Ben Carroll မၤဝဲတၢ်အၢၣ်လီၤအီလီၤဒ်သိးဝံးထိရံယါကီၢ်စဲၣ်ခိၣ်အသီတဂၤအသိး, ဖဲလၢ Jacinta Allan တဒိးန့ၢ်ဘၣ် လ့ၢ်ဘၢၣ်ဘျီၣ်ဒိၣ်ထးခီ အတၢ်ဆီၣ်ထွဲလၢၤဘၣ်ဝံၤအလီၢ်ခံ ဒီး အဝဲနုာ်လီၤကဒါဖဲအလီၢ်န့ၣ်လီၤ. ဖဲမုၢ်ယူာ်—မုၢ်ခံနံၤဂီၤခီန့ၣ် တၢ်ဖ့ၣ်ဆၢဒီး တၢ်ဘံဘူ ဟဲဆူၣ်ထီၣ်အါထီၣ်ဖဲ ဘျီၣ်ဒိၣ်ထးခီတၢ်အိၣ်ဖှိၣ်အပူၤ ဒီး စံၣ်ညီၣ်ကွီၣ်ခိၣ်ကျၢၢ် Sonya Kilkenny အိၣ်ဒီး တၢ်တာ်တၢ်ဒီးအီၤနာ်သက့ လၢခံကတၢၢ်န့ၣ် ပှၤပြၢလိာ်သးဒီးအီၤတအိၣ်နီတဂၤဘၣ်ဒီး အဝဲဘၣ်တၢ်ဃုထၢထီၣ်အီၤဒ်သိးကီၢ်စဲၣ်ခိၣ်တဂၤန့ၣ်လီၤ. တချုးဖဲလါနိးဝ့ဘၢၣ်အတီၢ်ပူၤ တၢ်ကမၤကီၢ်စဲၣ်တၢ်ဃုထၢဒ်ဘၣ်န့ၣ် ဝံစိာ်တီဆှၢကိတိာ် Gabrielle Williams ကဟံးဝဲမူဒါဒ်သိး ကီၢ်စဲၣ်ခိၣ်—၂ တဂၤအသိးန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
Jacinta Allan ဟးထီၣ်ကွံာ်လၢ အလီၢ်အလး ဒ်သိးဝံးထိရံယါကီၢ်စဲၣ်ခိၣ်အသိးဒီး အဝဲအကီၢ်စဲၣ်ခိၣ်—၂, Ben Carroll ထီၣ်က့ၤဝဲဒၣ်အလီၢ် ဒီး ဖဲမုၢ်ခံနံၤမုၢ်ဆါခီန့ၣ် ဆဲးလီၤဝဲစုမုၢ်ကျၢၢ်ဖဲ Government House န့ၣ်လီၤ.
အခီၣ်ထံးအခါန့ၣ် Ms Allan အၢၣ်လီၤလၢ အဝဲကကျဲးစၢးဖီၣ်ဂၢၢ်ဃာ်ဝဲဒၣ် အလီၢ်အလး နာ်သက့ တချုးဖဲ ဘျီၣ်ဒိၣ်ထးခီ တၢ်အိၣ်ဖှိၣ်အပူၤ တၢ်ဘၣ်ဂံာ်ဂုာ်ကဲထီၣ်ဒ်ဘၣ် အမံးနံး သၢဆံ န့ၣ် ဘိးဘၣ်သ့ၣ်ညါလီၤဝဲဒၣ်အတၢ်ဆၢတဲာ်အံၤန့ၣ်လီၤ.
“တၢ်အဝဲအံၤန့ၣ် လၢလ့ၣ်ဘၢၣ်ပၣ်တံၣ်ဒီး ပှၤဝံးထိရံယါဖိသ့ၣ်တဖၣ်အဂီၢ်န့ၣ် မ့ၢ်ဝဲတၢ်လၢအဘၣ်န့ၣ်လီၤ. ဒ်သိးပတၢ်သိၣ်တၢ်သီတၢ်ဘျၢအိၣ်အသိးန့ၣ်, ယတၢ်မၤနီၣ်မၤဃါဒီး ယတၢ်ရဲၣ်တၢ်ကျဲၤသ့ၣ်တဖၣ်, ယကဟ့ၣ်လီၤအီၤဖဲကရၢဖိတၢ်ဟ့ၣ်လီၤတၢ်ဖးအပူၤအဂီၢ်, ယအိၣ်ကတီၤပာ်ဝဲယသးန့ၣ်လီၤ. ယနာ်လၢယကမၤနၢၤတၢ်. ဘၣ်ဆၣ်သနာ်က့ ဖဲတၢ်ဃုထၢဘူးထီၣ်အဆၢကတီၢ် တၢ်မၤသးဒ်အံၤန့ၣ် မ့ၢ်တၢ်ဟံးထီၣ်ကွံာ် ဂံၢ်ထံးကံၢ်စီလၢအလုၢ်ဒိၣ်ပှ့ၤဒိၣ်သ့ၣ်တဖၣ်န့ၣ်လီၤ.”
