ကညီသးစၢ်ဒိးန့ၢ်ဘၣ်သးစၢ်ခိၣ်နၢ်တၢ်လၤကပီၤခီဖျိအတၢ်မၤစၢၤပှၤတဝၢ

ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn

စီၤထံဖိရံၤ နုာ်လီၤပၣ်ဃုာ်မုာ်သးမၤလီဒီးမၤစၢၤဝဲတၢ်ဖဲ Laverton College ကၠိ ဒီး Hobsons Bay Council's Youth Change Makers Challenge တၢ်ရဲၣ်တၢ်ကျဲၤသ့ၣ်တဖၣ်အပူၤ, လၢအပၣ်ဃုာ် သးစၢ်တၢ်လိာ်ကွဲပြၢအတၢ်ရဲၣ်တၢ်ကျဲၤသ့ၣ်တဖၣ်ဒီး နီၣ်သးဆူၣ်ချ့ဂ့ၢ်ဝီတၢ်မၤစၢၤဆီၣ်ထွဲသ့ၣ်တဖၣ်န့ၣ်လီၤ.

တၢ်လိာ်ကွဲပြၢ အတၢ်ရဲၣ်တၢ်ကျဲၤသ့ၣ်တဖၣ်အပူၤန့ၣ် အဝဲဟံးမူဒါဘၣ်ဃး တၢ်တူၢ်လိာ်မုာ်ပှၤသးစၢ်သ့ၣ်တဖၣ်ဖဲတၢ်ရဲၣ်တၢ်ကျဲၤအပူၤ, မၤစၢၤဆီၣ်ထွဲဝဲဒၣ်ပှၤသးစၢ်လၢအနုာ်လီၤပၣ်ဃုာ်သ့ၣ်တဖၣ်ဒီး ဒုးအိၣ်ထီၣ်စ့ၢ်ကီး ခိၣ်ဃၢၤန့ဆၢၣ်ဒ်သိး ပှၤသးစၢ်သ့ၣ်တဖၣ်ကတူၢ်ဘၣ်လၢ အဝဲသ့ၣ်အိၣ်ဒီးတၢ်ပူၤဖျဲးန့ၣ်လီၤ. ဖဲအဝဲတၢ်တီခိၣ်ရိၤမဲမၤစၢၤတၢ်အဖီလာ်န့ၣ်ပှၤသးစၢ်အိၣ်အါန့ၢ်အဂၤ ၂၃ဝ န့ၣ်လီၤ.

မ့ၢ်လၢအဝဲမုာ်သးမၤလီမၤစၢၤပှၤတဝၢအတၢ်ဖံးတၢ်မၤသ့ၣ်တဖၣ်အဃိ ဖဲလါယူၤလံ ၂၃ သီအနံၤန့ၣ် စီၤထံဖိရံၤ ဒိးန့ၢ်ဘၣ်ဝဲ လီၢ်ကဝီၤပတီၢ် သးစၢ်ခိၣ်နၢ်တၢ်လၤကပီၤ—Young Leader Award လၢအဘၣ်တၢ်ဟ့ၣ်လီၤအီၤလၢ Hobsons Bay ကီၣ်ကးကရၢ လၢအမ့ၢ်ကီၣ်ကရၢလၢစီၤထံဖိရံၤဒီးအဟံၣ်ဖိဃီဖိအိၣ်ဆိးဝဲအပူၤန့ၣ်လီၤ.

လၢအကမၤန့ၢ်ဘၣ်တၢ်လၤကပီၤခိၣ်ဖးဒ်အံၤန့ၣ် စီၤထံဖိရံၤ အနီၣ်ကစၢ်ဒၣ်ဝဲ တမုၢ်လၢ်ပာ်ဝဲနီတဘျီဘၣ်.

