တချုးဖဲလၢ ၂ဝ၂၆နံၣ် World Cup ဟီၣ်ခိၣ်ဒီဘ့ၣ် တၢ်လိာ်ကွဲပြၢဖျၢၣ်ထူစးထီၣ် ဖဲ North America ဒ်ဘၣ် အိၣ်တ့ၢ်က့ၤဖဲတလါဘျဲၣ်ဖိအတီၢ်အံၤ Socceroos ကရူၢ်မၤဆူၣ်ထီၣ်အဝဲသ့ၣ်တၢ်အိၣ်ကတဲာ်ကတီၤပာ်သးလၢဖျၢၣ်ထူအဂီၢ်န့ၣ်လီၤ. လၢတၢ်အိၣ်ကတဲာ်ကတီၤထီၣ်သးအဂီၢ် ဖျၢၣ်ထူကရူၢ်အံၤ အပှၤနဲၣ်လိတၢ်အခိၣ် Tony Popovic ဘၣ်မၤတၢ်အိၣ်ဝဲအါမးဒီး ပှၤကိးဂၤဒဲးအိၣ်ခိးကွၢ်လၢ်ဝဲတၢ်လၢအကမၤအသးသ့ၣ်တဖၣ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တၢ်ဆၢကတီၢ်လၢအကပှဲၤဒီးတၢ်ဆီၣ်သနံးတၢ်ကီတၢ်ခဲန့ၣ် အိၣ်ဘူးထီၣ်ဝဲဒၣ်လၢ Socceroos အဂီၢ်လံ — ဒီး မ့ၢ်တၢ်ဆၢကတီၢ်လၢ ဖျၢၣ်ထူကရူၢ်ပှၤနဲၣ်လိတၢ် Tony Popovic ကဘၣ်မၤဝဲ တၢ်ဆၢတဲာ်လၢ အကီမးသ့ၣ်တဖၣ်န့ၣ်လီၤ.
ဖဲလါအဝဲအံၤကတၢၢ်န့ၣ်, ပှၤလၢအအိၣ်ပှဲၤဒီးတၢ်မုၢ်လၢ် အဒၣ်စ့ၣ်အါမးသ့ၣ်တဖၣ်အကျါ, အဝဲကဘၣ်ဃုထၢထီၣ်ဝဲဒၣ်ပှၤထဲ ၂၆ဂၤလၢကနုာ်လီၤလိာ်ကွဲပြၢတၢ်လၢ World Cup တၢ်လိာ်ကွဲပြၢဖျၢၣ်ထူအဂီၢ်န့ၣ်လီၤ.
Popovic အၢၣ်လီၤဝဲလၢ ပှၤလိာ်ကွဲဖိလၢ အဝဲကဃုထၢထီၣ်အီၤသ့ၣ်တဖၣ် အိၣ်ပာ်လၢအခိၣ်နူာ်အပူၤတဘျုးဂၤလံ, နာ်သက့ ဘၣ်အိၣ်ခိးပှၤလိာ်ကွဲဖိတနီၤလၢ အဘၣ်ဒိဘၣ်ထံးသ့ၣ်တဖၣ်န့ၣ်လီၤ.
“ယဆိကမိၣ်န့ၣ် ပှၤလိာ်ကွဲဖိတနီၤ အဝဲသ့ၣ်နီၣ်ခိက့ၢ်ဂီၤ နုာ်လီၤပြၢတၢ်ကကဲတကဲန့ၣ် တသ့ၣ်ညါဝဲလီၤတံၢ်ဒံးဘၣ်, ဒီး ဖဲလါမ့ၤအကတၢၢ်အံၤမ့ၢ်တၢ်ကမၤအသးဒ်လဲၣ်——————အဃိတၢ်အိၣ်သးန့ၣ် ဘၣ်သ့ၣ်သ့ၣ်အိၣ်ဝဲဖဲ အမျးကယၤ ၇ဝ မ့တမ့ၢ် ၈ဝ န့ၣ်လီၤ.”
