လါယူၤအသီ ၂ဝ, မုၢ်ဘူၣ်, တနံၤအံၤ, ကညီတဝၢ လၢအအိၣ်ဆိးဖဲ ဝံးထိရံယါ ကီၢ်စဲၣ်အပူၤသ့ၣ်တဖၣ် ပာ်ဖှိၣ်မၤလၤကပီၤသကိးဝဲ အီစထြ့လယါကီၢ် ပှၤဘၣ်ကီဘၣ်ခဲအနွံ — Refugee Week 2026 ဖဲ Wyndham Vale တၢ်လီၢ်လၢအအိၣ်ဖဲမဲလ်ဘၢဝ့ၢ် မုၢ်နုာ်တကပၤန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တၢ်မၤလၤကပီၤ ပှၤဘၣ်ကီဘၣ်ခဲအနွံ တၢ်ရဲၣ်တၢ်ကျဲၤသ့ၣ်တဖၣ်အကျါန့ၣ် ပၣ်ဃုာ်ဝဲဒီး ပှၤဘၣ်ကီဘၣ်ခဲလီၢ်လံၤတနီၤ ဟ့ၣ်နီၤလီၤအဝဲသ့ၣ်အတၢ်လဲၤခီဖျိ ဒီး အကျါန့ၣ်ပၣ်ဃုာ်ဝဲဒၣ်ဒီး နီၣ်စၢ်ဟ့ၣ်မူစိ န့ၣ်လီၤ.
“တနံၤညါအံၤန့ၣ် ယအဲၣ်ဒိးဟံးန့ၢ်တၢ်ဆၢကတီၢ်အံၤဒီး ကွၢ်ကဒါက့ၤ တၢ်ကူၣ်ဘၣ်ကူၣ်သ့ အတၢ်စိတၢ်ကမီၤ. လၢအပူၤကွံာ်တဘျုးနံၣ်အခါ ယဆ့ၣ်နီၤဖဲတီၤပူၤ လၢအဘၣ်တၢ်တ့အီၤလၢဝၣ်, ဖဲကၠီၣ်တဲၣ်ဒီးကီၢ်ပယီၤကီၢ်ဆၢ ပှၤဘၣ်ကီဘၣ်ခဲအဒဲကဝီၤတဖျၢၣ်အပူၤ. ဖဲန့ၣ်အခါန့ၣ် ယတဆိကမိၣ်ဘၣ်နီတဘျီဘၣ်, မုၢ်ကအိၣ်ဝဲတနံၤ, လၢယကအိၣ်ဆၢၣ်ထၢၣ်ဖဲအံၤ, တဲတၢ်ဒီးသု, ဒီး မၤလၤကပီၤသကိး ပှၤဘၣ်ကီဘၣ်ခဲအနွံ. ယတဆိကမိၣ်ဘၣ်နီတဘျီဘၣ်.”
နီၣ်စၢ်ဟ့ၣ်မူစိ လၢအသးနံၣ်အိၣ် ၂၆နံၣ်တဂၤသ့ၣ်နီၣ်ထီၣ်က့ၤဝဲဒၣ် လၢအအိၣ်ကၠိဖဲပှၤဘၣ်ကီဘၣ်ခဲဒဲကဝီၤအပူၤအခါန့ၣ်လီၤ.
