ဖဲ FIFA World Cup တၢ်လိာ်ကွဲပြၢ ၁၃ သီအနံၤအံၤ, Cristiano Ronaldo ဒီး Luka Modrić တုၤထီၣ် ထီၣ်ဘးဆူ အဝဲသ့ၣ်တၢ်လုၢ်အီၣ်သးသမူတၢ်ဖံးတၢ်မၤနီၣ်ထိၣ်ဒ့ၣ်စၢၤဖးဒိၣ်, ဒီး တကတီၢ်ဃီန့ၣ် Socceroos ဘၣ်ဖှီၣ်ဘၣ်နးဝဲဒၣ် တချုးဖဲတၢ်လိာ်ကွဲအရ့ဒိၣ် လၢအဘၣ်ပြၢဒီး Paraguay စးထီၣ်ဒ်ဘၣ် မ့ၢ်လၢ Mathew Leckie နုာ်လီၤလိၣ်ကွဲတကဲဘၣ် ခီဖျိလၢအဘၣ်ဒိဘၣ်ထံးအဃိန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တနံၤအံၤ ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲန့ၣ် လၢ Cristiano Ronaldo အဂီၢ်မ့ၢ်ဝဲတၢ်ကွဲးနီၣ်တခါ, လၢ Luka Modrić အဂီၢ်န့ၣ်တၢ်မၤနီၣ်ဒ့ၣ်စၢၤတတီၤ, ဒီး မ့မ့ၢ်လၢ England အဂီၢ်န့ၣ် မ့ၢ်ဝဲတၢ်သးဘၣ်တံာ်တာ်န့ၣ်လီၤ.
တူၢ်လိာ်ကမုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၁၃ သီတသီ တၢ်ပာ်ဖျါအဘိၣ်န့ၣ်လီၤ.
———
ဖဲကရူၢ်— K အပူၤန့ၣ် Portugal မၤနၢၤဝဲ Uzbekistan ၅—ဝ ကိ ဒီးလဲၤခီဖျိဝဲ တၢ်ပြၢ ၁၃သီ အနံၤအံၤပှဲၤဒီး အဝဲသ့ၣ်အက့ၢ်အဂီၤဒၣ်ဝဲန့ၣ်လီၤ.
Cristiano Ronaldo ထူနုာ်လီၤဝဲကိခံဖျၢၣ်, ဒီးကဲထီၣ်ဝဲ ဟီခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ဃုဘျီအပူၤ မ့ၢ်ပှၤသွီနုာ်ကိ အဆိကတၢၢ်န့ၣ်လီၤ.
Portugal ဖျၢၣ်ထူကရူၢ်အခိၣ် လၢအသးနံၣ်အိၣ်ဝဲ ၄၁နံၣ်အံၤ, တၢ်လိာ်ကွဲပြၢအတၢ်စံၣ်စိၤတဲစိၤအပူၤန့ၣ် ကဲထီၣ်စ့ၢ်ကီးဝဲဒၣ် ပှၤသးနံၣ်ပှၢ်ကတၢၢ်ခံဂၤတဂၤ လၢအသွီနုာ်ကိန့ၢ်.
ဖဲကရူၢ်— K တၢ်ထူပြၢအပူၤန့ၣ်, Colombia ဖျၢၣ်ထူကရူၢ် မၤနၢၤဝဲဒၣ် DR Congo ၁—ဝ ကိ, လၢအသွီနုာ်လီၤဝဲကိအံၤဖဲ တၢ်လိာ်ကွဲပြၢ တုၤလီၤ ၇၆ မံးနံးအတီၢ်ပူၤန့ၣ်လီၤ.
တၢ်မၤနၢၤအံၤဆှၢဝဲဒၣ် Colombia ဆူ ကရူၢ်အံၤ အပတီၢ် အဖီခိၣ်ကတၢၢ်ဒီး လဲၤထီၣ်ဘၣ်ဝဲဆူ ၃၂ကရူၢ် တၢ်လိာ်ကွဲပြၢအပတီၢ်န့ၣ်လီၤ.
———
တကတီၢ်ဃီဖဲကရူၢ်— L အပူၤန့ၣ်, England ဒီး Ghana အတၢ်လိာ်ကွဲပြၢအပူၤ အမ့ၢ်ဒိးန့ၢ်ဘၣ် တၢ်ခွဲးတၢ်ယာ်လၢအဂ့ၤနာ်သက့ ပှၤခံဖုလၢၤအံၤ သွီကိတန့ၢ်နီတကပၤဘၣ်အဃိ အနၢၤအရှူတအိၣ် ထီၣ်ထူၣ်ဝဲဒၣ်န့ၣ်လီၤ.
