အ့ဒံယါဒီး အီစထြ့လယါကီၢ် ဘိးဘၣ်သ့ၣ်ညါလီၤဝဲ နယူချံယၢ, တၢ်ဘံၣ်တၢ်ဘၢ ဒီး တၢ်ဒီသဒၢ ဂ့ၢ်ဝီ အတၢ်ဖီၣ်လိာ်စုမၤသကိးတၢ်သ့ၣ်တဖၣ် ဖဲလၢ အ့ဒံယါကိတိာ်ခိၣ်ကျၢၢ် Narendra Modi ဟဲဟးဖဲအီစထြ့လယါကီၢ်အခါန့ၣ်လီၤ. လၢသၢနံၣ်အတီၢ်ပူၤ အဝဲအတၢ်ဟဲအဆိကတၢၢ်တဘျီအံၤန့ၣ် အိၣ်ဝဲဒီး တၢ်တူၢ်လိာ်ခီၣ်ဆၢအီၤ ပှဲၤဒီးတၢ်တူၢ်ဘၣ်လၢအအိၣ်ကျဲၣ်ကျီအသးသ့ၣ်တဖၣ်, လၢအမ့ၢ် ဘျီၣ်ဖးဒိၣ်အပူၤန့ၣ် အိၣ်ပှဲၤဒီး ပှၤဆီၣ်ထွဲအီၤသ့ၣ်တဖၣ်အသိး, အိၣ်စ့ၢ်ကီးဒီး ပှၤပာ်ဖှိၣ်ထီၣ်သးလၢအပာ်ဖျါထီၣ် တၢ်ထီဒါ အဝဲအပဒိၣ် အတၢ်ဖံးတၢ်မၤ လၢအဘၣ်ဃး ပှၤဟီၣ်ခိၣ်ဖိခွဲးယာ် အတၢ်မၤနီၣ်မၤဃါသ့ၣ်တဖၣ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
ဖဲလၢအဝဲဒီး အ့ဒံယါကီၢ်ကိတိာ်ခိၣ်ကျၢၢ် Narendra Modi ဆဲးလီၤသကိးစုမုၢ်ကျၢၢ် ဘၣ်ဃးယူးရ့နံယါ တၢ်သးလီၤပလိာ်တခါ လၢကမၤကတၢၢ်ကွံာ် တၢ်တီဆှၢမ့ၣ်ဆၣ် အတၢ်တံာ်တာ်အိၣ်အါန့ၢ် နံၣ်ဆံဖှိၣ်အံၤအဂီၢ်ဝံၤအလီၢ်ခံ ကတိၤလီၤတၢ်အခါ, ကိတိာ်ခိၣ်ကျၢၢ် Anothony Albanese စံးဝဲဒၣ်, “အီစထြ့လယါကီၢ် အတၢ်ရ့လိာ်မုာ်လိာ်ဒီးကီၢ်အ့ဒံယါန့ၣ် အရ့ဒိၣ်န့ၢ်ဒ်တၢ်တနံၤညါအံၤန့ၣ်အတအိၣ်လၢၤဘၣ်. ပတၢ်မၤသကိးအံၤ အဂံၢ်ဆူၣ်ထီၣ်န့ၢ်လၢညါအခါန့ၣ်လီၤ. ပဟ့ၣ်နီၤလီၤသကိး ပတၢ်ပညိၣ်လီၤဖဲ တၢ်မၤဒိၣ်ထီၣ်ယိာ်ထီၣ် ပတၢ်ရ့လိာ်မုာ်လိာ် လၢအအိၣ်ဖဲပထံကီၢ်ခံဘ့ၣ်အံၤဘၢၣ်စၢၤန့ၣ်လီၤ.”