“ဖဲမဲၢ်ရၤမိၤပှၤဘၣ်ကီဘၣ်ခဲဒဲကဝီၤ လၢယဒိၣ်ထီၣ်အလီၢ်န့ၣ်, တၢ်ကူၣ်ဘၣ်ကူၣ်သ့န့ၣ် ပတပာ်အီၤဒ်သိး တၢ်လၢကမၤန့ၢ်ဘၣ်အီၤညီကဒၣ်ဖိတခါဘၣ်, တၢ်န့ၢ်လဲၤထီၣ်ဘၣ်ကၠိန့ၣ်မ့ၢ်ဝဲတၢ်ခွဲးတၢ်ယာ်လီၤဆီတခါ ဒီး အိၣ်ဝဲဒီး တၢ်တာ်တၢ် တၢ်ကီတၢ်ခဲအါမး. ပတီၤန့ၣ် ဘၣ်တၢ်သူၣ်ထီၣ်န့ၢ်အီၤလၢ ဝၣ်, အတကျၢၤအါအါဘၣ်, တၢ်ပူၤဖျဲးတအိၣ်အါအါဘၣ် ဒီး ဖဲတၢ်စူၤခါန့ၣ် တဘျီတခီၣ် တၢ်စူၤလီၤစီၤ.”
ဖဲလၢကတိၤတၢ်ဒီး SBS ကညီကျိာ်တၢ်ရဲၣ်တၢ်ကျဲၤအခါ, သရၣ်စီၤအါအဲၣ်စိ လၢအမ့ၢ် ပှၤကရၢကရိရဲၣ်ကျဲၤမူးတဘျီအံၤတဂၤဒီး မ့ၢ်စ့ၢ်ကီးဝဲ အီစထြ့လယါကညီကလုာ်ကရၢ ပှၤဘၣ်မူဘၣ်ဒါအခိၣ်ဒိၣ်အကျါတဂၤ စံးဝဲဒၣ် တၢ်မၤလၤကပီၤပှၤဘၣ်ကီဘၣ်ခဲအနွံတၢ်ပညိၣ်န့ၣ် မ့ၢ်ဒ်သိး ဖိလံၤသ့ၣ်တဖၣ် အသုတသးပ့ၤနီၣ် အဝဲသ့ၣ် အထူအထံးတဂ့ၤ အဂီၢ်န့ၣ်လီၤ.
တကတီၢ်ဃီန့ၣ် ဖဲမုၢ်နံၤလီၤဆီတနံအံၤန့ၣ် အဝဲဟ့ၣ်သဆၣ်ထီၣ်စ့ၢ်ကီး ကညီတဝၢ ပှၤသူၣ်ဘီၣ်သးစၢ်သ့ၣ်တဖၣ်လၢ အကကျဲးစၢးတၢ်ကူၣ်ဘၣ်ကူၣ်သ့ ဒီး မိၢ်ပၢ်ဒီး သူၣ်က့သးပှၢ်သ့ၣ်တဖၣ်စ့ၢ်ကီး မ်အကဆီၣ်ထွဲမၤစၢၤ ဖိလံၤသ့ၣ်တဖၣ်န့ၣ်လီၤ.
ကညီပှၤတဝၢဖိသ့ၣ်တဖၣ်အမဲာ်ညါ တၢ်မၤလၤကပီၤ ပှၤဘၣ်ကီဘၣ်ခဲအနွံတဘျီအံၤ လီၢ်ကဝီၤ ပဒိၣ်ပှၤဘၣ်မူဘၣ်ဒါ တမှံၤတပျီၤလၢအဆီၣ်ထွဲမၤစၢၤ ကညီတဝၢသ့ၣ်တဖၣ် ကီၢ်ပယီၤကလုာ်ဒူၣ်, ကရ့ၣ်နံၣ်, ခၠီ, ရၢၢ်ခၢၣ် ဒီး ကခၠ့ၣ် သ့ၣ်တဖၣ် ဟဲထီၣ်ပၣ်ဃုာ် ဆီၣ်ထွဲ မၤလၤကပီၤသကိးဃုာ်စ့ၢ်ကီးဝဲမူးအံၤ, လၢအအိၣ်စ့ၢ်ကီးဒီး ကညီလုၢ်လၢ်ထူသနူတၢ်ဂဲၤကလံၣ်ဒိ, ကခၠ့ၣ်ကလုာ်ဒူၣ် တၢ်ဂဲၤကလံၣ် ဒီး တၢ်သူၣ်ဝံၣ်သးဆၢသ့ၣ်တဖၣ်န့ၣ်လီၤ.
