တၢ်အိၣ်ခိးကွၢ် နီၣ်ဂံၢ်နီၣ်ဒွးအတၢ်အိၣ်သး ဘူးဘူးတံၢ်တံၢ်ဒ်သိး တၢ်အိၣ်ခိးကွၢ်နီၣ်ဂံၢ်နီၣ်ဒွး လၢအဘၣ်ထွဲဒီး ဟံၣ်ဃီဂ့ၢ်ဝီအံၤန့ၣ် ဘၣ်သ့ၣ်အတအိၣ်ဘၣ်.
ဖဲတၢ်ပဲၤဖးနီၤဖး ဟံၣ်ဃီဂ့ၢ်ဝီ, Cotality ကရၢ အတၢ်ပာ်ဖျါအသီလၢအဘၣ်ဃးဒီး ဟံၣ်ဃီတၢ်ပာ်ကီၤအနီၣ်ဂံၢ်နီၣ်ဒွးသ့ၣ်တဖၣ် ဟ့ၣ်လီၤဝဲ တၢ်အုၣ်ကီၤလၢအဘၣ်ဃး အီစထြ့လယါကီၢ်ဟံၣ်ဃီတၢ်ဆါတၢ်ပှ့ၤအဖၠါ တၢ်အိၣ်သးန့ၣ်လီၤ.
အဝဲသ့ၣ်တၢ်ပာ်ကီၤနီၣ်ဂံၢ်နီၣ်ဒွးအသီ လၢအစးထီၣ်အသးဖဲလါနိးဝ့ဘၢၣ်အပူၤန့ၣ် ဒုးနဲၣ်ဖျါအသးလၢ တုၤလီၤဖဲလါနိးဝ့ဘၢၣ်အပူၤန့ၣ် ထံကီၢ်ဒီဘ့ၣ်အပူၤ ဟံၣ်အလုၢ်အပှ့ၤသ့ၣ်တဖၣ်ဟဲအါထီၣ်ဝဲ တၢ မျးကယၤန့ၣ်လီၤ. ဟံၣ်ဃီအပှ့ၤလၢအအိၣ်ဖဲအကြၢးအဘၣ်န့ၣ်မ့ၢ်ဝဲ ဒီလၣ် ဃီးကလီၢ်ဘျဲၣ် လၢအမ့ၢ် ၈၈၈,၉၄၁ ဒီၣ်လၣ်န့ၣ်လီၤ.
ဘြံးစဘဲဝ့ၢ် ကဲထီၣ်ဝဲ နီၣ်ဂံၢ်ခံ အီစထြ့လယါဝ့ၢ် လၢဟံၣ်ပှ့ၤဖဲအကြၢးအဘၣ်န့ၣ် ထီၣ်ဘးဝဲဒၣ် ဒီလၣ် တကကွဲၢ်န့ၣ်လီၤ.
Cotality ပှၤဃိထံသ့ၣ်ညါတၢ်အခိၣ် Eliza Owen စံးဝဲဒၣ် တၢ်နီၤဖးလီၤ တၢ်အလုၢ်အပှ့ၤစှၤ — လၢအမ့ၢ် ဟံၣ်ဃီလၢအပှ့ၤဘၣ် လၢပှၤပှ့ၤဟံၣ်အဆိကတၢၢ်တဖျၢၣ်သ့ၣ်တဖၣ် ပာ်တၢ်ပညိၣ်လီၤဖဲအလိၤသ့ၣ်တဖၣ် — မ့ၢ်တၢ်လၢအဒုးအါထီၣ်ဝဲနီၣ်ဂံၢ်နီၣ်ဒွးသ့ၣ်တဖၣ်အံၤန့ၣ်လီၤ.
