အီစထြ့လယါဖျၢၣ်ထူကရူၢ်—Socceroos သးစၢ်ပှၤလိာ်ကွဲဖျၢၣ်ထူ Nestory Irankunda ဒီး Connor Metcalfe စိာ်ကဖီထီၣ်ဝဲ ဘဲးခူဘၢ တၢ်လိာ်ကွဲပျီ ဒီး အဝဲသ့ၣ် တၢ်သွီနုာ်လီၤ ဂိလ် ၂ ဖျၢၣ် ဒီးမၤနၢၤကွံာ်ဝဲ ထၢကံး— Türkiye ဖျၢၣ်ထူကရူၢ် လၢအတန့ၢ်ဘၣ် ဂိလ် နီတဖျၢၣ်ဘၣ်န့ၣ်လီၤ. အဝဲသ့ၣ်တၢ်လိာ်ကွဲပြၢတဘျီအံၤန့ၣ် မ့ၢ်ဝဲဒၣ် အဝဲသ့ၣ် ၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ—FIFA World Cup 2026™ အဆိကတၢၢ်တဝီ လၢအလိာ်ကွဲဝဲဖဲ ကီၢ်ခဲနဒၢ်ဝ့ၢ် Vancouver B-C Place တၢ်လိာ်ကွဲပျီန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တၢ်အံၤမ့ၢ်ဝဲ အီစထြ့လယါဖျၢၣ်ထူကရူၢ်—Socceroos ပှၤနဲၣ်လိတၢ်အခိၣ် Tony Popovic ပာ်ဖျါထီၣ်တၢ်အုၣ်ကီၤဒီးအဝဲတၢ်ဃုထၢထီၣ်ပှၤလိာ်ကွဲဖိသ့ၣ်တဖၣ်, လၢအဒုးနဲၣ်ဖျါထီၣ်ဝဲ ခါဆူညါ စၢၤသွဲၣ်တစိၤလၢ အဒီသဒၢအီစထြ့လယါကီၢ်န့ၢ် န့ၣ်လီၤ.
ဘၣ်ဆၣ်သနာ်က့ဆူမဲာ်ညါတနွံန့ၣ် စီးခၢၤရူ ဖျၢၣ်ထူကရူၢ်အံၤ ကဘၣ်လိာ်ကွဲပြၢဝဲဒီး ဟံၣ်ကစၢ် ကီၢ်အမဲရကၤ ဖျၢၣ်ထူကရူၢ် — USA အဃိ မ့ၢ်အဝဲသ့ၣ် မၤနၢၤအီၤကန့ၢ်စ့ၢ်ကီၤဧါ? ဘရၤစံလ်ပှၤလိာ်ကွဲဖိ Vinicius Jr အကရူၢ်န့ၣ် မ့ၢ်အဆဲးဖီၣ်ဂၢၢ်ဃာ်ဝဲ အကရူၢ်တၢ်မၤနၢၤ ကန့ၢ်စ့ၢ်ကီၤဧါ?
“တၢ်အံၤမ့ၢ်ဝဲတၢ်စိၤပျၤစံၣ်စိၤတခါ, အတလီၤဂာ်တၢ်နီၣ်ကီၢ်ဘၣ်. လီၤဂာ်ဒ်သိးတၢ်မံမီၢ်ဟဲကဲထီၣ်နီၣ်ကီၢ်.”
အဝဲအံၤန့ၣ်မ့ၢ်ဝဲ Nestory Irankunda ကတိၤတၢ်ဒီး SBS ဖဲဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ အီစထြ့လယါကီၢ် မၤနၢၤ ထၢကံးကီၢ် ၂ဂိလ် ဒီး ထၢကံးတကပၤတန့ၢ်နီတဂိလ်ဘၣ်ဝံၤအလီၢ်ခံန့ၣ်လီၤ.
အီစထြ့လယါကီၢ် စီးခၢၤရူ ဖျၢၣ်ထူကရူၢ် အပှၤနဲၣ်တၢ် Tony Popovic အတၢ်ဃုထၢထီၣ် ပှၤလိာ်ကွဲဖျၢၣ်ထူကရူၢ် လၢအကရူၢ်ဖိအိၣ် ၂၆ ဂၤအံၤ မ့ၢ်ဝဲပှၤအထူအထံးဟဲန့ၢ်လၢ ကလုာ်ဒူၣ်ဒီးလုၢ်လၢ်ဆဲးလၤ ၁၅ ကလုာ်န့ၣ်လီၤ. ပှၤလိာ်ကွဲဖိသ့ၣ်တဖၣ်အံၤသၢဂၤန့ၣ် မ့ၢ်တ့ၢ်ဝဲပှၤဘၣ်ကီဘၣ်ခဲလၢအးဖြံးကးကီၢ် ဒီး ဟဲသုးအိၣ်ဆိးဖဲအီစထြ့လယါကီၢ်ပူၤန့ၣ်လီၤ.
