ပှၤဘၣ်မူဘၣ်ဒါဖဲ ခိခိၣ်ဟီၣ်ကဝီၤကသံၣ်သရၣ်ထီရီၤ — GP ဝဲၤကျိၤ, Hamish Meldrum စံးဝဲလၢ စ့တၢ်မၤစၢၤအံၤ ကမၤပှဲၤဒုးအိၣ်ထီၣ်က့ၤ ကသံၣ်သရၣ်ထီရီၤ — GP ဆူၣ်ချ့တၢ်အံးထွဲကွၢ်ထွဲဖဲခိခိၣ်ဟီၣ်ကဝီၤဒီး ပှၤတဝၢလၢအအိၣ်ယံၤဒီးဒူသဝီသ့ၣ်တဖၣ်အဂီၢ်န့ၣ်လီၤ.
ဘၣ်ဆၣ်သနာ်က့ ပှၤအဂုၤအဂၤဒ်သိး အီစထြ့လယါကသံၣ်ကသီကရၢ — Australian Medical Association တခီစံးဝဲဒၣ်လၢ ကျိၣ်စ့အံၤ အတမ့ၢ်စုကဝဲၤတခါလၢ ကဘှါရှဲတၢ်ဂ့ၢ်ကီသ့ၣ်တဖၣ်တဘျီဃီဘၣ်ဒီး ကဘှီဘၣ်က့ၤသနူအံၤအဂီၢ် ဘၣ်ဟံးတၢ်ဆၢကတီၢ်န့ၣ်လီၤ.
ကိတိာ်ခိၣ်ကျၢၢ် Anthony Albanese စံးဝဲဒၣ်, “ပှၤအီစထြ့လယါဖိသ့ၣ်တဖၣ် မ့ၢ်နာ်အီၣ်လ့ၣ်ဘၢၣ်ပဒိၣ်လၢကကဲပဒိၣ်တဘျီအကဒီးန့ၣ်, တၢ်ဂ့ၢ်လၢတၢ်ကမၤဆိအီၤလိၤလိၤန့ၣ်မ့ၢ်ဝဲ တၢ်ဆီလီၤ ဆူၣ်ချ့သနူခီၣ်တဃာ်န့ၣ်လီၤ. မ့ၢ်တုၤလီၤဖဲ ၂ဝ၃ဝန့ၣ်, ပအဲၣ်ဒိးလၢ တၢ်လဲၤထံၣ်ဒီးကသံၣ်သရၣ်ထီရီၤ — GP အဘျီ ၁ဝအကျါ ၉ဘျီန့ၣ် ကမ့ၢ်ဝဲ bulk billing — မဲးဒံးခဲ ဟ့ၣ်လီၤမၤစၢၤအီၤန့ၣ်လီၤ.”
ကိတိာ်ခိၣ်ကျၢၢ် Anthony Albanese စံးတၢ်အံၤမ့ၢ်ဝဲဖဲ အဝဲဘိးသ့ၣ်ညါလီၤ လၢအကဟ့ၣ်လီၤအါထီၣ် မဲးဒံးခဲ စ့ ၈.၅ ဘံလယၢၢ် ဖဲလၢအလီၤတၢ်ကရၢကရိ လၢတၢ်ဃုထၢအဂီၢ် ဖဲထဲးစမ့နံယါအခါန့ၣ်လီၤ.
အပူၤကွံာ်စှၤကိးလါအခါန့ၣ် ကိတိာ်ခိၣ်ကျၢၢ်လဲၤဟးဖဲထဲးစမ့နံယါ တၢ်လီၢ်အါတီၤ လၢအပၣ်ဃုာ် Launceston — လၢအဒုးနဲၣ်ဖျါ တၢ်ဃုထၢအဂီၢ် အဝဲတၢ်ဟ့ၣ်တၢ်ဖးခီၣ်တဃာ်အလီၢ်တခါန့ၣ်လီၤ.
ဘၣ်ဆၣ်သနာ်က့ ကိတိာ်ခိၣ်ကျၢၢ်စံးလၢ တၢ်ဂ့ၢ်လၢကဟ့ၣ်အါထီၣ် မဲးဒံးခဲ စ့အံၤ အတဘၣ်ဃးဒီးထံရူၢ်ကီၢ်သဲးဘၣ်.