ဖဲ ၂ဝ၁၄နံၣ်န့ၣ် အီစထြ့လယါကီၢ်ဒီး အ့ဒံယါကီၢ် ဆဲးလီၤဝဲ ကမျၢၢ်နညူချံယါ တၢ်သးလီၤပလိာ်တခါ နာ်သက့ ခီဖျိလၢ တၢ်ဘၣ်ယိၣ်အိၣ်ဒီး တၢ်ကသူအီၤလၢ တၢ်စုကဝဲၤ မ့ၣ်အူဆၣ်ဂီၢ်အဃိ တၢ်တီဆှၢ ယူးရ့နံယါန့ၣ် တၢ်မၤအီၤတအိၣ်ထီဘိဘၣ်.
ခဲကနံၣ်အံၤန့ၣ် ဒ်သိးလၢ ကကဲထီၣ်တၢ်မၤစၢၤ လၢအဝဲသ့ၣ် နယူချံယၢ ဂံၢ်သဟီၣ် အတၢ်ပညိၣ်ကွၢ်စိအဂီၢ် အီစထြ့လယါကီၢ် သးလီၤပလိာ်လၢ အကဆှၢဟးထီၣ်ဝဲဒၣ် ယူးရ့နံယါ ဆူအ့ဒံယါကီၢ်န့ၣ်လီၤ.
“တၢ်အဝဲအံၤန့ၣ် အကဒါလီၤန့ၣ်ဝဲကျဲလၢ အီစထြ့လယါကီၢ် ယူးရ့နံယါ တၢ်ပီးတၢ်လီသ့ၣ်တဖၣ် လၢအကလဲၤဆူ အ့ဒံယါကီၢ်ဒီး အကဟ့ၣ်လီၤ မၤပှဲၤထီၣ်ဝဲဒၣ် ပတၢ်ပညိၣ်ကွၢ်စိ လၢဂံၢ်သဟီၣ်ကဆှီ အဂီၢ်န့ၣ်လီၤ.”
အဝဲအံၤန့ၣ် အတမ့ၢ်တၢ်သးလီၤပလိာ် ထဲတခါဧိၤလၢ ကိတိာ်ခိၣ်ကျၢၢ်သ့ၣ်တဖၣ်အံၤ မၤအီၤဘၣ်.
ဘိးဘၣ်သ့ၣ်ညါလီၤစ့ၢ်ကီးဝဲဒၣ် တၢ်ကူၣ်ဘၣ်ကူၣ်သ့ဂ့ၢ်ဝီ အတၢ်သးလီၤပလိာ်, လၢအပၣ်ဃုာ် တၢ်ဟ့ၣ်ခွဲးလၢ တၢ်ကအိးထီၣ် Flinders ဖၠၣ်စိမိၤကရၢၢ်ဖဲအ့ဒံယါကီၢ်အပူၤဒီး မၤအါထီၣ် အီစထြ့လယါ တၢ်လုၢ်အီၣ်သးသမူ တၢ်မၤလိ အတၢ်ရဲၣ်တၢ်ကျဲၤ ဖဲအ့ရှၢၢ်ထံကီၢ်အပူၤန့ၣ်လီၤ.
ခဲကနံၣ်အံၤ အ့ဒံယါကီၢ် အၢၣ်လီၤစ့ၢ်ကီးဝဲဒၣ်လၢ အကဟ့ၣ်လီၤကဒါက့ၤ ပှၤထူလံၤဖိအတၢ်လီၤစၢၤ ဆူအီစထြ့လယါကီၢ်, လၢအမ့ၢ် ခဲကနံၣ်အံၤန့ၣ် ဘၣ်တၢ်ပာ်ဃာ်ဝဲဒၣ်အီၤဖဲ ပဒိၣ်တၢ်ပာ်တၢ်ကွၢ်ကီအလီၢ် — Government Museum of Chennai န့ၣ်လီၤ.
