ဖဲတၢ်လိာ်ကွဲပြၢတုၤလီၤတဝာ်ဝံၤစးထီၣ်ကဒါက့ၤအတီၢ်ပူၤန့ၣ် Harry Kane ဒီး Youri Tielemans အတၢ်သွီနုာ်ကိအဃိ England ဒီး Belgium ဖျၢၣ်ထူကရူၢ် လဲၤထီၣ်ဘၣ်ဝဲဆူ ကရူၢ် ၁၆ဖု တၢ်ပြၢအပတီၢ်, ကီၢ်အမဲရကၤဖျၢၣ်ထူကရူၢ်စ့ၢ်ကီး မၤန့ၢ်ဝဲတၢ်လီၢ်ဆူမဲာ်ညါတပတီၢ် မ့ၢ်လၢအမၤနၢၤကွံာ်ဝဲဒၣ် Bosnia ဒီး Herzegovina ဖျၢၣ်ထူကရူၢ်အဃိန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၂၁ သီတသီ တၢ်ပာ်ဖျါအဘိၣ်န့ၣ်လီၤ.
———
FIFA World Cup — ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ၂၁သီအနံၤ လၢတၢ်လိာ်ကွဲအီၤဖဲ Atlanta ပျီပူၤန့ၣ်, England မၤနၢၤဝဲဒၣ် DR Congo ၂–၁ ကိ န့ၣ်လီၤ. ဖဲအဘၣ်ဟ့ၣ်လီၤကွံာ်ကိတဖျၢၣ်ဝံၤအလီၢ်ခံ နွံမံး န့ၣ် အဝဲသ့ၣ်မၤန့ၢ်က့ၤဝဲဒၣ် ကိခံဖျၢၣ်တဖျၢၣ် လၢအမ့ၢ်တၢ်မၤနၢၤအကိန့ၣ်လီၤ.
တၢ်လိာ်ကွဲပြၢအပူၤ England ဘၣ်ကျဲးစၢးဝဲဒၣ်ကီကီခဲခဲ ခီဖျိလၢ ကိလၢအဝဲသ့ၣ်သွီအီၤသ့ၣ်တဖၣ်န့ၣ် Congo ဖျၢၣ်ထူကရူၢ် အပှၤဖီၣ်ကိ တြီအီၤန့ၢ်ဝဲဒၣ်အဃိန့ၣ်လီၤ.
တချုးဖဲတၢ်လိာ်ကွဲလီၤတဝာ်ဘူးကဝံၤ, Harry Kane ဟဲနုာ်လီၤလိာ်ကွဲအခါ တၢ်လိာ်ကွဲပြၢအကတီၢ် တၢ်လဲၤသး တလံးတပျၤအိၣ်ထီၣ်အဖီခိၣ် အဝဲသ့ၣ်ဃ့ထီၣ် ဖဲၤနၢၤတံၤန့ၣ် ဖျၢၣ်ထူပျီပှၤဆၢတဲာ်တၢ် ဒီး VAR တဟ့ၣ်လီၤအဝဲသ့ၣ် ဖဲၤနၢၤတံၤဘၣ်အဃိ ကဲထီၣ်ဝဲတၢ်သးအ့န့လၢ အဲကလံးဖျၢၣ်ထူကရူၢ် လၢအဘၣ်တၢ်ကိးစ့ၢ်ကီးအီၤလၢ 'Three Lions' အံၤန့ၣ်လီၤ.
ဘၣ်ဆၣ်သနာ်က့ ဖဲတၢ်လိာ်ကွဲဘူးကဝံၤန့ၣ် Kane သွီနုာ်လီၤဝဲကိခံဖျၢၣ်အဃိ ဆှၢထီၣ်ဝဲဒၣ် England ဖျၢၣ်ထူကရူၢ်အံၤဆူ ကရူၢ် ၁၆ဖု တၢ်ပြၢအပတီၢ် လၢအကဘၣ်တိနိၣ်လိာ်အသးဒီး Mexico ဖျၢၣ်ထူကရူၢ် ဖဲ Azteca Stadium စံၣ်စိၤတၢ်လိာ်ကွဲဘျီၣ်အပူၤန့ၣ်လီၤ.
