မဲလ်ဘၢကညီတဝၢမၤလၤကပီၤကညီလုၢ်လၢ်ထူသနူလါခူးကံၢ်စု

ဖဲလါအီကူာ် ၂၃သီ မုၢ်ဘူၣ်အနံၤ မဲလ်ဘၢ ကညီတဝၢ တၢ်မၤလၤကပီၤသကိး တနံၣ်တဘျီ ကညီလုၢ်လၢ်ထူသနူလါခူးကံၢ်စုအမူးအကတီၢ် ကညီဖိလၢအဟဲတုၤအိၣ်ဆိးဆီလီၤအသးဖဲမဲလ်ဘၢဝ့ၢ်အါအါဂီၢ်ဂီၢ် ဃုာ်ဒီး လီၢ်ကဝီၤခိၣ်နၢ်ပှၤဘၣ်မူဘၣ်ဒါသ့ၣ်တဖၣ် ဟဲထီၣ်မၤလၤကပီၤသကိးဝဲဒၣ်မူးအံၤန့ၣ်လီၤ.

Karen young women performing Karen traditional Don dance at annual wrist tying ceremony in Melbourne, August 23, 2025. Photo: Shah Paung/ SBS KAREN

ကညီသးစၢ်ပာ်ဖျါထီၣ်ကညီလုၢ်လၢ်ထူသနူဒိတၢ်ဂဲၤကလံၣ်ဖဲလါခူးကံၢ်စုအမူး Photo: Shah Paung/SBS Karen

တၢ်မၤလၤကပီၤကညီလါခူးကံၢ်စုအမူးတဘျီအံၤန့ၣ် ဘၣ်တၢ်မၤအီၤဖဲ မဲလ်ဘၢဝ့ၢ်မုၢ်နုာ် ဝ့ၤရဘံၤ တၢ်လီၢ် လၢအမ့ၢ်တၢ်လီၢ်တတီၤလၢကညီဖိအိၣ်ဆိးဆီလီၤအသးအါအါဂီၢ်ဂီၢ်တတီၤန့ၣ်လီၤ.

တၢ်မၤလၤကပီၤမူးတဘျီအံၤ ကညီသူၣ်ဘီၣ်သးစၢ်သ့ၣ်တဖၣ်ဟဲဝဲဒၣ်အါအါဂီၢ်ဂီၢ်အဃိ သရၣ်စီၤလီၤဘီလီၤမုၢ်လၢအမ့ၢ် ဝံးထိရံယါကီၢ်စဲၣ် အ့ၣ်ခ့ၣ်အိၣ် ပှၤဘၣ်မူဘၣ်ဒါတဂၤဒီး ပှၤရဲၣ်ကျဲၤဆီၣ်ထွဲမူးအံၤအကျါတဂၤ စံးဝဲဒၣ်လၢအမ့ၢ်တၢ်သူၣ်မံသးမုာ်တခါန့ၣ်လီၤ.

မၤလၤကပီၤကညီလါခူးကံၢ်စုအမူး Photo: Shah Paung/SBS Karen

ဖဲတၢ်မၤလၤကပီၤမူးအတီၢ်ပူၤန့ၣ် ဘၣ်တၢ်ကတိၤ ရှဲပၠးလီၤဝဲဒၣ် ကညီလါခူးကံၢ်စုဟဲကဲထီၣ်အဂ့ၢ် တၢ်စံၣ်စိၤတဲစိၤ လၢအအိၣ်ဃုာ်ဒီး တၢ်ဒုးနဲၣ်ဖျါ ကညီလုၢ်လၢ်ထူသနူတၢ်ဂဲၤကလံၣ်ဒိ, ကညီလုၢ်လၢ်ထူသနူတၢ်သူၣ်ဝံၣ်သးစၢ ဒီး ကညီသူၣ်က့သးပှၢ်ပှၤဘၣ်မူဘၣ်ဒါသ့ၣ်တဖၣ် ကံၢ်န့ၢ်ဝဲဒၣ် သူၣ်ဘီၣ်သးစၢ်, ဖိဒံဖိသၣ်ဒီး တမှံၤလၢ အအဲၣ်ဒိးကံၢ်စုသ့ၣ်တဖၣ်အစုကိးဂၤဒဲးန့ၣ်လီၤ.

သရၣ်စီၤအီၣ်ဘီမုၢ်စံးစ့ၢ်ကီးဝဲဒၣ်လၢ ဒ်သိးအဝဲမ့ၢ်စ့ၢ်ကီးပၢ်တဂၤအသိး တၢ်ရဲၣ်ကျဲၤမၤလၤကပီၤကညီလါခူးကံၢ်စုအမူးန့ၣ် မ့ၢ်စ့ၢ်ကီး ဝဲဒၣ် တၢ်ဟ့ၣ်လီၤဒုးညါ ဖိလံၤသ့ၣ်တဖၣ်ဒီး ကညီလုၢ်လၢ်ထူသနူအဂ့ၢ်န့ၣ်လီၤ.

Karen wrist tying ceremony in Melbourne, 25 August 2025. Photo: Shah Paung/SBS Karen

တၢ်မၤလၤကပီၤလါခူးကံၢ်စုမူးတဘျီအံၤ ဘၣ်တၢ်ဆီၣ်ထွဲမၤစၢၤအီၤလၢ ဝံးထိရံယါကီၢ်စဲၣ်ပဒိၣ် ဒီး ဘၣ်တၢ်တီခိၣ်ရိၤမဲရဲၣ်ကျဲၤမၤသကိးအီၤလၢ အီစထြ့လယါကညီကရၢ — AKO ဒီး Comfort Care & Community Services သ့ၣ်တဖၣ်န့ၣ်လီၤ.