တၢ်လီၤစၢၤလီၤသွဲၣ်အံၤ တၢ်ကဆှၢကဒါက့ၤအီၤဆူ Traditional Custodians ပှၤထူလံၤဖိအအိၣ်, ဒီး တကတီၢ်ဃီန့ၣ် ကိတိာ်ခိၣ်ကျၢၢ် Anthony Albanese ဘိးဘၣ်သ့ၣ်ညါလီၤစ့ၢ်ကီးဝဲလၢအကက့ၤဟ့ၣ်လီၤကဒါ တၢ်ဆဲးတၢ်လၤ ပီးလီ တဘျုးခါ ဆူအ့ဒံယါအအိၣ်, လၢအမ့ၢ်တၢ်ဆဲးတၢ်လၤပီးလီ လၢအဘၣ်တၢ်ပာ်ဖှိၣ်ဃာ်အီၤဖဲ နယူဆီၣ်သ်ဝံ National Gallery and Art Gallery, ဒီး တၢ်ဟ့ၣ်လီၤကဒါက့ၤအံၤမ့ၢ်ဝဲတၢ်မုာ်သးမၤကလီတခါန့ၣ်လီၤ.
အ့ဒံယါမီၢ်သီမူဒါခိၣ်ဆူအီစထြ့လယါကီၢ်, Nagesh Singh တဲဘၣ်ဝဲ SBS Hindi တၢ်ရဲၣ်တၢ်ကျဲၤလၢ တၢ်လိာ်ကွဲအဂ့ၢ်န့ၣ် ပၣ်ဃုာ်စ့ၢ်ကီးဝဲဒၣ်ဖဲတၢ်တၢၣ်ပီၣ်တဲသကိးတၢ်အတၢ်ရဲၣ်တၢ်ကျဲၤအပူၤန့ၣ်လီၤ.
“အီစထြ့လယါကီၢ်အံၤမ့ၢ်ဝဲဒၣ် တၢ်လိာ်ကွဲ ဂံၢ်ဘါအဆူၣ်ကတၢၢ်ထံကီၢ်တဘ့ၣ်, လၢအမ့ၢ်ဝဲဒၣ် တၢ်ရဲၣ်ကျဲၤ တၢ်လိာ်ကွဲအဂီၢ်မ့ၢ်ဂ့ၤ, တၢ်လိာ်ကွဲ ကသံၣ်ကသီမ့ၢ်ဂ့ၤ, တၢ်လိာ်ကွဲ စဲးဖီကဟၣ်မ့ၢ်ဂ့ၤ, တၢ်လိာ်ကွဲ ဂံၢ်ခီၣ်ထံးအတၢ်သူၣ်ထီၣ်ဆီလီၤမ့ၢ်ဂ့ၤန့ၣ်လီၤ. အီစထြ့လယါကီၢ် အကကဲဝဲဒၣ် ဟံၣ်ကစၢ်လၢအတူၢ်လိာ်မၤဝဲ အိးလါပ့းဖဲဘြ့ၣ်စဘဲဝ့ၢ်န့ၣ်လီၤ. ပအိၣ်ဒီးတၢ်သူၣ်ဆူၣ်သးဂဲၤ လၢကန့ၢ်တူၢ်လိာ်မၤဘၣ် ၂ဝ၃၆နံၣ် အိးလါပ့း ဒီး ၂ဝ၃ဝနံၣ် Commonwealth Games ဖဲအ့ဒံယါကီၢ်ပူၤန့ၣ်လီၤ.”
အ့ဒံယါကီၢ်အံၤ အိၣ်ကတီၤလံအသးလၢ အကကဲထီၣ်ဘၣ် ဟီၣ်ခိၣ်ဒီဘ့ၣ် မုၢ်ကျိၤဝဲၤကွာ် အဒိၣ်ကတၢၢ် သၢဖုတဖု ဒီး အီစထြ့လယါကီၢ်န့ၣ် ပၣ်ဃုာ်ဝဲဒၣ်ဖဲ ထံကီၢ်လၢအအိၣ်ရဲၣ်လီၤအသးလၢ တၢ်ကသူအီၤဒ်သိး သိၣ်မှံၤတၢ်မၤသကိးအဂီၢ်န့ၣ်လီၤ.