ဘၣ်ဃးဒီးတၢ်အိၣ်သးအံၤ ပှၤလိာ်ကွဲဖိလၢအဝဲအိၣ်ခိးကွၢ်လၢ်အီၤအကျါသ့ၣ်တဖၣ်န့ၣ် လီၤဂာ်ဒ်သိး ပှၤလိာ်ကွဲဖိ Harry Souttar, လၢအမ့ၢ် အပူၤကွံာ် လွံၢ်နံၣ်အခါ အဝဲမ့ၢ်တ့ၢ် World Cup—ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ပှၤဒူပှၤဃိၤသ့ၣ်တဖၣ်အကျါတဂၤ, ဒီးခီဖျိလၢအဘၣ်ဒိအဃိ ဟးထီၣ်အိၣ်ဘှံးတ့ၢ်ဖးယံၤလံတဂၤ, ဒီးအဂၤတဂၤန့ၣ်မ့ၢ်ဝဲဒၣ် Aiden O'Neill, ပှၤလိာ်ကွဲဖျၢၣ်ထူ လၢပျီပူၤတၢ်ခၢၣ်သးတဂၤ, ဒီးဖဲအပူၤကွံာ် စှၤကိးနွံန့ၣ် လၢအဂဲၤလိာ်ကွဲဖဲအကရူၢ်အပူၤအခါ အခီၣ်မဲၣ်ရံးဘၣ်ဒိတဂၤန့ၣ်လီၤ.
ဖဲလါမ့ၤ ၆သီအနံၤန့ၣ် Popovic ဟးထီၣ်လဲၤဝဲဆူ Sarasota တၢ်သိၣ်လိအလီၢ် လၢအအိၣ်ဖဲ Florida ကီၢ်စဲၣ်, ကီၢ်အမဲရကၤအပူၤန့ၣ်လီၤ.
အဝဲလဲၤကိးဃုာ်ဒီး ပှၤဃိးဂၤ လၢအမုၢ်လၢ်ပာ်ဝဲ လၢကလိာ်ကွဲဖဲဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢအပူၤ, လၢအမ့ၢ်ပှၤသ့ၣ်တဖၣ်လၢ အလိာ်ကွဲဖဲ အနီၣ်ကစၢ်ကရူၢ်—club ဒၣ်ဝဲ အဆၢကတီၢ် ဝံၤလံသ့ၣ်တဖၣ်န့ၣ်လီၤ.
အဝဲသ့ၣ်န့ၣ်မ့ၢ်ဝဲ: Souttar, Mat Leckie, Mitch Duke, Hayden Matthews, Anthony Caceres, Brandon Borrello, Nick D'Agostino ဒီး Nishan Velupillay သ့ၣ်တဖၣ်န့ၣ်လီၤ.
Popovic စံးဝဲဒၣ် ပှၤလၢအတၢ်မုၢ်လၢ်အိၣ်လၢကနုာ်လီၤလိာ်ကွဲဘၣ်ဖဲ ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ — World Cup အပူၤသ့ၣ်တဖၣ်, အဝဲသ့ၣ်လိာ်ကွဲတၢ်လီၢ်မ့ၢ်န့ၢ်အါန့ၢ်တခါတခီ, ကနုာ်လီၤပၣ်ဃုာ်ဘၣ်ဝဲဒၣ်ဖဲ ပှၤဃုထၢထီၣ်ပှၤအလီၢ်ခံကတၢၢ် ၂၆ ဂၤအကျါန့ၣ်လီၤ.
အဝဲဟ့ၣ်လီၤဝဲတၢ်အဒိဒ်သိးဒီး သးစၢ်ပှၤလိာ်ကွဲဖျၢၣ်ထူဖိ Nestory Irankunda န့ၣ်လီၤ.
“တၢ်လိာ်ကွဲ အလီၢ်တခါစုာ်စုာ်အဂီၢ် ကလိၣ်ဘၣ်ပှၤပှဲၤဂၤလဲၣ်န့ၣ် ပဆိကမိၣ်ပာ်စၢၤအိၣ်ဝဲဒၣ်မူးမူးနီၣ်နီၣ်. ပှၤလၢအလိာ်ကွဲသ့လၢတၢ်လီၢ်ကိးခါဒဲး ကိးတီၤဒဲးသ့ၣ်တဖၣ်န့ၣ် ကဲတၢ်မၤစၢၤဂ့ၤမး. ပမၤအီၤဒ်အံၤထီဘိ. ကမၤအီၤဒ်အံၤကိးဂၤဒဲးလီၤ. ပကဟ့ၣ်တၢ်အဒိဒ်သိး Nestor. အဝဲန့ၣ် ပျီပူၤတၢ်မဲာ်ညါ အလီၢ်ခဲလၢာ်န့ၣ် လိာ်ကွဲဝဲန့ၢ်. ဖဲလါမးရှးအတီၢ်ပူၤန့ၣ်, အဝဲလိာ်ကွဲဝဲဖဲတၢ်မဲာ်ညါထဲတဂၤဧိၤဒီး လိာ်ကွဲဝဲန့ၢ်ဂ့ၤဂ့ၤ လၢအတအိၣ်တ့ၢ်ဒီးတၢ်မၤလိနီတမံၤဘၣ်. ပှၤလိာ်ကွဲဖိဒံးအံၤမ့ၢ်အိၣ်အါထီၣ်န့ၣ်, မ့ၢ်တၢ်ဂ့ၤလၢပဂီၢ်န့ၣ်လီၤ.”
