တၢ်ဟ့ၣ်လၤကပီၤပှၤတဝၢပှၤဒူပှၤဃိၤအကယၤအါမး ဖဲတၢ်မၤလၤကပီၤ ၂ဝ၂၆နံၣ် ကစီၤပၤနံၤအိၣ်ဖျဲၣ်မုၢ်နံၤ

ဖဲ ၂ဝ၂၆နံၣ် တၢ်မၤလၤကပီၤ ကစီၤပၤနံၤအိၣ်ဖျဲၣ်ဆၢက့ၤအမုၢ်နံၤအံၤ ပှၤအီစထြ့လယါဖိ အါန့ၢ်အဂၤ ၉ဝဝ ဘၣ်တၢ်ပာ်ပနီၣ်အဝဲသ့ၣ် ခီဖျိအဝဲသ့ၣ် တၢ်ဟ့ၣ်လီၤသးမၤတၢ်လၢ ထံကီၢ်အံၤအဂီၢ်န့ၣ်လီၤ. ဖဲတၢ်ပာ်ဖျါအံၤအပူၤ, SBS ပာ်ဖျါထီၣ်ဝဲ ပှၤတဝၢ အပှၤဒူပှၤဃိၤတနီၤ လၢတၢ်ဟ့ၣ်လၤကပီၤအဝဲသ့ၣ် Medal of the Order of Australia ခိၣ်ဖးတၢ်လၤကပီၤ ထူကဘျၣ်ဒီး တိၢ်ကဘျၣ်သ့ၣ်တဖၣ်န့ၣ်လီၤ. ဖဲပှၤဒိးန့ၢ်ဘၣ် ခိၣ်ဖးတၢ်လၤကပီၤကဘျၣ်သ့ၣ်တဖၣ်အံၤအကျါန့ၣ်ပၣ်ဃုာ်ဒီး ပှၤသိၣ်လိ တၢ်ဒီသဒၢလီၤနီၣ်ကစၢ်အသး—သရၣ်မုၣ်, ပှၤလၢအဂဲၤလိာ်တၢ်ဆူၣ်ဆူၣ်လၢ ပှၤကဲပှၤတူၢ်ဘၣ်တၢ် ခီဖျိတၢ်မၤကမၣ်သဲစးတၢ်ဘျၢသ့ၣ်တဖၣ်ဒီး ဒ်သိးဒီးတၢ်မၤလၤကပီၤ တၢ်စံၣ်စံၣ်တဲစိၤအပူၤ ကြံၣ် ပိာ်မုၣ်အတၢ်မၤတုၤထီၣ်ထီၣ်ဘးအဂ့ၢ်သ့ၣ်တဖၣ်အသိး ပၣ်ဃုာ်ဒီးပှၤကွဲးလံာ်ဖိတဂၤန့ၣ်လီၤ.

---

ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn

တၢ်ဟ့ၣ်ပလီၢ်, တၢ်ပာ်ဖျါအံၤ ပၣ်ဃုာ်ဒီး ပှၤထူလံၤဖိလၢအလဲၤပူၤကွံာ်အဂ့ၢ်သ့ၣ်တဖၣ်န့ၣ်လီၤ.

ဖဲပှၤတဝၢ တၢ်ဂဲၤလိာ်ကွဲမၤဟူးနီၣ်ခိက့ၢ်ဂီၤ ကၠ့မ် တၢ်လီၢ်အပူၤ, ဖဲ Glen Waverley တလီၢ် လၢအအိၣ်ဖဲမဲလ်ဘၢဝ့ၢ်မုၢ်ထီၣ်တကပၤန့ၣ်, Dr Anne Pang မၤလိ ကလီန့ၢ်ဝဲ ပှၤမုၣ်သ့ၣ်တဖၣ်လၢတၢ်ဒီသဒၢလီၤနီၣ်ကစၢ်အသး နီၣ်ခိအတၢ်ဟူးတၢ်ဂဲၤသ့ၣ်တဖၣ်န့ၣ်လီၤ.

