တၢ်ကလုၢ်တဖၣ်: https://www.sbs.com.au/language/ karen/ kar/collection/podcast/0ms9u5vjn
ကညီဖိလၢအအိၣ်ဆိးဖဲအီစထြ့လယါကီၢ်မုၢ်နုာ်ကီၢ်စဲၣ် — Western Australia သ့ၣ်တဖၣ် ပာ်ဖှိၣ်မၤလၤကပီၤဝဲကညီနံၣ်ထီၣ်သီ ဖဲတနံၤအံၤ လါဒံၤစဲဘၢၣ် ၁၉သီ, လၢအလီၤဘၣ်ဝဲဒၣ်ဖဲ ကညီနံၣ် သလ့ၤလါထီၣ်သ ၁သီ တီတီ အနံၤန့ၣ်လီၤ.
မ့မ့ၢ်လၢ ကညီဖိလၢအအိၣ်ဖဲအီစထြ့လယါကီၢ် တၢ်လီၢ်အဂုၤအဂၤ လၢအပၣ်ဃုာ်, ဝံးထိရံယါကီၢ်စဲၣ်ဒီး ခွံစလဲကီၢ်စဲၣ် သ့ၣ်တဖၣ် အိၣ်ကတဲာ်ကတီၤထီၣ်အသးလၢ တၢ်မၤလၤကပီၤသကိး ကညီနံၣ်သီအဂီၢ်န့ၣ်လီၤ.
တနံၣ်အံၤ ဝံးထိရံယါကီၢ်စဲၣ် တၢ်မၤလၤကပီၤ ကညီနံၣ်ထီၣ်သီ အတၢ်ရဲၣ်တၢ်ကျဲၤသ့ၣ်တဖၣ်လီၤဆီန့ၢ်ဒ်ဝဲဒၣ် နံၣ်လၢအပူၤကွံာ်သ့ၣ်တဖၣ်, ခီဖျိလၢ အတၢ်ရဲၣ်တၢ်ကျဲၤလၢ တၢ်မၤလၤကပီၤ ကညီနံၣ်ထီၣ်သီအမူး ဘူၣ်န့ၣ်ကမၤဝဲဒၣ် ခံသီ လၢအမ့ၢ်ဝဲဒၣ်ဖြ ၂ဝ၂၆နံၣ် လါယနူၤအါရံၤ စးထီၣ် ၂သီအနံၤဒီး ၃သီအနံၤန့ၣ်လီၤ.
အီစထြ့လယၢၤကညီကလုာ်ကရၢ— ထံကီၢ်ဒီဘ့ၣ် ကမံးတံးဒီး ပှၤတီခိၣ်ရိၤမဲရဲၣ်ကျဲၤနံၣ်ထီၣ်သီအမူးတဘျီအံၤ အကျါတဂၤ, စီၤအါအဲၣ်စိ တဲဘၣ်ဝဲ အဲးစ်ဘံအဲးစ် ကညီကျိာ်တၢ်ရဲၣ်တၢ်ကျဲၤလၢ ဝံးထိရံယါကီၢ်စဲၣ် အတၢ်မၤလၤကပီၤ ကညီနံၣ်ထီၣ်သီမူးတနံၣ်အံၤ အိၣ်ဝဲဒီး ဟူးတၢ်ဂဲၤအါမးလၢအပၣ်ဃုာ်ဒီး တၢ်လိာ်ကွဲပြၢဖျၢၣ်ထူ
ဒီး တၢ်ကွဲးပြၢ ထါ လၢမိၢ်ထံးဒီးပၢ်ထံးကျိာ် ခံကလုာ်ဒဲးန့ၣ်လီၤ.
တၢ်မၤလၤကပီၤနံၣ်ထီၣ်အံၤ မ့ၢ်စ့ၢ်ကီး တၢ်ဒုးသ့ၣ်ညါက့ၤ ဖိလံၤလၢအဟဲအိၣ်ဖျဲၣ်ဒီး ဒိၣ်ထီၣ်ဖဲအံၤသ့ၣ်တဖၣ် ကသ့ၣ်ညါနၢ်ပၢၢ်က့ၤ ကညီမုၢ်နံၤဒိၣ်မုၢ်နံၤထီအဂ့ၢ်ဒီး သ့ၣ်ညါနၢ်ပၢၢ်အါထီၣ်စ့ၢ်ကီးကညီတၢ်စံၣ်စိၤတဲစိၤအဂ့ၢ်န့ၣ်လီၤ.
ဒ်သိးတၢ်မၤညီနုၢ်အိၣ်အသိး ဖဲတၢ်မၤနံၣ်သီအနံၤ လါယနူၤအါရံၤ ၃သီန့ၣ် တၢ်ကစးထီၣ်အီၤဒီးတၢ်အီၣ်အဘုသီခိၣ် လၢအမ့ၢ် ဖံဘံယီၤ ဒီး ပိာ်ထွဲထီၣ်အက့ၤဒီး တၢ်စးထီၣ်နံၣ်ထီၣ်သီအမူး ဒီး တၢ်ရဲၣ်တၢ်ကျဲၤ အဂုၤအဂၤတဆီဘၣ်တဆီ လၢအပၣ်ဃုာ် တၢ်ဟ့ၣ်လီၤက့ၤခိၣ်ဖးလၢပှၤကွဲးပြၢထါသ့ၣ်တဖၣ်အဂီၢ်န့ၣ်လီၤ.