လၢန့ၣ်အမဲာ်ညါ ဖဲမူးတဘျီအံၤ တၢ်ရဲၣ်တၢ်ကျဲၤအပူၤန့ၣ် အိၣ်ဃုာ်စ့ၢ်ကီးဒီး တၢ်ဟ့ၣ်လၤဟ့ၣ်ကပီၤဝဲဒၣ် ကညီဖိလၢ အဟ့ၣ်လီၤသးမၤတၢ် လၢပှၤတဝၢအဂီၢ်သ့ၣ်တဖၣ်န့ၣ်လီၤ.
အီစထြ့လယါကီၢ်ပူၤအံၤ လါယူၤ ၁၄—၂ဝ န့ၣ် မ့ၢ်ဝဲဒၣ် ပှၤဘၣ်ကီဘၣ်ခဲအနွံ — Refugee Week ဒီးတနံၣ်အံၤ တၢ်မၤလၤကပီၤ ပှၤဘၣ်ကီဘၣ်ခဲအနွံ အခိၣ်တီန့ၣ်မ့ၢ်ဝဲဒၣ် "A Million Stories" န့ၣ်လီၤ.
တကတီၢ်ဃီန့ၣ် လါယူၤအသီ ၂ဝ အံၤ မ့ၢ်စ့ၢ်ကီး ဟီၣ်ခိၣ်ဒီဘ့ၣ်ပှၤဘၣ်ကီဘၣ်ခဲမုၢ်နံၤ, World Refugee Day န့ၣ်လီၤ.
ဟီၣ်ခိၣ်ဒီဘ့ၣ် ပှၤဘၣ်ကီဘၣ်ခဲမုၢ်နံၤ တနံၣ်အံၤ အခိၣ်တီန့ၣ်မ့ၢ်ဝဲ, "Until Everyone Is Safe" န့ၣ်လီၤ.
ဘီမုၢ်စၢဖှိၣ်ကရၢစံးဝဲဒၣ် ဟီၣ်ခိၣ်ဒီဘ့ၣ်ပှၤဘၣ်ကီဘၣ်ခဲမုၢ်နံၤအံၤ လီၤဘၣ်ဝဲဒၣ်ဖဲ ဆၢကတီၢ်လၢ တၢ်အၢၣ်လီၤအီလီၤ လၢတၢ်ပူၤဖျဲးအဂီၢ်အံၤ ဘၣ်ဝဲဒၣ်တၢ်မၤကွၢ်အီၤ လၢဟီၣ်ခိၣ်ဒီဘ့ၣ် ဟီၣ်ကဝီၤကိးတီၤဒဲးအပူၤန့ၣ်လီၤ. ဘီမုၢ်စၢဖှိၣ်ကရၢ တၢ်အိၣ်ဖှိၣ်ဖးဒိၣ်ဆၢတဲာ်ပာ်လီၤဝဲ ပှၤဘၣ်ကီဘၣ်ခဲအတၢ်အိၣ်သးန့ၣ် မ့ၢ်ဝဲဒၣ်ဖဲ ၁၉၅၁နံၣ်အခါန့ၣ်လီၤ.
ဘီမုၢ်စၢဖှိၣ်ကရၢစံးဝဲဒၣ်, မုၢ်မဆါတနံၤအံၤ ဟီၣ်ခိၣ်ဒီဘ့ၣ်အပူၤ ပှၤဘၣ်ဃ့ၢ်မှံဟးဖျိး ဘၣ်သုးဆူၣ်ကွံာ် အလီၢ်အကျဲန့ၣ် အအိၣ်အါန့ၢ် ၁၁၇ ကကွဲၢ်, လၢအပၣ်ဃုာ် ကီၢ်ပယီၤ, ယူၤကရ့, ဆံရံယါဒီး ထံကီၢ်အဂုၤအဂၤ သ့ၣ်တဖၣ်န့ၣ်လီၤ.