Dr Pang မ့ၢ်ပှၤဟ့ၣ်လီၤသးမၤတၢ်လၢပှၤတရူးဖိအပှၤတဝၢအပူၤ ဒီး ပၣ်ဃုာ်ဝဲဖဲ ပိာ်မုၣ်လၢအဒိးန့ၢ်ဘၣ် Medal of the Order of Australia ခိၣ်ဖးတၢ်လၤကပီၤအကျါတဂၤန့ၣ်လီၤ.

ဖဲအဝဲကတိၤတၢ်ဒီး SBS Mandarin တၢ်ရဲၣ်တၢ်ကျဲၤအခါ, အဝဲစံးဝဲဒၣ် မ့ၢ်လၢအဝဲပၣ်ဃုာ်ဖဲ ပှၤကညီ ၉၄၉ဂၤအကျါ လၢအဒိးန့ၢ်ဘၣ် ၂ဝ၂၆နံၣ် ကစီၤပၤအိၣ်ဖျဲၣ်မုၢ်နံၤ တၢ်ဟ့ၣ်လၤကပီၤခိၣ်ဖးစရီပူၤအဃိ မ့ၢ်တၢ်ဟ့ၣ်ဆူၣ်ထီၣ်အသးသဟီၣ်လၢ ကမၤစၢၤအါထီၣ်တၢ်ဖဲအဝဲအပှၤတဝၢအပူၤန့ၣ်လီၤ.

“ယလီၤကမၢကမၣ် သပှၢ်ကတၢၢ်, ဒီး ဖုးဘၣ်ယသး, လၢအပှဲၤဒီးတၢ်ဆီၣ်လီၤသးအပူၤ ယပာ်ကဖၢလၢယသးလၢ ခိၣ်ဖးတၢ်လၤကပီၤအံၤဒိၣ်မး. ဒီးတၢ်လၢယအဲၣ်ဒိးတဲအီၤန့ၣ်မ့ၢ်ဒၣ်ထဲလၢ, ခိၣ်ဖးတၢ်လၤကပီၤအံၤ ယတထံၣ်အီၤဒ်သိး တၢ်မၤနၢၤခိၣ်ဖးအတၢ်ပနီၣ်တခါဘၣ်, မ့တမ့ၢ် တၢ်မၤနၢၤဖီတၢၣ်တခါဘၣ်— နီၣ်နီၣ်တခီ ယထံၣ်အီၤဒ်သိး တၢ်စးထီၣ်အခီၣ်ထံးခီၣ်ဘိတခါ. ဒ်သိးတြဲၤအိးထီၣ်အသးတဘ့ၣ်, လၢအမ့ၢ်ဒ်သိး ကျဲနုာ်လီၤဟးထီၣ်အတြဲၤတခါ လၢကမၤအါထီၣ် တၢ်လၢယမၤအီၤသ့ သ့ၣ်တဖၣ်န့ၣ်လီၤ.”

ပှၤနဲၣ်လိ တၢ်ဒီသဒၢလီၤသးတၢ်လိာ်ကွဲ သရၣ်မုၣ် လၢအသးနံၣ်အိၣ် ၆၈ နံၣ်တဂၤအံၤ ဟဲန့ၢ်ဝဲဒၣ်လၢ ထဲးဝး— Taiwan ကီၢ် ဖဲ ၁၉၇ဝ နံၣ်အခိၣ်အဃၢၤန့ၣ်လီၤ.

အဝဲသိၣ်လိ ပိာ်မုၣ်သ့ၣ်တဖၣ် တၢ်ဒီသဒၢလီၤသးတၢ်လိာ်ကွဲအံၤ ဖဲဖၠၣ်စိမိၤသ့ၣ်တဖၣ်, ကၠိသ့ၣ်တဖၣ်, ခၢးဘ်သ့ၣ်တဖၣ်ဒီး ပှၤတဝၢအတၢ်လီၢ်သ့ၣ်တဖၣ်န့ၣ် အိၣ်ဝဲအါန့ၢ် အနံၣ် ၃ဝ လံန့ၣ်လီၤ.