“ဖဲအီစထြ့လယါကီၢ် ဟံၣ်ဃီတၢ်ဆါတၢ်ပှ့ၤဖၠါပူၤ ဟံၣ်ဃီလၢအလုၢ်အပှ့ၤဘၣ် လၢအအိၣ်ဖဲတၢ်ခံဒးကတၢၢ် ၂၅ မျးကယၤန့ၣ် ဒီတနံၣ်ညါအတီၢ်ပူၤ တုၤလီၤဖဲမုၢ်မဆါတနံၤအံၤန့ၣ် အပှ့ၤဟဲအါထီၣ် ဘူးထီၣ်လၢ ၉မျးကယၤဃၣ်ဃၣ် အဃိ, မ့ၢ်ထိၣ်သတြီၤဒီး တၢ်ဆါတၢ်ပှ့ၤဖၠါ အပှ့ၤလၢအထီကတၢၢ်န့ၣ် တၢ်အပှ့ၤအံၤဟဲအါထီၣ်ဝဲဒၣ် ဃုမျးကယၤန့ၣ်လီၤ. ပထံၣ်ဘၣ်စ့ၢ်ကီးလၢ ဘြံးစဘဲ, ဖၢးသ် ဒီး အဲးဒလ့းန့ၣ် ဆဲးမ့ၢ်ဝဲတၢ်လီၢ်လၢ ဟံၣ်ဃီအပှ့ၤဟဲဒိၣ်ထီၣ်ကွ့ၢ်ကွ့ၢ်န့ၣ်လီၤ. အပူၤကွံာ်တလါတခါ ဖၢးသ်န့ၣ်ဟံၣ်အပှ့ၤဟဲအါထီၣ်ဝဲဒၣ် ၂.၄မျးကယၤ, ဒီး ဖဲဒါဝ့ဝ့ၢ်စ့ၢ်ကီး တနံၣ်အံၤအတီၢ်ပူၤ ပထံၣ်ဘၣ်ဟံၣ်အပှ့ၤထီၣ်ချ့မး, လၢအထီၣ်ဘးတုၤဝဲဒၣ် ၁၇မျးကယၤန့ၣ်လီၤ.”
နီၣ်ဂံၢ်နီၣ်ဒွးတၢ်ပာ်ဖျါလၢ Cotality ပာ်ဖျါအီၤအပူၤန့ၣ် စံးဝဲဒၣ် ပှၤလၢနုာ်လီၤပၣ်ဃုာ်ဖဲ တၢ်ဘျၢနုာ်လီၤကျိၣ်စ့တၢ်ဆါတၢ်ပှ့ၤဟံၣ်ဃီအပူၤန့ၣ် အနီၣ်ဂံၢ်ဟဲအါထီၣ် ဒီး မ့မ့ၢ်ပှၤပှ့ၤဟံၣ်အဆိကတၢၢ်တဖျၢၣ်အနီၣ်ဂံၢ်နီၣ်ဒွးန့ၣ် စှၤလီၤဝဲဒၣ်, လၢအမ့ၢ်တၢ်တခါလၢ တၢ်ဃိထံသ့ၣ်ညါအဂုၤအဂၤ တၢ်ပာ်ဖျါသ့ၣ်တဖၣ် ထံၣ်ဘၣ်အီၤစ့ၢ်ကီးန့ၣ်လီၤ.
Greens ဘျီၣ်ဒိၣ်ထးခီခၢၣ်စး Barbara Pocock စံးဝဲဒၣ် လၢတၢ်နီၣ်ကီၢ်အပူၤန့ၣ် တၢ်အံၤအခီပညီမ့ၢ်ဝဲ, ပှၤအီစထြ့လယါ လၢအဘၣ်တၢ်ဆီၣ်ဖျိးကွံာ်အီၤလၢ တၢ်ဆါတၢ်ပှ့ၤဟံၣ်ဃီအချၢန့ၣ် ဟဲအါထီၣ်ကွ့ၢ်ကွ့ၢ် ဒီး တန့ၢ်ဘၣ်တၢ်ခွဲးတၢ်ယာ်လၢ အကပှ့ၤဘၣ် အဝဲသ့ၣ် အနီၣ်ကစၢ်ဒၣ်ဝဲအဟံၣ်ဘၣ်န့ၣ်လီၤ.