ခဲကနံၣ်အံၤန့ၣ် ထံကီၢ်ခံဘ့ၣ်အံၤအဘၢၣ်စၢၤန့ၣ် အိၣ်ဝဲဒၣ်ဒီး တၢ်ကူၣ်လဲၤမၤကၤ တၢ်ဆါပှ့ၤခီလဲ လၢအလီၤလၢအါန့ၢ် ဒီလၣ် ၅၉ ဘံလယၢၢ်န့ၣ်လီၤ. ဘၣ်ဆၣ်သနာ်က့ တၢ်ပာ်အီၤအဒိၣ်ကတၢၢ်န့ၣ်မ့ၢ်ဝဲဒၣ် တၢ်ဒီသဒၢဂ့ၢ်ဝီန့ၣ်လီၤ.
လၢတၢ်မၤလဲၢ်ထီၣ် တၢ်ဖီၣ်လိာ်စုမၤသကိးတၢ်အဂီၢ် Fiji ဒီး အီစထြ့လယါကီၢ် ဆဲးလီၤစုမုၢ်ကျၢၢ်ဝံၤအလီၢ်ခံတနွံ — ဒီး တရူးကီၢ် မၤကွၢ်ဝဲဒၣ် တၢ်ခးထီၣ်မျိာ်သၣ် ဖဲထံဂုၤကီၢ် ထံအကဟီၣ်ဝီၤသ့ၣ်တဖၣ်အပူၤဝံၤစှၤကိးသီအလီၢ်ခံအံၤ, အ့ဒံယါဒီး အီစထြ့လယါကီၢ် ဘိးဘၣ်သ့ၣ်ညါလီၤဝဲဒၣ်အတၢ်ပာ်သူၣ်ပာ်သး လၢခါဆူညါန့ၣ် ကမၤလဲၢ်ထီၣ်ဝဲဒၣ် တၢ်ဒီသဒၢဒီး တၢ်ဘံၣ်တၢ်ဘၢ အတၢ်ဖီၣ်လိာ်စုမၤသကိးတၢ်, လၢပၣ်ဃုာ် တၢ်ပာ်တၢ်ပညိၣ်လီၤဖဲ ပီၣ်လဲၣ်အတၢ်ဘံၣ်တၢ်ဘၢ ဖဲ Indo Pacific အပူၤန့ၣ်လီၤ.
“တၢ်ဘိးဘၣ်ရၤလီၤသ့ၣ်တဖၣ်အံၤန့ၣ် မ့ၢ်တၢ်ပာ်ဖျါထီၣ် ပဟ့ၣ်နီၤလီၤသကိး တၢ်ပာ်သးကျၢၤမုဆှု လၢတၢ်ကပာ်ဝဲဒၣ် တၢ်မုာ်တၢ်ခုၣ် ဂၢၢ်ဂၢၢ်ကျၢၤကျၢၤဒီး တၢ်အီၣ်ကုၤအီပှဲၤ အိၣ်ဘီၣ်အိၣ်ညီဖဲ Indo-Pacific ဟီၣ်ကဝီၤအပူၤန့ၣ်လီၤ. ပကမၤဆူၣ်ထီၣ် တၢ်တၢၣ်ပီၣ်မၤသကိး တၢ်ရဲၣ်တၢ်ကျဲၤခိၣ်သ့ၣ်, မၤအါထီၣ် တၢ်ဒီသဒၢဝဲၤကျိၤ အတၢ်မၤလိသ့ၣ်တဖၣ်ဒီး လၢခါဆူညါအဂီၢ်န့ၣ် ကသူၣ်ထီၣ်သကိး တၢ်ဒီသဒၢသုးကျိၤသ့ၣ်တဖၣ်အံၤအဘၢၣ်စၢၤ တၢ်ဝးတရံးဖံးမၤတၢ်သ့ၣ်တဖၣ်န့ၣ်လီၤ. ပသးလီၤပလိာ်လၢ ပကတၢၣ်ပီၣ်တဲသကိးဝဲဒၣ် တၢ်မၤဂုၤထီၣ်ပသီထီၣ် လၢအဘၣ်ဃးဒီး တၢ်ဒီသဒၢဂ့ၢ်ဝီ ဖဲ Indo Pacific အပူၤ လၢအပာ်ဖျါဝဲဒၣ် ပတၢ်ဟ့ၣ်နီၤလီၤသကိး မုၢ်ကျိၤဝဲၤကွာ် အတၢ်န့ၢ်ဘျုးန့ၢ်ဖှိၣ်သ့ၣ်တဖၣ်န့ၣ်လီၤ.”