ပှၤလိာ်ကွဲဖိလၢအသးနံၣ်အိၣ် ၂ဝနံၣ်တဂၤအံၤ မ့ၢ်ဝဲအီစထြ့လယါကီၢ် ပှၤလိာ်ကွဲဖျၢၣ်ထူအသးနံၣ်စၢ်ကတၢၢ်လၢ အထူနုာ်ဂိလ် အဆိကတၢၢ် ဖဲဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢအပူၤ လၢတၢ်လိာ်ကွဲအီၤဖဲကီၢ်ခဲနဒၢ်ဝ့ၢ် Vancouver B-C Place တၢ်လိာ်ကွဲပျီ ဒီးအဝဲသ့ၣ်ကရူၢ်တၢ်ပြၢအံၤန့ၣ်မ့ၢ်ဝဲ ကရူၢ်—D (Group D) အတၢ်ပြၢန့ၣ်လီၤ.
“ပကျဲးစၢးမၤအီၤသပှၢ်ကတၢၢ်, ပနုာ်လီၤဝဲတၢ်ဒုးတုၤအကတၢၢ်တစု, မ့ၢ်ဆၢကတီၢ်တခါလၢအလီၤသူၣ်ပိၢ်သးဝး, ပဘၣ်စံးဘျုးဝဲပှၤမၤတၢ်ဖိသ့ၣ်တဖၣ်, ပဘၣ်စံးဘျုးထံကီၢ်ဒီဘ့ၣ်, အဝဲသ့ၣ်နာ်လၢယမၤအီၤကန့ၢ်မူးမူးနီၣ်နီၣ် ဒီး ယတူၢ်ဘၣ် တၢ်လီၤကမၢကမၣ်သပှၢ်ကတၢၢ် လၢတနံၤအံၤ ပမၤန့ၢ် ဂိလ်သ့ၣ်တဖၣ်အံၤအဃိန့ၣ်လီၤ.”
ပှၤလိာ်ကွဲဖျၢၣ်ထူအဂၤတဂၤလၢအသးနံၣ်အိၣ် ၂၂နံၣ် Mohamed Toure ဒီး Irankunda ခံဂၤလၢၤအံၤ မ့ၢ်ပှၤသးစၢ်လၢအအိၣ်ဒီးတၢ်သ့တၢ်ဘၣ်အဂ့ၤကတၢၢ် လၢအပၣ်ဃုာ်ဝဲဒၣ်ဖဲ ပှၤနဲၣ်လိဖျၢၣ်ထူတၢ်လိာ်ကွဲ Tony Popovic ဃုထၢထီၣ်အီၤသ့ၣ်တဖၣ်အကျါန့ၣ်လီၤ.
Irankunda အံၤ အိၣ်ဖျဲၣ်ထီၣ်န့ၢ်ဖဲ Tanzania ကီၢ် ပှၤဘၣ်ကီဘၣ်ခဲဒဲကဝီၤအပူၤ လၢအမိၢ်ပၢ်န့ၣ်မ့ၢ်ဝဲပှၤဘရူဒံၤန့ၣ်လီၤ.
ဒီး စီးခၢၤရူ ပှၤလိာ်ကွဲဖျၢၣ်ထူစဲၤနီၣ် Mo Toure န့ၣ် အိၣ်ဖျဲၣ်ထီၣ်န့ၢ်ဖဲ Guinea ကီၢ် ပှၤဘၣ်ကီဘၣ်ခဲဒဲကဝီၤအပူၤ ဒီး အဝဲဟဲဆူအီစထြ့လယါကီၢ် ဖဲအသးနံၣ်အိၣ် နွံလါအခါန့ၣ်လီၤ.
