FIFA World Cup—ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ၁၉သီ တသီအနံၤအံၤ, ဘၣ်တၢ်လိာ်ကွဲဝဲဒၣ်တၢ်ပြၢ ဆူၣ်ဆူၣ်ကိၤကိၤ ရှူဟးထီၣ် သၢခါ, ဒီး ကၠၢမနံၣ်ဒီး နဲၣ်သၢၣ်လဲၣ် ဘၣ်ဟးထီၣ်ကွံာ်ဝဲဒၣ် ဖဲလၢတၢ်ဆၢတဲာ်အီၤဒီး ဖဲၤနၢၤတံၤ ဝံၤအလီၢ်ခံ, ဒီးမ့မ့ၢ်ဘြၤစံလ်န့ၣ် တချုး ပှၤစံၣ်ညီၣ်တဲာ်တၢ်ဖဲပျီပူၤ အူသီၣ်ထီၣ်တၢ်ဒ်ဘၣ်အခါန့ၣ် အဝဲသ့ၣ်မၤနၢၤဝဲတၢ်ပြၢန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၁၉ သီတသီ တၢ်ပာ်ဖျါအဘိၣ်န့ၣ်လီၤ.
———
ဘြၤစံလ် ဖျၢၣ်ထူကရူၢ် လၢအမ့ၢ်တ့ၢ်လံ ပှၤဖျိးစိ—ခၠၣ်ပံၣ်ယၣ်ယဲၢ်ဘျီ လဲၤထီၣ်ဘၣ်ဝဲဆူ ကရူၢ် ၁၆ဖု တၢ်လိာ်ကွဲပြၢအပတီၢ် ဖဲလၢအဝဲသ့ၣ်မၤနၢၤဝဲဒၣ် ယပၣ်ဖျၢၣ်ထူကရူၢ် ၂—၁ကိ ဝံၤအလီၢ်ခံန့ၣ်လီၤ. အဝဲသ့ၣ်အတၢ်မၤနၢၤကိ ခံဖျၢၣ်တဖျၢၣ်န့ၣ် သွီနုာ်လီၤဝဲဖဲ တၢ်ဟ့ၣ်လီၤအါထီၣ်တၢ်ဆၢကတီၢ်လၢတၢ်ဘၣ်ဒိဘၣ်ထံးဂီၢ်အခါန့ၣ်လီၤ.
ယပၣ်ပှၤလိာ်ကွဲဖျၢၣ်ထူ Kaishu Sano သွီနုာ်ဆိကိအဃိ ကဲထီၣ်ဝဲ တၢ်လီၤကမၢကမၣ်လၢဘြၤစံလ်အဂီၢ်န့ၣ်လီၤ. တၢ်အံၤမ့ၢ်စ့ၢ်ကီးဝဲဒၣ် အဝဲအတၢ်သွီကိလၢထံဂုၤကီၢ်ဂၤအပတီၢ် အဆိကတၢၢ်တဖျၢၣ်န့ၣ်လီၤ.
ဘၣ်ဆၣ်သနာ်က့ ဖဲတၢ်လိာ်ကွဲပြၢတုၤလီၤ ၅၆ မံးနံးန့ၣ် ဘြၤစ့လ် ကရူၢ်ပှၤလိာ်ကွဲဖိ Casemiro က့ၤသွီကဒါကိတဖျၢၣ်, ဒီးဖဲန့ၣ်အလီၢ်ခံ ဖဲတၢ်ဟ့ၣ်လီၤအါထီၣ်တၢ်ဆၢကတီၢ်လၢတၢ်ဘၣ်ဒိဘၣ်ထံးအဂီၢ်အခါန့ၣ် အဝဲသ့ၣ်ပှၤလိာ်ကွဲဖိ Gabriel Martinelli သွီနုာ်ကဒီးဝဲကိခံဖျၢၣ်တဖျၢၣ်အဃိ အဝဲသ့ၣ်လဲၤထီၣ်ဘၣ်ဝဲဒၣ်ဆူ ကရူၢ် ၁၆ဖု တၢ်လိာ်ကွဲကပြၢအပတီၢ်န့ၣ်လီၤ.