———
ဖဲ Seattle ပျီပူၤတခီန့ၣ်, Belgium ဖျၢၣ်ထူကရူၢ် အဂံၢ်ဟဲက့ၤဆူၣ်ထီၣ်ကဒါက့ၤလီၤလီၤဆီဆီအဃိ မၤနၢၤဝဲ Senegal ၃–၂ ကိ, လၢအပၣ်ဃုာ်ဒီး ဖျၢၣ်ထူကရူၢ်ခိၣ် Youri Tielemans သွီနုာ်လီၤကိခံဖျၢၣ်န့ၣ်လီၤ.
ဖဲတၢ်လိာ်ကွဲပြၢတုၤလီၤ ၈၆ မံးန့ၣ် တချုးလၢ Belgium ဖျၢၣ်ထူကရူၢ် အဂံၢ်ဟဲက့ၤဆူၣ်ထီၣ်ကဒါက့ၤဒ်ဘၣ်အခါန့ၣ် Senegal ဖျၢၣ်ထူကရူၢ် သွီနုာ်လီၤဆိဝဲကိ ၂–ဝ ဖျၢၣ်န့ၣ်လီၤ. နာ်သက့ လၢခံန့ၣ် Belgium ကရူၢ် အဂံၢ်ဟဲက့ၤဆူၣ်ထီၣ်ကဒါက့ၤဒီးသွီနုာ်လီၤကိအဃိ ကရူၢ်ခံဖုအံၤ အိၣ်ထီၣ်ထူၣ်အသး တုၤလၢတၢ်ဘၣ်ဟ့ၣ်အါထီၣ်တၢ်ဆၢကတီၢ် ဒ်သိးအနၢၤအရှူကအိၣ်ဖျါထီၣ်အဂီၢ်န့ၣ်လီၤ.
လၢခံန့ၣ် လၢတၢ်က့ၤကွၢ်ကဒါ VAR အဖီခိၣ် Belgium ဖျၢၣ်ထူကရူၢ်ဒိးန့ၢ်ဘၣ်ဝဲ ဖဲၤနၢၤတံၤတဖျၢၣ်အဃိ ဖဲတၢ်လိာ်ကွဲတုၤလီၤ ၁၂၅ မံးနံးန့ၣ် သွီနုာ်ဝဲကိတဖျၢၣ်ဒီး မၤနၢၤဝဲတၢ်ပြၢန့ၣ်လီၤ.
ခဲကနံၣ်အံၤန့ၣ် Belgium ကဘၣ်တိနိၣ်လိာ်အသးဒီး ကီၢ်အမဲရကၤဖျၢၣ်ထူကရူၢ် ဖဲကရူၢ် ၁၆ဖု တၢ်ပြၢအပတီၢ်န့ၣ်လီၤ.
———
ကီၢ်အမဲရကၤဖျၢၣ်ထူကရူၢ် န့ၢ်ဘၣ်ဝဲတၢ်လီၢ်ဖဲကရူၢ်၁၆ဖု တၢ်ပြၢအပတီၢ် မ့ၢ်လၢအမၤနၢၤဝဲဒၣ် Bosnia ဒီး Herzegovina ဖျၢၣ်ထူကရူၢ် ၂–ဝ ကိအဃိန့ၣ်လီၤ. စးထီၣ်လၢ ၂ဝ၂၂နံၣ်န့ၣ် တၢ်အဝဲအံၤမ့ၢ်ဝဲဒၣ် အဝဲသ့ၣ် မၤနၢၤတၢ်အဆိကတၢၢ်တဘျီ ဖဲရှူဟးထီၣ် တၢ်ပြၢအပတီၢ်အံၤန့ၣ်လီၤ.
ကိအဆိကတၢၢ်တဖျၢၣ်န့ၣ် ဘၣ်တၢ်ထူနုာ်လီၤအီၤလၢ Folarin Balogun ဒီး ဖဲတၢ်ပြၢတုၤလီၤ ၈၂မံးနံးန့ၢ် Malik Tillman သွီနုာ်လီၤကဒီးဝဲကိတဖျၢၣ် ဖဲအထူဝဲဒၣ် free-kick အခါန့ၣ်လီၤ.
လၢ VAR တၢ်က့ၤကွၢ်ကဒါက့ၤ အတၢ်ဆၢတဲာ်အဖီခိၣ် Balogun ဒိးန့ၢ်ဘၣ်ဝဲ ကးဒ် အဂီၤ ဒီး ဘၣ်ဟးထီၣ်ကွံာ်န့ၣ်လီၤ
ခီဖျိလၢတၢ်အံၤအဃိ ဖဲကီၢ်အမဲရကၤ မ့ၢ်ထူပြၢဒီး Belgium အပူၤစ့ၢ်ကီး အဝဲနုာ်လီၤလိာ်ကွဲတန့ၢ်ဘၣ်.