အဝဲစံးဝဲဒၣ် အဝဲအဲၣ်ဒိး မၤစၢၤ ပှၤပိာ်မုၣ်သ့ၣ်တဖၣ် လၢအကကဲထီၣ်ပှၤလၢအအိၣ်ဒီး တၢ်စိကမီၤလၢနီၣ်ကစၢ်သ့ပၢလီၤအသးဒီး အိၣ်ပှဲၤဒီးတၢ်သဘျ့ လၢတဘၣ်ဒိးသန့ၤသးဒီးပှၤဂုၤပှၤဂၤဘၣ် ခီဖျိအဝဲအတၢ်ဖံးတၢ်မၤအံၤတဆီန့ၣ်လီၤ.

“ဖဲစးထီၣ်မၤလိဝဲဒၣ် တၢ်ဒီသဒၢလီၤနီၣ်ကစၢ်သးတၢ်လိာ်ကွဲအံၤအခါန့ၣ်, ယသ့ၣ်ညါဘၣ်ဝဲဒၣ်လၢ တၢ်အံၤမ့ၢ်ဝဲဒၣ်တၢ်လၢ ပှၤပိာ်မုၣ်သ့ၣ်တဖၣ် ဘၣ်မၤလိသ့အသးသပှၢ်ကတၢၢ်တခါ ခီဖျိလၢ တၢ်အဝဲအံၤန့ၣ် ဟ့ၣ်လီၤနၤ လၢနကအိၣ်ဒီး တၢ်နာ်န့ၢ်လီၤနီၣ်ကစၢ်အသးအါထီၣ်, ဒီး တၢ်နာ်န့ၢ်လီၤနီၣ်ကစၢ်အသးအံၤ နလဲလိာ်ကျိးထံက့ၤအီၤဆူ တၢ်သဘျ့, တၢ်ခွဲးတၢ်ယာ်ဒီး နီၣ်ကစၢ်တၢ်စံၣ်ညီၣ်ပၢလီၤသး သ့ဝဲန့ၣ်လီၤ.

ပှၤအဂၤတဂၤ လၢအဒိးန့ၢ်ဘၣ်ခိၣ်ဖးတၢ်လၤကပီၤ ခီဖျိ အတၢ်ဟ့ၣ်လီၤသးမၤစၢၤတၢ်ဖဲ အီစထြ့လယါကီၢ်မုၢ်နုာ် ပှၤထူလံၤဖိအပှၤတဝၢသ့ၣ်တဖၣ်အဂီၢ်တဂၤန့ၣ်မ့ၢ်ဝဲဒၣ် ပှၤသူၣ်က့သးပှၢ် Noongar ဒီး Yamatji အကလုာ်မုၣ် Mechelle Turvey န့ၣ်လီၤ.

ဖဲ ၂ဝ၂၂နံၣ်န့ၣ်, Ms Turvey အဖိခွါ Cassius လၢအသးနံၣ်အိၣ် ၁၅နံၣ်တဂၤ ဘၣ်တၢ်မၤသံအီၤ ဖဲဖၢၣ်သ်ဝ့ၢ်, ဖဲလၢအဝဲဟဲက့ၤလီၤလၢကၠိဒီးက့ၤဟးဒီးအခီၣ်ဆူဟံၣ်အခါန့ၣ်လီၤ.

တၢ်လိာ်ဘၢလိာ်ကွီၣ် တၢ်ထီၣ်တၢ်မူးတၢ်ရၢ်လၢအယံၤဘူးထီၣ်ဝဲဒၣ် ၁၃နွံအပူၤန့ၣ်, ပိာ်ခွါခံဂၤ အတၢ်မၣ်အိၣ်ဖျါဝဲဒၣ်လၢ အမ့ၢ်ပှၤမၤသံတၢ်ဖိသ့ၣ်တဖၣ် လၢအမၤသံအီၤန့ၣ်လီၤ.

