အီစထြ့လယါကီၢ်ဒီဘ့ၣ် ပှၤမုာ်သးမၤကလီအကွဲၢ်အါမး မၤလၤကပီၤ တနံၣ်တဘျီ ထံကီၢ်ဒီဘ့ၣ်တၢ်မုာ်သးမၤကလီအနွံ

ဖဲတနွံအံၤန့ၣ် အီစထြ့လယါကီၢ်ဒီဘ့ၣ်အပူၤ မုာ်သးမၤကလီပှၤမၤတၢ်ဖိ အကကွဲၢ်အါမး မၤလၤကပီၤဝဲဒၣ် တနံၣ်တဘျီ ထံကီၢ်ဒီဘ့ၣ်တၢ်မုာ်သးမၤကလီအနွံ—National Volunteer Week, အဝဲသ့ၣ်ဟ့ၣ်နီၤလီၤအတၢ်သးဖှံ ခီဖျိလၢ အမၤစၢၤ ဟ့ၣ်ဆၢက့ၤဘၣ်တၢ်ဖဲအဝဲသ့ၣ် အနီၣ်ကစၢ်ဒၣ်ဝဲ ပှၤတဝၢသ့ၣ်တဖၣ်အပူၤအဃိန့ၣ်လီၤ. တနံၣ်အံၤ ထံကီၢ်ဒီဘ့ၣ် တၢ်မုာ်သးမၤကလီ အနွံ အခိၣ်တီန့ၣ်မ့ၢ်ဝဲ 'Your Year to Volunteer', လၢအမ့ၢ် တၢ်ဟ့ၣ်လၤကပီၤ ပှၤမုာ်သးမၤလီတၢ်ဖိ အတၢ်ဖံးတၢ်မၤသ့ၣ်တဖၣ်ဒီး ဃ့ထီၣ်စ့ၢ်ကီးဝဲလၢ ပှၤကညီသ့ၣ်တဖၣ် ကနုာ်လီၤမၤစၢၤ မုာ်သးမၤကလီတၢ်အါထီၣ်န့ၣ်လီၤ.

---

ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn

ဖဲမုၢ်ဆါခီအဆၢကတီၢ်န့ၣ်, Gary Patni မ့ၢ်ပှၤတဂၤလၢအမၤတၢ်မၤဒ်သိး ပှၤသုးကျဲတၢ်လၢ တၢ်ဟ့ၣ်ကူၣ်ဟ့ၣ်ဖးတၢ်အဂီၢ်တဂၤ, ဒီးအဝဲနုာ်လီၤမၤစ့ၢ်ကီး မုာ်သးမၤကလီတၢ်မၤ ဖဲဆ့ၣ်ဒနံၤန့ၣ်အိၣ်လံအနံၣ်သၢဆံဘျဲၣ်လံ, အဝဲအတၢ်မုာ်သးမၤလီတၢ်ဖံးတၢ်မၤသ့ၣ်တဖၣ်န့ၣ် ပၣ်ဃုာ်ဒီးတၢ်မၤစၢၤ ကလုာ်ဒူၣ်ဆဲးလၤအါကလုာ်အပှၤတဝၢ တၢ်ကရၢကရိရဲၣ်ကျဲၤ ပှၤတဝၢ တၢ်မၤဘူၣ်မူးပွဲသ့ၣ်တဖၣ် ဒီး တၢ်ရဲၣ်သဲကတီၤက့ၤ ခိၣ်ဃၢၤန့ဆၢၣ် ဖဲသ့ၣ်ပှၢ်ပျံၤကွီၤ အပူၤသ့ၣ်တဖၣ်န့ၣ်လီၤ.

အဝဲအမိအပါန့ၣ် ဟဲန့ၢ်လၢ ကီၢ်အ့ဒံယါဒီး အဝဲသ့ၣ်န့ၣ် ဟဲသုးအိၣ်ဖဲအီစထြ့လယါဖဲ အဝဲသ့ၣ်အိၣ်ဘှံးကွံာ်လၢတၢ်ဖံးတၢ်မၤလံအဃိ, Mr Patni သ့ၣ်ညါပလီၢ်ဘၣ်ဝဲလၢ အမိၢ်န့ၣ် တူၢ်ဘၣ်ဝဲ တၢ်အိၣ်လီၤဖျဲၣ်လီၤဟိ အိၣ်သယုၢ်သတွး, ဒီး ဟးဃုဝဲဒၣ်အတံၤသကိးပှၤကညီလၢအသးနံၣ်ထဲသိးထီၣ်အီၤသ့ၣ်တဖၣ်န့ၣ်လီၤ.

