ဆီၣ်သ် အီစထြ့လယါ—South Australia ပာ်ဖျါထီၣ် ထံကီၢ်ဒီဘ့ၣ်အပူၤ တၢ်ရဲၣ်တၢ်ကျဲၤ အဆိကတၢၢ်တခါ လၢအဘၣ်ဃးဒီး တၢ်တြီတံာ်ကွံာ် ပှၤမၤဟံၣ်ပူၤဃီပူၤ တၢ်စုဆူၣ်ခီၣ်တကးဒီး မုၣ်ခွါ တၢ်မၤအၢမးဆါသ့ၣ်တဖၣ် အတၢ်သူ dating apps — တၢ်သ့ၣ်ဖးအဲၣ်တီ အဲးဖ် သ့ၣ်တဖၣ် န့ၣ်လီၤ. ကီၢ်စဲၣ်အံၤ အစံၣ်ညီၣ်ကွီၣ်ခိၣ်ကျၢၢ် Kyam Maher စံးဝဲဒၣ် တၢ်ဆှၢနုာ်လီၤအံၤ ကမၤဂ့ၤထီၣ်ဝဲ တၢ်ပူၤဖျဲး လၢပှၤနုာ်လီၤပၣ်ဃုာ်ဖဲ လီမုၢ်ပျီ—အီးလဲ တၢ်သ့ၣ်ဖးအဲၣ်တီ အပူၤသ့ၣ်တဖၣ်အံၤန့ၣ်လီၤ. ဖဲ ၂ဝ၂၂နံၣ်န့ၣ် အီစထြ့လယါ စဲအ့ၣ်တၢ်ဃိထံသ့ၣ်ညါဘၣ်ဃးတၢ်မၤကမၣ်သဲစးကွီၣ်မ့ၣ်—Australian Institute of Criminology, ပာ်ဖျါထီၣ်ဝဲဒၣ် တၢ်ပာ်ဖျါတခါ လၢအမ့ၢ် အဝဲသ့ၣ်တၢ်ဃုထံၣ်သ့ၣ်ညါဘၣ်ဃး လီမုၢ်ပျီတၢ်မၤတၢ်စုဆူၣ်ခီၣ်တကးအဂ့ၢ်, ဒီးအဝဲသ့ၣ်ထံၣ်ဘၣ်ဝဲဒၣ် ပှၤနုာ်လီၤပၣ်ဃုာ်ဖဲတၢ်စံးဆၢအံၤအပူၤသ့ၣ်တဖၣ် သၢပူ တပူ န့ၣ်စံးလၢ အဝဲသ့ၣ်တူၢ်ဘၣ် မုၢ်ခွါတၢ်မၤတၢ်ဆါပယွဲ ဒီးပှၤလၢအဝဲသ့ၣ်ထံၣ်န့ၢ်အီၤ ဖဲ အဲးဖ် တခါအပူၤ မ့တမ့ၢ် လီပှာ်ယဲၤသန့တခါအပူၤ ဖဲအပူၤကွံာ်ယဲၢ်နံၣ်အတီၢ်ပူၤန့ၣ်လီၤ. တၢ်ဆှၢနုာ်လီၤ တၢ်ရဲၣ်တၢ်ကျဲၤအခဲအံၤန့ၣ် မ့ၢ်ဝဲဒၣ် တၢ်ဖံးတၢ်မၤတခါ လၢအပိာ်ထွဲထီၣ်အသးခီဖျိတၢ်ပာ်ဖျါအံၤန့ၣ်လီၤ.
