တၢ်သ့ကဆှီဒံၢ်ကၠံၢ်ထၢၣ်: တၢ်တူၢ်လိာ်မုာ်ပှၤအဲၣ်ဒိးတၢ်ဘျးစဲဖဲလီမုၢ်ပျီချၢကရူၢ်အပူၤ

ဖဲ Amsterdam န့ၣ် Club-ချၢးဖ် အသီဟဲအိၣ်ထီၣ်တခါ - လၢအမ့ၢ်ကရူၢ်တဖု ဖဲပှၤလၢအပၣ်ဃုာ်သ့ၣ်တဖၣ် ဃုထၢလၢကထံၣ်လိာ်သကိးသးဖဲလီမုၢ်ပျီအချၢ (offline), လၢအမ့ၢ်တၢ်အိၣ်ယံၤကွံာ်ဒီးအဝဲသ့ၣ် အလီတဲစိစိာ်စုသ့ၣ်တဖၣ်ဒီး စဲးဖီကဟၣ်အဂုၤအဂၤသ့ၣ်တဖၣ်န့ၣ်လီၤ. တၢ်အိၣ်ဖှိၣ်သကိးအံၤ ဒုးနဲၣ်ဖျါထီၣ်ဝဲ စိၤခ့ခါခဲအံၤအကျဲ, လီၤဆီဒၣ်တၢ်ဖဲပှၤသးစၢ်သ့ၣ်တဖၣ်အကျါ, လၢကထုးယံၤကွံာ်အသးဒီး တၢ်ကွၢ် ကွဲၤဟူဖျါအမဲာ်သၣ်သ့ၣ်တဖၣ်ဒီး အိၣ်ဒီးတၢ်ဘျးစဲလိာ်သးဒီးပှၤဂုၤပှၤဂၤသ့ၣ်တဖၣ် လၢအဝဲသ့ၣ်အနီၣ်ကစၢ်ဒၣ်ဝဲန့ၣ်လီၤ.

---

ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn

ပှၤကညီကအိၣ်လၢ ၂ဝဝ ဂၤဃၣ်ဃၣ် လဲၤပာ်ဖှိၣ်ထီၣ်အသးတပူၤဃီဖဲ ၁၇ယၤဖှိၣ် Posthoornkerk တၢ်ဘါသရိာ်ဘျီၣ်အပူၤ လၢအအိၣ်ဖဲ Amsterdam န့ၣ်လီၤ.

တၢ်ဘါသရိာ်အံၤမ့မ့ၢ်ဘၣ်ဆၣ် စံၣ်စိၤလၢပျၢၤသရိာ်အဖျၢၣ်နာ်သက့, ဖဲပိာ်မုၣ်သးစၢ်တဂၤဒ့ဝဲ တနၢ်ပှီၢ်စု (piano) ဖးဒိၣ်အခါ ပှၤလၢအအိၣ်ဖှိၣ်သကိးဖဲ သ့ၣ်ဘၣ်စီၤနီၣ်ခိၣ်ဖးထီသ့ၣ်တဖၣ်န့ၣ် တမ့ၢ်လၢအဟဲထီၣ်ဘါယွၤဘၣ်.

အဝဲသ့ၣ်န့ၣ် အိၣ်ဝဲခုၣ်ယုၢ်ပှဲၤဒီးတၢ်သးစၢၢ်ဆၢ ဒီးပာ်လီၤဝဲအတၢ်ပညိၣ်ဖဲ စးခိ, ထိၣ်ဒံးဘိသ့ၣ်တဖၣ်, ထိၣ်ဒံးခဲၣ်တၢ်ဂီၤ, စၢၢ်ဘိအလွဲၢ်သ့ၣ်တဖၣ်ဒီး ထးရံးသ့ၣ်တဖၣ်အလိၤန့ၣ်လီၤ.

ဖဲဘျီၣ်အံၤအပူၤ ပှၤလၢအကွၢ်လီၤ အလီတဲစိ စိာ်စုန့ၣ် တအိၣ်နီတဂၤဘၣ် - တချုးဖဲ အဝဲသ့ၣ်လဲၤနုာ်လီၤဆူ တၢ်တ့ တၢ်စုသ့ အလီၢ် လၢအယံၤ ၂နၣ်ရံၣ်အံၤ အပူၤဒ်ဘၣ်အခါန့ၣ် အဝဲသ့ၣ် ဟ့ၣ်လီၤပာ်တ့ၢ်ဝဲအလီတဲစိသ့ၣ်တဖၣ်ဖဲ ပဲတြီခိၣ်ထိးန့ၣ်လီၤ.

