အီစထြ့လယါကီၢ် တၢ်ပာ်ဖှိၣ်တပူၤဃီ တၢ်ကစီၣ်တဝၢ အဟီၣ်မဲာ်ပျီဒီး စဲးဖီကဟၣ်ခီပနံၣ်ဖးဒိၣ်သ့ၣ်တဖၣ် တ့ဒုးအိၣ်ထီၣ် တၢ်ဆီလီၤပာ်လီၤတဆီဘၣ်တဆီလၢအအိၣ်ဘံဘူသးသ့ၣ်တဖၣ်န့ၣ်, လုၢ်ဘၢဝဲ တၢ်ဂ့ၢ်တၢ်ကျိၤအကလုာ်လၢပဒိးန့ၢ်ဘၣ်အီၤဖဲအီးလဲ—လီမူၢ်ပျီအပူၤသ့ၣ်တဖၣ်န့ၣ်လီၤ. ပှၤသ့ပှၤဘၣ်စဲၤနီၣ်သ့ၣ်တဖၣ်စံးလၢ, တၢ်အဝဲအံၤန့ၣ်ဆီတလဲဝဲပပှၤကရၢကရိ, ဒီး မၤဘၣ်ဒိဘၣ်ထံးပတၢ်မုၢ်လၢ်ကွၢ်ဆိသ့ၣ်တဖၣ်လၢအဆှၢပှၤဆူ တၢ်တဂ့ၤဘၣ်အကျဲန့ၣ်လီၤ.
စဲးဖီကဟၣ်ခီပနံၣ်ဖးဒိၣ် တၢ်ဒ့ၣ်စၢၤ ဒံၢ်ကၠံၢ်ထၢၣ်သ့ၣ်တဖၣ်, ဒ်သိး Facebook ဒီး Instagram သ့ၣ်တဖၣ်န့ၣ် လၢတၢ်ထိၣ်ဟူးထိၣ်ဂဲၤထိၣ် တၢ်ကစီၣ်ခိၣ်တီသ့ၣ်တဖၣ်ဒီး တၢ်ကစီၣ်သ့ၣ်တဖၣ်အဂီၢ် မၤအါထီၣ်ဝဲ တၢ်ဟ့ၣ်ဆူၣ်ထီၣ်ပှၤသး, လၢပှၤကဆီၣ်လီၤကွၢ်ဒိကနၣ်အီၤဒီး အိၣ်ဒီးတၢ်ဘျးစဲအဂီၢ်န့ၣ်လီၤ.
Dr Michael Noetel မ့ၢ်ဝဲ သးဂ့ၢ်ဝီပီညါတၢ်သိၣ်လိဝဲၤကျိၤ သရၣ်ဒိၣ်စိသဃဲၤတဂၤ ဖဲခွံစလဲဖၠၣ်စိမိၤန့ၣ်လီၤ. အဝဲတဲဘၣ်ဝဲ တၢ်ရဲၣ်တၢ်ကျဲၤလၢ တၢ်အဝဲအံၤ ဒုးကဲထီၣ်န့ၢ်ပတၢ်လဲၤခီဖျိ တၢ်တူၢ်ဘၣ်လၢ “တၢ်မၤလိန့ၢ်တၢ်လၢ တၢ်မၤစၢၤတၢ်တသ့နီတမံၤ”, န့ၣ်လီၤ.
“ပကစံးတၢ်အဒိ ဒ်သိးတၢ်ဒုးတၢ်ယာ်ဖဲ Iran အပူၤန့ၣ် ကမၤတၢ်တသ့နီတမံၤဘၣ်, တၢ်လၢပတူၢ်ဘၣ်အီၤ ဒ်သိးကမၤတၢ်တခါခါန့ၣ်, မ့ၢ်ဝဲဒၣ်လၢ, ပဃုသ့ၣ်ညါမၤန့ၢ်တၢ်ဂ့ၢ်တၢ်ကျိၤလၢခံကတၢၢ်သ့ၣ်တဖၣ်န့ၣ်လီၤ.”
ကတူၢ်ဘၣ်အီၤဒ်သိး တၢ်ကီတၢ်ခဲတနီၤနီၤလၢ ပှၤဟီၣ်ခိၣ်ဖိ ဘၣ်ကွၢ်ဆၢၣ်မဲာ်အီၤန့ၣ် မ့ၢ်တၢ်ဒိၣ်တလၢကွံာ်အခၢး လၢကမၤစၢၤအီၤကသ့တမံၤမံၤအဂီၢ်န့ၣ်လီၤ. ဒီးအခီပညီန့ၣ်မ့ၢ်ဝဲ လၢတၢ်အံၤအဂီၢ်န့ၣ် ကမၤတၢ်တသ့နီတမံၤဘၣ်. ယဆိကမိၣ်တၢ်အံၤန့ၣ်မ့ၢ်ဝဲ တၢ်လီၤသူၣ်အုးသးအုးနီၣ်နီၣ်တမံၤန့ၣ်လီၤ.
သရၣ်ဒိၣ်စိသဃဲၤ Noetel စံးစ့ၢ်ကီးဝဲဒၣ်, “နကတူၢ်ဘၣ်အီၤဒ်သိး တၢ်အရ့ဒိၣ်လၢ နမၤအီၤန့ၢ်သ့ၣ်တဖၣ်အိၣ်ဝဲအဆၢကတီၢ်န့ၣ်, နတူၢ်ဘၣ်အီၤဒ်သိး နမၤအီၤတန့ၢ်ဘၣ်န့ၣ်လီၤ.”
ဖဲ SBS Examines တၢ်ရဲၣ်တၢ်ကျဲၤအကူာ်အံၤအပူၤတၢ်လၢပသံကွၢ်အီၤန့ၣ်မ့ၢ်ဝဲ: တၢ်ကစီၣ်လၢပှၤအီစထြ့လယါဖိသ့ၣ်တဖၣ်ဒိးန့ၢ်ဘၣ်အီၤကိးမုၢ်ဒဲးန့ၣ် တၢ်ကစီၣ်တဝၢဖးဒိၣ်ဒီး စဲးဖီကဟၣ်ခီပနံၣ်ဖးဒိၣ်သ့ၣ်တဖၣ်လုၢ်ဘၢအီၤဒ်လဲၣ်? ဒီးတၢ်အံၤဘၣ်ဒိဘၣ်ထံးပတၢ်ထံၣ်လၢဟီၣ်ခိၣ်ဖျၢၣ်အံၤအဖီခိၣ်ဒ်လဲၣ်?