တၢ်ဟ့ၣ်ပလီၢ် — တၢ်ပာ်ဖျါလၢလာ်သ့ၣ်တဖၣ်အံၤ ကျိၤကျဲတၢ်ဂ့ၢ် လၢအကမ့ၢ်တၢ်တံာ်တာ် တၢ်သးအုး လၢပှၤတနီၤနီၤအဂီၢ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
Leesa Scanlon တဲပၠးဘၣ်က့ၤဝဲ အပူၤကွံာ် အဝဲတၢ်ပာ်အဲၣ်တီ အတၢ်ရ့လိာ်အဂ့ၢ်, လၢအဝဲပာ်အီၤဒ်အမ့ၢ် တၢ်ရ့လိာ်လၢအအိၣ်ဒီး တၢ်ဖီၣ်ဃံးတကလုာ်, ဒ်အံၤန့ၣ်လီၤ.
“ဒ်သိးပှၤကဘၣ်သူၣ်ဘၣ်သးအီၤအဂီၢ် ပှၤအဝဲန့ၣ် ပာ်ဖျါထီၣ်အတၢ်ပာ်သူၣ်ပာ်သးဒီး တၢ်လၢအမၤဝဲသ့ၣ်တဖၣ်န့ၣ် လီၤဂာ်ဒ်သိးပှၤလၢအဂ့ၤတဂၤန့ၣ်လီၤ. လၢတၢ်ဆၢကတီၢ်ယံၤထီၣ်အဖီခိၣ်, ပှၤအဝဲန့ၣ် အိၣ်ဒီးတၢ်ပာ်သးလိၤလိၤ လၢကမၤဆူးမၤဆါဝဲဒၣ် ယနီၣ်သးတၢ်ဆိကမိၣ်ဆိမးသ့ၣ်တဖၣ် ခီဖျိတၢ်မၤဆါပယွဲကဲထီၣ်ဝးတရံးအသး လၢပထံၣ်ဘၣ်အီၤသ့ၣ်တဖၣ်အံၤန့ၣ်လီၤ. ဒ်သိးလၢ အကသုးအသး ဆူပှၤတူၢ်ဘၣ်တၢ် လၢအအိၣ်မူလီၤတဲာ်တ့ၢ်သ့ၣ်တဖၣ် တဂၤဝံၤတဂၤအအိၣ် အဂီၢ်န့ၣ် ပှၤအဝဲန့ၣ် သူဝဲဒၣ် ပျဲၢ်စီၣ် လၢအလီၤဂာ်ဒ်သိး တၢ်သ့ၣ်ဖးအဲၣ်တီ အဲးဖ် — dating apps သ့ၣ်တဖၣ်န့ၣ်လီၤ.”
ခဲကနံၣ်အံၤန့ၣ် အဝဲမ့ၢ်ပှၤတဂၤ လၢအပၣ်ဃုာ်ဖဲ ဆီၣ်သ် အီစထြ့လယါ ပဒိၣ် အတၢ်ဂဲၤလိာ် လၢအဘၣ်ဃး တၢ်ကမၤတၢ်တြီတံာ် ပှၤလၢ အမၤ ဟံၣ်ပူၤဃီပူၤ တၢ်မၤဆူၣ်မၤဆီး ဒီး မၤကမၣ်သဲစး လၢအဘၣ်ဃး မုၣ်ခွါက့ၢ်ဂီၤ တၢ်မၤဆါပယွဲ သ့ၣ်တဖၣ် အတၢ်သူ လီမုၢ်ပျီ—အီးလဲ တၢ်သ့ၣ်ဖးအဲၣ်တီလိာ်သး အဲးဖ် သ့ၣ်တဖၣ်န့ၣ်လီၤ.
Sarah Quick မ့ၢ်ဝဲ ဆီၣ်သ် အီစထြ့လယါ ပှၤဘၣ်မူဘၣ်ဒါအခိၣ်ဒိၣ်တဂၤလၢ ပှၤတူၢ်ဘၣ်တၢ်သ့ၣ်တဖၣ် အတၢ်ခွဲးတၢ်ယာ်အဂီၢ်န့ၣ်လီၤ.