Socceroos ပှၤလိာ်ကွဲဖျၢၣ်ထူဖိသ့ၣ်တဖၣ်အံၤ အပူၤကွံာ်န့ၣ် အတအိၣ်ဒီးပှၤလိာ်ကွဲဖျိးစိအဂံၢ်အဘါဘၣ်, လီၤဆီဒၣ်န့ၣ် ပှၤလိာ်ကွဲဖဲပျီပူၤတၢ်မဲာ်ညါ တအိၣ်ဂ့ၤဂ့ၤဘၣ်.
ဘၣ်ဆၣ်သနာ်က့ Popovic စံးဝဲဒၣ် ဘၣ်ဃးဒီး သးစၢ်ပှၤလိာ်ကွဲ လၢတၢ်မဲာ်ညါ Mo Toure န့ၣ် အဝဲအိၣ်ဒီးတၢ်သူၣ်ပိၢ်သးဝး ခီဖျိလၢအဝဲမ့ၢ်ပှၤတဂၤလၢ အတီခိၣ်ရိၤမဲ အီစထြ့လယါဖျၢၣ်ထူကရူၢ်တၢ်မဲာ်ညါန့ၢ်ဝဲဒၣ်ဖဲ North America အဃိန့ၣ်လီၤ.
သးစၢ်ပှၤလိာ်ကွဲဖိလၢအသးနံၣ်အိၣ် ၂၂နံၣ်တဂၤအံၤ, တချုးအဟဲသုးအိၣ်ဖဲ Adelaide ဒ်ဘၣ်အခါ အဝဲမ့ၢ်တ့ၢ် Liberian ပှၤဘၣ်ကီဘၣ်ခဲဖဲ Guinea န့ၣ်လီၤ. အဝဲဟဲတုၤအခါန့ၣ် အသးနံၣ်အိၣ်ဒံးဒၣ်ဖဲဃိလါဖိန့ၣ်လီၤ. အဝဲမ့ၢ်ပှၤလိာ်ကွဲဖဲ Norwich City ကီၢ်အဲကလံးဖျၢၣ်ထူ club—ကရူၢ် တၢ်လီၢ်ခံ, ခံဂ့ၢ်တဂ့ၢ်အလီၢ်န့ၣ်လီၤ. အဝဲလဲၤသုးလိာ်ကွဲဖဲ ကရူၢ်အံၤအပူၤ ဖဲတၢ်လိာ်ကွဲကတီၢ်နုာ်လီၤတဝာ်ဃၣ်ဃၣ်အခါ ဒီး အဝဲလိာ်ကွဲလၢ အကရူၢ်အံၤအဂီၢ် န့ၢ်ဝဲဂ့ၤဂ့ၤန့ၣ်လီၤ.
“မ့ၢ်ဝဲယၤ, လီၤသူၣ်ပိၢ်သးဝးဒိၣ်မး, ပှၤလိာ်ကွဲကရူၢ်အံၤယသ့ၣ်ညါအီၤဂ့ၤဂ့ၤ, ဒီး အဝဲသ့ၣ်တၢ်လိာ်ကွဲပြၢသ့ၣ်တဖၣ်န့ၣ် ယထံၣ်ဘၣ်အီၤအါမးလံ, ဒီးအဝဲအိၣ်ဒီး တၢ်နာ်န့ၢ်လီၤသးပှဲၤပှဲၤန့ၣ်လီၤ. ဖဲတနံၣ်အံၤ နံၣ်တဝာ်န့ၣ် အဝဲသ့ၣ်ကရူၢ်အံၤ လိာ်ကွဲန့ၢ်ဂ့ၤမး. အဃိန့ၣ်, အဝဲသ့ၣ်မၤတ့ၢ်အီၤဂ့ၤမး, ဒီး တၢ်အဝဲန့ၣ် မ့ၢ်ဝဲတၢ်မၤစၢၤအီၤလၢ အကနုာ်လီၤအိၣ်ဆီလီၤအသးချ့ချ့ သြီနုာ်ဘၣ် ဂိလ် ဆိဆိန့ၣ်လီၤ. အဃိ, အဝဲန့ၣ်အိၣ်ဒီးတၢ်နာ်န့ၢ်လီၤသးလၢလၢပှဲၤပှဲၤ, ဒီး တယံၤဘၣ်န့ၣ် ပမုၢ်လၢ်လၢ ပကထံၣ်ဘၣ်က့ၤအီၤန့ၣ်လီၤ.”