အဝဲအံၤန့ၣ်မ့ၢ်ဝဲ Offline Club —လီမုၢ်ပျီချၢကရူၢ် အတၢ်ဟူးတၢ်ဂဲၤ လၢခံကတၢၢ်တခါန့ၣ်လီၤ. ကရူၢ်အံၤစးထီၣ်အသးဖဲ ၂ဝ၂၄နံၣ် လၢအစးထီၣ်တ့ၢ်အသးဒီး Amsterdam ကၠိဖိထဲသၢဂၤဧိၤန့ၣ်လီၤ.

Ilya Kneppelhout အံၤ မ့ၢ်ဝဲပှၤကၠိဖိ လၢအဒုးအိၣ်ထီၣ်ကရူၢ်အံၤ သၢဂၤအကျါ တဂၤန့ၣ်လီၤ.

“ပဒုးအိၣ်ထီၣ်ပတၢ်ဟူးတၢ်ဂဲၤအမူးသ့ၣ်တဖၣ်ဒီးအိၣ်ဖှိၣ်ရိဖှိၣ်ထီၣ်သကိးဃုာ်ဒီးတၢ်ဂ့ၢ်ခိၣ်တီလၢအလီၤဆီလိာ်အသးသ့ၣ်တဖၣ်, တၢ်ဟူးတၢ်ဂဲၤသ့ၣ်တဖၣ်အကျါတခါန့ၣ်မ့ၢ်ဝဲ တၢ်ဘျးစဲလိာ်ပသးခီဖျိတၢ်တ့ဒုးအိၣ်ထီၣ်တၢ်အတၢ်ဟူးတၢ်ဂဲၤသ့ၣ်တဖၣ်, တၢ်ဖးလံာ်ဖးလဲၢ်, တၢ်ကွဲးလံာ်ကွဲးလဲၢ် မ့တမ့ၢ် တၢ်ဂဲၤ ဖၢစၢၤလ် (puzzles) သ့ၣ်တဖၣ်, အဃိမ့ၢ်တၢ်နီၣ်နီၣ်တခါလၢအမၤကဘဲးလီၤနၤဒီးဆိကမိၣ်ထံလီၤက့ၤနသးပာ်တၢ်ပညိၣ်လီၤဖဲနနီၣ်ကစၢ်အပူၤန့ၣ်လီၤ. တၢ်ဘျးစဲလိာ်သး အတၢ်ဟူးတၢ်ဂဲၤ အဂုၤအဂၤသ့ၣ်တဖၣ်အိၣ်စ့ၢ်ကီးဝဲဒၣ် အဒိန့ၣ်, ဒ်သိး နတဲသကိးတၢ်ဒီးပှၤဂုၤပှၤဂၤ, နလိာ်ကွဲသကိးတၢ်လိာ်ကွဲသ့ၣ်တဖၣ်, နဟးကသုၣ်လၢတၢ်ချၢန့ဆၢၣ်အကျါ, နထံၣ်လိာ်သးဒီးပှၤကညီသ့ၣ်တဖၣ်ပှဲၤဒီးတၢ်သူၣ်ဆူၣ်သးဂဲၤဒ်သိးန့ဆၢၣ်အကျိၤအကျဲအသိးန့ၣ်လီၤ.”

Offline Club —လီမုၢ်ပျီချၢကရူၢ်အံၤ စးထီၣ်အသးအခီၣ်ထံးခီၣ်ဘိန့ၣ် မ့ၢ်ဝဲဒ်သိး တၢ်လဲၤထံၣ်လိာ်အိၣ်ဖှိၣ်သကိးတဘျီတခီၣ်ဖဲ လးဖးထံကျး အပူၤ ဒီးလၢခံန့ၣ် ကရူၢ်အံၤ ဒိၣ်ထီၣ်ဝဲကွ့ၢ်ကွ့ၢ် လၢအကဲထီၣ်ဝဲ offline—လီမုၢ်ပျီချၢ တၢ်ဟူးတၢ်ဂဲၤ ဖးဒိၣ်သ့ၣ်တဖၣ် လၢအအိၣ်ရၤလီၤသကုၤ ယူရပၤ အပူၤန့ၣ်လီၤ.