အဝဲအနီၣ်ကစၢ်တၢ်လဲၤခီဖျိသ့ၣ်တဖၣ် ဒုးဘၣ်ထွဲဝဲဒီးပှၤဂုၤပှၤဂၤသ့ၣ်တဖၣ်ဒ်လဲၣ်န့ၣ်, ဖဲလၢအဝဲကတိၤတၢ်ဒီး SBS တၢ်ကစီၣ်သန့အခါ, Ms Turvey စံးဝဲဒ်အံၤန့ၣ်လီၤ.

“ပှၤဂုၤပှၤဂၤသ့ၣ်တဖၣ် အတၢ်လဲၤခီဖျိန့ၣ် မ့ၢ်အိၣ်လီၤဆီလိာ်အသးနာ်သက့, ယလဲၤခီဖျိဘၣ်တၢ်ဒီဒူၣ်ညါန့ၣ် အဝဲသ့ၣ် သ့ၣ်ညါဝဲဒၣ်. အဝဲသ့ၣ်စ့ၢ်ကီးလဲၤခီဖျိဘၣ်တၢ်ဒီဒူၣ်ညါ အဃိ, တၢ်ခွဲးတၢ်ယာ်သ့ၣ်တဖၣ်အိၣ်လၢ ကတဲသကိးတၢ်ဒီး ပှၤဂုၤပှၤဂၤ လၢအသးအိၣ်တဲသကိးတၢ်သ့ၣ်တဖၣ်. တၢ်အိၣ်သးမ့ၢ်တဘၣ်လီၢ်ဘၣ်ဆးဘၣ်နာ်သက့န့ၣ် ယတဲသကိးတၢ်ဒီးပှၤဂုၤပှၤဂၤသ့. ယမ့ၢ်ဘၣ်ဟီၣ်ဃုာ်ဒီးအဝဲသ့ၣ်နာ်က့န့ၣ် ယဟီၣ်သ့. တသ့ဖဲအသ့န့ၣ် ယအဲၣ်ဒိးပာ်အီၤဒ်အမ့ၢ်တၢ်သပှၢ်ကတၢၢ်န့ၣ်လီၤ.”

ပှၤလၢအကဲပှၤတူၢ်ဘၣ် တၢ်မၤကမၣ်သဲစးသ့ၣ်တဖၣ်န့ၣ်ကဘၣ်ရ့ဒီးအဝဲသ့ၣ်ပှဲၤဒီးတၢ်ဒိသူၣ်ဒိသးဒ်လဲၣ်, ကဘၣ်အဟုကယာ်အဝဲသ့ၣ်ဒ်လဲၣ် ဒီး ကဘၣ်ဆီၣ်ထွဲမၤစၢၤအီၤ ဒ်လဲၣ်, ဒီး ပှၤလၢအလဲၤခီဖျိဘၣ် တၢ်ပျံၤတ့ၢ်တၢ်သ့ၣ်တဖၣ် ကသ့ၣ်ညါမၤနီၣ်အီၤဒ်လဲၣ်အဂ့ၢ်န့ၣ် Ms Turvey မၤသကိးတၢ်ဒီးပၢၤကီၢ်ပှၤဘၣ်မူဘၣ်ဒါသ့ၣ်တဖၣ် စးထီၣ်လၢ ၂ဝ၂၃နံၣ်အခါလံန့ၣ်လီၤ.