Popovic စံးလၢ Socceroos တၢ်လိာ်ကွဲကတီၤဆိအဂီၢ် ပှၤဟဲဆိသ့ၣ်တဖၣ် မုၢ်လၢ်ပာ်တၢ်လၢ တၢ်မၤဂ့ၤမၤကျၢၤထီၣ် နီၣ်ခိက့ၢ်ဂီၤ အတၢ်ဂံၢ်ဆူၣ်ဘါဆူၣ်အဂီၢ်သ့ဝဲန့ၣ်လီၤ.
“မ့ၢ်လီၤ, အကအိၣ်ဒီးတၢ်မၤတဆီဘၣ်တဆီဒီး တၢ်ရဲၣ်တၢ်ကျဲၤတခါ. ဆူမဲာ်ညါတနွံန့ၣ် ပကတီၢ် ကဖျ့ ပှၤလိာ်ကွဲဖိသ့ၣ်တဖၣ်ဝံၤဒီးပကတဲလၢအဝဲသ့ၣ်အိၣ်ကတဲာ်ကတီၤပာ်အသးလံန့ၣ် ပမၤအီၤတသ့ဘၣ်. ပကဘၣ်ဆိကမိၣ်ဃုာ်ဝဲဒၣ်, အခဲအံၤန့ၣ်အဝဲသ့ၣ်အိၣ်တုၤအပတီၢ်ဖဲလဲၣ်, အဝဲသ့ၣ်လိၣ်ကွဲတ့ၢ်ပာ် တၢ်လိာ်ကွဲပြၢပှဲၤဘျီလံလဲၣ်. နာ်သက့ အဟဲတုၤမ့ၢ်ဆိတခီ, ဆူမဲာ်ညါ သၢနွံ တုၤလွံၢ်နွံအတီၢ်ပူၤန့ၣ် အပဟ့ၣ်လီၤအဝဲသ့ၣ် တၢ်သိၣ်လိကန့ၢ်ဝဲဒၣ် လၢတၢ်မၤဂ့ၤထီၣ်ကျၢၤထီၣ်နီၣ်ခိက့ၢ်ဂီၤ အဂီၢ်မ့ၢ်ဂ့ၤ, ပမၤန့ၢ်အဝဲသ့ၣ်ကန့ၢ်အဂ့ၤကတၢၢ် လၢတဂၤစုာ်စုာ်ဒၣ်ဝဲအဂီၢ်န့ၣ်လီၤ.”
တနံၣ်အံၤ ပှၤနုာ်လီၤပြၢတၢ်အကရူၢ်န့ၢ် တၢ်မၤအါထီၣ်အီၤတုၤလၢ ၄၈ ဖုအဃိ, ကရူၢ်လၢအကထီၣ်ဘၣ်ဒီးကလိာ်ကွဲဘၣ်တုၤဖဲ တၢ်လိာ်ကွဲရှူဒီးဘၣ်ဟးထီၣ်အပတီၢ်န့ၣ် ကကဲထီၣ်ဝဲဒၣ် ၃၂ဖုန့ၣ်လီၤ. အပူၤကွံာ်လၢညါ တၢ်လိာ်ကွဲကရူၢ်လၢအထီၣ်ဘၣ်တုၤလၢ အပတီၢ်ဖဲအံၤန့ၣ် အိၣ်ဒၣ်ထဲ ၁၆ဖုန့ၣ်လီၤ.
တၢ်လိာ်ကွဲပြၢသ့ၣ်တဖၣ်န့ၣ် အိၣ်ဝဲဒီးအဂ့ၢ်အကျိၤ လၢအပှဲၤဒီးတၢ်သးကညီၤန့ၣ်လီၤ.
ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢအဂီၢ် ပှၤတူၢ်လိာ် တၢ်လိာ်ကွဲပြၢအဟံၣ်ကစၢ် လၢအမ့ၢ် ကီၢ်အမဲရကၤ, တူးရကံးဒီး ဖးရးကွ့ သ့ၣ်တဖၣ် အတဘၣ်ပြၢလိာ်သးဒီးအဝဲသ့ၣ်ဘၣ်အသိး Group D ကရူၢ်လၢ ပှၤဘၣ်ပြၢလိာ်သးဒီး အီစထြ့လယါဖျၢၣ်ထူကရူၢ်သ့ၣ်တဖၣ် တမ့ၢ်ထံကီၢ်လၢအဂံၢ်ဆူၣ်ဘါဆူၣ်နီတဘ့ၣ်ဘၣ်.
လၢပှၤလိာ်ကွဲဖျၢၣ်ထူပိာ်ခွါသ့ၣ်တဖၣ်အံၤအဂီၢ် Popovic အိၣ်ဒီးတၢ်သူၣ်ဆူၣ်သးဂဲၤသပှၢ်ပှၢ်, နာ်သက့ အဝဲအိၣ်ဒီးတၢ်ပလီၢ်သးလၢ အတၢ်ပညိၣ်သ့ၣ်တဖၣ်န့ၣ် အဝဲကပာ်ဖျါ အါတလၢဘၣ်ဖုးဝဲဆူကမျၢၢ်အအိၣ်န့ၣ်လီၤ.
တၢ်လိာ်ကွဲအဒိအတဲာ်လၢအဝဲတူၢ်လိာ်အီၤသ့သ့ၣ်တဖၣ်မ့ၢ်မနုၤလဲၣ်န့ၣ်အဝဲပာ်ဖျါဝဲဒ်အံၤန့ၣ်လီၤ.
“ယဆိကမိၣ်န့ၣ် ပအဲၣ်ဒိးဒုးနဲၣ်ဖျါဝဲဒၣ် တၢ်လိာ်ကွဲပြၢကိးဘျီဒဲးအပူၤ ပလိာ်ကွဲပြၢအီၤန့ၢ်ဂ့ၤဂ့ၤ. တၢ်မနုၤသ့ၣ်တဖၣ်လၢ ပမၤအီၤဖျိဂ့ၤဂ့ၤ မ့တမ့ၢ် တၢ်လၢကမၤအီၤန့ၢ်ဂ့ၤဂ့ၤ, လၢပတဲအီၤသ့ဒ်သိး, မ့ၢ်လီၤ, ပမၤအီၤလၢပှဲၤထီၣ်ဘးလံ, တၢ်ဒ်အံၤသ့ၣ်တဖၣ်န့ၣ် ယတအဲၣ်ဒိးတဲအီၤဘၣ်. စးထီၣ်လၢအခီၣ်ထံးလံၤလံၤ တၢ်လၢပတဲတ့ၢ်အီၤန့ၣ်မ့ၢ်ဝဲ, ဘၣ်မနုၤလၢကရူၢ်အံၤ တမၤတၢ်လၢအလီၤဆီတခါခါဘၣ်လဲၣ်? ပကနုာ်လီၤဝဲတၢ်ပြၢဒီး တၢ်ဆိကမိၣ်အံၤန့ၣ်လီၤ. ပှၤလၢအမၤတၢ်လီၤဆီတခါခါန့ၢ်န့ၣ် မ့ၢ်အကမ့ၢ်ပဝဲဧါ, ဒီး တၢ်လၢအီစထြ့လယါကီၢ် မၤအီၤတန့ၢ်နီတဘျီဘၣ်န့ၣ် မ့ၢ်ပမၤအီၤကန့ၢ်တခါခါစ့ၢ်ဧါ? တၢ်သ့ၣ်တဖၣ်အံၤန့ၣ်လီၤ.”