ခဲကနံၣ်အံၤန့ၣ် ပကကွၢ်ကဒါက့ၤလၢ Socceroos အတၢ်အိၣ်သးလၢခံကတၢၢ်.
———
Socceroos ဖျၢၣ်ထူကရူၢ် စးထီၣ်ဝဲ အဝဲသ့ၣ် တၢ်မၤလိသးအဆိကတၢၢ်တဘျီဖဲ Dallas ဝ့ၢ် တချုးဖဲ ဖဲမုၢ်ဘူၣ်—မုၢ်ဃုနံၤ အတၢ်ထူပြၢဒီး Egypt ဒ်သိးကရူၢ် ၃၂ဖု တၢ်ပြၢအပတီၢ်အသိးန့ၣ်လီၤ. ပှၤနဲၣ်တၢ်အခိၣ်—၂ Mile Jedinak စံးဝဲဒၣ် အဝဲသ့ၣ်ပာ်တၢ်ပညိၣ်လီၤဆူ Egypt ဖျၢၣ်ထူကရူၢ် ဒီတဖုအဖီခိၣ် ဒီး အတပာ်တၢ်ပညိၣ်လီၤဖဲ Egypt အပှၤလိာ်ကွဲဖိ Mohamed Salah လၢအဘၣ်ဒိဘၣ်ထံးတဂၤ အကဟဲက့ၤဂ့ၤထီၣ်က့ၤ ဒီး နုာ်လီၤလိာ်ကွဲဘၣ်, တနုာ်လီၤလိာ်ကွဲဘၣ် အဖီခိၣ်ဘၣ်.
“အဝဲသ့ၣ်အတၢ်မၤပျံၤမၤဖုးန့ၣ်အိၣ်ဖဲပျီဒီဘ့ၣ်အပူၤ, အဝဲန့ၣ်မ့ၢ်တၢ်လၢအဝဲသ့ၣ်ကမၤအီၤ. အဝဲသ့ၣ်အိၣ်ဒီး ပှၤလိာ်ကွဲဖိလၢအလိာ်ကွဲဖဲအပတီၢ်လၢအထီမးသ့ၣ်တဖၣ်. လၢနတဲဘၣ်ဃာ်ဒီးပှၤတဂၤ (Moh Salah) န့ၣ် မ့ၢ်ပှၤလိာ်ကွဲတ့ၢ် လၢအပူၤကွံာ်ဖးယံၤလံတဂၤ, ပှၤဂုၤပှၤဂၤလၢ အလိာ်ကွဲကဒါက့ၤဖဲအံၤန့ၣ်အိၣ်ဝဲဒၣ် ဖဲချၢးဘ်အပတီၢ်မ့ၢ်ဂ့ၤ, ထံကီၢ်ဒီဘ့ၣ်အပတီၢ်မ့ၢ်ဂ့ၤအိၣ်ဝဲဒၣ်, အဃိ ယမ့ၢ်ဘၣ်တဲအီၤလၢ ပတၢ်ထံၣ်တကပၤန့ၣ်, တၢ်အံၤမ့ၢ်ဝဲဒၣ် တၢ်စူးဖှိၣ်ရိဖှိၣ် အသနၢၣ်ကျိၤကျဲတကလုာ်န့ၣ်လီၤ.”
Socceroos ကဘၣ်ထူဒီး Egypt ဖဲမုၢ်ဘူၣ်—မုၢ်ဃုနံၤ ဂီၤခီ ဒီး စးထီၣ်လၢ ဂီၤခီ ၃နၣ်ရံၣ်န့ၣ် SBS ဒီး SBS On Demand ကစးထီၣ်ဒုးနဲၣ်အီၤတဘျီဃီန့ၣ်လီၤ.
——
မ့မ့ၢ်ဖဲမုၢ်ဖီဖး—မုၢ်ယဲၢ်နံၤ FIFA World Cup တၢ်လိာ်ကွဲပြၢ ၂၂သီအနံၤန့ၣ်, Spain ကဘၣ်ထူပြၢဒီး Austria, Portugal ကဘၣ်ထူပြၢဒီး Croatia ဒီး Switzerland ကဘၣ်ထံၣ်လိာ်အသးဒီး Algeria န့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၂၁ သီအနံၤအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
