တၢ်ကလုၢ်တဖၣ်: https://www.sbs.com.au/language/ karen/ kar/collection/podcast/0ms9u5vjn
Dr. Cynthia မ့ၢ်ဝဲဒၣ် ကညီကသံၣ်သရၣ်မုၣ်ဖးဒိၣ်တဂၤလၢ အတီခိၣ်ရိၤမဲ မဲၢ်တီၢ် ကသံၣ်ဒၢး—Mae Tao Clinic လၢအအိၣ်ဖဲဝ့ၢ်မဲၢ်ဆီးကၠီၣ်တဲၣ်ကီၢ်န့ၣ်လီၤ.
အဝဲဒီးအပှၤမၤသကိးတၢ်သ့ၣ်တဖၣ် အံးထွဲကွၢ်ထွဲ ကူစါယါဘျါဝဲဒၣ် ကီၢ်ပယီၤပှၤသုးလီၢ်အိၣ်ဆိး ပှၤမၤတၢ်ဖိသ့ၣ်တဖၣ်ဒီး ထံလီၢ်ကီၢ်ပူၤ ပှၤဘၣ်ကီဘၣ်ခဲလၢအဘၣ်ဃ့ၢ်မှံဟးဖျိးသ့ၣ်တဖၣ် န့ၢ်ဝဲ ၃၇နံၣ်လံန့ၣ်လီၤ.
ခီဖျိလၢအဝဲဟ့ၣ်လီၤသး ဂဲၤလိာ်မၤစၢၤတၢ် လၢကီၢ်ပယီၤ တၢ်မုာ်တၢ်ခုၣ်အဂီၢ် လီၤဆီဒၣ်တၢ်လၢ ကမျၢၢ်ဆူၣ်ချ့တၢ်အံးထွဲကွၢ်ထွဲအဂီၢ်အဃိ Dr Cynthia Maung ဒိးန့ၢ်ဘၣ်ဝဲဒၣ် 2013 Sydney Peace Prize ခိၣ်ဖးတၢ်လၤကပီၤန့ၣ်လီၤ.
အဝဲတၢ်ဟဲတဘျီအံၤန့ၣ် မ့ၢ်ဒ်သိးကမၤဆူၣ်ထီၣ် တၢ်ဖီၣ်လိာ်စုမၤသကိးတၢ်ဒီး ဟ့ၣ်ခီဟ့ၣ်နီၤလိာ်သး ထံဆၢကီၢ်ဆၢ ဒီးထံလီၢ်ကီၢ်ပူၤတၢ်အိၣ်သးသ့ၣ်တဖၣ်အဂီၢ်န့ၣ်လီၤ.
အဝဲဟဲဖဲမဲလ်ဘၢဝ့ၢ်အံၤမ့ၢ်ဝံၤန့ၣ် အဝဲကဆဲးလဲၤဆူဝ့ၢ်ခိၣ် ခဲဘါရၣ် ဒီး ဝံၤန့ၣ်ကလဲၤဝဲဒၣ်ဆူ ဆ့ၣ်ဒနံၤဝ့ၢ်, ဒ်သိးလၢအမ့ၢ် တၢ်လဲၤထံၣ်လိာ်တၢၣ်ပီၣ်သကိးတၢ်ဒီး ပဒိၣ်ပှၤဘၣ်မူဘၣ်ဒါ, ကီၢ်ပယီၤတၢ်ကရၢကရိ လၢအဂဲၤလိာ်တၢ်လၢ ကီၢ်ပယီၤတၢ်မုာ်တၢ်ခုၣ်အဂီၢ် ဃုာ်ဒီးကညီကလုာ်ဒူၣ်တၢ်ကရၢကရိဒီး ကညီတဝၢဖိသ့ၣ်တဖၣ်န့ၣ်လီၤ.
တချုးအဝဲဟဲတုၤအီစထြ့လယါကီၢ်ဒ်ဘၣ်အခါ အဝဲဟဲတုၤဆိဖဲ ကီၢ်နယူစံၣ်လဲၣ် လၢအထံၣ်လိာ် တၢၣ်ပီၣ်သကိးတၢ်ဒီး ဘျီၣ်ဒိၣ်ခၢၣ်စးပှၤဘၣ်မူဘၣ်ဒါ သ့ၣ်တဖၣ် လီၢ်ကဝီၤ တၢ်ကရၢကရိသ့ၣ်တဖၣ်, လၢအဘၣ်ဃး ကီၢ်ပယီၤ ထံလီၢ်ကီၢ်ပူၤ ဒီး ထံဆၢကီၢ်ဆၢ ပှၤဂ့ၢ်ဝီဒီး ဆူၣ်ချ့တၢ်အိၣ်သးသ့ၣ်တဖၣ်န့ၣ်လီၤ.
ကတီၢ်ဖဲလၢအဝဲဟဲတုၤဖဲမဲလ်ဘၢဝ့ၢ်အခါ ဘၣ်ဃးဒီး အဝဲတၢ်ဟဲတဘျီညါအံၤအဂ့ၢ်ဒီး ထံဆၢကီၢ်ဆၢ ဆူၣ်ချ့ တၢ်အိၣ်သးအဂ့ၢ် လၢခံကတၢၢ်သ့ၣ်တဖၣ်န့ၣ် SBS ကညီကျိာ်တၢ်ရဲၣ်တၢ်ကျဲၤ ယၤ ရှါဖီၤ ထံၣ်လိာ်တဲသကိးဘၣ်တၢ်ဒီးအီၤန့ၣ်လီၤ.
တၢ်သံကွၢ်စံးဆၢလၢပကဖျါအီၤခဲကနံၣ်အံၤန့ၣ် မ့ၢ်ဝဲဒၣ် တၢ်သံကွၢ်စံးဆၢအကူာ်—၁ န့ၣ်လီၤ.
မ့မ့ၢ်တၢ်သံကွၢ်စံးဆၢအကူာ်—၂န့ၣ် ပကဆဲးပာ်ဖျါအီၤဆူမဲာ်ညါအဃိ ဝံသးစူၤအိၣ်ခိးဒိကနၣ်ဘၣ်အီၤတက့ၢ်.