ခီဖျိလၢတၢ်အဆၢဟဲထီၣ်ဒ်အံၤအဃိ အဝဲသ့ၣ် ခံကရူၢ်လၢၤ အတၢ်အနၢၤ—အရှူ ဘၣ်ဟးထီၣ်အပတီၢ်န့ၣ် တၢ်ကဆၢတဲာ်အီၤဖဲ အဝဲသ့ၣ်ကရူၢ်အံၤအပူၤ လၢခံကတၢၢ် အတၢ်လိာ်ကွဲပြၢန့ၣ်လီၤ.
ကရူၢ်—L အပူၤ ဖျၢၣ်ထူကရူၢ်အဂၤခံဖု လၢအမ့ၢ် Croatia ဒီး Panama တၢ်ပြၢလိာ်သးအပူၤ Croatia မၤနၢၤဝဲအီၤ ၁—ဝ အဃိ Panama ဘၣ်ဟးထီၣ်ကွံာ်ဝဲလၢ တၢ်ပြၢတဘျီအံၤအပူၤလံန့ၣ်လီၤ.
တၢ်မၤနၢၤကိအဖျၢၣ်အံၤ ဘၣ်တၢ်ထူနုာ်လီၤအီၤလၢ ပှၤလိာ်ကွဲဖျၢၣ်ထူခၢၣ်စး Ante Budimir, ဒီး တၢ်ပြၢအံၤမ့ၢ်ဝဲဒၣ် ဖျၢၣ်ထူကရူၢ်အံၤ အကရူၢ်ခိၣ် လူကာ မိုဒရစ် တၢ်အိၣ်ဖျါဖဲထံဂုၤကီၢ်ဂၤတၢ်ပြၢ ပှဲၤထီၣ်ဝဲအဘျီ ၂ဝဝ, အဃိ ကဲထီၣ်ဝဲ ပိာ်ခွါပှၤလိာ်ကွဲဖျၢၣ်ထူ လွံၢ်ဂၤတဂၤ လၢအဟဲတုၤဖဲ တၢ်မၤနီၣ်ဒ့ၣ်စၢၤအံၤန့ၣ်လီၤ.
———
မ့ၢ်ကွၢ်ကဒါဖဲ Socceroos အခီန့ၣ်...
တချုးဖဲအဝဲသ့ၣ် တၢ်လိာ်ကွဲပြၢ အရ့ဒိၣ် လၢအကဘၣ်ထူဒီး Paraguay ဖဲမုၢ်ဖီဖး—မုၢ်ယဲၢ်နံၤ တုၤလီၤဒ်ဘၣ်န့ၣ် အီစထြ့လါကီၢ် ဘၣ်သဂၢၢ်ဒီးတၢ်တံာ်တာ်, လၢအဝဲသ့ၣ် ပှၤနဲၣ်တၢ်အခိၣ်—၂ Paul Okon ပာ်ဂၢၢ်ပာ်ကျၢၤဝဲဒၣ် အဝဲသ့ၣ် ပှၤလိာ်ကွဲဖျၢၣ်ထူဒံးဆ့ လၢအအိၣ်ဒီးတၢ်လဲၤခီဖျိအါမး Mathew Leckie နုာ်လီၤလိၣ်ကွဲတကဲဘၣ် မ့ၢ်လၢအဘၣ်ဒိဘၣ်ထံးအဃိန့ၣ်လီၤ.
“အဃိ အခဲအံၤန့ၣ် အဝဲဟူးဂဲၤတန့ၢ်ဘၣ်. မ့ၢ်တၢ်ဘူၣ်တဂ့ၤဘၣ်ဖးဒိၣ်တခါ. အဝဲမ့ၢ်ပှၤလိာ်ကွဲဖိလၢအအိၣ်ဒီးတၢ်လဲၤခီဖျိ. အမ့ၢ်တကဲထီၣ်ဒ်အံၤဘၣ်န့ၣ် ဖဲတၢ်လိာ်ကွဲပြၢတဘျီအံၤန့ၣ် ပဆဲးသူအီၤသ့. ဘၣ်ဆၣ်သနာ်က့ တၢ်ကဲထီၣ်သးဒီး Mat ဒ်လဲၣ်ဂ့ၤ ဒ်လဲၣ်ဂ့ၤန့ၣ် ဒိးသန့ၤထီၣ်အသးလၢ တၢ်ပြၢတဘျီအံၤ ပလဲၤအီၤကန့ၢ်တုၤထဲလဲၣ်.”