“အတမ့ၢ်တၢ်လၢအညီတခါဘၣ်, နာ်သက့ တၢ်ကကျဲးစၢးမၤကွၢ်အီၤအဂီၢ် တၢ်ဂ့ၢ်တၢ်ကျိၤတအိၣ်ဘၣ်ဒု, ယတဆိကမိၣ်ဘၣ်အီၤဒ်န့ၣ်ဘၣ်. ပအိၣ်ဒီးတၢ်ဟံးမူဒါ လၢကဘၣ်မၤလီၤတံၢ် အဲးဖ် သ့ၣ်တဖၣ်အံၤ တသ့ဖဲအသ့န့ၣ်ကဘၣ်အိၣ်ဒီးတၢ်ပူၤဖျဲးန့ၣ်လီၤ.”
အဝဲသ့ၣ်တၢ်ဘၣ်ယိၣ်ဘၣ်ဘှီသ့ၣ်တဖၣ်အံၤန့ၣ် ဒိးသန့ၤထီၣ်အသးလၢ တၢ်ဂ့ၢ်တၢ်ကျိၤနီၣ်ကီၢ် လၢတၢ်မၤလီၤတံၢ်အီၤန့ၢ် လီၤတံၢ်လီၤဆဲးန့ၣ်လီၤ.
လၢတၢ်ဆၢကတီၢ်တဘျီဂ့ၤတဘျီဂ့ၤ, ပှၤအီစထြ့လယါဖိ လၢအသူဝဲဒၣ် လီမုၢ်ပျီ တၢ်သ့ၣ်ဖးအဲၣ်တီ—dating apps အါန့ၢ်အဂၤသၢကကွဲၢ်အကျါန့ၣ် ပှၤ ဆီၣ်သ် အီစထြ့လယါန့ၣ် ပၣ်ဃုာ်ဝဲဒၣ် အဂၤ ၂ဝဝ,ဝဝဝ ဃၣ်ဃၣ်န့ၣ်လီၤ.
ဒီး ၂ဝ၂၂နံၣ်အတီၢ်ပူၤ အီစထြ့လယါ စဲအ့ၣ်တၢ်ဃိထံသ့ၣ်ညါဘၣ်ဃးတၢ်မၤကမၣ်သဲစးကွီၣ်မ့ၣ် -Australian Institute of Criminology ထုးထီၣ်ရၤလီၤ အတၢ်ဃုထံၣ်သ့ၣ်ညါ ပာ်ဖျါအပူၤန့ၣ် ထံၣ်ဘၣ်ဝဲလၢ ပှၤပၣ်ဃုာ်ဖဲတၢ်ဃိထံသ့ၣ်ညါအံၤအကျါ သၢပူတပူန့ၣ် မ့ၢ်ပှၤတူၢ်ဘၣ် မုၣ်ခွါက့ၢ်ဂီၤ တၢ်မၤဆူၣ်မၤဆီး လၢပှၤတဂၤဂၤ လၢအဝဲသ့ၣ်ထံၣ်န့ၣ်အီၤဖဲ အဲးဖ် မ့တမ့ၢ် လီပှာ်ယဲသန့ အပူၤ လၢအပူၤကွံာ်ယဲၢ်နံၣ်အခါန့ၣ်လီၤ.
ဆီၣ်သ် အီစထြ့လယါ စံၣ်ညီၣ်ကွီၣ်ခိၣ်ကျၢၢ် ဒီး တစိၢ်တလီၢ် ကီၢ်စဲၣ်ခိၣ် Kyam Maher စံးဝဲဒၣ် အဝဲသ့ၣ်အဲၣ်ဒိးဒီသဒၢဝဲ ပှၤလၢအတူၢ်ဘၣ်တၢ်သ့ၣ်တဖၣ်အံၤ ဒီး ပာ်ထီၣ်တၢ်ဟံးမူဒါအံၤဆူပှၤလၢအမၤကမၣ်တၢ်သ့ၣ်တဖၣ်အဖီခိၣ်န့ၣ်လီၤ.
