ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢဟံၣ်ကစၢ်အကျါ လၢအမ့ၢ် Mexico ထီၣ်ဘၣ်ဝဲဆူ ကရူၢ် ၁၆ဖု တၢ်လိာ်ကွဲပြၢအပတီၢ်, ဒီးမ့ၢ်လၢအဝဲသ့ၣ် ပှၤလိာ်ကွဲဖျၢၣ်ထူဖိ Erling Haaland ဒီး Kylian Mbappé အတၢ်မၤစၢၤအဃိ Norway ဖျၢၣ်ထူကရူၢ်ဒီး ဖြၣ်စ့ၣ်ဖျၢၣ်ထူကရူၢ်လဲၤထီၣ်ဘၣ်ဝဲဆူညါတပတီၢ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၂ဝ သီတသီ တၢ်ပာ်ဖျါအဘိၣ်န့ၣ်လီၤ.
———
FIFA World Cup—ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ အသီ ၂ဝ တနံၤအံၤန့ၣ်, ဖဲ Dallas အပျီ ကရူၢ် ၃၂ဖုအပတီၢ် တၢ်လိာ်ကွဲပြၢအပူၤ Norway မၤနၢၤဝဲ Côte d'Ivoire ၂—၁ ကိအဃိ, ဘၣ်စံးဝဲဒၣ် အပှၤလိာ်ကွဲဖိ Erling Haaland လၢအထူနုာ်လီၤက့ၤကိလၢအလီၢ်ခံတဖျၢၣ်အဃိန့ၣ်လီၤ.
တချုးဖဲ တၢ်ဆၢကတီၢ်လီၤတဝာ်ဒ်ဘၣ်န့ၣ် Antonio Nusa သွီနုာ်ဝဲကိလၢ Norway အဂီၢ်, ဒီးဖဲတၢ်အိၣ်ဘှံးဝံၤအလီၢ်ခံန့ၣ် Côte d'Ivoire သွီနုာ်ဝဲတကိ, ဘၣ်ဆၣ်သနာ်က့ မ့ၢ်လၢ Haaland သွီနုာ်ကဒီကိလၢခံတဖျၢၣ်အဃိ Norway န့ၢ်ဘၣ်တၢ်ပူၤဖျဲးလၢ အမၤနၢၤတၢ်ဖဲ ဟီၣ်ခိၣ်ဒီဘ့ၣ် ရှူဟးထီၣ် တၢ်ပြၢအပတီၢ် ဒီးစးထီၣ်လၢ ၁၉၉၈နံၣ်န့ၣ် မ့ၢ်ဝဲဒၣ်အဝဲသ့ၣ် တၢ်မၤနၢၤအဆိကတၢၢ်တဘျီ ဖဲတၢ်ပြၢအပတီၢ်အံၤန့ၣ်လီၤ.
ခဲကနံၣ်အံၤ Norway ထီၣ်ဘၣ်ဝဲဆူ ကရူၢ် ၁၆ဖု တၢ်ပြၢအပတီၢ် လၢအကဘၣ်ထံၣ်လိာ်အသးဒီး ပှၤဖျိးစိ—ခၠၣ်ပံၣ်ယၣ် ယဲၢ်ဘျီ ဘြၤစံလ် ဖျၢၣ်ထူကရူၢ်န့ၣ်လီၤ.
———
ဖဲ New Jersey ပျီပူၤတခီန့ၣ်, ဖြၣ်စ့ၣ် မၤန့ၢ်ဝဲတၢ်လီၢ်လၢ ကရူၢ် ၁၆ဖု တၢ်ပြၢအဂီၢ် မ့ၢ်လၢအမၤနၢၤဝဲဒၣ် ဆွံၣ်ဒ့ၣ် ၃—ဝ, ဒီး အဝဲသ့ၣ်အကိခံဖျၢၣ်န့ၣ် ဘၣ်တၢ်ထူနုာ်လီၤအီၤလၢ Kylian Mbappé န့ၣ်လီၤ.
ဖဲလၢအဝဲသ့ၣ် ဒိၣ်စိဝဲဒၣ် တၢ်လိာ်ကွဲ အခီၣ်ထံးတကူာ်ဝံၤအလီၢ်ခံ, ဖြၣ်စ့ၣ်ဖျၢၣ်ထူကရူၢ်အံၤ တချုးဖဲတၢ်အိၣ်ဘှံးအဆၢကတီၢ်တုၤလီၤဒ်ဘၣ်န့ၣ် မၤန့ၢ်ဝဲကိတဖျၢၣ်, လၢအမ့ၢ်ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ရှူဟးထီၣ်အပတီၢ် Mbappé တၢ်သွီနုာ်ကိပှဲၤထီၣ် ခွံဖျၢၣ်တဖျၢၣ် — ဒီးဖဲတၢ်လိာ်ကွဲပြၢအံၤ အတၢ်စံၣ်စိၤတဲစိၤအပူၤန့ၣ် ဖဲတၢ်ပြၢအပတီၢ်အံၤ အဝဲကဲထီၣ်ဝဲပှၤလၢအသွီကိန့ၢ်အါကတၢၢ်န့ၣ်လီၤ.
