ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢဒီတကတီၢ် မဲၤစံၤ ကဲထီၣ် ပှၤသွီနုာ်ကိအအါကတၢၢ်

ပှၤလိာ်ကွဲဖျၢၣ်ထူဖိအသီတဂၤ ဒိးန့ၢ်ဘၣ်ဝဲခိၣ်သလုာ် လၢအမ့ၢ် World Cup — ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ပှၤလိာ်ကွဲဖျၢၣ်ထူဖိ လၢအသွီနုာ်ကိအါကတၢၢ် ကိးဆၢကတီၢ်ဒဲး ခိၣ်သလုာ်, ဒီးတကတီၢ်ဃီန့ၣ် မ့ၢ်လၢမူခိၣ်စူၤကလံၤမုၢ်လီၤအဃိ တၢ်တံာ်တာ်အိၣ်ထီၣ်ဒီး တၢ်လိာ်ကွဲပြၢတခါ အတၢ်လိာ်ကွဲတၢတကတီၢ်န့ၣ်လီၤ.

---

ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn

တူၢ်လိာ်ကမုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၁၂ သီတသီ တၢ်ပာ်ဖျါအဘိၣ်န့ၣ်လီၤ.

———

Lionel Messi ကဲထီၣ်ဝဲဒၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ—World Cup ပှၤသွီနုာ်ကိအအါကတၢၢ် ကိးဆၢကတီၢ်ဒဲးတဂၤ, ဒီး ဖဲ Dallas ဝ့ၢ်ပူၤ, Argentina ထူပြၢဒီး Austria ဖျၢၣ်ထူကရူၢ်အခါန့ၣ်, အဝဲထူနုာ်လီၤ ကိ ၂ဖျၢၣ် ဒီးမၤနၢၤဝဲတၢ်ပြၢအံၤ, အဃိ ဖဲကရူၢ် — J အပူၤန့ၣ်အိၣ်ဝဲဒၣ်ဖဲတၢ်လီၢ်လၢအဖီခိၣ်ကတၢၢ်, ဒီး န့ၢ်ဘၣ်ဝဲတၢ်လီၢ်ဖဲ တၢ်ထူပြၢ အနၢၤအရှူ — လၢဘၣ်ဟးထီၣ်အပတီၢ်န့ၣ်လီၤ.

ဖဲအဝဲထူ ဖဲၤနၢၤလ်တံၤ ဖျၢၣ်ထူတဖျၢၣ်အခါ အဝဲထူဝဲတနုာ်လီၤဘၣ် နာ်သက့, တချုးလၢ တၢ်လိာ်ကွဲ တၢတကတီၢ် ဝံၤဒ်ဘၣ်န့ၣ် Messi ထူနုာ်လီၤဝဲကိတကိ ဒီး ဖဲတၢ်အိၣ်ဘှံးတဘျီဝံၤအလီၢ်ခံန့ၣ် အဝဲထူနုာ်လီၤကဒီးဝဲတကိန့ၣ် အဃိ, အခဲအံန့ၣ် World Cup တၢ်ပြၢအပူၤ အဝဲသွီနုာ်ကိ န့ၢ်ခဲလၢာ်အိၣ်ဝဲ ၁၈ ဖျၢၣ်န့ၣ်လီၤ.

ဖဲကရူၢ်တခါဃီအပူၤအံၤ, တၢ်လိာ်ကွဲပြၢအပူၤ Algeria လူၤထီၣ်ကဒါက့ၤဝဲဒၣ် Jordan ဖျၢၣ်ထူကရူၢ်ဒီးမၤနၢၤဝဲဒၣ်အီၤ ၂–၁, ဒီးဖဲတၢ်လိာ်ကွဲပြၢတဘျီအံၤအပူၤန့ၣ် ဒိးန့ၢ်ဘၣ်ဝဲ အမး အဆိကတၢၢ် တမးန့ၣ်လီၤ.

တချုးတၢ်လိာ်ကွဲ အတၢ်အိၣ်ဘှံး ကတီၢ်ဒ်ဘၣ်န့ၣ် Jordan သွီနုာ်လီၤဆိဝဲဒၣ် တကိ နာ်သက့ ဖဲတၢ်လိာ်ကွဲစးထီၣ်ကဒါက့ၤ လၢခံတကတီၢ်န့ၣ် Algeria သွီနုာ်လီၤကဒါဝဲကိခံဖျၢၣ်အဃိ မၤနၢၤဝဲတၢ်န့ၣ်လီၤ.