“ဖဲအံၤန့ၣ်ပအိၣ်ဒီးတၢ်ကီတၢ်ခဲနီၣ်ကီၢ်တမံၤ, လၢအမ့ၢ်ဝဲဒၣ် ဖဲအီစထြ့လယါကီၢ်ပူၤအံၤ ပှၤသူက့သးပှၢ်သ့ၣ်တဖၣ်န့ၣ် အဝဲသ့ၣ်အဂီၢ် မုၢ်ကျိၤဝဲၤကွာ် တၢ်ဃုထၢအကျဲလၢ အကဟ့ၣ်လီၤအဝဲသ့ၣ် တၢ်ဘျးစဲဒီး ပှၤကရၢကရိန့ၣ်အတအိၣ်ဘၣ်.”

ခီဖျိလၢအဝဲအမိၢ်တၢ်လဲၤခီဖျိအံၤအဃိ, Mr Patni ဒုးအိၣ်ထီၣ်ဝဲ တၢ်ဟူးတၢ်ဂဲၤအသီတခါ ဒ်အမ့ၢ် တၢ်မၤစၢၤ ပှၤသူၣ်က့သးပှၢ် လၢအအိၣ်ထဲတဂၤသ့ၣ်တဖၣ် ကကဲထီၣ်ဝဲ တံၤသကိး ပှၤအိၣ်တပူၤဃီဖဲ ဒၢးတဖျၢၣ်ဃီအပူၤန့ၣ်လီၤ.

Mr Patni ဒုးအိၣ်ထီၣ်ဝဲ တၢ်အိၣ်နီၤလီၤသကိးဟံၣ်ဃီ အတၢ်ရဲၣ်တၢ်ကျဲၤ န့ၢ်ဝဲတဘျုးဟံၣ်, လၢအမၤခီဖျိဝဲဖဲ ကမျၢၢ်တၢ်ဆဲးကျိးတဝၢဒီး ပှၤတဝၢ အပှာ်ယဲၤသ့ၣ်တဖၣ်န့ၣ်လီၤ.

အတၢ်ရဲၣ်ကျဲၤန့ၣ် ပှၤအိၣ်ဖှိၣ်သကိးဟံၣ်တဖျၢၣ်ဃီ, ဒၢးတဖျၢၣ်ဃီအံၤ ပၣ်ဃုာ်ဝဲဒီး တၢ်ဒုးအိၣ်ဆိးသကိးတပူၤဃီဝဲဒၣ် မုၢ်ကမဲသးပှၢ်တဂၤလၢအသးနံၣ်အိၣ် ၈ဝနံၣ်ဒီး ကသံၣ်သရၣ်မုၣ် နၢးစ် တဂၤ လၢအသးနံၣ်အိၣ် ၆ဝနံၣ်န့ၣ်လီၤ.

“ဒ်သိးကမၤလီၤတံၢ်လၢ ဟံၣ်တဖျၢၣ်န့ၣ် အကအိၣ်ဝးတရံးအသးဒ်သိးဟံၣ်ဃီတဖျၢၣ်အသိးအဂီၢ် ပှၤမုာ်သးမၤကလီတၢ်အဂုၤအဂၤဒ်သိးယၤသ့ၣ်တဖၣ် မၤစၢၤတၢ်အိၣ်ဝဲန့ၣ်လီၤ.”

အဝဲအတၢ်ရဲၣ်တၢ်ကျဲၤအံၤ ခဲကနံၣ်အံၤ ကဲထီၣ်ဝဲဒၣ် အီစထြ့လယါကီၢ် မုာ်သးမၤကလီ ပှာ်ယဲၤ အတၢ်မၤတခါ လၢအဘၣ်တၢ်မၤလၤကပီၤအီၤဖဲတနွံအံၤ ထံကီၢ်ဒီဘ့ၣ် တၢ်မုာ်သးမၤကလီအနွံ အံၤန့ၣ်လီၤ.