အဝဲသ့ၣ်ခံဂၤလၢၤအံၤဟဲန့ၢ်လၢ Adelaide United ဖျၢၣ်ထူကရၢ ဒီး အခဲအံၤန့ၣ်မ့ၢ်ဝဲ ပှၤလိာ်ကွဲဖျၢၣ်ထူဖိသ့ၣ်တဖၣ် လၢအလိာ်ကွဲဖဲ English Football League Championship ကရၢအပူၤန့ၣ်လီၤ.
အဝဲသ့ၣ်နုာ်လီၤမၤဃုာ်သကိးတၢ်ဒီး ပှၤလိာ်ကွဲသကိးဖျၢၣ်ထူ Awer Mabil, လၢအမ့ၢ်ပှၤအိၣ်ဖျဲၣ်ထီၣ်န့ၢ်ဖဲ Kenyan ပှၤဘၣ်ကီဘၣ်ခဲဒဲကဝီၤအပူၤ ဒီးအမိၢ်အပၢ်န့ၢ်မ့ၢ်ဝဲ ပှၤ South Sudanese န့ၣ်လီၤ. အဝဲအမိၢ်အပၢ်တဂၤစုာ်စုာ်န့ၣ်မ့ၢ်ဝဲဒၣ် UNHCR—ဘီမုၢ်စၢဖှိၣ်ကရၢ ပှၤဘၣ်ကီကဘၣ်ခဲဂ့ၢ်ဝီဝဲၤဒၢး "Gamechanging Team" ကရူၢ်န့ၣ်လီၤ.
ဖဲတၢ်လိာ်ကွဲပြၢအပူၤ တုၤလီၤဖဲ တဝာ်ဘျဲၣ် ဘူးလၢတၢ်လိာ်ကွဲပြၢအံၤကဝံၤ အိၣ်တ့ၢ်က့ၤ ၁၅မံးနံးအခါန့ၣ် ပှၤလိာ်ကွဲဖျၢၣ်ထူဖိ Connor Metcalfe ထူနုာ်လီၤဝဲ ဂိလ် ခံဖျၢၣ်တဖျၢၣ်န့ၣ်လီၤ.
“ဖဲယထံၣ် ဖျၢၣ်ထူအံၤလဲၤနုာ်လီၤအခါ ယနီၣ်ခိဒီတဂၤန့ၣ် ယတူၢ်ဘၣ်ဒ်သိး အတလီၤနာ်နီတစဲးဖိဘၣ်, ယတဲပၠးအီၤလၢအဂ့ၢ်မး တဘၣ်ဘၣ်, ယအဲၣ်ဒိးတဲအီၤန့ၣ်, တၢ်အံၤမ့ၢ်ဝဲယလိာ်ကွဲပြၢဖဲ World Cup အဆိကတၢၢ်တဘျီ, က့မ် —တၢ်ပြၢအဆိကတၢၢ်တခါလၢယလိၣ်ကွဲအီၤ, တၢ်ဂ့ၤန့ၢ်ဒ်တၢ်အံၤဒုတအိၣ်လၢၤဘၣ်.”
ဖဲလၢတၢ်လိာ်ကွဲပြၢအံၤနုာ်လီၤတဝာ်အခါ Socceroos ဖျၢၣ်ထူကရူၢ် ပှၤနဲၣ်လိတၢ် ကတိၤတၢ်ဒီး SBS တၢ်ကစီၣ်သန့ဒီးစံးဝဲဒၣ်လၢ ထၢကံး ဖျၢၣ်ထူကရူၢ်အံၤ အကလိာ်ကွဲဝဲဒၣ်ဒ်သိး ပှၤဒုးတၢ်ကရူၢ်အသိးန့ၣ်လီၤ.
“နာ်သက့န့ၣ် ပဝဲန့ၣ်ပအိၣ်လၢ အခီၣ်တူၢ်တၢ်ကျၢၤခီတကပၤ, ပပြၢလိာ်သးဒီးပှၤတဂၤဂ့ၤတဂၤဂ့ၤသ့ဝဲဒၣ်. အလီၢ်မ့ၢ်အိၣ်လၢ ပဘၣ်တူၢ်နး တူၢ်ဖှီၣ်ပသးနာ်က့, ပကမၤအီၤလီၤ. အလီၢ်အိၣ်ပကဘၣ်ဆဲးဖီၣ်ဃာ်ဝဲဒၣ်ဖျၢၣ်ထူအံၤဂ့ၤဂ့ၤန့ၣ်လီၤ.”