“လၢကဆ့ၣ်နီၤအိၣ်ဖဲဝဲၤဒၢးအပူၤဒီး ဒိးသန့ၤသးလၢ တၢ်ပီးတၢ်လီသ့ၣ်တဖၣ် အလီၢ်န့ၣ်, ယဆိကမိၣ် တၢ်မၤစၢၤပီးလီ အခိၣ်သ့ၣ်အကျါတမံၤ လၢယမၤအီၤဖဲယကရူၢ်အပူၤန့ၣ်န့ၣ် မ့ၢ်ဝဲဒၣ် တၢ်လဲၤဆူပှၤတဝၢအပူၤ, အိၣ်ဒီးတၢ်ဘျးစဲဒီးအဝဲသ့ၣ်, လၢမဲာ်သကိးမဲာ်, တဂၤဒီး တဂၤ. အဃိ, မ့ၢ်ဝဲတၢ်လၢအဘၣ်ဃးဒီး တၢ်လဲၤလီၤထံၣ်လိာ်သးဒီး ပှၤထူလံၤဖိသ့ၣ်တဖၣ်, မၢဟဲဆ့ၣ်နီၤသကိးတပူၤဃီဒီးပၢၤကီၢ်သ့ၣ်တဖၣ်ဖဲစီၤနီၣ်ခိၣ်ဒီး မၤဘၣ်လိာ်က့ၤ တၢ်နၢ်ပၢၢ်ကမၣ်သ့ၣ်တဖၣ်, မၤလဲၢ်ထီၣ်အါထီၣ် တၢ်နာ်န့ၢ်လိာ်သးတဂၤဒီးတဂၤ, ဒီး လဲၤခီဖျိကွံာ် တၢ်တြီတံာ် လၢအအိၣ်သ့ၣ်တဖၣ်န့ၣ်လီၤ.”

ပှၤအဂၤတဂၤလၢအဒိးန့ၢ်ဘၣ်ခိၣ်ဖးတၢ်လၤကပီၤန့ၣ်မ့ၢ်ဝဲဒၣ် ပှၤကွဲးလံာ်ဖိ လၢအသူတ့ၢ်ဝဲတၢ်ဆၢကတီၢ်အနံၣ်အလါအါမး, လၢအကျဲးစၢး ပာ်ဖျါထီၣ်ဝဲ အပူၤကွံာ် အနံၣ် ၂ဝဝ ဘျဲၣ်အခါ ဖဲတၢ်စံၣ်စိၤတဲစိၤအပူၤ ကြံၣ် ပိာ်မုၣ် အတၢ်ဟ့ၣ်လီၤမၤစၢၤတၢ်ဒီး တၢ်တုၤထီၣ်ထီၣ်ဘးလၢပှဲၤအဂ့ၢ်သ့ၣ်တဖၣ်န့ၣ်လီၤ.

Panagiotis Andrinopoulos ကွဲးဆဲးကျံးထုးထီၣ်တ့ၢ်ဝဲ လံာ်တဘ့ၣ် လၢကျိာ်ခံကလုာ် ဒီးကွဲးဖျါထီၣ်ဝဲ ပိာ်မုၣ်လၢအအိၣ်ဒီးလုၢ်ဘၢစိကမီၤဒိၣ် ဒီးအထူးအထံးဟဲန့ၢ်လၢ ကြံၣ် အဂၤ ၄ဝဝ လၢအပၣ်ဃုာ် ကြံၣ်—အီစထြ့လါပိာ်မုၣ် ဃိးဂၤအဂ့ၢ်န့ၣ်လီၤ.

Mr Andrinopoulos စံးဝဲဒၣ် ဖဲတၢ်စံၣ်စိၤတဲစိၤအပူၤ တၢ်ကွဲးပာ်ဖျါထီၣ် ပှၤလၢတၢ်သ့ၣ်နီၣ်အီၤအဂ့ၢ်အကျိၤသ့ၣ်တဖၣ်, အတၢ်ထံၣ်တၢ်ဆိကမိၣ်သ့ၣ်တဖၣ် တအိၣ်ဒီး တၢ်ပှဲၤသိးတုၤသိးဘၣ်အဂ့ၢ်န့ၣ် အဝဲအဲၣ်ဒိးပာ်ဖျါထီၣ်အီၤအဃိအဝဲကွဲးထုးထီၣ်ဝဲလံာ်အံၤန့ၣ်လီၤ.