တၢ်မၤလၤကပီၤအခိၣ်တီလၢအမ့ၢ် 'Your Year to Volunteer' အံၤ, မ့ၢ်ဝဲတနံၣ်တဘျီ တၢ်မၤလၤကပီၤအမူးလၢ အဟ့ၣ်ဂံၢ်ဟ့ၣ်ဘါ ပှၤအီစထြ့လယါသ့ၣ်တဖၣ် ကနုာ်လီၤဖဲ တၢ်မၤမုာ်သးမၤကလီ တၢ်ဖံးတၢ်မၤသ့ၣ်တဖၣ်အပူၤ, ဒီး ဟ့ၣ်နီၤလီၤဝဲ တၢ်ဃဲၤပူ တၢ်ဂ့ၢ်တၢ်ကျိၤ ဘၣ်ဃး တၢ်ရဲၣ်တၢ်ကျဲၤ လၢအဘၣ်တၢ်ဒုးအိၣ်ထီၣ်ဒီးမၤအီၤဒ်သိး တၢ်မုာ်သးမၤကလီ တၢ်ဖံးတၢ်မၤ သ့ၣ်တဖၣ်အသိးန့ၣ်လီၤ.

ထံကီၢ်အံၤအပူၤ တၢ်မုာ်သးမၤကလီကရူၢ်အဒိၣ်ကတၢၢ်သ့ၣ်တဖၣ်အကျါတခါန့ၣ်မ့ၢ်ဝဲ ခိခိၣ်ဒူသဝီမ့ၣ်အူဝဲၤကျိၤ — Rural Fire Service, လၢအကရၢဖိအိၣ်အါန့ၢ်အဂၤ နွံကလး (၇ဝ,ဝဝဝ) န့ၣ်လီၤ.

Scott Campbell မ့ၢ်ဝဲ နယူဆီၣ်သ်ဝံ ခိခိၣ်ဒူသဝီမ့ၣ်အူကရၢ (New South Wales Rural Fire Association) အကရၢခိၣ်တဂၤန့ၣ်လီၤ.

“ပှၤအါဒံအါဂၤန့ၣ် ဆိကမိၣ်ဒံးဝဲလၢ ပမ့ၢ်ဒၣ်ထဲ ပှၢ်မ့ၣ်အူဝဲၤကျိၤဝဲၤဒ့သ့ၣ်တဖၣ်, နာ်သက့ နီၣ်နီၣ်န့ၣ်မ့ၢ်ဝဲတၢ်တခါလၢအဒိၣ်န့ၢ်ဒ်လၢ တၢ်အံၤန့ၣ်လီၤ. ပမၤတၢ်မၤ ၂၄နၣ်ရံၣ်, နွံသီပှဲၤပှဲၤဒီး ပမၤဝဲဒၣ်ဒီတနံၣ်ကျၢၤ အသီ ၃၆၅ သီ, တဘျီလၢ်လၢ်ဖဲသိလ့ၣ်ဘၣ်ထံးလိာ်သးအခါမ့ၢ်ဂ့ၤ, ဟံၣ်မ့ၣ်အူအီၣ်မ့ၢ်ဂ့ၤ, ပှၢ်တပှီၤမ့ၣ်အူအီၣ်တၢ်ကဲထီၣ်မ့ၢ်ဂ့ၤန့ၣ် ပလဲၤမၤစၢၤဝဲတၢ်န့ၣ်လီၤ.”

စးထီၣ်ဖဲ အပူၤကွံာ်စှၤကိးနံၣ် အတီၢ်ပူၤန့ၣ် ခီဖျိလၢ တၢ်အိၣ်ဆိးအပှ့ၤဒိၣ်ထီၣ်ကွ့ၢ်ကွ့ၢ်အဃိ မုာ်သးမၤကလီ အကရၢဖိသ့ၣ်တဖၣ် လီၤစှၤဝဲဒၣ်န့ၣ်လီၤ.

နာ်သက့ အခဲအံၤန့ၣ် ပှၤကညီသ့ၣ်တဖၣ် ဟဲက့ၤ မၤကဒါက့ၤဝဲ တၢ်မုာ်သးမၤကလီ တၢ်ဖံးတၢ်မၤတဘျီကဒီး မ့ၢ်လၢအဝဲသ့ၣ်ထံၣ်လၢ တၢ်ဟူးတၢ်ဂဲၤန့ၣ် အကဲဝဲ တၢ်ဖံးတၢ်မၤတခါစ့ၢ်ကီးအဃိန့ၣ်လီၤ.