“တၢ်အံၤမ့ၢ်တၢ်ပညိၣ်ဖးဒိၣ်ဖးထီတခါ နာ်သက့ ဘၣ်ဃးဒီး မဲးဒံးခဲန့ၣ် ပှၤကညီသ့ၣ်တဖၣ် ကြၢးန့ၢ်ဘၣ် တၢ်သူၣ်ဆူၣ်သးဆူၣ်လၢအဝဲသ့ၣ်ပဒိၣ်အအိၣ်. ဘၣ်မနုၤအဃိလဲၣ်န့ၣ် ဒ်သိးပှၤအီစထြ့လယါဖိကိးဂၤ အဲၣ်ဒိးန့ၢ်ဘၣ်ဆူၣ်ချ့တၢ်အံးထွဲကွၢ်ထွဲအဂ့ၤအကတၢၢ် လၢအဝဲသ့ၣ်ဟံၣ်ဖိဃီဖိအဂီၢ်အသိးန့ၣ်, အီစထြ့လယါပဒိၣ်အဲၣ်ဒိးန့ၢ်ဘၣ်ဆူၣ်ချ့တၢ်အံးထွဲကွၢ်ထွဲအဂ့ၤကတၢၢ် လၢပှၤအီစထြ့လယါဖိကိးဂၤဒဲးအဂီၢ်စ့ၢ်ကီးန့ၣ်လီၤ.”
ဒ်လဲၣ်ဂ့ၤန့ၣ် အဝဲတၢ်ဘိးဘၣ်သ့ၣ်ညါလီၤအံၤ ကဲထီၣ်ထံရူၢ်ကီၢ်သဲးဂ့ၢ်ဝီချ့သဒံး မ့ၢ်လၢတၢ်ဆၢကတီၢ်အိၣ်တ့ၢ်က့ၤထဲစှၤကိးသီလၢတၢ်ကဘိးဘၣ်သ့ၣ်ညါလီၤ တၢ်ကမၤ တၢ်ဃုထၢမုၢ်နံၤမုၢ်သီအဂီၢ် အဃိန့ၣ်လီၤ.
ပှၤထီဒါတၢ်ကရၢခိၣ် Peter Dutton ဒုးဘၣ်လိာ်ဝဲ လ့ၢ်ဘၢၣ် အတၢ်အၢၣ်လီၤအံၤဒီးအနီၣ်ကစၢ်တၢ်ဘျၢနုာ်လီၤကျိၣ်စ့န့ၣ်လီၤ.
“တနံၤအံၤ ယအဲၣ်ဒိးဘိးဘၣ်သ့ၣ်ညါလီၤ ကရၢပာ်ဖှိၣ်ပဒိၣ်အံၤ အိၣ်ဒီးတၢ်ပာ်ကျၢၤမုဆှုလၢ ကဘျၢနုာ်လီၤကျိၣ်စ့ ဒီလၣ် ၉ဘံလယၢၢ် ဖဲပကသံၣ်သရၣ်ထီရီၤ ကသံၣ်ဒၢးတၢ်ဖံးတၢ်မၤပှာ်ယဲၤအပူၤန့ၣ်လီၤ. ကျိၣ်စ့အံၤ ကဟ့ၣ်လီၤဝဲ တၢ်ဆီၣ်ထွဲ တၢ်ဟ့ၣ်လီၤတၢ်သိၣ်လိ, ကဆီၣ်ထွဲ နီၣ်သးဆူၣ်ချ့အဂ့ၢ်ဝဲၤကျိၤသ့ၣ်တဖၣ်, ဒီး ကဟ့ၣ်လီၤစ့ၢ်ကီးတၢ်ဆီၣ်ထွဲမၤစၢၤလၢ ကမၤလီၤတံၢ် တၢ်အံးထွဲကွၢ်ထွဲသ့ၣ်တဖၣ်အိၣ်ဒီးတၢ်တုၤလီၤတီၤလီၤ ဒီး ကျိၤကျဲအိၣ်ကျဲၣ်ကျီအသးလၢပှၤဆါသ့ၣ်တဖၣ်အဂီၢ်, ဒီးကမၤစၢၤစ့ၢ်ကီး တၢ်သူၣ်ထီၣ်ပာ်လီၤ bulk billing အပှ့ၤသ့ၣ်တဖၣ် ဒ်အမ့ၢ် တၢ်က့ၤဆီၣ်ကဖီထီၣ်က့ၤကျိၤကျဲလၢတၢ်မၤတ့ၢ်အီၤဖဲကရၢစၢဖှိၣ်ပဒိၣ်စုပူၤအခါန့ၣ်လီၤ.”