Mr Modi အတၢ်ဟဲဆူအီစထြ့လယါကီၢ်အံၤ မ့ၢ်တၢ်ထုးန့ၢ်စ့ၢ်ကီး တၢ်သးစၢၢ်ဆၢ လၢအတဂ့ၤဘၣ်တကပၤ, ဒ်သိးအပူၤကွံာ်လၢညါ အဝဲဟဲတ့ၢ်ခံဘျီအသိးန့ၣ်လီၤ.
ဖဲအပူၤကွံာ်တနွံန့ၣ် အီစထြ့လယါကီၢ် ကီၢ်စၢဖှိၣ်ပၢၤကီၢ် ထုးထီၣ်ဝဲဒၣ် တၢ်ဟ့ၣ်ပလီၢ်လၢအဖိသဲစးတၢ်ဘျၢတခါ လၢအမ့ၢ် ခိၣ်နၢ်အံၤမ့ၢ်ဟဲတုၤလီၤဖဲကီၢ်မိၢ်ပှၢ်အံၤအပူၤန့ၣ် ပှၤသးစၢ်တဂၤတဲပျံၤဝဲလၢ အကမၤသံအီၤန့ၣ်လီၤ.
ဖဲတနွံညါအံၤန့ၣ်, ပၢၤကီၢ် ဘၣ်ထုးထီၣ်ကွံာ်ဝဲဒၣ် ပှၤမံၤဟူသၣ်ဖျါဖဲအီးလဲ—လီမုၢ်ပျီအပူၤတဂၤ လၢအကျဲးစၢး နုာ်လီၤဝဲဒၣ်ဆူ မဲလ်ဝ့ၢ် တမှံၤဟံၣ်ဒွဲ (ဟိးထဲလ်) လၢအမ့ၢ် အ့ဒံယါ ကိတိာ်ခိၣ်ကျၢၢ်အံၤ အိၣ်ပတုာ်အလီၢ်, ဒီး အနီၣ်ကစၢ်ဒၣ်ဝဲက့ၤဒိလီၤကဒါတၢ်ဂီၤလၢအကိးပသူ တဲအၢတဲသီ ဆိၣ်ဝဲ ခိၣ်နၢ်အံၤန့ၣ်လီၤ.
တကတီၢ်ဃီန့ၣ် ထံဂုၤကီၢ်ဂၤတၢ်ပျၢ်ဖျဲး— Amnesty International ပဲၤအၢဝဲဒၣ် အ့ဒံယါပဒိၣ် မ့ၢ်လၢအ့ဒံယါကီၢ် တၢ်အိၣ်ဆိးအတီၤပတီၢ်သ့ၣ်တဖၣ်လီၤဖုၣ်လီၤ, ဒီး ပဒိၣ်အံၤ ပာ်ဝဲတၢ်ပညိၣ်လီၤဖဲ ပှၤကွဲးတၢ်ကစီၣ်ဖိသ့ၣ်တဖၣ်ဒီး ပှၤသ့လံာ်လဲၢ်ပတီၢ်ထီသ့ၣ်တဖၣ် လၢအမ့ၢ်ခီဖျိ တၢ်ထီဒါဝဲဒၣ် တၢ်မၤတၢ်စုဆူၣ်ခီၣ်တကးအသဲစးတဆီန့ၣ်လီၤ.