ဖဲလၢသံကွၢ်ဘၣ်ဃး ၂ဝ၂၂နံၣ် Graham Arnold အကရူၢ်ဒီး ၂ဝ၂၆နံၣ် အခဲအံၤ အဝဲပှၤလိာ်ကွဲဖိသ့ၣ်တဖၣ်အံၤ တၢ်လီၤဆီ အခိၣ်သ့ၣ် န့ၣ်မ့ၢ်တၢ်မနုၤလဲၣ်အခါ— Popovic စံးလၢ အတၢ်လီၤဆီလိာ်အသးသ့ၣ်တဖၣ်တအိၣ်အါအါဘၣ်, လီၤဆီဒၣ်တၢ် ဘၣ်ဃးဒီး ကရူၢ်အံၤအဖီခိၣ် ကမျၢၢ် အတၢ်ပာ်သး သ့ၣ်တဖၣ်န့ၣ်လီၤ.
“ယအဲၣ်ဒိးထံၣ်ဘၣ် တၢ်သူၣ်ဆူၣ်သးဆူၣ်ဒီးတၢ်ဆီၣ်ထွဲမၤစၢၤ ဒ်သိးပထံၣ်ဘၣ်တ့ၢ်အီၤဖဲ World Cup လၢအပူၤကွံာ်တဘျီအခါန့ၣ်. ပဆီၣ်ဖျိးဝဲဒၣ် အးကၠ့းထံနါဖဲတၢ်လိာ်ကွဲပျီပူၤ, ဒီး ဖဲတၢ်လိာ်ကွဲပြၢတဘျီန့ၣ် ပမၤကဲထီၣ် တၢ်လီၤလိၢ်လီၤလး ဘူးလၢအကန့ၢ်တခါန့ၣ် ပဆိကမိၣ်ဆံးအီၤတသ့ဘၣ်. ဒီးထံကီၢ်ဒီဘ့ၣ်န့ၣ် ဆီၣ်ထွဲဝဲ အီစထြ့လယါကီၢ်. ပှၤအီစထြ့လယါဖိ လၢအအိၣ် လၢအီစထြ့လယါကီၢ်အချၢကိးဂၤ ဆီၣ်ထွဲအဝဲသ့ၣ်, ကထူဝဲလၢအနၣ်ရံၣ်အခါဖဲလဲၣ်န့ၣ် အဝဲသ့ၣ် ဂဲၤဆၢထၢၣ်ဒီးကွၢ်ကီအီၤန့ၣ်လီၤ. တၢ်ဒံးအံၤန့ၣ် ပအဲၣ်ဒိးကဒါအီၤတဘျီကဒီး. ပအဲၣ်ဒိးတၢ်ဆီၣ်ထွဲမၤစၢၤဒ်အံၤ. ပအိၣ်ဒီးကရူၢ်လၢအပှဲၤဒီးတၢ်လီၤသူၣ်ပိၢ်သးဝးန့ၣ်လီၤ.”
တၢ်လၢဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် အတမ့ၢ်ထဲဒၣ် တၢ်ကဲထီၣ်အသးဖဲတၢ်လိာ်ကွဲပျီပူၤဘၣ်. တၢ်တဘျီအံၤန့ၣ် Donald Trump အစိၤ ကီၢ်အမဲရကၤအပူၤ တၢ်မၤအသး လၢအအိၣ်ဒီးတၢ်ဂ့ၢ်လိာ်ဘှီလိာ်သ့ၣ်တဖၣ်အိၣ်အါမး လၢတၢ်ကဘၣ်ပလီၢ်သးန့ၣ်လီၤ.
ဘၣ်ဃးဒီး ကီၢ်အမဲရကၤ ထံရူၢ်ကီၢ်သဲးအတၢ်အိၣ်သးအဖီခိၣ်န့ၣ် Popovic စံးဝဲဒၣ်လၢ အတအိၣ်ဒီး တၢ်ဘၣ်ယိၣ်ဘၣ်ဘှီဘၣ်, ဒီး ပဲၤလီၤတဲာ်ကွံာ်ဝဲ ပှၤလိာ်ကွဲဖျၢၣ်ထူ ဖဲတၢ်ခၢၣ်သးအပတီၢ် Jackson Irvine အတၢ်ပဲၤဖး Mr Trump အဂ့ၢ်သ့ၣ်တဖၣ်န့ၣ်လီၤ.
Popovic စံးဝဲဒၣ် အဝဲတူၢ်လိာ်ကမုာ် Mr Trump လၢအကဟဲဒီးကွၢ်ကီဝဲ အီစထြ့လယါကီၢ် အတၢ်လိာ်ကွဲပြၢဒီးကီၢ်အမဲရကၤ လၢအမ့ၢ်ဖဲ လါယူၤအသီ ၂ဝအနံၤ, လၢတၢ်ကပြၢအီၤဖဲ Seattle န့ၣ်လီၤ.