ပှၤနဲၣ်တၢ်သ့ၣ်တဖၣ် အခဲအံၤ ဘၣ်ကရၢကရိရဲၣ်ကျဲၤဝဲ တၢ်အိၣ်ဖှိၣ်သကိးအတၢ်ဟူးတၢ်ဂဲၤသ့ၣ်တဖၣ် ဖဲဝ့ၢ် ၁၈ဖျၢၣ်အပူၤဒီး ကရူၢ်အံၤ သူၣ်ထီၣ် ပှၤပိာ်ထွဲအဝဲသ့ၣ်ဖဲ Instagram အပူၤန့ၣ် အိၣ်ဝဲအဂၤ ဃုကလီၢ် (၆ဝဝ,ဝဝဝ ) ဃၣ်ဃၣ်န့ၣ်လီၤ.

တချုးလၢ ပှၤဟဲပၣ်ဃုာ်ဖဲတၢ်ဟူးတၢ်ဂဲၤအပူၤသ့ၣ်တဖၣ် စးထီၣ်အတၢ်ဟူးတၢ်ဂဲၤဒ်ဘၣ်အခါ, တၢ်အိၣ်ဖှိၣ်ရိဖှိၣ်တၢ်ဟူးတၢ်ဂဲၤလၢတၢ်မၤအီၤဖဲ Amsterdam အပူၤန့ၣ် ဘၣ်တၢ်အိးထီၣ်အီၤ လၢအအိၣ်ဃုာ်ဒီး တၢ်ဒ့ တနၢ်ပှီၢ်စု (piano) လၢအဘၣ်တၢ်ဒ့အီၤလၢ ပှၤကွဲးတၢ်သးဝံၣ်ဒီး ပှၤဒ့တနၢ်ပှီၢ်စု Cécile Schulte န့ၣ်လီၤ. တၢ်ဟူးတၢ်ဂဲၤသ့ၣ်တဖၣ်န့ၣ် ပၣ်ဃုာ်ဒီး တၢ်တ့တၢ်စုသ့ဒီး တၢ်ကွဲးလံာ်ကွဲးလဲၢ်ဒ်သိးတၢ်ကတဲာ်ကတီၤတၢ်ကတိၤလီၤတၢ်ဖဲအဝဲသ့ၣ်ဆူမဲာ်ညါ အသးနံၣ်ကပှဲၤထီၣ် ၈ဝနံၣ် နံၤအိၣ်ဖျဲၣ်အဂီၢ်အခါန့ၣ်လီၤ.

Bernard Kappele, လၢအသးနံၣ်အိၣ် ၂၇နံၣ်အံၤ မ့ၢ်ဝဲဒၣ် ပှၤမၤတၢ်ဃိထံသ့ၣ်ညါလၢအဘၣ်ဃး ပှၤသူစွဲတၢ်ဖိအဂ့ၢ်တဂၤဒီး အဝဲကဲထီၣ်ဝဲ ပှၤဟဲပၣ်ဃုာ်ဖဲကရူၢ်အံၤ အတၢ်ဟူးတၢ်ဂဲၤအပူၤထီဘိတဂၤန့ၣ်လီၤ.

“ယဆိကမိၣ်န့ၣ် တၢ်ဖီၣ်ဘၣ် ထိးဘၣ် ဒီးထီၣ်ဒံးဘိဒီးစးခိအံၤ မ့ၢ်တၢ်လၢအမုာ်တခါ, လီၤဂာ်ဒ်သိး တၢ်ထိးဘၣ်အီၤလၢနီၣ်ခိနီၣ်ကစၢ်ဒၣ်ဝဲ လၢအအိၣ်ဖဲနဃၢၤဝးဝး. မ့ၢ်က့ၤကွၢ်ကဒါက့ၤ ဖဲယဖိသၣ်အခါန့ၣ် ယကွဲးတၢ်ဂီၤဒီး မၤတၢ်ဒ်သိးအံၤထီဘိ. အဃိန့ၣ် တၢ်အံၤလီၤဂာ်စ့ၢ်ကီးဒ်သိးနက့ၤဖိသၣ်လီၤကဒါက့ၤတဘျီ, လၢတအဲၣ်ဒိးအိၣ်ဖဲ နီၣ်ဘျးဒၢ စဲးမဲာ်ကလာ်သ့ၣ်တဖၣ်အလီၢ်ခံ ဒီး အိၣ်ဖဲ online—လီမုၢ်ပျီအပူၤ ကိးဆၢကတီၢ်ဒဲးဘၣ်.”