တၢ်ကမၤတၢ်ဃုထၢအိၣ်တ့ၢ်က့ၤဒၣ်ထဲလွံၢ်လါလီၤအဃိ, အဝဲစံးဝဲဒၣ် တၢ်လုၢ်ဒိၣ်ပှ့ၤဒိၣ်ကတၢၢ်န့ၣ်မ့ၢ်ဝဲဒၣ် တၢ်ဆၢကတီၢ်န့ၣ်လီၤ.
“တၢ်အရ့ဒိၣ်န့ၢ်တၢ်အံၤန့ၣ်မ့ၢ်ဝဲ တၢ်မၤသးဒ်အံၤန့ၣ် ကဲထီၣ်တၢ်ပာ်လီၤ ကီၢ်စဲၣ်အံၤဖဲတၢ်အိၣ်သးတဂၢၢ်တကျၢၤဘၣ်. ကဘၣ်ဒိဘၣ်ထံးပှၤဝံးထိရံယါဖိသ့ၣ်တဖၣ်, အဃိ ယတဘၣ်သးမၤအီၤဒ်န့ၣ်ဘၣ်.”
ဖဲမုၢ်ခံနံၤဘျီၣ်ဒိၣ်တၢ်အိၣ်ဖှိၣ်အပူၤန့ၣ်, လၢတၢ်တီခိၣ်ရိၤမဲအဂီၢ် စံၣ်ညီၣ်ကွီၣ်ခိၣ်ကျၢၢ် Sonya Kilkenny တာ်လိာ်အသးဒီး Ben Carroll လၢအမ့ၢ်တၢ်လၢ ပှၤမုၢ်လၢ်ပာ်အီၤအိၣ်စှၤတခါန့ၣ်လီၤ.
ဘၣ်ဆၣ်သနာ်က့ လၢခံန့ၣ် Mr Carroll အံၤ ပှၤပြၢလိာ်သးဒီးအီၤတအိၣ်နီတဂၤဘၣ်ဒီး အဝဲဘၣ်တၢ်ဃုထၢထီၣ်အီၤဒ်သိးကီၢ်စဲၣ်ခိၣ်တဂၤန့ၣ်လီၤ.
လ့ၢ်ဘၢၣ်ပၣ်တံၣ် ခိၣ်နၢ်တၢ်ဆီတလဲအိၣ်ထီၣ်အံၤ မ့ၢ်ဝဲဒၣ်ဖဲလၢ တၢ်ဂိၢ်ခါကတီၢ် တၢ်အိၣ်ဘှံးဘျီၣ်ဒိၣ်တၢ်ဖံးတၢ်မၤဝံၤ က့ၤစးထီၣ်ကဒါ တၢ်အိၣ်ဖှိၣ်တဲသကိး အဆိကတၢၢ်တဘျီ အတီၢ်ပူၤန့ၣ်လီၤ.
ဖဲလၢလ့ၢ်ဘၢၣ်ပၣ်တံၣ် ဘျီၣ်ဒိၣ်ခၢၣ်စးသ့ၣ်တဖၣ် ဟးထီၣ်ကွံာ်လၢတၢ်အိၣ်ဖှိၣ်ဘျီၣ်အပူၤဝံၤ တၢ်ဘံဘူအိၣ်ထီၣ်ဝံၤအလီၢ်ခံ ပှၤထီဒါတၢ်တကပၤန့ၣ် ဟံးန့ၢ်ဝဲဒၣ်တၢ်ခွဲးတၢ်ယာ်ချ့မးန့ၣ်လီၤ.
ပှၤထီဒါတၢ်ကရၢ ပနံးတၢ်ဖံးတၢ်မၤဂ့ၢ်ဝီ ပှၤရဲၣ်ကျဲၤတၢ်အခိၣ်, James Newbury လၢအအိၣ်ဖဲလီၢ်ဆ့ၣ်နီၤ ကွၢ်မဲာ်လိာ်သးခီတက့န့ၣ် သံကွၢ်ဝဲဒၣ်တၢ်သံကွၢ်သ့ၣ်တဖၣ်န့ၣ်လီၤ.