နီၤဝ့ ဒီး Côte d'Ivoire မ့တမ့ၢ် Ivory Coast ဖျၢၣ်ထူကရူၢ် အတၢ်လိာ်ကွဲပြၢပူၤ ပှၤလၢအမၤနၢၤတၢ်န့ၣ် အကဘၣ်တိနိၣ်လိာ်ဝဲအသးဒီး ဘြၤစံလ်ဖျၢၣ်ထူကရူၢ်အံၤန့ၣ်လီၤ.
———
မ့မ့ၢ်လၢ Massachusetts အပျီတၢ်လိာ်ကွဲပြၢအပူၤန့ၣ်, ကၠၢမနံၣ် လၢအမ့ၢ် ပှၤဖျိးစိ—ခၠၣ်ပံၣ်ယၣ်လွံၢ်ဘျီဖျၢၣ်ထူကရူၢ်အံၤ ပၤရၤကွ့ ဖျၢၣ်ထူကရူၢ် ထူဟးကွံာ်အီၤလၢတၢ်ပြၢအပူၤလံန့ၣ်လီၤ. ပၤရၤကွ့ဖျၢၣ်ထူကရူၢ်အံၤမၤနၢၤအဝဲသ့ၣ်ဒီး ဖဲၤနၢၤလ်တံၤ လၢအမ့ၢ် ၄—၃ကိန့ၣ်လီၤ.
အဝဲသ့ၣ်ခံဖုတၢ်လိာ်ကွဲပြၢအပူၤန့ၣ် တခီစုာ်စုာ် ဒိးန့ၢ်ဝဲ ကိတဂၤတဖျၢၣ်, ပၤရၤကွ့ ပှၤလိာ်ကွဲဖျၢၣ်ထူဖိ Julio Enciso သွီနုာ်လီၤဆိကိ လၢအထံးဝဲဒၣ်ဒီးအခိၣ်သၣ်ဃံ, ဒီးဖဲန့ၣ်အလီၢ်ခံ ကၠၢမနံၣ်သွီနုာ်လီၤကဒါက့ၤကိတဖျၢၣ်န့ၣ်လီၤ. လၢခံန့ၣ် ကၠၢမနံၣ်အံၤ သွီနုာ်အါထီၣ်ဝဲကိတဖျၢၣ် ဘၣ်ဆၣ်သနာ်က့လၢခံန့ၣ် VAR ဆၢတဲာ်လၢ အတကိဘၣ်န့ၣ်လီၤ.
ဖဲန့ၣ်အလီၢ်ခံ ပၤရၤကွ့မၤနၢၤဝဲအီၤဒီး ထီၣ်ဘၣ်ဝဲဆူ ကရူၢ် ၁၆ဖု တၢ်လိာ်ကွဲပြၢအပတီၢ်န့ၣ်လီၤ.
ပှၤဆီၣ်သ်အမဲရကၤဖျၢၣ်ထူကရူၢ်အံၤ အကဘၣ်တိနိၣ်လိာ်အသးဒီး ပှၤလၢအမၤနၢၤတၢ်ဖဲ ဖြၣ်စ့ၣ်ဒီး ဆွံၣ်ဒ့ၣ် တၢ်ပြၢန့ၣ်လီၤ.
———
တၢ်လိာ်ကွဲပြၢအဂၤတခါလၢအလီၤသူၣ်ပိၢ်သးဝးန့ၣ်မ့ၢ်ဝဲဒၣ် မီၤရကိၤဖျၢၣ်ထူကရူၢ် လၢအအိၣ်ဖဲဟီၣ်ခိၣ်ဒီဘ့ၣ်အပတီၢ်နီၣ်ဂံၢ်ဃု ဒီး နဲၣ်သၣ်လဲၣ် ဖျၢၣ်ထူကရူၢ် လၢအအိၣ်ဖဲဟီၣ်ခိၣ်ဒီဘ့ၣ်အပတီၢ်နီၣ်ဂံၢ်နွံ, ဖျၢၣ်ထူကရူၢ်ခံဖုအံၤအတၢ်လိာ်ကွဲပြၢန့ၣ်လီၤ.