တၢ်လဲၤနုာ်လီၤပၣ်ဃုာ်သကိးဖဲ Amsterdam တၢ်ဟူးတၢ်ဂဲၤအပူၤအံၤ အလံာ်ပျဲ—လဲးမး တဘ့ၣ်န့ၣ် လီၤလၢဝဲ အီစထြ့လယါစ့ ၄၉ ဒီလၣ်, ဒီး ဖဲလၢတၢ်ဟူးတၢ်ဂဲၤအံၤ အမံၤဟူထီၣ်သါလီၤတဘျီ ဖဲလါအ့ဖြ့ၣ်အတီၢ်ပူၤန့ၣ် ပှၤရဲၣ်ကျဲၤမူးသ့ၣ်တဖၣ် ဘၣ်ရဲၣ်ကျဲၤမၤဝဲမူးအံၤဖဲ Amsterdam အပူၤ ဃိးခါန့ၣ်လီၤ.

တၢ်ဟူးတၢ်ဂဲၤမူးအံၤတနီၤန့ၣ် ပာ်ဝဲတၢ်ပညိၣ်လၢ ပှၤနီၣ်ကစၢ်တဂၤဒၣ်ဝဲအဂီၢ် လၢအမ့ၢ်ဒ်သိး တၢ်ဖးလံာ်, တၢ်ကွဲးလံာ်, မ့တမ့ၢ် တၢ်လိာ်ကွဲ ဖၢစၢၤလ် (puzzles), ဒီး မ့မ့ၢ်အဂုၤအဂၤသ့ၣ်တဖၣ်န့ၣ် ရဲၣ်ကျဲၤမၤဝဲဒ်သိး ပှၤကရၢကရိတၢ်ရ့လိာ်မုာ်လိာ်, လၢအပၣ်ဃုာ် တၢ်လိာ်ကွဲလၢ တၢ်လိာ်ကွဲအီၤဒ်သိးကရူၢ်အသိး မ့တမ့ၢ်ဘၣ်တခီ တၢ်ဟးလိာ်ကွဲသကိးဒီးခီၣ်ဒီတကရူၢ်န့ၣ်လီၤ.

မ့မ့ၢ်လၢပှၤသးနံၣ်အိၣ် ၂၉နံၣ် လၢအမ့ၢ် ပှၤသ့ပှၤဘၣ်စဲၤနီၣ်လၢတၢ်ဆါတၢ်ပှ့ၤအဂ့ၢ်, Penny Steenbeek အဂီၢ်န့ၣ်, တၢ်ရ့လိာ်မုာ်လိာ်အိၣ်ဖှိၣ်သကိးလၢနီၣ်ကစၢ်မဲာ်သကိးမဲာ်ဒ်အံၤန့ၣ် အဝဲပလၢၢ်ဘၣ်ဝဲလၢ အအိၣ်ဒီး တၢ်ထိၣ်ဟူးထိၣ်ဂဲၤဂ့ၤမးန့ၣ်လီၤ.

“တၢ်လၢအဲၣ်အီၤတခါန့ၣ်မ့ၢ်ဝဲ နအိၣ်ဘှံးအိၣ်သါသ့ နာ်သက့ အိၣ်ဘှံးအိၣ်သါဃုာ်ဒီးပှၤဂုၤပှၤဂၤသ့ၣ်တဖၣ်သ့. အဃိ နမ့ၢ်အိၣ်ဖဲဟံၣ်အခါ, နအိၣ်ဒၣ်လၢ နနီၣ်ကစၢ်ထဲတဂၤဧိၤဒီး နကမၤဝဲဒ်သိး, ဂ့ၤလံ—အခဲအံၤန့ၣ် ယသူယလီတဲစိတသ့ဘၣ် မ့တမ့ၢ် ယကဘၣ်အိၣ်ဘှ့ၣ်အိၣ်ဘှီၣ်, ကဆိကမိၣ်မၤအီၤဒ်န့ၣ်. မ့ၢ်တၢ်လၢအကီဒိၣ်န့ၢ်ဒံးလၢ နကဟးဆူတၢ်လီၢ်အဂုၤအဂၤ, တၢ်လီၢ်တတီၤတီၤလၢအမ့ၢ်ဒ်သိးဖဲအံၤ, လၢအအိၣ်ဒီးပှၤဂုၤပှၤဂၤလၢအတၢ်တူၢ်ဘၣ်လီၤဂာ်ဒီးနၤ, လၢအမ့ၢ်တၢ်တူၢ်ဘၣ်လၢအလီၤဆီတမံၤန့ၣ်လီၤ.”