ဖဲတၢ်စးထီၣ်ကဒါက့ၤ တၢ်လိာ်ကွဲခံကူာ်တကူာ်န့ၣ် ဖြၣ်စ့ၣ်မၤန့ၢ်အါထီၣ်ကဒီးကိတဖျၢၣ် တချုးဖဲလၢ Mbappé သွီနုာ်လီၤအါထီၣ်ကဒီး ကိတဖျၢၣ်ဒ်အခါန့ၣ်လီၤ. အဝဲအတၢ်သွီကိအံၤ ဆှၢအီၤဆူ ပှၤကဒိးန့ၢ်ဘၣ် ခီၣ်ဖံးထူ—Golden Boot ခိၣ်ဖးတၢ်ပြၢအပူၤန့ၣ်လီၤ.
အခဲအံၤန့ၣ် အဝဲသ့ၣ် ကဘၣ်တိနိၣ်လိာ်ဝဲအသးဒီး Paraguay, လၢအမ့ၢ်ဖျၢၣ်ထူကရူၢ်တဖု လၢအထူဟးထီၣ်ကွံာ် ကၠၢမနံၣ်ဖျၢၣ်ထူကရူၢ် ဖဲဟီၣ်ခိၣ်ဒီဘ့ၣ်ဖျၢၣ်ထူတၢ်ပြၢတဘျီအံၤအပူၤန့ၣ်လီၤ.
———
မ့ၢ်လၢမူခိၣ်စူၤဒိၣ်ဒိၣ်မုၢ်မုၢ်ဒီး လီသီၣ်လီဖျးတၢ်အဃိ တၢ်ကစးထီၣ်တၢ်လိာ်ကွဲပြၢအဂီၢ် စဲၤခံဝဲဒၣ် တနၣ်ရံၣ်ဝံၤအလီၢ်ခံ, Mexico လၢအမ့ၢ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢဟံၣ်ကစၢ်ထံကီၢ်သ့ၣ်တဖၣ်အကျါတဘ့ၣ် လိာ်ကွဲပြၢဒီး Ecuador န့ၣ်လီၤ.
ဖဲတၢ်လိာ်ကွဲအံၤစးထီၣ်န့ၣ် Mexico ဒိၣ်စိဝဲတၢ်ပြၢအံၤ ဃုာ်ဒီး အဝဲသ့ၣ်အပှၤထံဖိကီၢ်ဖိအါန့ၢ်အဂၤ ၈ဝ,ဝဝဝ ဟဲကွၢ်ကီဟ့ၣ်ဂံၢ်ဟ့ၣ်ဘါအီၤ, ဒီးဖဲတၢ်လိာ်ကွဲအခီၣ်ထံးတကူာ်န့ၣ် ဒိးန့ၢ်ဝဲကိခံဖျၢၣ်န့ၣ်လီၤ.
အနံၣ် ၄ဝ အတီၢ်ပူၤ မ့ၢ်ဝဲတၢ်အဆိကတၢၢ်တဘျီလၢ Mexico မၤနၢၤတၢ်ဖဲ ရှူဟးထီၣ်တၢ်ပြၢအပတီၢ် လၢအဝဲသ့ၣ် အပှၤလိာ်ကွဲဖျၢၣ်ထူဖိ Julián Quiñones ဒီး Raúl Jiménez ထူနုာ်န့ၢ်အဝဲသ့ၣ် ၂—ဝ ကိန့ၣ်လီၤ.
တၢ်အဆၢအံၤပာ်ဖျါထီၣ် Mexico မၤနၢၤဝဲတၢ်ပြၢ ၁၂ ဘျီ. အခဲအံၤန့ၣ်အဝဲသ့ၣ် ကဘၣ်တိနိၣ်လိာ်အသးဒီး ပှၤလၢအမၤနၢၤ England ဒီး DR Congo အတၢ်ပြၢ ဖဲကရူၢ် ၁၆ဖု တၢ်ပြၢအပတီၢ်န့ၣ်လီၤ.