လ့ဘရၢၢ်ဘျီၣ်ဒိၣ်ထးခီခၢၣ်စး ဒီး ဆူၣ်ချ့ပှၤကတိၤတၢ်ပၢ Anne Ruston စံးဝဲဒၣ် လ့ၢ်ဘၢၢ် တၢ်ကမၤအါထီၣ် ဆူၣ်ချ့ကျိၣ်စ့အံၤ မ့ၢ်ဒၣ်ထဲတဆဲးဖိဒီး စဲၤခံဒိၣ်မးလံန့ၣ်လီၤ.
“တၢ်ဘံဘူစၢၢ်သၢ လၢလ့ၣ်ဘၢၢ်ပဒိၣ်မၤပာ်အီၤ ဒီးကျဲးစၢးဘှီဘၣ်က့ၤသ့ၣ်ဝဲအခဲအံၤန့ၣ် ပတအိၣ်ဆၢထၢၣ်ဖဲအဝဲသ့ၣ်အကျဲပူၤဘၣ်.”
ဆူၣ်ချ့ကိတိာ် Mark Butler တဲဆၢကဒါက့ၤအီၤဒီးစံးဝဲလၢ ပှၤထီဒါတၢ်ကရၢအခိၣ်န့ၣ် နာ်အီၣ်အီၤတသ့ဘၣ်.
“အဝဲမ့ၢ်ပှၤလၢအကျဲးစၢးမၤဟးဂီၤကွံာ်ဝဲ bulk billing ပဒိၣ်စ့တၢ်မၤစၢၤဃုာ်ဒီး ကသံၣ်သရၣ်ထီရီၤ GP ခိသွဲ ဒီး ပှၤအီစထြ့လယါဖိကိးဂၤဒဲး တဘျီလၢ်လၢ်ဖဲအဝဲသ့ၣ်လဲၤထံၣ်လိာ်သးဒီးကသံၣ်သရၣ်န့ၣ် ဘၣ်ဟ့ၣ်လီၤဝဲစ့န့ၣ်လီၤ. ဖဲမဲးဒံးခဲအတၢ်စံၣ်စိၤတဲစိၤအပူၤန့ၣ် မ့ၢ်ဝဲပိာ်ခွါတဂၤလၢ အနးကတၢၢ် အအၢကတၢၢ် လၢအီစထြ့ယါကီၢ်ဃုထီၣ်ထီၣ်အီၤဒ်သိး ဆူၣ်ချ့ကိတိာ်အတဂၤ, ဒီးနသ့ၣ်ညါ, အဝဲန့ၣ်မ့ၢ် Peter Dutton န့ၣ်လီၤ.”
Greens ပၣ်တံၣ်အခိၣ် Adam Bandt စ့ၢ်ကီးစံးလၢ အဝဲတနာ်အီၣ် Peter Dutton ဘၣ်.
“Greens ဃ့ထီၣ်ဝဲကိတိာ်ခိၣ်ကကျၢၢ်လၢ ဆူမဲာ်ညါတနွံန့ၣ် ကကိးကဒါက့ၤဘျီၣ်ဒိၣ်တၢ်အိၣ်ဖှိၣ်, မ့ၢ်ဝဲဖဲဘျီၣ်ဒိၣ်ထးခီခၢၣ်စးတဝာ် ကအိၣ်ဝဲဖဲဘျီၣ်ဒိၣ်အံၤအပူၤအခါန့ၣ်လီၤ. တချုးလၢတၢ်မၤတၢ်ဃုထၢဒ်ဘၣ်န့ၣ် ကဟံးန့ၢ်တၢ်ခွဲးတၢ်ယာ်အံၤ လၢကပာ်လီၤ, GP For Free — တၢ်လဲၤထံၣ်ကလီကသံၣ်သရၣ်ထီရီၤ လၢအဖိးသဲစးတၢ်ဘျၢ ဒ်သိးပှၤကိးဂၤဒဲးကန့ၢ်ဘၣ်ဝဲတၢ်အၢၣ်လီၤန့ၣ်လီၤ. မ့ၢ်မၤအီၤလၢကျဲဒ်အံၤန့ၣ် Peter Dutton ဒီး Pauline Hanson မၤတံာ်တာ်အီၤတသ့လၢၤဘၣ်.”