တကတီၢ်ဃီဖဲလၢအဝဲမၤစၢၤတၢ်ဖဲ ပှၤတဝၢအပူၤအခါန့ၣ် စီၤထံဖိရံၤ မၤစ့ၢ်ကီးဝဲတၢ်မၤဒ်သိး သရၣ်သိၣ်လိတၢ်ဒ့တၢ်အူတဂၤအသိး ဒီး တကးဒ်ဘၣ် အဝဲမ့ၢ်စ့ၢ်ကီး ဖၠၣ်စိမိၤကၠိဖိတဂၤန့ၣ်လီၤ.

အဝဲမ့ၢ်ပှၤဖျိထီၣ်တီၤထီကၠိဖဲ Laverton College လၢအအိၣ်ဖဲမဲလ်ဘၢဝ့ၢ်မုၢ်နုာ်တကပၤ ဒီး ခဲကနံၣ်အံၤန့ၣ် အဝဲက့ၤသိၣ်လိက့ၤတၢ်ဖဲကၠိအံၤ ဒ်သိးတၢ်ဒ့တၢ်အူသရၣ်တဂၤအသိး ဒီး အဝဲန့ၣ် သိၣ်လိဝဲဘၣ်ဃးဒီးတၢ်ဒ့ ခၠဲလိ န့ၣ်လီၤ.

မ့မ့ၢ်လၢ ဖၠၣ်စိမိၤကၠိတခီန့ၣ် အဝဲမၤလိတၢ်ဘၣ်ဃး တၢ်ဒ့တၢ်အူအဂ့ၢ်—Bacherlor of Music ဒီးမၤလိဝဲဒၣ်ဖဲ Victoria University န့ၣ်လီၤ အဝဲတၢ်ဒ့တၢ်အူအဂ့ၢ် ဖၠၣ်စိမိၤကၠိတၢ်မၤလိသၢနံၣ်အံၤအဂီၢ်န့ၣ် အဝဲဒိးန့ၢ်ဘၣ်ဝဲဒၣ် ပဒိၣ်ကျိၣ်စ့တၢ်ဆီၣ်ထွဲမၤစၢၤ — Commonwealth Teaching Scholarship လၢလၢပှဲၤပှဲၤန့ၣ်လီၤ.

စီၤထံဖိရံၤအဟံၣ်ဖိဃီဖိအံၤ ဟဲတုၤဖဲအီစထြ့လယါကီၢ်ဖဲ ၂ဝ၁၁နံၣ် အခါဒီးအဝဲသ့ၣ်ဟဲန့ၢ်ဝဲဒၣ်လၢ မဲၢ်လး ပှၤဘၣ်ကီဘၣ်ခဲဒဲကဝီၤန့ၣ်လီၤ

အဝဲအိၣ်ဒီးအဒီပုၢ်ဝဲၢ်ဖိသၢဂၤ ဒီး အဝဲနုာ်လီၤမၤတၢ်မၤန့ၣ် မ့ၢ်လၢအဝဲအဲၣ်ဒိးမၤစၢၤစ့ၢ်ကီးအပၢ်အဃိန့ၣ်လီၤ.

သးစၢ်တၢ်ဒ့တၢ်အူသရၣ် စီၤထံဖိရံၤ ဟ့ၣ်ဂံၢ်ဟ့ၣ်ဘါစ့ၢ်ကီးဝဲဒၣ်ပှၤသးစၢ်သ့ၣ်တဖၣ်လၢ အကကျဲးစၢးတၢ်အဂ့ၤကတၢၢ် ဒီး အဝဲသ့ၣ်မ့ၢ်လိၣ်ဘၣ်တၢ်မၤစၢၤန့ၣ် တၢ်မၤစၢၤသ့ၣ်တဖၣ်အိၣ်ဝဲလၢအဝဲသ့ၣ်အဂီၢ်န့ၣ်လီၤ.

ခါဆူညါန့ၣ် စီၤထံဖိရံၤ အတၢ်မုၢ်လၢ်အိၣ်လၢ အကအိးထီၣ် တၢ်ဒ့တၢ်အူ ပနံးတၢ်ဖံးတၢ်မၤ ဒီး တကတီၢ်ဃီန့ၣ် မၤစၢၤစ့ၢ်ကီး ပှၤတဝၢန့ၣ်လီၤ.