ပှၤပဲၤထံနီၤဖးဖျၢၣ်ထူတၢ်လိာ်ကွဲပြၢစံးဝဲဒၣ်, “အီစထြ့လယါကီၢ်အံၤ အဝဲသ့ၣ်န့ၣ် တၢ် ထံၣ်ဘၣ်အီၤဖဲ ဟီၣ်ခိၣ်ဖျၢၣ်ပျဲၢ်စီၣ်ဖးဒိၣ်အဖီခိၣ်အံၤထီဘိနာ်သက့န့ၣ် အတလဲၤထီၣ်တလၢကွံာ် တၢ်လိာ်ကွဲပြၢ ၁၆ကရူၢ် အပတီၢ်နီတဘျီဘၣ်.”
ဖဲမုၢ်ဃုနံၤ လါယူၤ ၁၃သီအနံၤန့ၣ် ထၢကံး ဖျၢၣ်ထူကရူၢ်အခိၣ် Hakan Calhanoglu စံးဝဲဒၣ်လၢ အဝဲအကရူၢ်န့ၣ် အတၢ်သ့တၢ်ဘၣ်အိၣ်အါန့ၢ် အီစထြ့လယါကီၢ်, တယာ်ဝဲဒၣ်လၢ အဝဲသ့ၣ်န့ၣ် ကမ့ၢ်ပှၤဒိၣ်စိဖဲတၢ်လိာ်ကွဲပြၢတဘျီအံၤန့ၣ်လီၤ.
အီစထြ့လယါဖျၢၣ်ထူကရူၢ်— စီးခၢၤရူ အပှၤဟ့ၣ်ဂံၢ်ဟ့ၣ်ဘါတၢ်ဖိအကယၤအါမး လၢအသိးဃုာ်ဒီးကူကၤအလွဲၢ် လါဒီးထူအလွဲၢ်သ့ၣ်တဖၣ် လဲၤကွၢ်ကီဝဲတၢ်လိာ်ကွဲပြၢအံၤ ဖဲ Vancouver တၢ်လိာ်ကွဲပျီအပူၤန့ၣ်လီၤ.
ဘၣ်ဆၣ်သနာ်က့န့ၣ် တၢ်ကွၢ်ကီ အီစထြ့လယါကီၢ် ဖျၢၣ်ထူကရူၢ် အတၢ်လိာ်ကွဲပြၢတဘျီအံၤန့ၣ် အိၣ်ဝဲဒၣ် သကုၤအီစထြ့လယါကီၢ်ဒီဘ့ၣ်အပူၤန့ၣ်လီၤ.
ဖဲတနွံအံၤစးထီၣ်သီအခါန့ၣ် Haylena Krishnamoorthy ကတိၤတၢ်ဒီး အဝဲသ့ၣ်စှၤကိးဂၤ ဖဲ Matildas ဒီး Mexico တၢ်ရ့လိာ်မုာ်လိာ် အတၢ်လိာ်ကွဲပြၢအကတီၢ် ဒီးသံကွၢ်အဝဲသ့ၣ်ဘၣ်ဃး အဝဲသ့ၣ်တၢ်ဖးတယာ်ဒီး စီးခၢၤရူ က့မ်—တၢ်လိာ်ကွဲပြၢအဆိကတၢၢ်တဘျီအံၤန့ၣ်လီၤ.
အဝဲသ့ၣ်စံးဝဲဒၣ်ဒ်အံၤ——
“ယတမ့ၢ် ပှၤသ့ၣ်ညါ စီးခၢးရူ အဂ့ၢ်နီၣ်နီၣ်တဂၤဘၣ်, နာ်သက့ အဝဲသ့ၣ် လိာ်ကွဲအီၤမ့ၢ်ဂ့ၤဒ်သိးလၢ အပူၤကွံာ် စှၤကိးနံၣ် Matildas လိၣ်ကွဲအသိးန့ၣ် ယဆိကမိၣ်ဒု မၤ-ကန့ၢ်ဂ့ၤဂ့ၤန့ၣ်လီၤ.”