“လီၢ်ဆ့ၣ်နီၤ တကပၤန့ၣ် မ့ၢ်ဝဲဒၣ်လၢ Niddrie ခၢၣ်စးအဂီၢ်, ဒီးလီၢ်ဆ့ၣ်နီၤ လၢအဂၤတခီန့ၣ်မ့ၢ်ဝဲဒၣ်လၢ Dandenong ခၢၣ်စးအဂီၢ်. လၢန့ၣ်အမဲာ်ညါ, တၢ်ဒိၣ်ပှၤပၢၤလီၢ်ဆ့ၣ်နီၤ, လီၢ်ဆ့ၣ်နီၤခံခါအံၤ တၢ်ရဲၣ်တၢ်ကျဲၤပာ်အီၤလၢ Bendigo East ခၢၣ်စးအဂီၢ်, လၢအမ့ၢ်လီၢ်ဆ့ၣ်နီၤလၢ Monbulk ခၢၣ်စးဆ့ၣ်နီၤပာ်အီၤအခဲအံၤ. အဃိ ဖဲဘျီၣ်ဒိၣ်အံၤအပူၤန့ၣ် ယဘၣ်ယိၣ်လၢ Bendigo East ခၢၣ်စးအဂီၢ် လီၢ်ဆ့ၣ်နီၤတအိၣ်ဘၣ်, လီၢ်ဆ့ၣ်နီၤတၢ်ရဲၣ်တၢ်ကျဲၤခံခါလၢာ်အံၤန့ၣ် လၢ Bendigo East ခၢၣ်စးအဂီၢ် တၢ်လီၢ်တအိၣ်ဘၣ်.”
Jacinta Allan မ့ၢ်ဝဲဒၣ် Bendigo East ခၢၣ်စးန့ၣ်လီၤ.
အဝဲကဲတ့ၢ်ဝဲဒၣ် တၢ်ဒိးဃုထၢသးလၢ ခိခိၣ်ဟီၣ်ကဝီၤအဂီၢ် စးထီၣ်လၢ ၁၉၉၉နံၣ်အခါလံ, ဒီး ဖဲလ့ၢ်ဘၢၣ်အပူၤန့ၣ် အဝဲအလီၢ်လး ဟဲထီၣ်ဝဲဒၣ်တဆီဘၣ်တဆီ တုၤလၢကိတိာ်အပတီၢ်ဝံၤ လၢခံန့ၣ် ထီၣ်ဘၣ်ဝဲဒၣ် ကီၣ်စဲၣ်ခိၣ်—၂ လၢအမ့ၢ်ဝဲဒၣ်ဖဲ Daniel Andrews အဖီလာ်န့ၣ်လီၤ.
ဖဲမုၢ်ခံနံၤဂီၤခီ အဝဲဟးထီၣ်ကွံာ်လၢလီၢ်လး အတၢ်ကတိၤလီၤအပူၤန့ၣ်, Ms Allan ပာ်ဖျါထီၣ်ဝဲဒၣ် တၢ်ဖံးတၢ်မၤလၢအဝဲမၤတ့ၢ်အီၤသ့ၣ်တဖၣ်, လၢအတဲဖျါထီၣ်ဝဲဒၣ် တၢ်ပာ်လီၤသနူ လၢအဘၣ်ဃး တၢ်အိၣ်ဆိးအပှ့ၤအဘူးအလဲဟဲဒိၣ်ထီၣ်အဂ့ၢ်, တၢ်မၤကမၣ်သဲစးတၢ်ဘျၢဂ့ၢ်ဝီ, တၢ်မၤစၢၤကမျၢၢ်ဝဲၤကျိၤသ့ၣ်တဖၣ်, တၢ်ဘှီဘၣ်က့ၤ စ့တိာ်ကျဲၤ, တၢ်မၤန့ၢ်တၢ်အၢၣ်လီၤလံာ်ဃံာ်ဃး ဒီး ပိာ်မုၣ်တၢ်အိၣ်ဆူၣ်အိၣ်ချ့ဂ့ၢ်ဝီသ့ၣ်တဖၣ်န့ၣ်လီၤ.