တချုးလၢတၢ်စးထီၣ် တၢ်ဂဲၤလိာ်လၢ တၢ်ဃုထၢအဂီၢ် ဖိးဒီးသဲစးတၢ်ဘျၢဒ်ဘၣ်န့ၣ် တၢ်လၢမဲးဒံးခဲတၢ်ဂ့ၢ်အံၤအိၣ်ပာ်လံဒ်အမ့ၢ် တၢ်ဃုထၢအတၢ်ပညိၣ်တခါန့ၣ်လီၤ. ဘၣ်ဃးဒီးတၢ်အၢၣ်လီၤလၢတၢ်ကဟ့ၣ်လီၤမၤစၢၤကျိၣ်စ့အံၤ အတၢ်တုၤထီၣ်ထီၣ်ဘးန့ၣ် ကသံၣ်သရၣ်ကရူၢ်သ့ၣ်တဖၣ် ပာ်ဖျါထီၣ်အတၢ်လီၤဘၣ်ယိၣ်န့ၣ်လီၤ.
ဖဲ Cleanbill ဆူၣ်ချ့တၢ်အံးထွဲကွၢ်ထွဲတၢ်ပာ်ဖျါလၢအထုးထီၣ်ရၤလီၤဝဲဖဲလါယနူၤအါရံၤအပူၤန့ၣ်စံးဝဲဒၣ် စးထီၣ်ဖဲ ၂ဝ၂၅ နံၣ်စးထီၣ်အံၤ အီစထြ့လယါကီၢ်မဲးဒံးခဲစ့တၢ်ဟ့ၣ်မၤစၢၤ bulk-billing အပှ့ၤလၢအအိၣ်ပာ် ၃၅.၇ မျးကယၤန့ၣ် လီၤကွံာ်ဝဲဒၣ်တုၤလၢ ၂ဝ. ၇မျးကယၤန့ၣ်လီၤ.
ပှၤဘၣ်မူဘၣ်ဒါဖဲ ခိခိၣ်ဟီၣ်ကဝီၤကသံၣ်သရၣ်ထီရီၤ — GP ဝဲၤကျိၤ, Hamish Meldrum စံးဝဲဒၣ် စ့တၢ်မၤစၢၤအံၤ ကမၤပှဲၤဒုးအိၣ်ထီၣ်က့ၤဝဲဒၣ် ကသံၣ်သရၣ်ထီရီၤ — GP ဆူၣ်ချ့တၢ်အံးထွဲကွၢ်ထွဲဖဲခိခိၣ်ဟီၣ်ကဝီၤဒီး ပှၤတဝၢလၢအအိၣ်ယံၤဒီးဒူသဝီသ့ၣ်တဖၣ်အဂီၢ်န့ၣ်လီၤ.
ဘၣ်ဆၣ်သနာ်က့ Royal Australian College of GPs ကရၢခိၣ် Michael Wright စံးဝဲဒၣ် မ့ၢ်လၢပှၤဆါတၢ်က့ၤမၤန့ၢ်ကဒါစ့န့ၣ် စှၤဒိၣ်မးလၢကကျၢၢ်ဘျၢတၢ်လၢၤဘူၣ်လၢၤစ့အဂီၢ်အဃိ ဆူမဲာ်ညါန့ၣ် ပှၤကိးဂၤဒဲးတန့ၢ်ဘၣ် မဲးဒံးခဲစ့တၢ်မၤစၢၤ (bulk billing) ဘၣ်န့ၣ်လီၤ.
Australian Medical Association — အီစထြ့လယါကသံၣ်ကသီကရၢ, ကရၢခိၣ် Dr Danielle McMullen သးလီၤပလိာ်ဃုာ်ဒီးတၢ်ထံၣ်အံၤန့ၣ်လီၤ.