Nicola Cloherty လၢအသးနံၣ်အိၣ် ၄၁နံၣ် ဒီး ဟဲနုာ်လီၤဝဲဖဲ Offline Club တၢ်ဟူးတၢ်ဂဲၤသ့ၣ်တဖၣ်အပူၤတဂၤစံးဝဲဒၣ် အဝဲဟဲပၣ်ဃုာ်ဖဲအံၤန့ၣ် ဒုးသ့ၣ်နီၣ်ထီၣ်က့ၤအီၤ အတၢ်အိၣ်မူလၢအပူၤကွံာ် ဖဲလၢတၢ်သူ ဒံၢ်ကၠံၢ်ထၢၣ် စဲးဖီကဟၣ်သ့ၣ်တဖၣ်တအိၣ်အါအါဒံးဘၣ်အခါန့ၣ်လီၤ.

“ဘူးထီၣ်လၢ သးနံၣ်ကပှဲၤထီၣ် ၄၂နံၣ်လံ. ယတၢ်အိၣ်မူန့ၣ် စဲးဖီကဟၣ်လဲၤထီၣ်လဲၤထီအခါ ဒီး တအိၣ်ထီၣ်ဒ်ဘၣ်အခါ စိၤခံခါလၢာ်အပူၤန့ၣ် ယအိၣ်မူဘၣ်အီၤ, အဃိတၢ်အံၤမ့ၢ်တၢ်က့ၤဆှၢကဒါက့ၤယၤဆူတၢ်အိၣ်မူယိယိဖိအပူၤ လၢအပှဲၤဒီးတၢ်သူၣ်ဖှံသးညီ လၢယလဲၤခီဖျိတ့ၢ်အီၤဖဲယဖိသၣ်အခါန့ၣ်လီၤ.”

Offline Club—လီမုၢ်ပျီအချၢကရူၢ်အံၤ ဟဲဒိၣ်ထီၣ်ကွ့ၢ်ကွ့ၢ်ဒီး မ့ၢ်ကျဲတဘိလၢ တၢ်ဘၣ်သူၣ်ဘၣ်သးအီၤအိၣ်အါထီၣ်, လီၤဆီဒၣ်တၢ် ဖဲပှၤသူၣ်ဘီၣ်သးစၢ်သ့ၣ်တဖၣ်အကျါ, လၢကသူစှၤလီၤတၢ်ဆၢကတီၢ်ဖဲဒ့ၢ်ကၠံၢ်ထၢၣ်ပျဲၢ်စီၣ်သ့ၣ်တဖၣ်အဖီခိၣ်န့ၣ်လီၤ.

ကျိၤကျဲအံၤ အိၣ်စ့ၢ်ကီးဝဲဒၣ်ဖဲအီးလဲ—လီမုၢ်ပျီအပူၤ, လၢအမ့ၢ်ဒ်သိး ပှၤသူ စိၤရှၢၤမံၤဒံၤယၤ—ကမျၢၢ်တၢ်ဆဲးကျိးတဝၢသ့ၣ်တဖၣ် ဟ့ၣ်လီၤနီၤအဝဲသ့ၣ် အတၢ်ရဲၣ်တၢ်ကျဲၤ ဒ်သိးနံၣ်လၢအကဟဲသ့ၣ်တဖၣ်အတီၢ်ပူၤန့ၣ် အဝဲသ့ၣ်ကသူစှၤလီၤ မ့တမ့ၢ် ပတုာ်ကွံာ် အဝဲသ့ၣ် အတၢ်သူ ပျဲၢ်စီၣ်သ့ၣ်တဖၣ်အံၤန့ၣ်လီၤ.

ဘၣ်ဆၣ်သနာ်က့ Surya Gayet, လၢအမ့ၢ် ပှၤဃိထံမၤကွၢ်သးဂ့ၢ်ဝီပညီဖဲ Utrecht ဖၠၣ်စိမိၤစံးဝဲဒၣ်, တၢ်တ့ဒုးအိၣ်ထီၣ် အဲးဖ် (apps) သ့ၣ်တဖၣ်အက့ၢ်အဂီၤန့ၣ် တၢ်ကပတုာ်ကွံာ် တၢ်သူအီၤအလုၢ်အလၢ်န့ၣ် မ့ၢ်ဝဲဒၣ်တၢ်ကီတခါန့ၣ်လီၤ.