“ဖဲအပူၤကွံာ်ခံနံၣ်အခါန့ၣ် ပဆီတလဲကွံာ် ပသဲစးတၢ်ဘျၢသ့ၣ်တဖၣ်အဃိ ပှၤလၢ အမၤကမၣ် ဖိသၣ်မုၢ်ခွါက့ၢ်ဂီၤ သဲစးတၢ်ဘျၢသ့ၣ်တဖၣ် မၤသကိးတၢ်ဒီး ဖိသၣ်တန့ၢ်ဘၣ်. ဒီးဖဲသဲစးတၢ်ဘျၢအံၤအပူၤန့ၣ် ပှၤလၢအဘၣ်ဟံးမူဒါန့ၣ်မ့ၢ်ဝဲ ပှၤမၤကမၣ်သဲစးတၢ်ဘျၢတဂၤန့ၣ်လီၤ. အဃိ နမ့မ့ၢ် တၢ်မၤနီၣ်မၤဃါပာ်အီၤလၢအမ့ၢ်ဝဲဒၣ် ပှၤမၤကမၣ် ဖိသၣ်မုၣ်ခွါက့ၢ်ဂီၤ သဲစးတၢ်ဘျၢ ဒီး နမၤသကိးတၢ်ဒီးဖိသၣ်သ့ၣ်တဖၣ်န့ၣ်, နမ့ၢ်ဝဲဒၣ် ပှၤမၤကမၣ်တၢ်တဂၤ လၢအမၤကမၣ်သဲစးတၢ်ဘျၢန့ၣ်လီၤ. ဒီး ဒ်တၢ်စးထီၣ်အခီၣ်ထံးတခါအသိး တၢ်အဝဲအံၤန့ၣ် မ့ၢ်ဝဲက့ၢ်ဂီၤဒိတဲာ်တခါ လၢပကွၢ်ဃုန့ၢ်အီၤဖဲအံၤန့ၣ်လီၤ. နမ့ၢ်အိၣ်ဒီး တၢ်မၤကမၣ် မုၣ်ခွါက့ၢ်ဂီၤ တၢ်မၤတၢ်စုဆူၣ်ခီၣ်တကး, ဟံၣ်ပူၤဃီပူၤ တၢ်မၤတၢ်စုဆူၣ်ခီၣ်တကး, တၢ်မၤကမၣ်ဖိသၣ်မုၣ်ခွါက့ၢ်ဂီၤသဲစးတၢ်ဘျၢန့ၣ်, တၢ်ကတြီတံာ်ဝဲနၤလၢ နကသူ လီမုၢ်ပျီ တၢ်သ့ၣ်ဖးအဲၣ်တီ—dating apps န့ၣ်လီၤ.”
ဖဲဆီၣ်သ် အီစထြ့လယါ အတၢ်ဆှၢနုာ်အဖီလာ်အပူၤန့ၣ်, ပှၤမၤကမၣ်တၢ်သ့ၣ်တဖၣ်အံၤ တၢ်ကပာ်ယံၤကွံာ်အီၤလၢ တၢ်သူ လီမုၢ်ပျီ—အီးလဲ တၢ်သ့ၣ်ဖးအဲၣ်တီ ပျဲၢ်စီၣ်သ့ၣ်တဖၣ်အဖီခိၣ် အစှၤကတၢၢ် အနံၣ် ၁ဝ ဒီး ပှၤသ့ၣ်တဖၣ်အံၤ အမ့ၢ်မၤကမၣ်သဲစးတၢ်ဘျၢအံၤန့ၣ် တၢ်ကဟ့ၣ်အီၤတၢ်ကမၣ် လၢအကဘၣ်လီၤဃိးပူၤန့ၣ်လီၤ.