“ဟီၣ်ကဝီၤလၢ မဲးဒံးခဲဟ့ၣ်လီၤမၤစၢၤ bulk-billing အိၣ်ပာ်ပှဲၤပှဲၤလံသ့ၣ်တဖၣ်န့ၣ် တၢ်ရဲၣ်တၢ်ကျဲၤအံၤ မၤစၢၤဝဲတၢ်အိၣ်စံၣ်အိၣ်ကျၢၤဒီး ကသံၣ်ဒၢးသ့ၣ်တဖၣ်ကဆဲးပာ်အီၤဒ်အလီၢ်လီၢ်အသိးန့ၣ်လီၤ. အီစထြ့လယါကီၢ်တၢ်လီၢ်အါတီၤ ဖဲကသံၣ်သရၣ်ဒီးကသံၣ်ဒၢးသ့ၣ်တဖၣ် စးထီၣ်ဟံးန့ၢ်စ့လၢပှၤဆါအအိၣ်တဆံးတက့ၢ်သ့ၣ်တဖၣ် အတၢ်ဖံးတၢ်မၤကဆဲးလဲၤဝးတရံးအသးဒီး ကမၤစၢၤ အဝဲသ့ၣ်လၢကဆဲးအိးထီၣ်အကသံးဒၢးဒီး ကထုးကွံာ်ဝဲတၢ်ဘျၢလၢတၢ်ဟံးန့ၢ်စ့လၢပှၤဆါသ့ၣ်တဖၣ်အအိၣ်န့ၣ်လီၤ. မ့မ့ၢ်အီစထြ့ယါကီၢ်တၢ်လီၢ်တနီၤနီၤတခီ, ပကဘၣ်သ့ၣ်ညါလၢ တၢ်ရဲၣ်တၢ်ကျဲၤအံၤ အတလၢပှဲၤထီၣ်ဘး လၢကဆီတလဲကသံၣ်ဒၢးသ့ၣ်တဖၣ်တၢ်ဟံးန့ၢ်စ့ဘၣ်, လီၤဆီဒၣ်တၢ် ဖဲဝ့ၢ်ပူၤတၢ်လီၢ်အါတီၤအပူၤ ပှၤဆါသ့ၣ်တဖၣ်ဘၣ်ဟ့ၣ်လီၤစ့အါန့ၢ် ဒီလၣ် ၄ဝ ဒီး ဘၣ်ဟ့ၣ်အါထီၣ်စ့ၢ်ကီးဝဲဒီလၣ် ၂ဝ လၢကမၤန့ၢ်အါထီၣ်တၢ်အံးထွဲကွၢ်ထွဲအဂီၢ်န့ၣ်လီၤ. နာ်သက့ တၢ်ရဲၣ်တၢ်ကျဲၤအံၤပျဲလၢ, ပှၤဆါလၢအဟ့ၣ်လီၤစ့တန့ၢ်လ့ၤတက့ၤဘၣ်သ့ၣ်တဖၣ်အဂီၢ်, လၢအဟ့ၣ်လီၤကသံၣ်သရၣ်ထီရီၤသ့ၣ်တဖၣ် မၤတၢ်ဆီတလဲသ့ညီ လၢကမၤတၢ်ဆၢတဲာ်အဂီၢ်န့ၣ်လီၤ.”
မ့မ့ၢ်ပှၤလၢအဟ့ၣ်တၢ်ဖးသ့ၣ်တဖၣ်တခီ အတၢ်ဆၢတဲာ်န့ၣ်အိၣ်ကျဲၣ်ကျီလိာ်အသးန့ၣ်လီၤ.
ပှၤနီၤနီၤန့ၣ်စံးဝဲလၢတၢ်ဟ့ၣ်အါထီၣ်စ့အံၤ အတၢ်ဒိဘၣ်တအိၣ်လၢအဝဲအဂီၢ်ဘၣ်ဒီး တနီၤနီၤတခီအိၣ်ဒီးတၢ်ထံၣ်လၢအဂ့ၤတကပၤ ဒီးစံးဝဲဒၣ် တၢ်မၤစၢၤအါထီၣ်စ့အံၤ ကမ့ၢ်တၢ်ဟ့ၣ်ဂံၢ်ဟ့ၣ်ဘါ ကသံၣ်သရၣ်ထီၣ်ရီၤ — GPs သ့ၣ်တဖၣ် လၢအကမၤဝဲမဲးဒံးခဲစ့တၢ်မၤစၢၤ bulk billing ဒီး မၤအါထီၣ်တၢ်အိးထီၣ်ကသံၣ်ဒၢး အတၢ်ဆၢကတီၢ် ခီဖျိလၢ ခဲကနံၣ်အံၤ ကန့ၢ်ဘၣ်တၢ်သ့ၣ်ဖးဒီး ကသံၣ်သရၣ်အဂီၢ်ကီမးအဃိန့ၣ်လီၤ. ပှၤတနီၤနီၤန့ၣ်စံးဝဲဒၣ် အဝဲသ့ၣ် အိၣ်ဒီးကျိၣ်စ့တၢ်ဃံးတၢ်စ့ၤသပှၢ်ပှၢ် ဒီး တအဲၣ်ဒိးလဲၤထံၣ်ဒီးကသံၣ်သရၣ်ထီရီၤဘၣ် မ့ၢ်လၢတၢ်လၢၤဘူၣ်လၢၤအါအဃိန့ၣ်လီၤ.