“တၢ်လၢ အဲးဖ် (apps) သ့ၣ်တဖၣ်န့ၣ် တၢ်တ့ပာ်လီၤအီၤအက့ၢ်အဂီၤန့ၣ် ဒ်သိးနအိၣ်ဖဲအပူၤသ့ဖးယံၤကိးဆၢကတီၢ်ဒဲး, လၢအဟ့ၣ်လီၤဝဲဒီးတၢ်ဆၢကတီၢ်ဖုၣ်ကိးဖိအဂီၢ် တၢ်ဟ့ၣ်ကနၢၤတစဲးဖိ, တမ့ၢ်ဧါ? အဃိန့ၣ် နကွၢ် တၢ်ဂီၤ တဘ့ၣ်ဝံၤ, နကွၢ်ကဒီးတဘ့ၣ် ဒီးအဂ့ၤစ့ၢ်ကီး, ဖဲန့ၣ်ဝံၤနန့ၢ်ဘၣ်ဝဲ တၢ်ဟ့ၣ်ကနၢၤဖိ အစဲးကီး ၁ဝ ဖိ, ဝံၤန့ၣ်, နလဲၤကဒီးဆူတၢ်ဂီၤအဂၤတဘ့ၣ်? အဃိ အဲးဖ် သ့ၣ်တဖၣ်န့ၣ် အမၤတၢ်ဂ့ၤမး လၢအထုးန့ၢ်နၤ ဒ်သိးနကအိၣ်ဖဲအပူၤ, ဒီးအဟ့ၣ်လီၤစ့ၢ်ကီးနၤ တၢ်တူၢ်ဘၣ်ဒ်အမ့ၢ်, နမ့ၢ်တအိၣ်ဖဲအပူၤဘၣ်န့ၣ် နတန့ၢ်ဘၣ်လၢာ် တၢ်ဟ့ၣ်နၢၤဘၣ်, နကဘၣ်တူၢ်ရှူကွံာ်အီၤ, တၢ်တူၢ်ဘၣ်ဒ်သိးအံၤသ့ၣ်တဖၣ်န့ၣ်လီၤ.”

Brian Hermeljin, မ့ၢ်ပှၤခဲၣ်တၢ်ဂီၤဖိတဂၤလၢအသးနံၣ်အိၣ် ၃၁နံၣ်, အဝဲစံးဝဲဒၣ် Offline Club—လီမုၢ်ပျီချၢကရူၢ်အံၤဟ့ၣ်လီၤအီၤ တၢ်လီၢ်လီၤဟိလၢ အမၤဖှံထီၣ်က့ၤအသးန့ၣ်လီၤ.

“ယဆိကမိၣ် တၢ်အရ့ဒိၣ်န့ၣ်မ့ၢ်ဝဲ တၢ်ပတုာ်ကွံာ်တၢ်ဘျးစဲ. လၢယနီၣ်ကစၢ်တဂၤဒၣ်ယဲအဂီၢ်န့ၣ်, ယတူၢ်ဘၣ်လၢယၤန့ၣ် ယအိၣ်စဲဘူးထီဒီးအ့ထၢၣ်နဲးထီဘိဒီး ဃုကွၢ်ကီတၢ်ထီဘိ. အဃိတၢ်ဟူးတၢ်ဂဲၤဒ်သိးအံၤသ့ၣ်တဖၣ်န့ၣ် ပျဲယၤလၢ ယကနၢ်ပၢၢ်ဝဲဒၣ် တၢ်အိၣ်သကိးဖဲ ဆၢကတီၢ်ခ့ခါခဲအံၤန့ၣ် အခီပညီမ့ၢ်မနုၤလဲၣ်ဒီး မ့ၢ်စ့ၢ်ကီးတၢ်မၤစၢ်လီၤ မၤကဘဲးလီၤကွံာ် ခိၣ်နူာ်အတၢ်ဆိကမိၣ်ဆိကမးသ့ၣ်တဖၣ် ခီဖျိလၢ ခိၣ်နူာ်အံၤ အမၤတၢ်ထီဘိ, အအိၣ်ဝးတရံးမၤတၢ် တုၤလၢနသ့ၣ်ညါဟ့ၣ်လီၤက့ၤ တၢ်ဆၢကတီၢ်လၢနနီၣ်ကစၢ်ဒၣ်ဝဲအဂီၢ်တစုန့ၣ်လီၤ.”