“အအိၣ်ဖျါလီၤဂာ်ဒ်သိးကရူၢ်လၢအလိာ်ကွဲန့ၢ်ဂ့ၤဂ့ၤတဖု, ယသူၣ်ပိၢ်သးဝးဒိၣ်မး, ယဆိကမိၣ်ဒု ပအိၣ်ဒီးပှၤလိာ်ကွဲဖိလၢအဂံၢ်အဘါဆူၣ်စှၤကိးဂၤဖိ, ယဆိကမိၣ်န့ၣ် ဖဲပတၢ်ပြၢကရူၢ်အပူၤန့ၣ် အိၣ်ဃုာ်ဝဲဒီးထံကီၢ်တနီၤလၢ ပလိာ်ကွဲအီၤကန့ၢ်ဂ့ၤဂ့ၤ. ဖဲကရူၢ်အံၤအပူၤန့ၣ်အိၣ်ဝဲဒၣ်ဒီးသးစၢ်ပှၤလိာ်ကွဲဖိအမဲာ်သီနါသီတနီၤ, မ့ၢ်တၢ်အဂ့ၤထီဘိတခါလၢပထံၣ်ဘၣ်အီၤ.”
“လၢ Socceroosအဂီၢ်န့ၣ် ယတၢ်မုၢ်လၢ်အိၣ်ဖးထီ, ဖဲ World Cup တၢ်ပြၢတဘျီအံၤန့ၣ်, ပမုၢ်လၢ်လၢ အီစထြ့လယါကီၢ် (ဖျၢၣ်ထူကရူၢ်) ဒီး ဖးရၤကွ့ ဖျၢၣ်ထူကရူၢ် ကထူဖျိးကွံာ်ဝဲဒၣ် USA (ဖျၢၣ်ထူကရူၢ်) ဖဲအဝဲသ့ၣ် အနီၣ်ကစၢ်ဟံၣ်ပျီပူၤ. ယအိၣ်ဒီးတၢ်နာ်လၢ ပမၤအီၤကန့ၢ်. တၢ်လိာ်ကွဲပြၢတဘျီအံၤ ပသွံၣ်အသီအံၤကဟဲစိာ်န့ၢ်ပှၤတၢ်မနုၤကန့ၢ်လဲၣ်န့ၣ် ယသူၣ်ပိၢ်ဝးဒိၣ်မးလၢ ကထံၣ်ဘၣ်အီၤန့ၣ်လီၤ.”
စီးခၢၤရူ သးစၢ်ပှၤလိာ်ကွဲဖိသ့ၣ်တဖၣ်အဖီခိၣ် တၢ်ထံၣ်တၢ်ပာ်သးသ့ၣ်တဖၣ်အိၣ်ဝဲဒ်အံၤစ့ၢ်ကီးန့ၣ်လီၤ.
“ယဆိကမိၣ် တၢ်အံၤမ့ၢ်တၢ်လၢ အလီၢ်အိၣ်နီၣ်နီၣ်တခါ, ယအဲၣ်ဒိးတဲအီၤန့ၣ်မ့ၢ်ဝဲ, စီးခၢၤရူအံၤ အါတက့ၢ်န့ၣ် မ့ၢ်ကရူၢ်လၢအလိာ်ကွဲန့ၢ်ဂ့ၤဂ့ၤတဖု. နာ်သက့ ကမ့ၢ်တၢ်တခါလၢအကလဲၤအသးဘံဘူဒိၣ်မး, ယအဲၣ်ဒိးတဲအီၤန့ၣ်မ့ၢ်ဝဲ ပကရူၢ် လၢအအိၣ်ဒီးတၢ်ခွဲးတၢ်ယာ်လၢအဂ့ၤအံၤ တၢ်ပြၢအပူၤ တၢ်လၢအဝဲသ့ၣ် ကဘၣ်တိနိၣ်အီၤသ့ၣ်တဖၣ်န့ၣ် အတသ့ၣ်ညါဝဲဘၣ်, နာ်သက့ ယဆိကမိၣ်ဒု တၢ်ပြၢသ့ၣ်တဖၣ်န့ၣ် အကဟဲထီၣ်ဒ်သိးပဘၣ်သးအီၤန့ၣ်လီၤ.”
ပှၤနဲၣ်တၢ် Tony Popovic မ့ၢ်ဝဲဒၣ် ပှၤအီစထြ့လယါဖိ အဆိကတၢၢ်တဂၤ လၢနုာ်လီၤလိာ်ကွဲဘၣ်ဖဲ ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲအပြၢအပူၤ ဒီး ကဲဘၣ်ပှၤနဲၣ်တၢ်တဂၤစံးဝဲဒၣ် - အီစထြ့လယါကီၢ်န့ၢ် ၂ဂိလ် ဒီး မၤနၢၤဝဲဒၣ် ထၢကံးကီၢ် လၢအတန့ၢ်နီတဂိလ်ဘၣ်အဃိ အဝဲပာ်ကဖၢလၢအသးဒိၣ်မးန့ၣ်လီၤ.