အီစထြ့လယါကသံၣ်ကသီကရၢ ကရၢခိၣ် Dr McMullen ဟ့ၣ်ပလီၢ်ဝဲပှၤဆါသ့ၣ်တဖၣ်လၢအတဘၣ်အိၣ်ဒီးတၢ်မုၢ်လၢ်လၢအဆိအချ့ဘၣ် ဒီးစံးဝဲဒၣ် တၢ်ကဟ့ၣ်လီၤအါထီၣ် မဲးဒံးခဲ ကျိၣ်စ့တၢ်မၤစၢၤန့ၣ် အတမ့ၢ်တၢ်ကူစါယါဘျါတဘျီဃီ, တထံၣ်ဃီဘၣ်န့ၣ်လီၤ.
“ယအဲၣ်ဒိးဟ့ၣ်ဂံၢ်ဟ့ၣ်ဘါပှၤတဝၢလၢအကနၢ်ပၢၢ်ဝဲ တၢ်ဟ့ၣ်အါထီၣ်တၢ်မၤစၢၤအံၤ ဒုးအိၣ်ထီၣ်တၢ်သးစၢၢ်ဆၢနာ်သက့န့ၣ် တၢ်အံၤတမ့ၢ်လၢ ကသံၣ်ဒၢးကိးဖျၢၣ်ဒဲးန့ၣ် တနၤအတီၢ်ပူၤ ကဆီတလဲအသးဆူ မဲးဒံးခဲ bulk billing — စ့တၢ်မၤစၢၤဘၣ်.”
Dr McMullen စံးစ့ၢ်ကီးဝဲဒၣ် အလီၢ်အိၣ်ဒ်လၢ တၢ်ကဘၣ်မၤတၢ်ဆီတလဲ လၢအတကွီၣ်ဖးလဲၢ်သ့ၣ်တဖၣ်အဂီၢ်န့ၣ်လီၤ.
“ယဆိကမိၣ် တၢ်အံၤကမၤစၢၤဝဲဟီၣ်ကဝီၤတနီၤ လီၤဆီဒၣ်တၢ်လၢအအိၣ်ဒီးတၢ်ဂံၢ်စၢ်ဘါစၢ်သ့ၣ်တဖၣ်. နာ်သက့ ပတၢ်ထံၣ်ဘၣ်ဃး တၢ်ကဘၣ်မၤဂ့ၤထီၣ် ဘှီဘၣ်ထီၣ်က့ၤ မဲးဒံးခဲသနူလၢအတကွီၣ်ဖးလဲၢ်အဂီၢ်န့ၣ် ပမၤလီၤမၢ်ကွံာ်အီၤတန့ၢ်ဘၣ်ဒီး ဘၣ်မၤလီၤတံၢ်လၢ ပဆီၣ်ထွဲ ပှၤအီစထြ့လယါဖိ လၢအအိၣ်ဒီး တၢ်ဆါထီရီၤ, နီၣ်သးဆူၣ်ချ့တၢ်ဂ့ၢ်ကီဒီး ပပှၤသးပှၢ်အနီၣ်ဂံၢ်ဒွးသ့ၣ်တဖၣ် — ဒီး ပှၤအီစထြ့လယါဖိသ့ၣ်တဖၣ် အဝဲသ့ၣ်ဘၣ်ထံၣ်လိာ်သးဒီးကသံၣ်သရၣ်ထီရီၤတၢ်ဆၢကတီၢ်န့ၣ် ယံၤထဲၣ်လဲၣ်ထဲလဲၣ်ဂ့ၤ ကန့ၢ်ဘၣ်ကဒါက့ၤစ့အဂီၢ် သနူသ့ၣ်တဖၣ်န့ၣ် တၢ်ကဘၣ်ဘှီဘၣ်မၤဂ့ၤထီၣ်အီၤန့ၣ်လီၤ.”
