ၣ်လီၤ.
အဝဲမ့ၢ် ပှၤသ့ပှၤဘၣ်လၢ စဲးဖီကဟၣ်တၢ်မၤဖဲ Forbes တဂၤ ဒီး အဝဲဃ့ၢ် တၢ်ဃ့ၢ်ယံၤ ဘူးထီၣ်လၢ ၄,ဝဝဝ ကံလိမံထၢၣ်ဃၣ်ဃၣ်, စးထီၣ်လၢ ဖၢၣ်သ် Cottesloe Beach ပီၣ်လဲၣ်နံၤ တုၤဝဲဒၣ်ဆူ Bondi ဖဲဆ့ၣ်ဒနံၤ လၢအယံၤအါန့ၢ်ဝဲ ၄၆သီန့ၣ်လီၤ.
စးထီၣ်ဖဲန့ၢ်လံၤလံၤန့ၣ်, အဝဲစးထီၣ်ဒုးအိၣ်ထီၣ်ဝဲဒၣ် Nedd's Uncomfortable Challenge, လၢအထိၣ်ဟူးထီၣ်ဂဲၤထီၣ်ပှၤဂုၤပှၤဂၤသ့ၣ်တဖၣ်အသးသဟီၣ် ဒ်သိး ကလူၤပိာ်ထွဲအဝဲတၢ်တီခိၣ်ရိၤမဲအံၤန့ၣ်လီၤ.
ပှၤအီစထြ့လယါဖိလၢအဂ့ၤကတၢၢ်ဒီနံၣ်ညါခိၣ်ဖးတၢ်လၤကပီၤလွံၢ်ခါတခါန့ၣ် လၢပှၤဒိးန့ၢ်ဘၣ်အီၤန့ၢ် မ့ၢ်ဝဲဒၣ်ကရူၢ်တဖု လၢအပၣ်ဃုာ်ဖဲ ပှၤဒိးန့ၢ်ဘၣ်ခိၣ်ဖးလၢခံကတၢၢ် ၃၃ဂၤအကျါ — ဒီးအဝဲသ့ၣ်တဂၤစုာ်စုာ်န့ၣ် လီၤဆီလိာ်အသးဒီး အိၣ်ဝဲဒီး အတၢ်လဲၤခီဖျိလၢ အလီၤတိၢ်လီၤဆီသ့ၣ်တဖၣ်န့ၣ်လီၤ.
ကိတိာ်ခိၣ်ကျၢၢ် အဲးသနံး အဲလ်ဘနံဆံး စံးဝဲဒၣ် ပှၤဒိးန့ၢ်ဘၣ်ခိၣ်ဖးတၢ်လၤကပီၤသ့ၣ်တဖၣ်အံၤ မ့ၢ်ဝဲတၢ်ကဲအီစထြ့လယါကီၢ်ခၢၣ်စးလၢအဂ့ၤကတၢၢ်သ့ၣ်တဖၣ်န့ၣ်လီၤ.