ဖဲတၢ်လိာ်ကွဲပြၢဝံၤအလီၢ်ခံ အဝဲကတိၤတၢ်ဒီး SBS အခါ အဝဲစံးဝဲဒၣ်, ပှၤဟဲဟ့ၣ်ဂံၢ်ဟ့ၣ်ဘါတၢ်ဖဲကီၢ်ခဲနဒၢ် ဝ့ၢ် Vancouver B-C Place တၢ်လိာ်ကွဲပျီအပူၤသ့ၣ်တဖၣ် အမဲာ်သၣ်လိၤန့ၣ် ကရူၢ်အံၤပာ်ထီၣ်ဝဲ တၢ်နံၤကမှံန့ၢ်အဃိ အဝဲသးခုသးမုာ်န့ၣ်လီၤ.
“ယပာ်ကဖၢလၢယသးလၢ ပှၤမၤတၢ်ဖိသ့ၣ်တဖၣ်အတၢ်ကျဲးစၢးထဲဂံၢ်ထဲးဘါဒီး အတၢ်ဆၢတဲာ်သ့ၣ်တဖၣ်. ယကျဲးစၢးဟံးစုနဲၣ်ကျဲအဝဲသ့ၣ်, ကျဲးစၢးဆီၣ်ထွဲမၤစၢၤ ပှၤလိာ်ကွဲဖိသ့ၣ်တဖၣ်ဒီး အဝဲသ့ၣ်ဖျိးစိဂ့ၤမး.”
ပှၤနဲၣ်တၢ်အံၤ မၤဝဲတၢ်ဆီတလဲ လၢအလီၤကမၢကမၣ်တခါ, လၢအမ့ၢ် ဖဲတၢ်လိာ်ကွဲပြၢတဘျီအံၤန့ၣ် အဝဲပာ်တ့ၢ်ကွံာ်ဝဲ Mat Ryan ဒီး Jackson Irvine ဒီး အဝဲဃုထၢထီၣ်ဝဲဒၣ်လၢ Patrick Beach လၢကမ့ၢ်ပှၤဖီၣ်ဂိလ် ဒီး Paul Okon-Engstler လၢကနုာ်လီၤလိာ်ကွဲဖဲ တၢ်ခၢၣ်သးန့ၣ်လီၤ.
ဘၣ်ဃးအတၢ်ဆၢတဲာ်အံၤ အဝဲရှဲပၠးဝဲဒ်အံၤန့ၣ်လီၤ.
“မ့ၢ်ဝဲဒၣ် အဝဲအကံၢ်အကစီတခါ လၢပထံၣ်ဘၣ်အီၤထီဘိ ဒီး ပှၤသးစၢ်ဖိအံၤ ပနာ်အီၤဖးဒိၣ်ညါ. တနံၤအံၤန့ၣ် အဝဲအိၣ်ဆၢထၢၣ်ပာ်ဖျါထီၣ်အသးအဃိ ပသးခုလၢအဂီၢ်ဒိၣ်မး.”
Beach စံးဝဲဒၣ် အဝဲသးခုသပှၢ်ကတၢၢ်ဒီး သူၣ်ပိၢ်သးဝးဒိၣ်မးဒီး တၢ်အဆၢလၢအအိၣ်ဖျါထီၣ်အံၤန့ၣ်လီၤ.
အဝဲဟ့ၣ်နီၤကဒါက့ၤစ့ၢ်ကီးဝဲဒၣ် အတၢ်တူၢ်ဘၣ် ဖဲလၢအသ့ၣ်ညါဘၣ်ဝဲလၢ အကဘၣ်နုာ်လီၤထူဘီလ် အခါန့ၣ်လီၤ.