တၢ်ဂ့ၢ်လၢအဘၣ်ဃးဒီး ဖျၢၣ်ထူတၢ်လိာ်ကွဲအဂ့ၢ်တမံၤန့ၣ်မ့ၢ်ဝဲဒၣ်ကဘီယူၤန့ၣ်လီၤ, ပှၤအဲၣ်ဖျၢၣ်ထူတၢ်လိာ်ကွဲ လၢအအဲၣ်ဒိးလဲၤကွၢ်ကီ ဖျၢၣ်ထူတၢ်လိာ်ကွဲပြၢဖဲကီၢ်အမဲရကၤအပူၤသ့ၣ်တဖၣ် ပဲၤအၢပဲၤသီတၢ်အါမး မ့ၢ်လၢ ကဘီယူၤ အပှ့ၤသ့ၣ်တဖၣ် ဒိၣ်ထီၣ်ဒီး တၢ်လၢအဘၣ်ထွဲလိာ်သးဒီး တၢ်ဂ့ၢ်အံၤသ့ၣ်တဖၣ် အပှ့ၤဒိၣ်ထီၣ်အဃိန့ၣ်လီၤ.
Popovic စံးဝဲဒၣ် အဝဲအိၣ်ဒီး တၢ်ဒိသူၣ်ဒိသးလၢ ပှၤဆီၣ်ထွဲ တၢ်လိာ်ကွဲဖျၢၣ်ထူကရူၢ်အဂီၢ်န့ၣ်လီၤ.
“မ့ၢ်လီၤ, တၢ်ဂ့ၢ်အဝဲန့ၣ်, မ့မ့ၢ်တၢ်ဂ့ၢ်လၢအဝဲသ့ၣ်လဲၤတသ့ဘၣ်န့ၣ်... မ့ၢ်တၢ်ကီလၢပှၤကွၢ်ကီဖျၢၣ်ထူသ့ၣ်တဖၣ်အဂီၢ်. ခီဖျိလၢ တၢ်ဆီၣ်ထွဲ တၢ်လိာ်ကွဲအဂီၢ် နဘၣ်သူနတၢ်ဆၢကတီၢ်အါမး...ဒီးနမ့ၢ်ဒွးဃုာ်ဝဲဒၣ် ကဘီယူၤအပှ့ၤဒီး တၢ်ကွၢ်ကီ တၢ်လိာ်ကွဲ လံာ်ပျဲလဲးမးအပှ့ၤသ့ၣ်တဖၣ်, ဒီး တၢ်အိၣ်ပတုာ်ဖဲ ဟိးထဲလ် အပှ့ၤသ့ၣ်တဖၣ်ခဲလၢာ်န့ၣ်... တၢ်အဝဲန့ၣ် အတညီဘၣ်. အတညီနီတစဲးဖိဘၣ်. နာ်သက့ ကျိၣ်စ့တၢ်ဂ့ၢ်အဃိ ပှၤလၢအလဲၤကွၢ်ကီအီၤတသ့ဘၣ်သ့ၣ်တဖၣ်... ယမုၢ်လၢ်လၢ အဝဲသ့ၣ် ကကွၢ်ကီအီၤဖဲ ကွဲၤထံၣ်ဟူအပူၤ, ဆ့ၣ်နီၤအိလိာ်ကွဲတၢ်ဒီး ကွၢ်ကီအီၤဖဲအီစထြ့လယါအံၤ. ဒီးဖဲတၢ်လိာ်ကွဲပြၢအံၤမ့ၢ်ဝံၤ ဒီး အဝဲသ့ၣ်ထံၣ်ဘၣ်ပလိာ်ကွဲမ့ၢ်ဝံၤန့ၣ် ပမုၢ်လၢ်လၢအဝဲသ့ၣ် ကပာ်ကဖၢလၢအသးဒီးပှၤန့ၣ်လီၤ.”
တုၤလီၤဖဲလါမ့ၤ ၁၁သီန့ၣ်, Popovic အနီၣ်ကစၢ်ဒၣ်ဝဲ ဘၣ်တီၣ်ထီၣ်ဝဲဒၣ် ပှၤလိာ်ကွဲတၢ်ဖိစရီ ဆူ FIFA ကရူၢ်အအိၣ်, လၢအထီၣ်ဘးတုၤ ၅၅ ဂၤန့ၣ်လီၤ.