ပှၤလၢအမၤကမၣ်တၢ်ဒိၣ်ဒိၣ်မုၢ်မုၢ်သ့ၣ်တဖၣ် တၢ်ကတြီကွံာ်အဝဲသ့ၣ် တၢ်သူ လီမုၢ်ပျီ တၢ်သ့ၣ်ဖးအဲၣ်တီပျဲၢ်စီၣ်—online dating platforms တစိၤသး, ဒီး မ့မ့ၢ် ပှၤလၢတၢ်ဖီၣ်ချုးန့ၢ်အီၤလၢ အတလူၤပိာ်ထွဲတၢ်ဘျၢဘၣ်သ့ၣ်တဖၣ်န့ၣ် ကဘၣ်ကွၢ်ဆၢၣ်မဲာ်ဒီး တၢ်ဟံးအီၤအရ့ လၢကဘၣ်လီၤဃိာ်ပူၤတုၤလၢယဲၢ်နံၣ်န့ၣ်လီၤ.
တၢ်ဟံးအီၤဂ့ၢ်သီသ့ တၢ်ဂ့ၢ် အဒိအတဲာ်သ့ၣ်တဖၣ်န့ၣ် ပၣ်ဃုာ်ဒီး မုၣ်ခွါက့ၢ်ဂီၤ တၢ်မၤဆူးမၤဆါ မ့တမ့ၢ် တၢ်မၤဆူၣ်မၤစိး ဒီး ဒိးသန့ၤထီၣ်သးလၢ အနီၣ်ကစၢ်တၢ်ဂီၤ မုၣ်ခွါက့ၢ်ဂီၤ တၢ်မၤဆါပယွဲသ့ၣ်တဖၣ်န့ၣ်လီၤ.
စံၣ်ညီၣ်ကွီၣ်ခိၣ်ကျၢၢ်အံၤစံးဝဲဒၣ် တၢ်ဆီၣ်ထွဲလၢ တၢ်ကမၤတၢ်ဆီတလဲသ့ၣ်တဖၣ်အံၤတနီၤန့ၣ် ဟဲန့ၢ်လၢ လီမုၢ်ပျီ—အီးလဲ တၢ်ဖံးတၢ်မၤလီၢ် အနီၣ်ကစၢ်ဒၣ်ဝဲ အအိၣ်န့ၣ်လီၤ.
“ဖဲအပူၤကွံာ်တနံၣ်န့ၣ်, Match Group လၢအမ့ၢ် ဟီၣ်ခိၣ်ဒီဘ့ၣ် တၢ်သ့ၣ်ဖးအဲၣ်တီ အဲးဖ်—dating apps အဒိၣ်ကတၢၢ်အံၤ — အနီၣ်ကစၢ်ဒၣ်ဝဲန့ၣ် ဆဲးကျိးဝဲဆီၣ်သ်အီစထြ့လယါပဒိၣ်န့ၣ်လီၤ. ပှၤလၢအသူ လီမုၢ်ပျီ တၢ်သ့ၣ်ဖးအဲၣ်တီ အဲးဖ် သ့ၣ်တဖၣ် တဝာ်ဃၣ်ဃၣ်န့ၣ် မ့ၢ်ပှၤလၢအသူ Match Group ပျဲၢ်စီၣ်, လၢအလီၤဂာ်ဒ်သိး Tinder န့ၣ်လီၤ. အဝဲသ့ၣ်ထံၣ်ဘၣ် ပတၢ်တြီတံာ် ဖိသၣ်သ့ၣ်တဖၣ် အတၢ်သူ ကမျၢၢ်တၢ်ဆဲးတဝၢ— social media အတၢ်ဖံးတၢ်မၤသ့ၣ်တဖၣ် ဒီး အဝဲသ့ၣ်ဆဲးကျိးဒီးပှၤဒီးသံကွၢ်ဝဲဒၣ် မ့ၢ်ပအဲၣ်ဒိးကွၢ်ဃုမၤအါထီၣ်ကျိၤကျဲ လၢကကဲထီၣ်ဟီၣ်ခိၣ်ဒီဘ့ၣ်ခိၣ်နၢ်အဂၤတခါ, လၢအဘၣ်ဃးတၢ်ဆီတလဲမၤဂ့ၤထီၣ် လီမုၢ်ပျီ—အီးလဲ တၢ်ပူၤဖျဲးန့ၣ်လီၤ. ဒီးတၢ်အဝဲအံၤ အကမၤတၢ်မၤဒ်လဲၣ်န့ၣ်, ဖဲအပူၤကွံာ် ၁၂လါအတီၢ်ပူၤန့ၣ် ပမၤတ့ၢ်လံတၢ်ဖံးတၢ်မၤအါမး, စးထီၣ်လၢ တၢ်ဃုထၢန့ၣ်လီၤ.”