Socceroos ဖျၢၣ်ထူကရူၢ်အံၤ ကန့ၢ်ထီၣ်ဘၣ် ရှူဟးထီၣ်ဟးထီၣ်အဂီၢ်န့ၣ် လိၣ်ဝဲဒၣ်ထဲ တၢ်လိာ်ကွဲပြၢ လၢအထီၣ်ထူၣ်—အနၢၤအရှူတအိၣ်ဘၣ် တခါန့ၣ်လီၤ.
Okon တဲလိာ်ကွဲစ့ၢ်ကီးဝဲဒၣ်လၢ အဝဲမုၢ်လၢ်လၢ အီစထြ့လယါကီၢ် ကိတိာ်ခိၣ်ကျၢၢ် ကဟ့ၣ်လီၤဝဲ ပှၤအီစထြ့လယါဖိ နံၤအိၣ်ဘှံးတနံၤ ဒ်သိးအဝဲသ့ၣ် ကနုာ်လီၤကွၢ်ကီဘၣ်ပတၢ်ပြၢအဂီၢ်န့ၣ်လီၤ.
“မ့ၢ်ဝဲဒၣ်ယတၢ်မုၢ်လၢ်ပာ်အီၤတခါ. ပမုၢ်လၢ်ဝဲဒၣ်, ပကိတိာ်ခိၣ်ကျၢၢ် Mr. M Albanese, ကဟ့ၣ်လီၤပှၤကိးဂၤဒဲး နံၤအိၣ်ဘှံးတသီ, ဒီးပှၤကညီသ့ၣ်တဖၣ် အဝဲသ့ၣ်အိၣ်တတီၤဂ့ၤတတီၤဂ့ၤန့ၣ်, ကကွၢ်ကီဘၣ်ပှၤအဂီၢ် အတဘၣ်ဟးလူၤဂုၤကွၢ်ဝဲဒၣ်ကွဲထံၣ်ဟူဘၣ်.”
Socceroos အတၢ်ထူပြၢဒီး Paraguay န့ၣ်, နကွၢ်ကီအီၤ သ့တဘျီဃီဖဲ SBS ဒီး SBS On Demand ဖဲမုၢ်ထူၣ် ၁၂နၣ်ရံၣ် မုၢ်ထီၣ်နီၣ်ထိၣ် တၢ်ဆၢကတီၢ်န့ၣ်လီၤ.
———
မ့မ့ၢ် ၁၄သီ တၢ်ပြၢအနံၤန့ၣ် တၢ်အၢၣ်လီၤအိၣ်လၢ တၢ်လိာ်ကွဲပြၢသ့ၣ်တဖၣ်ကအိၣ်ပှဲၤဒီး တၢ်လီၤသူၣ်ပိၢ်သးဝး, ဒီး ဖဲတၢ်ပြၢစရီအပူၤန့ၣ် တၢ်ထူပြၢအိၣ်ဝဲဃုခါန့ၣ်လီၤ.
ကရူၢ်— B အပူၤန့ၣ်, Bosnia ဒီး Herzegovina ကဘၣ်သဂၢၢ်လိာ်သအးဒီး Qatar, ဖဲလၢ Canada လၢအမ့ၢ် ထံကီၢ်လၢ အတူၢ်လိာ်ကဃဲၤ ဖျၢၣ်ထူတၢ်ပြၢတဘျီအံၤ ကဘၣ်ထူပြၢဝဲဒီး Switzerland န့ၣ်လီၤ.
Brazil န့ၣ်ကထံၣ်လိာ်အသးဒီး Scotland, ဒီး Morocco န့ၣ် ကဘၣ်သဂၢၢ်လိာ်အသးဒီး Haiti ဖျၢၣ်ထူကရူၢ် ဖဲကရူၢ်— C အပူၤန့ၣ်လီၤ.
ဖဲကရူၢ်— A အပူၤန့ၣ်, အးဖြံးကးကလံၤထံး ကဘၣ်ထူဒီး Korea Republic, ဒီး Czechia ဖျၢၣ်ထူကရူၢ်န့ၣ် ကဘၣ်ထူပြၢဝဲဒီး Mexico န့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၁၃ သီတသီအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