လၢပှၤဒၢၣ်ရှ် ကရူၢ်အဂီၢ်န့ၣ် Cody Gakpo သွီနုာ်လီၤဆိန့ၢ်ဝဲကိ, ဒီးအဝဲသွီကိအံၤမ့ၢ်ဝဲဒၣ်ဖဲလၢ အဝဲတဲဖျါထီၣ်ဝဲဒၣ် အမါဒီးအီၤတၢ်လီၤမၢ်ဖးဒိၣ်တခါဝံၤအလီၢ်ခံစှၤကိးသီ, လၢအမ့ၢ်အဖိလၢအတအိၣ်ဖျဲၣ်လီၤဒ်ဘၣ်တဂၤ ဟးဂီၤကွံာ်န့ၣ်လီၤ.
ဘၣ်ဆၣ်သနာ်က့ လၢခံန့ၣ် မီၤရကိၤ က့ၤမၤန့ၢ်ကဒါက့ၤဝဲဒၣ်ကိ ဖဲတၢ်ဟ့ၣ်လီၤအါထီၣ်တၢ်ဆၢကတီၢ်လၢတၢ်ဘၣ်ဒိဘၣ်ထံးအဂီၢ် အခါန့ၣ်လီၤ.
အဝဲသ့ၣ်ခံခီလၢၤအံၤမ့ၢ်လၢအထီၣ်ထူၣ်လိာ်သးအဃိ လၢခံန့ၣ်ဘၣ်ထူအါထီၣ်ဝဲဒၣ်တၢ်ဆၢကတီၢ်တခီနၣ်ဂံၢ်, တကပၤ ၁၅မံးနံး နာ်သက့ မ့ၢ်လၢအနၢၤအရှူတအိၣ်ဖျါထီၣ်ဘၣ်အဃိ လၢခံန့ၣ်တၢ်လိာ်ကွဲပြၢအံၤ ဘၣ်ကတၢၢ်ဝဲဒၣ်ဒီး တၢ်ထူ ဖဲၤနၢၤလ်တံၤန့ၣ်လီၤ. တၢ်ထူဖဲၤနၢၤလ်တံၤအတီၢ်ပူၤန့ၣ် မီၤရကိၤ မၤနၢၤဝဲ နဲၣ်သၢၣ်လဲၣ် ၃—၂ကိ ဒီး ထီၣ်ဘၣ်ဝဲဆူ ကရူၢ် ၁၆ဖု တၢ်လိာ်ကွဲအပတီၢ် လၢအကဘၣ်တိနိၣ်လိာ်အသးဒီး ကီၢ်ခဲနဒၢ်ဖျၢၣ်ထူကရူၢ်န့ၣ်လီၤ.
———
ကတီၢ်ဖဲလၢ စီၤခၢၤရူ ဖျၢၣ်ထူကရူၢ် အိၣ်ကတဲာ်ကတီၤအသးလၢ ကထူပြၢဒီး အံးကၠ့ၣ် ဖျၢၣ်ထူကရူၢ် ဒ်သိးကထီၣ်ဘၣ်ဆူ ကရူၢ် ၁၆ဖုတၢ်လိာ်ကွဲပြၢအဂီၢ်အခါ, Cristian Volpato စံးဝဲဒၣ် တၢ်ပဲၤဖးနီၤဖးအီၤ ခီဖျိအဝဲ အတၢ်ဆၢတဲာ်လၢ အကဆီတလဲ ထူဖျၢၣ်ထူ လၢ အံးထလံး ဆူအီစထြ့လယါကီၢ်န့ၣ် မ့ၢ်ဝဲဒၣ် တၢ်သူၣ်ဆူၣ်သးဆူၣ် လၢအဝဲအဂီၢ်တခါန့ၣ်လီၤ.