လၢန့ၣ်အမဲာ်ညါ အဝဲဒီသဒၢ စ့ၢ်ကီးဝဲဒၣ် လ့ၢ်ဘၢၣ် Big Build အတၢ်ရဲၣ်တၢ်ကျဲၤ, လၢအမ့ၢ်ဝဲဒၣ်တၢ်ရဲၣ်တၢ်ကျဲၤလၢ တၢ်ပာ်ဒ့ၣ်ပာ်ကမၣ်အီၤလၢ အအိၣ်ဒီး တၢ်အီၣ်ခိၣ်ဖးလာ်ဆှိး ဒီး ကဲထီၣ်တၢ်ဂ့ၢ်တၢ်ကျိၤတခါလၢ တၢ်ဘၣ်သူၣ်ဘၣ်သးအီၤစှၤလီၤ ဖဲအပူၤကွံာ်စှၤကိးလါအခါန့ၣ်လီၤ.
“တၢ်ခဲလၢာ် စးထီၣ်အသးဒီးတၢ်သူၣ်ထီၣ်. ကၠိအသီ ၁၂၁ ဖျၢၣ်. တၢ်ဆါဟံၣ်အသီ ၁၂ဖျၢၣ်. ပထုးကွံာ်စ့ၢ်ကီးဝဲဒၣ် လ့ၣ်မ့ၣ်အူတၢ်ခီတဲာ်ကျဲ ၉၂ခါ. ပမၤဝံၤဝဲဒၣ် Westgate Tunnel ဟီၣ်ခိၣ်လာ်ကျဲ. ပသူၣ်ထီၣ်ဝဲဒၣ် North East Link ဒီး Suburban Rail Loop. ပတ့စ့ၢ်ကီးဝဲဒၣ် Metro Tunnel ဝ့ၢ်ပူၤလ့ၣ်မ့ၣ်အူဟီၣ်ခိၣ်လာ်ကျဲ. တၢ်တိာ်ကျဲၤအံၤ လၢ အစးထီၣ် တုၤလၢအကတၢၢ်တစု မ့ၢ်အဒိၣ်ထဲလဲာ်န့ၣ် ပှၤအါဒံအါဂၤ တထံၣ်ဘၣ်အီၤဘၣ်. ယပာ်ကဖၢလၢယသးလၢတၢ်သ့ၣ်တဖၣ်အံၤအဃိသပှၢ်ပှၢ်န့ၣ်လီၤ.”
တၢ်ဃ့ထီၣ်လၢဘၣ်ဃးဒီး တၢ်ကမၤတၢ်ဃိထံသ့ၣ်ညါသဘျ့ဒီး တၢ်ပာ်ဒ့ၣ်ပာ်ကမၣ်တၢ်လၢ တၢ်အီၣ်ခိၣ်ဖးလာ်ဆှိး လၢအပၣ်ဃုာ်ဒီး တၢ်မၤကမၣ်သဲစးလၢအအိၣ်ဒီးတၢ်ရဲၣ်ကျဲၤပာ်လီၤအီၤသ့ၣ်တဖၣ် ဒီး CFMEU န့ၣ် ဟဲဒိၣ်ထီၣ်အါထီၣ်ကွ့ၢ်ကွ့ၢ်, လၢအပၣ်ဃုာ်ဒီးအဝဲအနီၣ်ကစၢ်အပၣ်တံၣ်ဒၣ်လဲာ်န့ၣ်, Ms Allan ထီဒါဝဲဒၣ်တၢ်ဃ့ထီၣ်အံၤန့ၣ်လီၤ.
အဝဲပၢကွံာ်ခိၣ်နၢ်တၢ်တီခိၣ်ရိၤမဲဝံၤအလီၢ်ခံ, Mr Carroll တဲဖျါထီၣ်ဝဲရှဲရှဲဖိလၢအကဆီတလဲကွံာ်ကျိၤကျဲသ့ၣ်တဖၣ်န့ၣ်လီၤ.
