ဖဲလါအ့ဖြ့ၣ် ၁သီအနံၤန့ၣ် ဘီမုၢ်စၢဖှိၣ်ကရၢ လၢအဃုထၢပာ်ဖှိၣ် ဟီၣ်ခိၣ်ဟူး အတၢ်ဘၣ်ဒိဘၣ်ထံးဖဲကီၢ်ပယီၤအပူၤ ဟ့ၣ်သဆၣ်ထီၣ်ဝဲ ဟီၣ်ခိၣ်ဒီဖျၢၣ်အပှၤတဝၢသ့ၣ်တဖၣ်လၢ ကမၤဆူၣ်ထီၣ် မၤချ့ထီၣ် တၢ်တိစၢၤမၤစၢၤသ့ၣ်တဖၣ် တချုးဖဲတၢ်စူၤခါတုၤလီၤဒ်ဘၣ်န့ၣ်လီၤ. ကီၢ်ပယီၤပူၤဟီၣ်ခိၣ်ဟူးအဃိ ခဲကနံၣ်အံၤ ပှၤသံအနီၣ်ဂံၢ်အိၣ်လံ ၂,၇၁၉ ဂၤဒီး တၢ်သံတၢ်ပှၢ်အနီၣ်ဂံၢ်အံၤ တၢ်တယာ်လၢ အကလၢကွံာ် ၃,ဝဝဝန့ၣ်လီၤ.
တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
မ့ၢ်လၢတၢ်သူၣ်ထီၣ်, ကျဲမုၢ်ဒီး တိၤ သ့ၣ်တဖၣ်ဘၣ်ဒိဘၣ်ထံးဒိၣ်ဒိၣ်မုၢ်မုၢ်အဃိ ဖဲ Reuters တၢ်ကစီၣ် အတၢ်ပာ်ဖျါအပူၤန့ၣ် ဘီမုၢ်စၢဖှိၣ်ကရၢ တစိၢ်တလီၢ် ပှၤဂ့ၢ်ဝီတၢ်မၤစၢၤဒီးလီၢ်ကဝီၤမူဒါခိၣ် Marcoluigi Corsi, စံးဝဲဒၣ်, ထံအိ, တၢ်မၤတၢ်ကဆှဲကဆှီတၢ်ဖိတၢ်လံၤပီးလီ, တၢ်အီၣ်တၢ်အီ, လီၢ်အိၣ်ကဒုဒီး ကသံၣ်ကသီသ့ၣ်တဖၣ်န့ၣ် မ့ၢ်ဝဲဂ့ၢ်ဂီၢ်အူအတၢ်လိၣ်ဘၣ်သ့ၣ်တဖၣ်န့ၣ်လီၤ. အဝဲစံးတၢ်ဒ်အံၤ ဖဲလၢအလဲၤလီၤကွၢ်ဟီၣ်ခိၣ်ဟူးတၢ်အိၣ်သးခံသီဝံၤအလီၢ်ခံန့ၣ်လီၤ.
ဘီမုၢ်စၢဖှိၣ်ကရၢအပှၤကတိၤတၢ်ပၢ Stephane Dujarric စံးဝဲဒၣ်, “ဒ်သိးတၢ်မၤစၢၤတဖၣ်ကတုၤဃီၤဆူ ကီၢ်ပယီၤအပူၤ ပှၤလၢအလိၣ်ဘၣ်တၢ်တိစၢၤမၤစၢၤသ့ၣ်တဖၣ်အအိၣ်အဂီၢ် ပအိၣ်ဒီးတၢ် ပာ်သးကျၢၤမုဆှုလၢကဟ့ၣ်လီၤမၤစၢၤအီၤန့ၣ်လီၤ. တချုးလၢ တၢ်စူၤခါတုၤလီၤဒ်ဘၣ်န့ၣ် တၢ်ဟ့ၣ်မၤစၢၤသ့ၣ်တဖၣ် ပဘၣ်မၤအီၤချ့ချ့, ခီဖျိလၢတၢ်စူၤခါန့ၣ် ကမၤနးဒိၣ်ထီၣ် တၢ်နးတၢ်ဖှီၣ်အံၤအဃိန့ၣ်လီၤ.”