“ယသ့ၣ်ညါ, ယထံၣ်တၢ်ကိးမံၤဒဲး, နာ်သက့, တဘျီတခီၣ် တၢ်လၢအဘၣ်ဃးဒီးနၤန့ၣ်ပှၤကတဲအီၤလီၤ. အကပၣ်ဒီးအဂ့ၤတနီၤ ဒီးအတဂ့ၤဘၣ်တနီၤ. ဘၣ်ဆၣ်သနာ်က့ ဒ်သိးပှၤလိာ်ကွဲဖျၢၣ်ထူတဂၤအသိး ယတူၢ်ဘၣ်ဒ်သိးလၢ, နကဘၣ်အိၣ်ဝဲဒီးတၢ်သးစွံကတုာ်န့ၣ်လီၤ. ဒီးဒ်နသ့ၣ်ညါအသိး, တဘျီတခီၣ် တၢ်သ့ၣ်တဖၣ်န့ၣ် နသူအီၤဒ်သိးမ့ၣ်ဆၣ်အသိးသ့ဝဲဒၣ်, ဒီး သူအီၤလၢတၢ်ဂ့ၤအဂီၢ်တကပၤသ့ဝဲစ့ၢ်ကီးန့ၣ်လီၤ.”
စီၤခၢၤရူ ကဘၣ်တိနိၣ်လိာ်အသးဒီး အံးကၠ့ၣ် ဖဲမုၢ်ဘူၣ်—မုၢ်ဃုနံၤ, ဒီး စးထီၣ်လၢ မုၢ်ထီၣ်နီၣ်ထိၣ် ဂီၤခီ ၃နၣ်ရံၣ်န့ၣ် တၢ်ကဒုးနဲၣ်အီၤတဘျီဃီဖဲ SBS ဒီး SBS On Demand အပူၤန့ၣ်လီၤ. ပှၤလၢအမၤနၢၤတၢ်န့ၣ် အကဘၣ်တိနိၣ်လိာ်အသးဒီး ပှၤလၢအမၤနၢၤတၢ်ဖဲ အးကၠ့းတံနါဒီး Cabo Verde အတၢ်လိာ်ကွဲပြၢန့ၣ်လီၤ.
———
ဖဲမုၢ်ပျဲၤ—မုၢ်သၢနံၤ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ အသီ ၂ဝ တနံၤန့ၣ် Côte d'Ivoire ဒီး နီၤဝ့ ကဘၣ်တိနိၣ်လိာ်အသး အဆိကတၢၢ်တဘျီ, ဒ်သိးကထီၣ်ဘၣ်ဝဲဒၣ် ကရူၢ် ၁၆ဖု တၢ်လိာ်ကွဲပြၢအပတီၢ်အဂီၢ်န့ၣ်လီၤ.
မ့မ့ၢ်ဖြၣ်စ့ၣ်န့ၣ် ကဘၣ်တိနိၣ်လိာ်အသးဒီး ဆွံၣ်ဒ့ၣ်, ဒီးဘူးထီၣ်လၢအနံၣ်တယၤအတီၢ်ပူၤန့ၣ် မ့ၢ်ဝဲဒၣ် အဝဲသ့ၣ်တၢ်တိနိၣ်လိာ်အသးအဆိကတၢၢ်တဘျီ ဖဲဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢအပူၤန့ၣ်လီၤ.
မ့မ့ၢ်လၢ မဲၣ်စံၣ်ကိၣ် လၢအမ့ၢ်စ့ၢ်ကီး ဟံၣ်ကစၢ်ပှၤတူၢ်လိာ်ခီၣ်ဆၢ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် ကဘၣ်ထူပြၢဝဲဒီး အံးကွ့းဒီ ဖဲ Mexico City အပူၤအဃိဒိးန့ၢ်ဘၣ်ဝဲဒၣ် တၢ်အဘျုးလၢအလိာ်ကွဲဘၣ်ဖဲအဟံၣ်ပျီပူၤအဃိန့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၁၉ သီတသီအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