ဖဲလါယူၤလံ ၉သီအနံၤ, မုၢ်လွံၢ်နံၤန့ၣ် ပှၤဟဲပာ်ဖှိၣ်ထီၣ်သးဖဲ Docklands တၢ်ကွၢ်ကီပျီ အချၢ လၢအထီဒါ Modi အတၢ်ဟဲတုၤလီၤ အိၣ်ဝဲဒၣ်ခံဒူၣ်, ပှၤပာ်ဖျါထီၣ်တၢ်ထီဒါ တဒူၣ်န့ၣ်ပာ်ဝဲတၢ်ပညိၣ်လီၤဖဲ ကိတိာ်ခိၣ်ကျၢၢ် ပှၤဟီၣ်ခိၣ်ဖိခွဲးယာ်တၢ်မၤနီၣ်မၤဃါ တၢ်ဂ့ၢ်အဖီခိၣ် ဒီး မ့မ့ၢ်လၢအဂၤတဒူၣ်တခီ မ့ၢ်ဝဲဒၣ် ပှၤဆီၣ်ထွဲ စုထွဲသနူ ပှၤပာ်ဖျါထီၣ်တၢ်ထီဒါသ့ၣ်တဖၣ်, လၢအကိးထီၣ်ဝဲဒၣ် အ့ဒံယါကိတိာ်ခိၣ်ကျၢၢ်အံၤဒီး ပှၤအ့ဒံယါဖိ အဂုၤအဂၤသ့ၣ်တဖၣ် ကက့ၤကဒါဆူ အဝဲသ့ၣ်အဟံၣ်အဃီ အထံအကီၢ်န့ၣ်လီၤ.
ပှၤထီဒါ တၢ်သးဟ့အံးစလါ သိၣ်မှံၤကရၢ—Alliance Against Islamophobia ပှၤပၢၤလီၢ်ဆ့ၣ်နီၤ Waseem Razei စံးဝဲဒၣ် ပှၤပာ်ဖျါထီၣ်တၢ်ထီဒါလၢအဝဲအကရူၢ်အပူၤသ့ၣ်တဖၣ်န့ၣ် ဘၣ်ယိၣ်ဘၣ်ဘှီတၢ်ဘၣ်ဃးဒီး ပှၤဟီၣ်ခိၣ်ဖိခွဲးယာ် ဖဲအ့ဒံယါကီၢ်ပူၤ ဒီး တၢ်ဘၣ်ဒိဘၣ်ထံး ပှၤတဝၢ လၢအဆံးသ့ၣ်တဖၣ်န့ၣ်လီၤ.
“ခီဖျိလၢ တၢ်မၤဘၣ်ထံး ပှၤဟီၣ်ခိၣ်ဖိခွဲးယာ်သ့ၣ်တဖၣ် ကဲထီၣ်အသး ဖဲအ့ဒံယါကီၢ်ပူၤ ဒီး ထီဒါဝဲဒၣ် ပှၤတဝၢ ကရူၢ် လၢအဆံးသ့ၣ်တဖၣ်အါမး, မ့ၢ်လၢထံဂုၤကီၢ်ဂၤ အတၢ်နုာ်လီၤဂီၤစုဂီၤခီၣ် ဒ်သိးဖဲအီစထြ့လယါကီၢ်ပူၤအံၤ လၢအမ့ၢ် တၢ်ဆှၢနုာ်လီၤဝဲဒၣ် တၢ်သးဟ့, လၢအလီၤဂာ်ဒ်သိး တၢ်သးဟ့ဖဲအ့ဒံယါကီၢ်ပူၤန့ၣ် တၢ်ဟဲစိာ်နုာ်လီၤအီၤဖဲ အီစထြ့လယါကီၢ်ပူၤအံၤန့ၣ်လီၤ.”