———
Socceroos လဲၤတုၤလီၤဝဲဒၣ်ဆူ Dallas ဝ့ၢ် တချုးဖဲတနွံအံၤအတၢ်လိာ်ကွဲပြၢဒီး Egypt ဖျၢၣ်ထူကရူၢ် ဒ်သိးကရူၢ် ၃၂ဖု တၢ်ပြၢအပတီၢ် စးထီၣ်ဒ်ဘၣ်အခါ, ဒီးတၢ်အဝဲအံၤန့ၣ်မ့ၢ်ဝဲဒၣ် အီစထြ့လယါကီၢ် တၢ်ပြၢ အဆိကတၢၢ်တဘျီ ဖဲ FIFA World Cup တၢ်ပြၢရှူဟးထီၣ်အပတီၢ် ဖဲလၢအဝဲသ့ၣ်ရှူတ့ၢ်ဝဲ Italy ဖဲ ၂ဝဝ၆နံၣ် ဒီး ပှၤဖျိးစိ—ခၠၣ်ပံယၣ် Argentina ဖဲ ၂ဝ၂၂နံၣ် ဝံၤအလီၢ်ခံန့ၣ်လီၤ.
ပှၤလိာ်ကွဲဖျၢၣ်ထူဖဲတၢ်ခၢၣ်သးအပတီၢ် Ajdin Hrustic စံးဝဲဒၣ် ကရူၢ်အံၤ မၤန့ၢ်ဝဲ တၢ်မၤလိလုၢ်ဒိၣ်ပှ့ၤဒိၣ် ဖဲအဝဲသ့ၣ်ရှူ ကီၢ်အမဲရကၤဖျၢၣ်ထူကရူၢ် ၂—ဝ ကိ အပူၤ ဒီး အိၣ်ကတီၤအသးလၢ တၢ်တာ်တၢ် တဘျီအံၤအဂီၢ်လံန့ၣ်လီၤ.
“လၢတၢ်လိာ်ကွဲစးထီၣ်အခီၣ်ထံးဖဲအစဲးကီးအတီၢ်ပူၤလံန့ၣ် ပကဘၣ်အိၣ်တဲာ်ကတီၤပသးဒီးမၤအီၤနီၣ်ကီၢ်. ဒီးယဆိကမိၣ်န့ၣ်တၢ်အဝဲအံၤမ့ၢ်တၢ်လၢပသ့ၣ်ညါဘၣ်က့ၤအီၤန့ၣ်လီၤ. ပလဲၤခီဖျိဘၣ်တၢ်ဒ်အံၤအဃိယသးခုတမံၤ. တမ့ၢ်ယတဲလၢ အခီၣ်ထံးတကူာ်န့ၣ် အတဂ့ၤဘၣ်ဒု တမ့ၢ်ဘၣ်. တၢ်လၢအဲၣ်ဒိးတဲအီၤန့ၣ်မ့ၢ်ဝဲ လၢပဂီၢ်န့ၣ် မ့ၢ်တၢ်လိာ်ကွဲတကူာ်လၢအကီမး, မ့ၢ်ဝဲဖဲပမၤလိန့ၢ်တၢ်တခါခါ, ဒီးဟံးန့ၢ်အီၤလၢအဂ့ၤခီတက့. ပဟးထီၣ်ဝံၤဒီး ပလိာ်ကွဲပြၢကဒါဒီး Paraguay, လၢတန့ၢ်လိာ်သးကိနီတဖျၢၣ်ဘၣ် ဒီး ယဆိမိၣ်န့ၣ် မ့ၢ်တၢ်ပြၢလၢ အဂ့ၤတခါန့ၣ်လီၤ.”
Socceroos ကဘၣ်ထူဒီး Egypt ဖဲမုၢ်ဘူၣ်—မုၢ်ဃုနံၤ ဂီၤခီ ဒီး စးထီၣ်လၢ ဂီၤခီ ၃နၣ်ရံၣ်န့ၣ် SBS ဒီး SBS On Demand ကစးထီၣ်ဒုးနဲၣ်အီၤတဘျီဃီန့ၣ်လီၤ.
———
မ့မ့ၢ်ဖဲ FIFA World Cup —တၢ်ပြၢလၢတၢ်ကလိာ်ကွဲအီၤဖဲ မုၢ်လ့ၢ်ဧိၤ—မုၢ်လွံၢ်နံၤ ဒ်သိး တၢ်ပြၢ ၂၁ သီတသီအနံၤအပူၤန့ၣ်, England ကဘၣ်ထူပြၢဒီး DR Congo, Belgium ကဘၣ်ထူပြၢဒီး Senegal န့ၣ်လီၤ.
မ့မ့ၢ်လၢ FIFA World Cup တၢ်လိာ်ကွဲပြၢအဟံၣ်ကစၢ် ကီၢ်အမဲရကၤန့ၣ် ကဘၣ်ထူပြၢဝဲဒီး Bosnia ဒီး Herzegovina ဖျၢၣ်ထူကရူၢ်န့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၂ဝ သီတသီအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