“ဒ်သိးကီၢ်စဲၣ်ခိၣ်တဂၤအသိး တၢ်မၤအဆိကတၢၢ်လၢယကမၤအီၤန့ၣ်မ့ၢ်ဝဲဒၣ် ယကဃ့ထီၣ် ပှၤဃိထံသ့ၣ်ညါတၢ်ဘျ့ ခီးမ့ရှၢၢ်တဖု လၢအနုာ်လီၤသမံသမိးတၢ်ဖဲ တၢ်သူၣ်ထီၣ်ဘှီထီၣ်ဟီၣ်ကဝီၤအပူၤန့ၣ်လီၤ. ပကဒုးအိၣ်ထီၣ်စ့ၢ်ကီး ပီၢ်ရီလီၤဆီတဂၤ လၢအကလဲၤသဃဲၤလိာ်အသးဒီး ပှၤဃိထံသ့ၣ်ညါတၢ်ဘျ့တဖုန့ၣ်လီၤ. ခီးမ့ရှၢၢ်, ဒီးပဝဲန့ၣ် ပကမၤဆူၣ်ထီၣ်ဝဲဒၣ် IBAC, ဒီး ဘၣ်ဃးဒီးကျိၣ်စ့ဂ့ၢ်ဝီတၢ်ဖံးတၢ်မၤသ့ၣ်တဖၣ်န့ၣ် ပကဟ့ၣ်လီၤအဝဲသ့ၣ်တၢ်စိတၢ်ကမီၤ. ပကမၤအီၤအခဲအံၤ, ဖဲတၢ်တဘျီအံၤအပူၤ, အတမ့ၢ်လၢ ၂ဝ၂၇နံၣ်အပူၤဘၣ်.”
ဘၣ်ဃးဒီးတၢ်ပညိၣ် အတၢ်သိၣ်တၢ်သီတၢ်ဘျၢသ့ၣ်တဖၣ်န့ၣ် အဝဲတပာ်ဖျါအီၤဘၣ် နာ်သက့, အၢၣ်လီၤဝဲဒၣ်လၢ အကမ့ၢ်ဝဲ တၢ်လၢ အအိၣ်ဒီးတၢ်လၢတၢ်ပှဲၤ, ဒီး အဝဲစံးစ့ၢ်ကီးဝဲဒၣ်လၢ ဖဲအဝဲတၢ်တီခိၣ်ရိၤမဲအဖီလာ်န့ၣ် တၢ်မၤတၢ်တီတီလိၤလိၤန့ၣ် တမ့ၢ်တၢ်ကဘၣ်ဃုထၢအီၤအဂီၢ်တခါဘၣ်.
ကီၢ်စဲၣ်ခိၣ်အသီအံၤ သုးလီၤဆီကွံာ်အသးဒီး ကိတိာ်ခိၣ်ကျၢၢ်လၢအပူၤကွံာ်သ့ၣ်တဖၣ်ချ့မး.
“ယကတဲအီၤရှဲရှဲဖိလီၤ. ယၤအံၤ တမ့ၢ် Daniel Andrews ဘၣ်. ယတမ့ၢ် Jacinta Allan ဘၣ်.”
ခဲကနံၣ်အံၤ လ့ၢ်ဘၢၣ်ပၣ်တံၣ် ဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲသ့ၣ်တဖၣ်န့ၣ် အဝဲအၢၣ်လီၤအီၤစ့ၢ်ကီးလီၤ.
Mr Carroll နဲၣ်ဖျါထီၣ်စ့ၢ်ကီးဝဲဒၣ်လၢ အကမၤဃံးထီၣ်ဝဲဒၣ်ပဒိၣ်အတၢ်သူတၢ်စွဲသ့ၣ်တဖၣ်ဒီး ကမၤဆူၣ်ထီၣ်စ့ၢ်ကီးကျိၤကျဲသနၢၣ်လၢ တၢ်ဆၢၣ်မဲာ်လိာ်အသးဒီး တၢ်မၤကမၣ်သဲစးတၢ်ဘျၢသ့ၣ်တဖၣ်န့ၣ်လီၤ.
“ခီဖျိလၢတၢ်အံၤအဃိန့ၣ် တနံၤအံၤ ယဆဲးကျိးလိာ်သးဒီး ပၢၤကီၢ်မူဒါခိၣ်. လၢကမၤတၢ်ရှဲရှဲတခါအဂီၢ်, ပကဟ့ၣ်လီၤအဝဲသ့ၣ်တၢ်စိတၢ်ကမီၤသ့ၣ်တဖၣ်, ကျိၣ်စ့တၢ်မၤစၢၤ, ဒီး ဆီၣ်ထွဲမၤစၢၤအဝဲသ့ၣ် ဒီးတၢ်လိၣ်ဘၣ်လၢ တၢ်ဒုးထီဒါ တၢ်မၤကမၣ်သဲစးတၢ်ဘျၢသ့ၣ်တဖၣ်န့ၣ်လီၤ.”
