ဖဲနွံကတၢၢ်အတီၢ်ပူၤ ပှၤလၢအပာ်ဖျါထီၣ်တၢ်ထီဒါသ့ၣ်တဖၣ် ကွံာ်ဝဲပၢၤကီၢ်ဒီး လၢၢ်ဒီးပလီလၢအအိၣ်ဒီး မဲာ်ကလာ်က့သ့ၣ်တဖၣ်ဝံၤအလီၢ်ခံ တၢ်သံကွၢ်အိၣ်ထီၣ်ဒီး တၢ်ပူၤဖျဲးဖဲမဲလ်ဘၢဝ့ၢ်ကျဲဖီခိၣ်သ့ၣ်တဖၣ်န့ၣ်လီၤ. ဖဲမုၢ်ဒဲး—မုၢ်ခီၣ်ထံးနံၤ တၢ်ပာ်ဖျါထီၣ်တၢ်ထီဒါအကတီၢ် ပၢၤကီၢ်ဘၣ်ဒိဘၣ်ထံးခံဂၤဝံၤအလီၢ်ခံ ဝံးထိရံယါပၢၤကီၢ် မုၢ်လၢ်လၢကဖီၣ်အါထီၣ်ဝဲ ပှၤမၤကမၣ်တၢ်သ့ၣ်တဖၣ်န့ၣ်လီၤ.
တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
ဖဲနွံကတၢၢ်အခါန့ၣ် ပၢၤကီၢ် ပှၤဘၣ်မူဘၣ်ဒါသ့ၣ်တဖၣ် ဘၣ်လဲၤဆူ မဲလ်ဘၢဝ့ၢ်ခၢၣ်သးအပူၤ မ့ၢ်လၢပှၤလၢအထီဒါ ပှၤသုးလီၢ်အိၣ်ဆိးသ့ၣ်တဖၣ် လဲၤထီၣ်ပာ်ဖှိၣ်ထီၣ်သးဖဲဝ့ၢ်ပူၤ ဒီးတကတီၢ်ဃီန့ၣ် ပှၤလၢအထီဒါကဒါက့ၤအီၤ လၢအပာ်ဖျါထီၣ်တၢ်ထီဒါသ့ၣ်တဖၣ် လဲၤထီၣ်ပာ်ဖှိၣ်ထီၣ်စ့ၢ်ကီးအသးအဃိန့ၣ်လီၤ.
နာ်သက့ တၢ်သဘံၣ်သဘုၣ်ကဲထီၣ်ဝဲဒၣ် ဖဲလၢပၢၤကီၢ်ပာ်လီၤအါထီၣ် တၢ်တြီတံာ်တၢ်အဒူၣ်သ့ၣ်တဖၣ် ဒ်သိးလၢအကပာ်ယံၤထီၣ်ဝဲ ပှၤခံဖုလၢအပာ်ဖျါထီၣ်တၢ်ထီဒါအံၤန့ၣ်လီၤ.
ခီဖျိလၢ တၢ်သဘံၣ်သဘုၣ်ကဲထီၣ်အဃိ ပၢၤကီၢ်ပှၤဘၣ်မူဘၣ်ဒါခံဂၤ ဘၣ်ထီၣ်တၢ်ဆါဟံၣ် မ့ၢ်လၢတၢ်ကွံာ်အဝဲသ့ၣ်ဒီးလၢၢ်ဒီး ပလီလၢအပၣ်ဃုာ်ဒီးမဲာ်ကလာ်က့ဒီး တၢ်သူတၢ်သၣ်လၢအုၣ်သ့ၣ်တဖၣ်အဃိန့ၣ်လီၤ.
ဝံးထိရံယါကီၢ်စဲၣ်ခိၣ် Jacinta Allan ပဲၤအၢဝဲဒၣ် တၢ်မၤတၢ်စုဆူၣ်ခီၣ်တကးအံၤဒီးစံးဝဲလၢ တၢ်ဒ်အံၤန့ၣ် တၢ်ဝံသးစူၤအီၤအလီၢ်တအိၣ်ဘၣ်န့ၣ်လီၤ.
ပိာ်မုၣ်လၢအသးနံၣ်အိၣ် ၃ဝနံၣ်တဂၤ ဘၣ်တၢ်ဖီၣ်အီၤဖဲတၢ်ကဲထီၣ်သးပျီပူၤဒီး ဘၣ်တၢ်လိာ်ဘၢလိာ်ကွီၣ်အီၤဒီးတၢ်မၤထီဒါပၢၤကီၢ် နာ်သက့ ပၢၤကီၢ်စံးလၢ အဝဲသ့ၣ် ကဖီၣ်ဒုးဃာ်အါထီၣ်ဒံးဝဲဒၣ်ပှၤလၢအမၤကမၣ်တၢ်သ့ၣ်တဖၣ်န့ၣ်လီၤ.
ပၢၤကီၢ်စံးဝဲဒၣ် ခဲကနံၣ်အံၤန့ၣ် အဝဲသ့ၣ် ဟးကွၢ်ဃုဝဲဒၣ် ပှၤအဂၤ ၂ဝ လၢအမ့ၢ်ပှၤလၢ အမူဒါအိၣ်လၢ တၢ်မၤတၢ်စုဆူၣ်ခီၣ်တကးကဲထီၣ်အသးတဘျီအံၤန့ၣ်လီၤ.
ဝံးထိရံ ပှၤထီဒါတၢ်ကရၢအခိၣ် Brad Battin စံးဝဲဒၣ် တၢ်ပာ်ဖျါထီၣ်တၢ်ထီဒါအံၤ မ့ၢ်ဝဲခူပူၤဝ့ၢ်ပူၤတၢ်ဘၣ်သဂၢၢ်ဒီး တၢ်သဘံၣ်သဘုၣ်န့ၣ်လီၤ.
အဝဲဃ့ထီၣ်ဝဲဒၣ် ပှၤတဂၤလၢ်လၢ်လၢအတၢ်ကမၣ်မ့ၢ်အိၣ်လၢ အမၤဆူးမၤဆါပၢၤကီၢ်န့ၣ် တမၤတသ့ တၢ်ကဘၣ်ဟ့ၣ်လီၤအီၤတၢ်ကမၣ် ဒီး ပၢနုာ်အီၤဆူဃိးပူၤဃုလါန့ၣ်လီၤ.