———

ဖဲကရူၢ်— I အပူၤန့ၣ်, အီစထြ့လယါထံဖိကီၢ်ဖိ လၢအကဲဖျၢၣ်ထူအပှၤနဲၣ်တၢ်လၢ Iraq ဖျၢၣ်ထူကရူၢ်အဂီၢ်, Graham Arnold, အကရူၢ်အံၤ ရှူဝဲဒၣ် ဖြၣ်စ့ၣ်ဖျၢၣ်ထူကရူၢ် ၃—ဝ လၢအဝဲသ့ၣ်လိာ်ကွဲပြၢအီၤဖဲ Philadelphia ဝ့ၢ်ပူၤ, ဒီးအပှၤလိာ်ကွဲဖိ Kylian Mbappé အတၢ်အိၣ်ဖျါထီၣ်ဖဲ ထံဂုၤကီၢ်ဂၤ တၢ်ပြၢအပူၤ ပှဲၤထီၣ်အဘျီ ၁ဝဝ ဒီ ထူနုာ်လီၤဝဲကိ ခံဖျၢၣ်န့ၣ်လီၤ.

မ့ၢ်လၢမူခိၣ်စူၤဒိၣ်အဃိ ကဲထီၣ်ဝဲတၢ်တံာ်တာ်လၢတၢ်ပြၢတဘျီအံၤအဂီၢ် ဒီး ဘၣ်အိၣ်ပတုာ်ဝဲဖးယံၤ လၢအအါန့ၢ် ၂နၣ်ရံၣ်ဘျဲၣ်— ဖဲတၢ်လိာ်ကွဲပြၢတဘျီအံၤအပူၤ မူခိၣ်ကလံၤသီၣ်ဂီၤ အဃိတၢ်တံာ်တာ်အိၣ်ထီၣ်န့ၣ် တၢ်အံၤမ့ၢ်ဝဲ တၢ်အဆိကတၢၢ်တဘျီန့ၣ်လီၤ.

တကတီၢ်ဃီန့ၣ်, Norway ဖျၢၣ်ထူကရူၢ်မၤနၢၤဝဲဒၣ် Senegal ၃–၂ ကိ, ဒီး ဖဲတၢ်လိာ်ကွဲပြၢတဘျီအံၤအပူၤန့ၣ် Erling Haaland အံၤ ထူနုာ်လီၤကိခံဖျၢၣ်အဃိ, တၢ်လိာ်ကွဲတဘျီအံၤအပူၤ တၢ်မုၢ်လၢ်အိၣ်လၢ အကကဲထီၣ်ဘၣ် ပှၤသွီနုာ်ကိအအါကတၢၢ် — လၢအဘၣ်တၢ်သ့ၣ်ညါစ့ၢ်ကီးအီၤဒ်သိး Golden Boot, “ခီၣ်ဖံးထူ” န့ၣ်လီၤ.

———

မ့ၢ်ကွၢ်ကဒါလၢ Socceroos တကပၤန့ၣ်...

အီစထြ့လယါကီၢ် အိၣ်ကတဲာ်အကတီၤအသးလၢ World Cup တၢ်ပြၢ လၢအကဘၣ်ထူဒီး Paraguay ဖျၢၣ်ထူကရူၢ်, ဒီးကိတိာ်ခိၣ်ကျၢၢ် အဲးသနံး အဲးလ်ဘၢၤနံးစံၤ ဟ့ၣ်သဆၣ်ထီၣ် ထံဖိကီၢ်ဖိသ့ၣ်တဖၣ်လၢ အကဟ့ၣ်ဂံၢ်ဟ့ၣ်ဘါဆီၣ်ထွဲသကိး Socceroos, တကးဒ်ဘၣ်, ပတြၢၤစ့ၢ်ကီးဝဲဖျၢၣ်ထူကရူၢ်အံၤ မ့ၢ်လၢ အဒုးနဲၣ်ဖျါထီၣ်ဝဲဒၣ် အီစထြ့လယါကီၢ် တၢ်လီၤဆီအိၣ်ဖှိၣ်သကိးအါကလုာ်ဒီး အတၢ်သူၣ်ဆူၣ်သးဂဲၤ တၢ်သးခူတလ့ၢ်န့ၣ်လီၤ.