ဒီး မ့ၢ်တုၤလီၤဖဲလါယူၤ ၁သီန့ၣ် ကဘၣ်ဒီၣ်တဲာ်စှၤလီၤကွံာ်ဝဲပှၤလိာ်ကွဲဖိသ့ၣ်တဖၣ်အံၤ လၢအမ့ၢ်ပှၤလိာ်ကွဲတၢ်ဖိလၢတၢ်ဃုထၢထီၣ်အီၤအလီၢ်ခံကတၢၢ်န့ၣ် ကမ့ၢ်ဝဲ ၂၆ ဂၤန့ၣ်လီၤ.
ပှၤလိာ်ကွဲတၢ်ဖိ ၂၆အံၤ အကဘၣ်အိၣ်ဖဲ San Francisco Bay Area, ဒီး တၢ်လိာ်ကွဲပြၢဒီတကတီၢ်န့ၣ် အီစထြ့လယါကီၢ် တၢ်မၤလိအလီၢ်န့ၣ် တၢ်ကမၤအီၤဖဲ အဘူးဒီး Oakland န့ၣ်လီၤ.
တချုးလၢ တၢ်လိာ်ကွဲပြၢအံၤစးထီၣ်ဒ်ဘၣ်န့ၣ် အီစထြ့လယါကီၢ် ကလိာ်ကွဲ ဒ်သိးတၢ်မၤကလၢၤထီၣ်ခီၣ် တၢ်ပြၢလိာ်သးအသိးန့ၣ် ခံဘျီ - လၢအမ့ၢ် ဖဲလါမ့ၤ ၃၁သီန့ၣ် အဘၣ်လိာ်ကွဲပြၢဒီး Mexico ဖဲ Los Angeles ဝ့ၢ်, ဒီး ဖဲလါယူၤ ၇သီန့ၣ် ကဘၣ်လိာ်ကွဲပြၢဝဲဒီး Switzerland ဖဲ San Diego ဝ့ၢ်ပူၤန့ၣ်လီၤ.
အီစထြ့လယါကီၢ်ကစးထီၣ်အတၢ်ပြၢန့ၣ် ဖဲလါယူၤ ၁၄သီ လၢအကဘၣ်တိနိၣ်လိာ်အသးဒီး တူးရကံး ဒီးကဘၣ်လိာ်ကွဲပြၢဝဲဖဲ Vancouver န့ၣ်လီၤ. မ့ၢ်ဝံၤန့ၣ် ဖဲလါယူၤ အသီ ၂ဝ န့ၣ် အကဘၣ် လိာ်ကွဲပြၢဝဲဒီး ကီၢ်အမဲရကၤ ဖဲ Seattle ဝ့ၢ်, ဒီးတချုး တၢ်လိာ်ကွဲပြၢဖဲကရူၢ်အပတီၢ်ဝံၤဒ်ဘၣ်န့ၣ်, အကဘၣ်တိနိၣ်လိာ်အသးဒီး Paraguay လၢကဘၣ်လိာ်ကွဲဝဲဖဲ လါယူၤ ၂၆သီ ဖဲ Santa Clara ဝ့ၢ်န့ၣ်လီၤ.
တၢ်လိာ်ကွဲ ကရၢ တဖုစုာ်စုာ်အပူၤ ကရူၢ် လၢအနၢၤတၢ်အါကတၢၢ်ခံကရူၢ်, ဒီးကရူၢ်လၢ အအိၣ်ဖဲနီၣ်ဂံၢ်သၢအပတီၢ် ဃိးကရူၢ်, ကထီၣ်ဘၣ်ဝဲဆူ (ရှုံးထွက်) ရှူးဒီးဟးထီၣ် တၢ်ပြၢအပတီၢ်န့ၣ်လီၤ.
၂ဝ၂၆နံၣ် FIFA World Cup တၢ်လိာ်ကွဲပြၢ ၁ဝ၄ ခါခဲလၢာ်န့ၣ် SBS တၢ်ကစီၣ်သန့ ကထုးထီၣ်ရၤလီၤအီၤတဘျီဃီ ဒ်သိးတၢ်ရဲၣ်တၢ်ကျဲၤလီၤလီၤဆီဆီတခါန့ၣ်လီၤ.