“ပထံၣ်ဘၣ်လၢ ဟံၣ်ဃီအပှ့ၤသ့ၣ်တဖၣ်န့ၣ် ထီၣ်ဝဲဒၣ်ကွ့ၢ်ကွ့ၢ် တဘျီဝံၤတဘျီ အဃိ မ့ၢ်ဝဲတၢ်ဆီၣ်ဖျိးကွံာ်တခါ လၢပှၤသူၣ်ဘီၣ်သးစၢ်သ့ၣ်တဖၣ် ပှ့ၤဟံၣ်တန့ၢ်ဘၣ်, ပိာ်မုၣ်လၢ အဲၣ်ဒိးဃ့ၢ်ပူၤဖျဲးကွံာ်အသးလၢ ဟံၣ်ဃီတၢ်ဆီၣ်တံၢ်မၤနၢၤအပူၤသ့ၣ်တဖၣ် ပှ့ၤဟံၣ်တန့ၢ်ဘၣ်. လ့ၢ်ဘၢၣ်ကရၢအံၤ ပၢနုာ်အါထီၣ်ဝဲ မ့ၣ်ဆၣ်ဖဲမ့ၣ်အူအကျါ လၢအမ့ၢ် မၤနးထီၣ်ဝဲဒၣ်တၢ်အိၣ်သးအံၤန့ၣ်လီၤ. အဝဲသ့ၣ် တၢ်မၤစၢၤ ဟ့ၣ်လိၢ်လီၤ တၢ်ပၢနုာ်လီၤပာ်စ့ ၅မျးကယၤ အတၢ်ရဲၣ်တၢ်ကျဲၤန့ၣ် မ့ၢ်တၢ်မၤအါထီၣ်ဝဲဒၣ်ဟံၣ်ဃီအပှ့ၤ ဒီး ကဲထီၣ်ဝဲ တၢ်တြီတံာ်လၢ ပှၤဟဲနုာ်လီၤဖဲတၢ်ဆါတၢ်ပှ့ၤအဖၠါပူၤ လၢအပှ့ၤဟံၣ်အဆိကတၢၢ်တဖျၢၣ်သ့ၣ်တဖၣ် ကထံၣ်သ့ၣ်ညါဘၣ် ဟံၣ်ဃီအလုၢ်အပှ့ၤလၢအဝဲသ့ၣ်ပှ့ၤအီၤန့ၢ်သ့ၣ်တဖၣ်န့ၣ်လီၤ.”
နာ်သက့ တၢ်မၤသးဒ်အံၤန့ၣ် အတမ့ၢ်ထဲလၢအဘၣ်ဃးဒီး ပဒိၣ်တၢ်ပာ်လီၤသနူသ့ၣ်တဖၣ်ဘၣ်. တၢ်အံၤမ့ၢ်စ့ၢ်ကီးဝဲဒၣ် စ့အ့ၣ်အနီၣ်ဂံၢ်နီၣ်ဒွး ဟဲအါထီၣ် အါမးအဃိန့ၣ်လီၤ.
Cotality စံးဝဲဒၣ် ဖဲ ၂ဝ၂၅နံၣ် တၢ်ထုးစှၤလီၤကွံာ် စ့အ့ၣ်အနီၣ်ဂံၢ်နီၣ်ဒွးန့ၣ် မၤစၢၤဝဲဒၣ် ဟံၣ်ဃီအလုၢ်အပှ့ၤ နွံမျးကယၤဘျဲၣ် လၢ၁၂လါအတီၢ်ပူၤ — ဒီး တၢ်ပာ်ဖျါနီၣ်ဂံၢ်နီၣ်ဒွး ဖဲတၢ်ဒိးန့ၢ်ဘၣ်အီၤလၢခံကတၢၢ် ဖဲလါနိးဝ့ဘၢၣ်အပူၤန့ၣ် မ့ၢ်ဝဲတၢ်ကဲခၢၣ်စးလၢ တလါတဘျီအဂီၢ်တၢ်ဆါတၢ်ပှ့ၤ လၢအဘဲးလီၤဝဲဒၣ် ခီဖျိလၢ ဟံၣ်ဃီအလုၢ်အပှ့ၤအံၤ ပှၤပှ့ၤတၢ်ဖိတနီၤအဂီၢ် ထီၣ်ဘးတုၤလၢ အဝဲသ့ၣ်ပှ့ၤအီၤန့ၢ် အနီၣ်ထိၣ်အပတီၢ်လံအဃိန့ၣ်လီၤ.