ဒ်သိးပှၤမၤကမၣ်တၢ်သ့ၣ်တဖၣ် ဃုမၤဆူးမၤဆါအါထီၣ်ပှၤကညီသုတန့ၢ်တဂ့ၤအဂီၢ်, Sarah Quick စံးဝဲဒၣ် ပှၤဂဲၤလိာ်တၢ်လၢတၢ်အံၤအဂီၢ်သ့ၣ်တဖၣ်ဒီး ပှၤအဂုၤအဂၤ လၢအတူၢ်ဘၣ် တၢ်မၤတၢ်စုဆူၣ်ခီၣ်တကး ခီဖျိ တၢ်သ့ၣ်ဖးအဲၣ်တီ အဲးဖ် တဆီသ့ၣ်တဖၣ်န့ၣ်, သူၣ်ဆူၣ်သးဆူၣ်လၢ တၢ်ကတြီတံာ် ပှၤမၤကမၣ်တၢ်သ့ၣ်တဖၣ် အတၢ်သူပျဲၢ်စီၣ်အံၤန့ၣ်လီၤ.
“တၢ်အဲၣ်တၢ်ရ့လိာ်လၢ အဒိးသန့ၤထီၣ်အသးလၢ တၢ်မၤတၢ်စုဆူၣ်ခီၣ်တကးန့ၣ် မ့ၢ်ဝဲတၢ်မၤဟးဂူာ်ဟးဂီၤတၢ်, မ့ၢ်လၢအပၣ်ဃုာ်ဒီး တၢ်မၤဟးဂီၤကွံာ် တၢ်နာ်အီၣ်လိာ်သး အဃိန့ၣ်လီၤ. ဒီးပှၤကညီသ့ၣ်တဖၣ် ကြၢးဘၣ်လၢ အသူ အဲးဖ်သ့ၣ်တဖၣ် န့ၢ်ဝဲဒၣ် လၢအတဘၣ်အိၣ်ဒီး တၢ်သူၣ်ပျံၤသးပျံၤ ပှၤလၢအဝဲသ့ၣ်တသ့ၣ်ညါအီၤဘၣ်သ့ၣ်တဖၣ် ကဟံးန့ၢ် တၢ်ဘျုးအဖှိၣ် ဒီးအဝဲသ့ၣ် တၢ်နာ်အီၣ်န့ၣ်လီၤ.”
Kyam Maher စံးဝဲဒၣ်, တၢ်ဆီတလဲမၤဂ့ၤထီၣ် အတၢ်ရဲၣ်တၢ်ကျဲၤအံၤ ကမၤတၢ်မၤဒ်လဲၣ် အဂ့ၢ်အကျိၤလီၤတံၢ်လီၤဆဲးန့ၣ် အဝဲသ့ၣ် မၤဝဲတၢ်မၤအဖၢမုၢ်န့ၣ်လီၤ.