“ပိာ်မုၣ်သ့ၣ်တဖၣ် တၢ်ဆိကမိၣ်ဆံးအဝဲသ့ၣ်, ပာ်လီၤတဲာ်တ့ၢ်အဝဲသ့ၣ် အိၣ်ဝဲတလီၢ်လီၢ်, အဝဲသ့ၣ်န့ၣ် အတၢ်ဟူးဂဲၤဒ်သိးဒီးပှၤပိာ်ခွါသ့ၣ်တဖၣ်နာ်သက့ ပှၤပိာ်ခွါသ့ၣ်တဖၣ်န့ၣ် အအိၣ်ဖျါလီၤဂၤလၢ အန့ၢ်ဘၣ် တၢ်ပာ်တၢ်သးစၢၢ်ဆၢဒီးအဝဲသ့ၣ်အိၣ်အါ. ယဆှၢနုာ်လီၤလၢ လံာ်အဝဲအံၤန့ၣ်တၢ်ကပာ်အီၤတပူၤဃီ. ပလဲၤခီဖျိဒီး== တၢ်ဃိထံၣ်သ့ၣ်ညါအါအါဂီၢ်ဂီၢ်ဒီး ပထံၣ်ဘၣ်ဝဲပိာ်မုၣ်လၢဟီၣ်ခိၣ်ဒီဘ့ၣ်အပူၤသ့ၣ်တဖၣ်န့ၣ်လီၤ.”

Mr Andrinopoulos အတၢ်ကွဲးပာ်ဖျါထီၣ် မုၣ်ခွါ တၢ်ပှဲၤသိးတုၤသိးတအိၣ်ဘၣ်အဂ့ၢ်အံၤ ဘၣ်တၢ်ပာ်ပနီၣ်အီၤဒီး တၢ်တီၣ်ဖျါထီၣ်စ့ၢ်ကီးအီၤဖဲကစီၤပၤတၢ်ဟ့ၣ်လၤကပီၤ အစရီအပူၤန့ၣ်လီၤ.

ဖဲပှၤဒိးန့ၢ်ဘၣ် Order of Australia General Division ခိၣ်ဖးတၢ်လၤကပီၤ ၇ဝ၃ ဂၤအကျါန့ၣ် ပိာ်မုၣ်အိၣ်ဝဲဒၣ်ထဲ ၃၂ မျးကယၤန့ၣ်လီၤ.

ဖဲလံာ်တၢ်ဘိးဘၣ်သ့ၣ်ညါလီၤအပူၤန့ၣ် ပှၤပၢဆှၢတၢ်ခိၣ်ကျၢၢ် Sam Mostyn စံးဝဲဒၣ်, ခီဖျိလၢအဝဲသ့ၣ် တၢ်ဟ့ၣ်လီၤသးမၤစၢၤတၢ်အဃိ ပိာ်မုၣ်သ့ၣ်တဖၣ် တၢ်တုၤသိးပှဲၤသိးကအိၣ်ဒီး တၢ်ဒိးန့ၢ်ဘၣ်ခိးဖးတၢ်လၤကပီၤအဂီၢ်န့ၣ် အီစထြ့လယါကီၢ်အံၤ အိၣ်ဒံးဝဲဖးယံၤန့ၣ်လီၤ.

“ပှၤအီစထြ့လယါဖိကိးဂၤ, ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ, ပှၤဂ့ၢ်ဝီ, တၢ်ဆဲးတၢ်လၤ မ့တမ့ၢ် မုၢ်ကျိၤဝဲၤကွာ် အထူအထံးသ့ၣ်တဖၣ် မ့ၢ်အိၣ်ဒ်လဲၣ်ဂ့ၤ, ဒ်လဲၣ်ဂ့ၤန့ၣ်, ကြၢးလၢအထံၣ်ဘၣ်လီၤ အနီၣ်ကစၢ်အသးဖဲ တၢ်ဟ့ၣ်လၤကပီၤ အစရီပူၤန့ၣ်လီၤ. ”