“တၢ်ဆါတၢ်ပှ့ၤဟံၣ်ဃီတၢ်စုလီၢ်ခီၣ်ခိၣ်အဖၠါအံၤမ့ၢ်ဝဲတၢ်လၢအပှ့ၤဒိၣ်မး. ယဆိကမိၣ်န့ၣ် တၢ်အံၤမ့ၢ်တၢ်ဂံၢ်တၢ်ဘါတကလုာ် ခီဖျိလၢ တၢ်ထုးစှၤလီၤကွံာ် စ့အ့ၣ်အနီၣ်ဂံၢ်နီၣ်ဒွးဖဲ ၂ဝ၂၅နံၣ်အတီၢ်ပူၤအဃိ အပူၤကွံာ် ၁၂လါအတီၢ်ပူၤန့ၣ် ဟံၣ်ဃီအလုၢ်အပှ့ၤ ဟဲအါထီၣ်က့ၤ နွံမျးကယၤဘျဲၣ်န့ၣ်လီၤ. နာ်သက့ အခဲအံၤန့ၣ် ပက့ၤတုၤကဒါက့ၤဖဲ တၢ်အိၣ်သးအပတီၢ်လၢ စ့အ့ၣ် အနီၣ်ဂံၢ်နီၣ်ဒွးန့ၣ် တကပတုာ်ဃာ်အီၤ တတီၤဖိန့ၣ်လီၤ. တၢ်ဃဲၤဖးအကျိၤသ့ၣ်တဖၣ်န့ၣ် စးထီၣ်ဟဲအိၣ်ဖျါထီၣ်ဝဲတစဲးဘၣ်တစဲးလံန့ၣ်လီၤ.”
Eliza Owen စံးဝဲဒၣ် ပှၤလၢအပှ့ၤဟံၣ်သ့ၣ်တဖၣ်, မ့ၢ်လၢဟံၣ်ဃီအပှ့ၤထီၣ်အဃိ တၢ်ဒီၣ်တဲာ်စှၤလီၤ စ့အ့ၣ်အနီၣ်ဂံၢ်နီၣ်ဒွး သၢဘျီ အတၢ်န့ၢ်ဘျုးန့ၢ်ဖှိၣ်သ့ၣ်တဖၣ်န့ၣ် အဝဲသ့ၣ်တဒိးန့ၢ်ဘၣ်. Cotality တယာ်ဝဲလၢ တၢ်ဒီၣ်တဲာ်စှၤလီၤစ့အ့ၣ်အနီၣ်ဂံၢ်နီၣ်ဒွးအံၤ မၤအါထီၣ်ဝဲဒၣ် တၢ်ဟံးလိၢ်စ့န့ၢ် အကံၢ်အစီ လၢတၢ်ပှ့ၤဟံၣ် လၢအပှ့ၤအိၣ်ဖဲအကြၢးအဘၣ်သ့ၣ်တဖၣ် — ဟံၣ်ဒူၣ်တဒူၣ် အတၢ်ဟဲနုာ်အဖီခိၣ်န့ၣ် ဃ့ၢ်လိၢ်စ့န့ၢ်အါထီၣ်ဝဲဒၣ် ဒီလၣ် ၅၅,ဝဝဝ, နာ်သက့ စးထီၣ်လၢ တၢ်ဒီၣ်တဲာ်စှၤလီၤစ့အ့ၣ်န့ၣ် မ့မ့ၢ်လၢဟံၣ်အလုၢ်အပှ့ၤတခီ ဟဲအါထီၣ်ဝဲဒၣ် ဒီလၣ် ၆ဝ,ဝဝဝ န့ၣ်လီၤ.