ကီၢ်စဲၣ်ခိၣ်အသီအံၤ အဝဲပဒိၣ်ဝဲၤကျိၤအပူၤ ကမၤတၢ်ဆီတလဲဒ်လဲၣ်န့ၣ် ဟ့ၣ်လီၤတၢ်ဂ့ၢ်တၢ်ကျိၤလီၤတံၢ်လီၤဆဲးတအိၣ်ဘၣ်အသိး, ပှၤလၢအပြၢလိာ်အသးဒီးအီၤ Sonya Kilkenny န့ၣ် မ့ၢ်အကဘၣ်ဟးထီၣ်ကွံာ်လၢအတၢ်ဖံးတၢ်မၤဧါန့ၣ် တတဲဖျါဝဲဘၣ်.
Jacinta Allan အံၤ မ့ၢ်အကအိၣ်ဒ်ဖဲအတၢ်မၤအပူၤ တုၤအကတၢၢ်တစုဧါ, မ့တမ့ၢ်ဘၣ်တခီ မူဒါတၢ်ဖံးတၢ်မၤလၢအဝဲမၤတ့ၢ်ပာ်အီၤ လၢအယံၤအိၣ် ၂၇နံၣ်အံၤ, အကနုာ်လီၤဒိးပြၢအသးဒ်ဧါန့ၣ် တၢ်လီၤတံၢ်လီၤဆဲးတအိၣ်ဒ်ဘၣ်.
ဒ်သိးလၢ ကိတိာ်ခိၣ်ကျၢၢ် Anthony Albanese စံးတ့ၢ်အီၤဖဲမုၢ်ခံနံၤဂီၤခီအသိးန့ၣ်, Mr Carroll ပာ်ပနီၣ်စ့ၢ်ကီးဝဲဒၣ် Jacinta Allan တၢ်ဖံးတၢ်မၤ လၢအဝဲမၤတ့ၢ်အီၤ အနံၣ်အါမးသ့ၣ်တဖၣ်န့ၣ်လီၤ.
“Jacinta Allan အံၤ လၢယတၢ်ဆိကမိၣ်န့ၣ် မ့ၢ်ဝဲပှၤတဂၤ လၢအမ့ၢ်ပှၤကညီတဂၤလၢအအိၣ်ဒီးအကဒုလီၤတံၢ် အိၣ်ဒီးတၢ်ပာ်သူၣ်ပာ်သးလၢအဘၣ်. အဝဲမ့ၢ်ပှၤတဂၤလၢအအိၣ်ဒီးတၢ်သူၣ်ဆူၣ်သးဆူၣ်ဒီး အတၢ်အိၣ်မူအကျိၤကျဲန့ၣ် မၤဝဲဒ်အနာ်အဝဲသိး, လၢပှၤဝံးထိရံယါဖိသ့ၣ်တဖၣ်အဂီၢ်န့ၣ် တၢ်ကူၣ်ဘၣ်ကူၣ်သ့မ့ၢ်ဂ့ၤ, တၢ်အိၣ်ဆူၣ်အိၣ်ချ့မ့ၢ်ဂ့ၤ, ဝံစိာ်တီဆှၢမ့ၢ်ဂ့ၤ အဝဲဟ့ၣ်လီၤမၤန့ၢ်အီၤအဂ့ၤကတၢၢ်န့ၣ်လီၤ. အဃိ, ယဆိကမိၣ်န့ၣ် လၢတၢ်ဆၢကတီၢ်ဖးယံၤအပူၤ, အဝဲအတၢ်မၤကဲထီၣ်လိၣ်ထီၣ်သ့ၣ်တဖၣ်အံၤအဖီခိၣ်န့ၣ် အဝဲပာ်ကဖၢလၢအသးသ့ဝဲဒၣ်ဒီး ယဆၢဂ့ၤဆၢဝါစ့ၢ်ကီးအီၤလၢ အတၢ်အိၣ်မူခါဆူညါအပူၤ. တနံၤအံၤန့ၣ်အကမ့ၢ်ဝဲဒၣ်မုၢ်နံၤလၢအကီခဲတနံၤန့ၣ်လီၤ.
Mr Albanese ဆၢဂ့ၤဆၢဝါစ့ၢ်ကီးဝဲဒၣ် ကီၢ်စဲၣ်ခိၣ်အသီအံၤ လၢအပာ်ဖျါထီၣ်ဝဲဖဲ အဝဲကမျၢၢ်တၢ်ဆဲးကျိးအဖီခိၣ် ဒီး စံးဝဲဒၣ် အဝဲဆၢမုၢ်လၢ်လၢ ခါဆူညါန့ၣ် ကမၤသကိးဘၣ်တၢ်တပူၤဃီဒီးအီၤန့ၣ်လီၤ.