“ယသ့ၣ်ညါဘၣ်အီၤဖဲအပူၤကွံာ်စှၤကိးသီအခါ ဒီး ယတၢ်ခီၣ်ဆၢတဘျီဃီန့ၣ်မ့ၢ်ဝဲဒၣ် ယသူၣ်ပိၢ်သးဝး ယသးခုဒိၣ်မး ဒီး ယနၢ်ပၢၢ်ဝဲဒၣ် ယမူယဒါ ဒီး ယလီၢ်လၢ ကဘၣ်လိာ်ကွဲအီၤ, ဒီး ယဒိးန့ၢ်ဘၣ်ဝဲ ပသရၣ် အတၢ်ဆီထွဲ ဃုာ်ဒီး ပှၤဘၣ်မူဘၣ်ဒါသ့ၣ်တဖၣ် ဒီး ပှၤလိာ်ကွဲဖိသ့ၣ်တဖၣ်အတၢ်ဆီၣ်ထွဲအဃိ ဟ့ၣ်လီၤယၤ တၢ်န့ၢ်လီၤနီၣ်ကစၢ်အသးဖးဒိၣ်လၢယကလဲၤဒီး လိာ်ကွဲဝဲဖဲတၢ်လိာ်ကပြၢတဘျီအံၤန့ၣ်လီၤ.”
ဖဲလါယူၤအသီ ၂ဝ အနံၤ မုၢ်ထီၣ်နီၣ်ထိၣ် ဂီၤခီ ၅နၣ်ရံၣ်န့ၣ် အီစထြ့လယါကီၢ် ဖျၢၣ်ထူကရူၢ်အံၤ ကဘၣ်ထူပြၢဝဲဒၣ်ဒီး USA ဖျၢၣ်ထူကရူၢ်န့ၣ်လီၤ.
ဖဲမုၢ်ဒဲး လါယူၤ ၁၄သီအနံၤ ဂီၤခီန့ၣ် Scotland ဖျၢၣ်ထူကရူၢ်မၤနၢၤဝဲဒၣ် Haiti ဖျၢၣ်ထူကရူၢ်န့ၣ်လီၤ. စးထီၣ်လၢ ၁၉၉၈နံၣ်န့ၣ် အဝဲအံၤမ့ၢ်ဝဲ ပှၤ Scottish ဖျၢၣ်ထူကရူၢ် အတၢ်ဟဲလိၣ်ကွဲအဆိကတၢၢ်တဘျီန့ၣ်လီၤ.
မ့မ့ၢ် Haiti ဖျၢၣ်ထူကရူၢ်န့ၣ် အဝဲသ့ၣ်အလီၢ်ခံကတၢၢ်တဘျီ အကံၢ်အစီထီၣ်ဘး လၢကနုာ်လီၤလိာ်ကွဲဖဲ ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢအပူၤန့ၣ် မ့ၢ်ဝဲဒၣ်ဖဲ ၁၉၇၄ နံၣ်န့ၣ်လီၤ.
ဖဲလၢအဝဲသ့ၣ်လိာ်ကွဲဒီး Morocco ဖျၢၣ်ထူကရူၢ် ဖဲကီၢ်အမဲရကၤ New Jersey ကီၢ်စဲၣ်အပူၤ ဒီး ဒိးန့ၢ်ဘၣ်ဝဲ ဂိလ် တကပၤ တဖျၢၣ်စုာ်စုာ် လၢအနၢၤအရှူ တအိၣ်နီတခီဘၣ်ဝံၤအလီၢ်ခံ ဘရၤစ့လ်ဖိ Vinicius Jr စံးဝဲဒၣ် အဝဲအကရူၢ်န့ၣ် ကဘၣ်အိၣ်ဒီး တၢ်မၤလဲၤထီၣ်လဲၤထီအသးန့ၣ်လီၤ.
ဖဲတၢ်လိာ်ကွဲပြၢအပူၤန့ၣ် Morocco ဖျၢၣ်ထူကရူၢ် ပှၤလိာ်ကွဲဖိ Ismael Saibari သွီနုာ်လီၤ ဂိလ်ဝံၤအလီၢ်ခံ Brazil ဖျၢၣ်ထူကရူၢ် ပှၤလိာ်ကွဲဖိ Vinicius က့ၤသွီနုာ်လီၤက့ၤဝဲဒၣ် ဂိလိ တဖျၢၣ် နာ်သက့ အဝဲစံးလၢ အဝဲအကရူၢ်အံၤ ဖဲအစးထီၣ်သီအခါန့ၣ် ဘၣ်ကျဲးစၢးထဲးဂံၢ်ထဲးဘါဝဲသပှၢ်ပှၢ်န့ၣ်လီၤ.