ဖဲလွံၢ်လါတဘျီ လါစဲးပထဲးဘၢၣ်အတီၢ်ပူၤ တၢ်ပာ်ဖျါအပူၤန့ၣ် နီၣ်ဂံၢ်နီၣ်ဒွးလၢ တၢ်ပှ့ၤအီၤန့ၢ်န့ၣ် ဒုးနဲၣ်ဖျါစ့ၢ်ကီးဝဲဒၣ်လၢ ထံကီၢ်ဒီဘ့ၣ် တၢ်လီၢ်တၢ်ကျဲအဖီခိၣ်ဟံၣ်ဃီအလုၢ်အပှ့ၤ ဒီးဟံၣ်ဒူၣ်သ့ၣ်တဖၣ်အတၢ်ဟဲနုာ် တၢ်ထိၣ်ဒွးအမျးကယၤန့ၣ် အိၣ်ဝဲဒၣ်ဖဲ တၢ်မၤနီၣ်မၤဃါအပတီၢ်လၢအထီကတၢၢ် အပူၤန့ၣ်လီၤ.
အဃိ ဟံၣ်ဃီတၢ်ထိၣ်ဃူအပှ့ၤအံၤ လၢတဟ့ၣ်လီၤခိသွဲဒ်ဘၣ်တနံၣ်အဂီၢ်န့ၣ် အါန့ၢ်ဝဲဒၣ်ဟံၣ်ဒူၣ်တဒူၣ်အကျိၣ်စ့တၢ်ဟဲနုာ် ၈.၂မျးကယၤ, ဒီး တၢ်ဟံးလိၢ်စ့ လၢတၢ်ပှ့ၤဟံၣ် အလုၢ်အပှ့ၤအိၣ်ဖဲအကြၢး တဖျၢၣ်ကန့ၢ်အဂီၢ် ကျိၣ်စ့တၢ်ဟဲနုာ်အပတီၢ်န့ၣ် အိၣ်ဝဲဒၣ် ၄၅မျးကယၤ အဃိမ့ၢ်ဝဲ အပတီၢ်လၢ အထီမး တခါန့ၣ်လီၤ.
အဃိန့ၣ် Eliza Owens စံးဝဲဒၣ် တၢ်ဂ့ၢ်အံၤကဲထီၣ်ဝဲတၢ်မၤစၢၤလၢ တၢ်ကရှဲပၠး ဘၣ်မနုၤအဃိ ပှၤလၢအပှ့ၤဟံၣ်သ့ၣ်တဖၣ် ပှ့ၤဝဲဟံၣ်လၢအပှ့ၤအိၣ်စှၤကတၢၢ်န့ၣ် ဟဲအါထီၣ်လဲၣ်အဂ့ၢ်န့ၣ်လီၤ.
“တၢ်အံၤန့ၣ်မ့ၢ်ဝဲဒၣ် တၢ်ဆါတၢ်ပှ့ၤ လၢအပှ့ၤဘၣ် ဒီး အိၣ်ဒီးတၢ်လီၤဟိလၢ အပှ့ၤကဒိၣ်ထီၣ်အဂီၢ်, နာ်သက့ တၢ်နီၣ်ကီၢ်န့ၣ် တၢ်ဆါတၢ်ပှ့ၤအဖၠါပူၤအံၤ ဟံၣ်ဃီလၢတၢ်ပှ့ၤအီၤန့ၢ် ဟံၣ်လၢအပှ့ၤအိၣ်ဖဲအကြၢး အခၢၣ်သးအပတီၢ် ဒီးပှၤပှ့ၤဟံၣ်လၢအအိၣ်ဒီးတၢ်ဟဲနုာ်အါဒၣ်လဲာ် ပာ်ဝဲတၢ်ပညိၣ်လီၤဖဲ ဟံၣ်ပှ့ၤလၢအဘၣ်ကတၢၢ် အဖီခိၣ်အံၤအဃိ, ယဆိကမိၣ် တၢ်အံၤမ့ၢ်စ့ၢ်ကီး တၢ်ဒုးနဲၣ်ဖျါ တၢ်ပနီၣ်တခါလၢ, ဟံၣ်ဃီလၢတၢ်ပှ့ၤအီၤန့ၢ်န့ၣ် အိၣ်ဝဲဒီးအနီၣ်ထိၣ်န့ၣ်လီၤ.”