တချုးဒ်ဖဲလၢဟီၣ်ခိၣ်ဟူးဖးဒိၣ်ကဲထီၣ်ဒ်ဘၣ်န့ၣ် ထံလီၢ်ကီၢ်ပူၤတၢ်ဒုးတၢ်ယာ်အဃိ ကီၢ်ပယီၤအပူၤ ထံလီၢ်ကီၢ်ပူၤ ပှၤသုးလီၢ်အိၣ်ဆိး ပှၤဘၣ်ကီဘၣ်ခဲသ့ၣ်တဖၣ်အိၣ်အါန့ၢ် အဂၤ ၃ကကွဲၢ်န့ၣ်လီၤ. မ့ၢ်လၢတၢ်အိၣ်သးသ့ၣ်တဖၣ်အံၤအဃိ ဘီမုၢ်စၢဖှိၣ်ကရၢ ခၢၣ်စးလီၤဆီလၢကီၢ်ပယီၤအဂီၢ် Julie Bishop ဟ့ၣ်သဆၣ်ထီၣ်ဝဲ ပှၤကိးဖုကိးကပၤဒဲး လၢအကပတုာ်ကွံာ်တၢ်ဒုးတၢ်ယာ်, ဟ့ၣ်လီၤခွဲးလၢ တၢ်ကလဲၤနုာ်လီၤမၤစၢၤ ပှၤဂ့ၢ်ဝီတၢ်လိၣ်ဘၣ်သ့ၣ်တဖၣ်ဒီး ပှၤဟ့ၣ်လီၤတၢ်မၤစၢၤ အပှၤမၤတၢ်ဖိသ့ၣ်တဖၣ်အဂီၢ်န့ၣ် တၢ်ပူၤဖျဲးကဘၣ်အိၣ်ဝဲလၢလၢပှဲၤပှဲၤန့ၣ်လီၤ.
ပှၤစိာ်စုကဝဲၤလၢအထီဒါပယီၤသုးမီၤစိရိၤသ့ၣ်တဖၣ် ပၣ်တၢ်ကမၣ်ဝဲဒၣ်ပယီၤသုးလၢအမၤဝဲတၢ်လဲၤခးလီၤတၢ်ဒီးကဘီယူၤဖဲကလုာ်ဒူၣ်တၢ်လီၢ်တနီၤအပူၤ ကတီၢ်ဖဲလၢဟီၣ်ခိၣ်ဟူးကဲထီၣ်အဆၢကတီၢ်န့ၣ်လီၤ. ဒ်သိး တၢ်နိးတၢ်ဘျာ်သုတကဲထီၣ်ဒီး တၢ်မၤပူၤဖျဲးပှၤသးသမူဒီး တၢ်မၤစၢၤအတၢ်ဖံးတၢ်မၤသ့ၣ်တဖၣ်အဂီၢ် ပှၤစိာ်စုကဝဲၤသိၣ်မှံၤကရူၢ်ဖးဒိၣ်သ့ၣ်တဖၣ် ဘိးဘၣ်သ့ၣ်ညါလီၤဝဲလၢ အဝဲသ့ၣ်ကပတုာ်ဃာ် တၢ်ဒုးတၢ်ယာ်သ့ၣ်တဖၣ်တစိၢ်တလီၢ်န့ၣ်လီၤ.
ခဲကနံၣ်အံၤ ထံဂုၤကီၢ်ဂၤ တၢ်မၤစၢၤသ့ၣ်တဖၣ် လဲၤတုၤဝဲဒၣ်ဆူကီၢ်ပယီၤအပူၤကယီယီလံန့ၣ်လီၤ.