အဝဲသ့ၣ်ကရူၢ် ပှၤနဲၣ်တၢ် Carlo Ancelotti ပာ်ဖျါထီၣ်ဝဲ နီၣ်ဝံာ်ခိၣ်သ့ၣ်လၢ အဝဲသ့ၣ်ကဘၣ်မၤဂ့ၤထီၣ်အီၤသ့ၣ်တဖၣ် ဒီး ဟ့ၣ်ပလီၢ်စ့ၢ်ကီးဝဲဒၣ် လၢဆူမဲာ်ညါတၢ်ပြၢသ့ၣ်တဖၣ်အပူၤ တၢ်အိၣ်သးန့ၣ် အကကီဒိၣ်ထီၣ်ဝဲဒၣ်န့ၣ်လီၤ.
“ယဆိကမိၣ်န့ၣ် ပဘၣ်ဟ့ၣ်လီၤကွံာ် ဂိလ်တဖျၢၣ်န့ၣ်အဃိ, ဒ်သိးယတဲတ့ၢ်အီၤအသီခါအသိး, ပတၢ်လိာ်ကွဲပြၢ အက့ၢ်အဂီၤအံၤ မ့ၢ်တၢ်လၢအမၤကီထီၣ်န့ၢ်တၢ်လၢပဂီၢ်ဒိၣ်မး. တုၤလၢ ပသုးဆီတလဲကွံာ် Rafa အတၢ်လိာ်ကွဲလီၢ်မး ပလိာ်ကွဲအီၤတၢ်လီၢ်န့ၢ်အါထီၣ်ဒီး ပလိာ်ကွဲဂ့ၤဒိၣ်ထီၣ်က့ၤ. မ့ၢ်တၢ်လိာ်ကွဲပြၢတခါလၢ အကီဒိၣ်မး. Morocco န့ၣ်မ့ၢ်ကရူၢ်တဖုလၢအလိာ်ကွဲဂ့ၤမး, ဒီး အကမ့ၢ်တၢ်လိာ်ကွဲပြၢတခါလၢ အကီမးန့ၣ် ယသ့ၣ်ညါအီၤ ခီဖျိလၢ တၢ်လိာ်ကွဲပြၢအဝဲအံၤန့ၣ်မ့ၢ်ဝဲ ပတၢ်လိာ်ကွဲပြၢ အဆိကတၢၢ်တဝီ, ဒီး ပတိနိၣ်လိာ်ပသးဒီး Morocco, လၢအမ့ၢ်ကရူၢ်တဖုလၢ ပလိာ်ကွဲဘၣ်ဒီးအဝဲသ့ၣ် ဖးယံၤလံ, လၢထီၣ်အဘးတုၤလၢ Africa Cup of Nations တၢ်လိာ်ကွဲပြၢလၢခံကတၢၢ်အပတီၢ်, လၢအမ့ၢ်ဝဲ တၢ်လၢပကဘၣ်ဆိကမိၣ်ဃုာ်အီၤ. ဆူမဲာ်ညါတၢ်ပြၢတခါကဒီးန့ၣ် ပကမၤနၢၤတၢ်အဂီၢ် ပဘၣ်မၤဂ့ၤထီၣ်ပသးန့ၣ်လီၤ.”
ဖဲမုၢ်ဒဲး လါယူၤ ၁၄သီအနံၤ Qatar ကရူၢ်အတၢ်လိာ်ကွဲပြၢ ဒီး Switzerland ဖျၢၣ်ထူကရူၢ် ဒ်သိး ၂ဝ၂၆နံၣ် တၢ်အိးထီၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ အပူၤန့ၣ် ကရူၢ်ခံဖုအံၤ န့ၢ်ဝဲဒၣ် ၁ဂိလ် ဒ်သိးသိးအဃိ အနၢၤအရှုတအိၣ်ဘၣ်.
ဘၣ်ဃးဒီး ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ကိးနံၤဒဲး အတၢ်ကစီၣ်လီၢ်ခံကတၢၢ်န့ၣ် အိၣ်ခိးဒိကနၣ်ဘၣ်အီၤဖဲ The 90+ Podcast တၢ်ရဲၣ်တၢ်ကျဲၤအံၤတက့ၢ်.
မ့မ့ၢ်လၢဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ တၢ်ကစီၣ်လၢခံကတၢၢ်န့ၣ် နုာ်လီၤကွၢ်အီၤဖဲ SBS News Headlines အတၢ်ရဲၣ်တၢ်ကျဲၤအပူၤသ့ဝဲန့ၣ်လီၤ.