နမ့မ့ၢ်ပှၤလၢအအိၣ်လဲဟံၣ်တခီ, တၢ်ပှ့ၤဟံၣ်ဃီန့ၢ် အနီၣ်ဂံၢ်စရီ တၢ်ထိၣ်ဃူအတၢ်ပာ်ဖျါန့ၣ် အတၢ်အိၣ်သး နးဒိၣ်ဝဲဒၣ်န့ၣ်လီၤ.
ဝ့ၢ်ခိၣ်ကိးဖျၢၣ်ဒဲး တၢ်အိၣ်လဲဟံၣ်အပှ့ၤသ့ၣ်တဖၣ်ဟဲဒိၣ်ထီၣ်, ဒီးဖဲထံကီၢ်ဒီဘ့ၣ် တၢ်အိၣ်လဲဟံၣ် အစရီတၢ်ပာ်ဖျါအပူၤန့ၣ်, အပူၤကွံာ် ၁၂လါအတီၢ်ပူၤ တၢ်အိၣ်လဲဟံၣ်အပှ့ၤန့ၣ် ဟဲအါထီၣ်ဝဲ ယဲၢ်မျးကယၤ — လၢအမ့ၢ်ဝဲနံၣ်တနံၣ်လၢ တနံၣ်တဘျီ တၢ်ပာ်ဖျါဟံၣ်လဲအပှ့ၤထီၣ် အအါကတၢၢ်တခါန့ၣ်လီၤ.
Barbara Pocock စံးဝဲဒၣ် ဒ်သိးဟ့ၣ်လီၤဟံၣ်လီၤဟံၣ်လဲအပှ့ၤကန့ၢ်အဂီၢ် ပှၤအီစထြ့လယါထံဖိကီၢ်ဖိအါမးလၢအဘၣ်ကီဘၣ်ခဲဒီး ဘၣ်ထဲးဂံၢ်ထဲးဘါသပှၢ်ပှၢ် — ဒီးအဝဲပာ်ဒ့ၣ်ပာ်ကမၣ်ဝဲဒၣ် အီစထြ့လယါကီၢ် ခိသွဲသနူကျိၤကွာ် လၢအမ့ၢ်ဝဲဒၣ် တၢ်ဟ့ၣ်လီၤခိသွဲအကျိၤအကျဲ အတၢ်ဂ့ၢ်ကီန့ၣ်လီၤ.
“လၢတၢ်စံၣ်စိၤတဲစိၤအပူၤန့ၣ် အဝဲသ့ၣ်ဘၣ်ကွၢ်ဆၢၣ်မဲာ်ဒီး တၢ်အိၣ်သးအဖုၣ် အနးကတၢၢ်, ဟံၣ်ဒိးလဲသ့ၣ်တဖၣ် လီၤဟိအနီၣ်ဂံၣ်အိၣ်စှၤကတၢၢ်ဒီး ဟံၣ်လဲသ့ၣ်တဖၣ်အပှ့ၤဒိၣ်ထီၣ် လၢအမ့ၢ်တၢ်အနးကတၢၢ်လၢတၢ်စံၣ်စိၤတဲစိၤအပူၤန့ၣ်လီၤ. ပဟံၣ်ဃီ အတၢ်တၢၤတနါ တၢ်ဂ့ၢ်ကီအံၤ တၢ်ဘှါရှဲအီၤအဂီၢ် အကျိၤအကျဲသ့ၣ်တဖၣ်အိၣ်ဝဲ. တၢ်လီၤဆီလၢပမၤအီၤသ့ သ့ၣ်တဖၣ်န့ၣ် အိၣ်ဝဲ. လၢအမ့ၢ် တၢ်မၤကတၢၢ်ကွံာ် တၢ်မၤစှၤလီၤခိသွဲ. တၢ်သူၣ်အါထီၣ်ကမျၢၢ် ပဒိၣ်ဟံၣ်ဃီသ့ၣ်တဖၣ်. ဟံၣ်လဲအပှ့ၤထီၣ် လၢအတအိၣ်ဒီးအနီၣ်ထိၣ်ဘၣ်အံၤ ပမၤကတၢၢ်အီၤသ့ဝဲဒၣ်. လၢအဒုးအီၣ်ထီၣ် အီစထြ့လယါဟံၣ်ဖိဃီဖိ အကထိ တဖၣ် အကထိ အဂီၢ် တၢ်လီၤဆီသ့ဝဲ. ဟံၣ်ဃီတၢ်အိၣ်တၢ်ဆိးန့ၣ်မ့ၢ်ဝဲပှၤဟီၣ်ခိၣ်ဖိခွဲးယာ်တခါ, ဒီး ပလိၣ်ဘၣ် တၢ်ဟံးမူဒါလၢ လ့ၢ်ဘၢၣ်ပဒိၣ်အအိၣ် လၢကမၤဒီးဒုးအိၣ်ထီၣ်ဝဲတၢ်လီၤဆီအံၤအဂီၢ်န့ၣ်လီၤ.”