ဘၣ်ဆၣ်သနာ်က့ Mr Modi အံၤပှၤအ့ဒံယါဖိလၢအအိၣ်ဆိးဖဲအီစထြ့ခယါကီၢ်ပူၤ ဒီးဆီၣ်ထွဲအီၤသ့ၣ်တဖၣ် အိၣ်ဝဲအါအါဂီၢ်ဂီၢ်န့ၣ်လီၤ.
Canberra India Council—ခဲဘါရၣ် အ့ဒံယါ ကီၣ်ကးကရၢ ပှၤပၢၤလီၢ်ဆ့ၣ်နီၤ Deepak-Raj Gupta စံးဝဲဒၣ် Modi မ့ၢ်ဝဲဒၣ် ပှၤကညီလၢအမံၤဟူသၣ်ဖျါဒိၣ်မးသၢကလုာ်အကျါ တကလုာ်: ဒီးပာ်ဖျါထီၣ်ဝဲဒၣ် ပှၤသၢကလုာ်န့ၣ် မ့ၢ်ဝဲဒၣ် ပှၤဂဲၤလိာ်ထံရူၢ်ကီၢ်သဲးသ့ၣ်တဖၣ်, ပှၤဂဲၤဒိဖဲ Bollywood လၢအမံၤဟူသၣ်ဖျါသ့ၣ်တဖၣ်ဒီး ပှၤလိာ်ကွဲ ခြ့ၣ်ကဲး တၢ်လိာ်ကွဲသ့ၣ်တဖၣ်န့ၣ်လီၤ.
လၢ Bhavan Modi အဂီၢ်န့ၣ်, တၢ်ဟဲဟးတဘျီအံၤ မ့ၢ်တၢ်မၤဆူၣ်ထီၣ်ဝဲဒၣ် ပှၤအ့ဒံယါဖိလၢအအိၣ်ဆိးဖဲထံကီၢ်အချၢသ့ၣ်တဖၣ် တဂၤဒီးတဂၤ အတၢ်စၢဃာ်လိာ်သးန့ၣ်လီၤ.
“ဖဲ Modi ဟဲဟးအခါအံၤန့ၣ် ပန့ၢ်ဘၣ်စ့ၢ်ကီး တၢ်ပာ်ကဖၢလၢပသး လၢတၢ်ကမၤအါထီၣ် ကလုာ်ဒူၣ်ဆဲးလၤအါကလုာ်သနူဒီး ဘျးစဲလိာ်သးတပူၤဃီ, မၤဆူၣ်ထီၣ်ပဂံၢ်ပဘါသ့ၣ်တဖၣ်န့ၣ်လီၤ.”
ဖဲတၢ်ကွၢ်ကီအပျီန့ၣ် တၢ်တူၢ်လိာ်ခီၣ်ဆၢဝဲဒၣ် Modi ဒ်သိး ရီၣ်စတါ တဂၤအသိး လၢအဒုးနဲၣ်ဖျါထီၣ်အသးဖဲ ပှၤဂီၢ်မုၢ်လၢအနီၣ်ဂံၢ်ကအိၣ်ဝဲဒၣ် အဂၤ ၃ဝ,ဝဝဝ ဃၣ်ဃၣ်န့ၣ်လီၤ.
ဖဲအီစထြ့လယါကီၢ်ပူၤအံၤ မဲလ်ဘၢဝ့ၢ်မ့ၢ်ဝဲဒၣ် ပှၤအ့ဒံယါဖိ ဟဲအိၣ်ဆိး အနီၣ်ဂံၢ်အါကတၢၢ် အဝ့ၢ်တဖျၢၣ်န့ၣ်လီၤ.
ဒီးပှၤအ့ဒံယါဖိ လၢအအိၣ်ဆိးဖဲအီစထြ့လယါကီၢ် တၢ်လီၢ်အဂုၤအဂၤ အကထိအါမးသ့ၣ်တဖၣ် ဟဲစ့ၢ်ကီးဝဲဒၣ်ဖဲ တၢ်တူၢ်လိာ် ခီၣ်ဆၢ Modi အမူးအံၤန့ၣ်လီၤ.