“ပအိၣ်ဒီးတၢ်ဆဲးတၢ်လၤထူးတီၤ. ဒီးပမ့ၢ်ကွၢ်ဖဲ Socceroos န့ၣ်, ပထံၣ်ဘၣ်ဝဲတၢ်ဆဲးတၢ်လၤလၢအထူးတီၤ အဒိအတဲာ်သ့ၣ်တဖၣ်. ပှၤကညီလၢအပာ်ကဖၢလၢအသးဒီးအဝဲသ့ၣ်ကလုာ်ဒူၣ်, လၢအမ့ၢ်မတၤတဂၤသ့ၣ်တဖၣ်လဲၣ်, ဘၣ်ဆၣ်သနာ်က့ မ့ၢ်ပှၤသ့ၣ်တဖၣ်လၢ အပာ်ကဖၢလၢစ့ၢ်ကီးအသးခီဖျိအမ့ၢ်ပှၤအီစထြ့လယါထံဖိကီၢ်ဖိ ဒီး ကဲဘၣ်ခၢၣ်စးလၢပထံပကီၢ်လၢအဂ့ၤမးတဘ့ၣ်အံၤအဂီၢ်. ဒီးဖဲမုၢ်ဖီဖး—မုၢ်ယဲၢ်နံၤ မုၢ်ထူၣ် ၁၂နၣ်ရံၣ်န့ၣ် ထံကီၢ်ဒီဘ့ၣ် ကဟ့ၣ်ဂံၢ်ဟ့ၣ်ဘါအဝဲသ့ၣ်. ဒီးယမုၢ်လၢ်လၢ, ဖဲန့ၣ်အခါ, ထံကီၢ်အံၤ အကအိၣ်ပတုာ်ကွံာ်အသးတစိၢ်ဖိန့ၣ်လီၤ.”

ဖဲတၢ်ပြၢအံၤအပူၤ မၤနၢၤတၢ်မ့ၢ်ဂ့ၤ, အနၢၤအရှူအဆၢမ့ၢ်တအိၣ်ဘၣ်မ့ၢ်ဂ့ၤ, အီစထြ့လယါကီၢ် ကအိၣ်ဝဲဒၣ်ဖဲ ကရူၢ်— D တၢ်ဖီခိၣ်ကတၢၢ် ကရူၢ်ခံဖုပူၤ ဒီး ကဘၣ်အိၣ်ခိးဝဲတၢ်ဖဲ တၢ်ထူပြၢ, လၢအမ့ၢ်ဝဲဒၣ် ပှၤလၢအရှူန့ၣ် ကဘၣ်ဟးထီၣ်ကွံာ်ဖဲတၢ်ပြၢအံၤအပူၤန့ၣ်လီၤ.

———

မ့ၢ်ကွၢ်လၢ FIFA World Cup တၢ်ပြၢ ၁၃ သီအနံၤအဂီၢ်န့ၣ်, တၢ်ပြၢလိာ်သးလၢအရ့ဒိၣ်မးသ့ၣ်တဖၣ် အိၣ်ဝဲဒၣ်ဖဲတၢ်ရဲၣ်တၢ်ကျဲၤအပူၤန့ၣ်လီၤ.

ဖဲကရူၢ်—K အပူၤန့ၣ် Portugal ကဘၣ်ထူပြၢဒီး Uzbekistan, ဒီးမ့မ့ၢ် Colombia န့ၣ်ကဘၣ်တိနိၣ်လိာ်သးဒီး DR Congo ဖျၢၣ်ထူကရူၢ်န့ၣ်လီၤ.

မ့မ့ၢ်လၢကရူၢ်— L တခီန့ၣ်, တချုးလၢ Panama ဒီး Croatia ထူပြၢလိာ်သးဒ်ဘၣ်န့ၣ်, England ကဘၣ်တိနိၣ်လိာ်သးဒီး Ghana န့ၣ်လီၤ.

အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၁၁ သီတသီအတၢ်ကစီၣ်. ယၤန့ၣ်မ့ၢ် ရှါဖီၤ.

FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.