တၢ်ဘၣ်ဂၢၢ်ဒီးတၢ်မၤကွၢ်ဒ်အံၤန့ၣ် အတမ့ၢ်ခီဖျိလၢ ခိသွဲသနူထဲတခါဘၣ်.
အီစထြ့လယါကီၢ် ဘၣ်ကွၢ်ဆၢၣ်မဲာ်ဒီး တၢ်ပီးတၢ်လီ တလၢတလီၣ်ဘၣ်, ဒီး ပှၤတ့ဒုးအိၣ်ထီၣ်တၢ်သ့ၣ်တဖၣ်စံးဝဲဒၣ် လၢကမၤဆူၣ်ထီၣ် ပှၤဂ့ၢ်ဝီပနံာ်ပာ်ဖှိၣ်အဂီၢ်ဒီး ဟံၣ်ဃီလၢတၢ်ပှ့ၤအီၤန့ၢ်အဂီၢ် ဒီးတၢ်သူၣ်ထီၣ်ဟံၣ်ဃီလၢတၢ်ဒိးလဲလီၤအီၤသ့ၣ်တဖၣ်ကန့ၢ်အဂီၢ် ပဒိၣ်သနူသ့ၣ်တဖၣ် အိၣ်တံာ်တာ်တၢ်ဖဲကျဲပူၤ အဃိ တၢ်ဂ့ၢ်ကီသ့ၣ်တဖၣ်အိၣ်ဝဲဒၣ်န့ၣ်လီၤ.
Eliza Owen စံးဝဲဒၣ် မ့ၢ်ကွၢ်ဒီးအပူၤကွံာ်အနံၣ်တဆံန့ၣ် ဟံၣ်ဃီဟီၣ်ခိၣ်လီၢ်စရီအံၤ လီၤစှၤဝဲဒၣ် အမျးကယၤ ၁ဝ — ဒီး ယဲၢ်နံၣ်အတၢ်ထိၣ်ဃူအနီၣ်ဂံၢ်န့ၣ်စှၤလီၤဝဲဒၣ် ဃုမျးကယၤန့ၣ်လီၤ.
အဝဲစံးဝဲဒၣ် တၢ်သုးလီၢ်အိၣ်ဆိးသ့ၣ်တဖၣ်စှၤလီၤဒီး လၢကဟးဆှဲးတၢ်အိၣ်လဲဟံၣ် လၢအပှ့ၤဒိၣ်အဂီၢ် ဟံၣ်ဖိဃီဖိတၢ်က့ၤအိၣ်ဖှိၣ်သကိးတပူၤဃီန့ၣ် မ့ၢ်ထုးစှၤလီၤဝဲဒၣ် တၢ်ပှ့ၤဟံၣ်လၢအပှ့ၤဒိၣ်ထီၣ်အံၤ နာ်သက့ အတပတုာ်ဝဲဒၣ် ဟံၣ်ဃီအပှ့ၤဒိၣ်ထီၣ်ကွ့ၢ်ကွ့ၢ်အံၤဘၣ်န့ၣ်လီၤ.