ဖဲ Volunteering Australia တၢ်ပာ်ဖှိၣ်နီၣ်ဂံၢ်နီၣ်ဒွးအပူၤန့ၣ်, ၂ဝ၂၅နံၣ်အတီၢ်ပူၤန့ၣ်, ပှၤအီစထြ့လယါဖိ ခွံဂၤ အကျါ တဂၤန့ၣ် နုာ်လီၤမၤဝဲ မုာ်သးမၤကလီတၢ်ဖံးတၢ်မၤ ဒီးအဝဲသ့ၣ်တဖၣ်အတၢ်မုာ်သးမၤကလီတၢ်မၤအနၣ်ရံၣ်န့ၣ်, တနံၣ်အတီၢ်ပူၤအိၣ်အါန့ၢ် အကကွဲၢ် ၆ဝဝ နၣ်ရံၣ်န့ၣ်လီၤ.

မ့ၢ်ထိၣ်ဒီးအပူၤကွံာ်လၢညါ ၂ဝ၂ဝနံၣ် အတီၢ်ပူၤအခါန့ၣ် ပှၤအီစထြ့လယါဖိသ့ၣ်တဖၣ် အတၢ်နုာ်လီၤမၤ မုာ်သးမၤကလီ တၢ်ဖံးတၢ်မၤ နၣ်ရံၣ်န့ၣ် တနံၣ်အိၣ်ဝဲ အကကွဲၢ် ၄၉ဝ နၣ်ရံၣ်န့ၣ်လီၤ.

Mark Pearce မ့ၢ်ဝဲ Volunteering Australia ကရၢခိၣ်တဂၤန့ၣ်လီၤ.

“တၢ်ဃံးတၢ်စ့ၤသ့ၣ်တဖၣ်မ့ၢ်အိၣ်ထဲလဲၣ်ဘၣ်ဆၣ်, တၢ်လၢအတြီပှၤလၢပကနုာ်လီၤ မၤမုာ်သးမၤကလီတၢ်ဖံးတၢ်မၤဖဲပှၤတဝၢအပူၤသ့ၣ်တဖၣ် မ့ၢ်အိၣ်ထဲလဲၣ်ဘၣ်ဆၣ်နာ်သက့န့ၣ်, ပှၤမုာ်သးမၤကလီတၢ်ဖိအနီၣ်ဂံၢ်သ့ၣ်တဖၣ်, ပှၤလၢအနုာ်လီၤမၤမုာ်သးမၤကလီတၢ်အနီၣ်ဂံၢ်သ့ၣ်တဖၣ်န့ၣ်အဂံၢ်ဆူၣ်ထီၣ်ကွ့ၢ်ကွ့ၢ်အဃိ, ကဲထီၣ်ဝဲတၢ်မၤစၢၤန့ၣ်လီၤ.”

Mr Pearce ဟ့ၣ်ဂံၢ်ဟ့ၣ်ဘါဝဲဒၣ်ပှၤအီစထြ့လယါဖိသ့ၣ်တဖၣ်လၢကနုာ်လီၤပၣ်ဃုာ်ဖဲ မုာ်သးမၤကလီတၢ်ဖံးတၢ်မၤန့ၣ်လီၤ.

“လဲၤနုာ်လီၤကွၢ်အီၤဖဲ Go Volunteer မ့တမ့ၢ် Seek Volunteer သ့ၣ်တဖၣ်အပူၤန့ၣ်, ဒီးဖဲန့ၣ်, န့ၣ် နကထံၣ်ဘၣ်ဝဲတၢ်ခွဲးတၢ်ယာ်သ့ၣ်တဖၣ်, ဖဲနဟီၣ်ကဝီၤအပူၤ, ဒီး ဟီၣ်ကဝီၤလၢ နသးစၢၢ်ဆၢမၤအီၤအပူၤန့ၣ်လီၤ. လၢန့ၣ်အမဲာ်ညါ နဆဲးကျိးမၤစၢၤတၢ်ဖဲ နကီၢ်စဲၣ်ဒီး ကဝီၤဒိၣ်တၢ်ပၢ မုာ်သးမၤကလီ ကရၢမိၢ်ပှၢ်စ့ၢ်ကီးသ့ဝဲဒၣ်, နကိးလီတဲစိဖဲအဝဲသ့ၣ်အအိၣ်သ့, ဒီး အဝဲသ့ၣ် ကဟ့ၣ်လီၤနၤ တၢ်ခွဲးတၢ်ယာ်အါအါဂီၢ်ဂီၢ် ဒီး နကဘၣ်နုာ်လီၤမၤအီၤဒ်လဲၣ်တဆီဘၣ်တဆီန့ၣ် အဝဲသ့ၣ် ကနဲၣ်နၤအကျိၤအကျဲသ့ၣ်တဖၣ်န့ၣ်လီၤ.”