မ့မ့ၢ်လၢ Bijinder Dugal န့ၣ် တၢ်ပာ်ပနီၣ်အီၤလၢ အဝဲအတၢ်ဟ့ၣ်လီၤသးမၤစၢၤတၢ် ဘၣ်ဃး ပှၤသူၣ်က့သးပှၢ် အတၢ်အိၣ်မုာ်ဆိးပၢၤအဂီၢ်, ခီဖျိအဝဲမၤတၢ်ဘၣ်ဃး တၢ်ဆီၣ်ထွဲမၤစၢၤ တၢ်အိၣ်ဆူၣ်အိၣ်ချ့ဒီး တၢ်အိၣ်မုာ်ဆိးပၢၤ လၢအ့ဒံယါ ပှၤတဝၢ ပှၤသူၣ်က့သးပှၢ်သ့ၣ်တဖၣ်အဂီၢ်အဃိန့ၣ်လီၤ.

Ms Dugal စံးဝဲဒၣ် ကိးနံၣ်ဒဲးန့ၣ်, တၢ်လၤကပီၤခိၣ်ဖးသ့ၣ်တဖၣ်အံၤ ဟ့ၣ်လီၤ တၢ်ခွဲးတၢ်ယာ်အရ့ဒိၣ်တခါ လၢတၢ်ကက့ၤဆိကမိၣ်ထံဆးက့ၤ တၢ်ဂံၢ်တၢ်ဘါလၢ အီစထြ့လယါ ကလုာ်ဒူၣ်ဆဲးလၤအါကလုာ် အပှၤတဝၢသ့ၣ်တဖၣ် ဒုးအိၣ်ထီၣ်အီၤန့ၣ်လီၤ.

ဖဲတဲတသကိးတၢ်ဒီး SBS Punjabi တၢ်ရဲၣ်တၢ်ကျဲၤအခါ အဝဲစံးဝဲဒၣ်, တၢ်လၤကပီၤ ခိၣ်ဖးတခါစုာ်စုာ် အလီၢ်ခံန့ၣ် အတမ့ၢ်ထဲလၢအအိၣ်ဒီး တၢ်ဂ့ၢ်တၢ်ကျိၤ လုၢ်ဒိၣ်ပှ့ၤဒိၣ်သ့ၣ်တဖၣ်ဘၣ်, နီၣ်နီၣ်တခီ အိၣ်စ့ၢ်ကီးဝဲဒီး အပှၤတဝၢန့ၣ်လီၤ.

“လၢယဂီၢ်န့ၣ်, လီၤဆီဒၣ်တၢ် ဒ်သိး ပှၤ Punjabi ဖိဖဲ Sikh ဟံၣ်ဖိဃီဖိအပူၤတဂၤအသိး, ဒ်သိးပိာ်မုၣ်တဂၤလၢအအိၣ်ဒီးဖံးဘ့ၣ်အလွဲၢ်ဃး ဟဲန့ၢ်လၢ ဟ့မါလယး သဝီဆံးကိးဖိတဖျၢၣ်အပူၤတဂၤအသိး, ခီဖျိလၢ ယန့ၢ်တဲဖျါထီၣ်ဘၣ်ယတၢ်ထံၣ်ဒီး ဒိးန့ၢ်ဘၣ်တၢ်လၤကပီၤခိၣ်ဖးအံၤအဃိ ယပာ်ကဖၢလၢယသးသပှၢ်ကတၢၢ်န့ၣ်လီၤ. ခိၣ်ဖးအဝဲအံၤန့ၣ် အတမ့ၢ်ယတၢ်ဘၣ်, မ့ၢ်ဝဲယပှၤတဝၢအတၢ်လီၤ. လၢယဂီၢ်န့ၣ်, ခိၣ်ဖးအံၤဟ့ၣ်လီၤဝဲ ယပှၤတဝၢ တၢ်ယူၤယီၣ်ပာ်ကဲ လၢအဝဲသ့ၣ်ကြၢးဒိးန့ၢ်ဘၣ်အီၤသပှၢ်ကတၢၢ်န့ၣ်လီၤ.”