“တသ့ဖဲအသ့န့ၣ် ပသးအိၣ်မၤကဲထီၣ်အီၤ လၢအဆိအချ့. ဘၣ်ဆၣ်သနာ်က့ ဖဲနမၤတၢ်ဆီတလဲမၤဂ့ၤထီၣ်ဒ်သိးအံၤတဘျီလၢ်လၢ်, ဖဲနမၤဝဲဒၣ် ဟီၣ်ခိၣ်ဒီဘ့ၣ် တၢ်ဘှီဘၣ်မၤဂ့ၤထီၣ် အဆိကတၢၢ်အံၤအခါ, နအဲၣ်ဒိးမၤလီၤတံၢ်လၢ အမ့ၢ်တၢ်လၢအဘၣ်မူးမူးနီၣ်နီၣ်တခါန့ၣ်လီၤ. အဃိန့ၣ် ပအဲၣ်ဒိးမၤအီၤချ့ချ့ နာ်သက့ တသ့ဖဲအသ့န့ၣ် ပအဲၣ်ဒိးကျၢၢ်ဘၢအီၤန့ၢ်ဝဲ အတကွီၣ်ဖးလဲၣ်, ဒီး တသ့ဖဲအသ့န့ၣ် မၤအီၤလၢအဘၣ်မူးမူးနီၣ်နီၣ်န့ၣ်လီၤ.”
ဘၣ်ဆၣ်သနာ်က့ ပှၤဂဲၤလိာ်တၢ်ဖိ လၢအမ့ၢ်ဒ်သိး Leesa Scanlon, လၢအမ့ၢ် ပှၤလဲၤခီဖျိဘၣ် ဟံၣ်ပူၤဃီပူၤဒီး မုၣ်ခွါက့ၢ်ဂီၤ တၢ်မၤတၢ်စုဆူၣ်ခီၣ်တကးတဂၤ, အကပၣ်ဃုာ်ဝဲဒၣ်ဖဲတၢ်တၢၣ်ပီၣ်တဲသကိးအံၤအပူၤန့ၣ်လီၤ.
Leesa စံးဝဲဒၣ် အဝဲသ့ၣ် တၢ်ပညိၣ်ကွၢ်ဆိအံၤ မ့ၢ်ဝဲတၢ်လၢအလုၢ်ဒိၣ်ပှ့ၤဒိၣ်န့ၣ်လီၤ.
“လၢကမၤဆူၣ်ထီၣ် တၢ်ဟံးဂ့ၢ်ဝီမူဒါအံၤအဂီၢ် တၢ်ကွၢ်ဃုဒုးအိၣ်ထီၣ်ကျိၤကျဲလၢ တၢ်သူအီၤသ့နီၣ်ကီၢ်န့ၣ် ယဆီၣ်ထွဲအီၤ ဒီး တကတီၢ်ဃီန့ၣ် တၢ်မၤဆူၣ်ထီၣ်တၢ် အကျိၤအကျဲ ဖးလဲၢ်သ့ၣ်တဖၣ်အကျါ, တၢ်အဝဲအံၤမ့ၢ်ဒၣ် တၢ်အက့အခီ တခါဖိလီၤန့ၣ် ပကဘၣ်ပာ်ပနီၣ်အီၤစ့ၢ်ကီးန့ၣ်လီၤ. ဖဲတၢ်ဆီတလဲမၤဂ့ၤထီၣ်တၢ်အပူၤန့ၣ်, တၢ်ကဘၣ်မၤစ့ၢ်ကီးဝဲဒၣ် တၢ်ဟ့ၣ်လီၤတၢ်သ့ၣ်ညါနၢ်ပၢၢ်, တၢ်နုာ်လီၤကျဲၤဃူဆိတၢ်ဖဲတၢ်ဘၢၣ်စၢၤ, တၢ်ဆီတလဲမၤဂ့ၤထီၣ်သဲစးဂ့ၢ်ဝီ, ဒီး မၤဂ့ၤထီၣ် တၢ်တီၣ်ဖျါထီၣ်တၢ်ဂ့ၢ် အကျိၤအကျဲသ့ၣ်တဖၣ်န့ၣ်လီၤ. ဒ်သိးဒီး အကမ့ၢ်ဝဲဒၣ် တၢ်ဆီလီၤပာ်လီၤန့ၢ်တၢ်လၢအဝဲသ့ၣ်အဂီၢ်န့ၣ်, ပှၤကညီလၢအဘၣ်ဒိဘၣ်ထံးခီဖျိသနူကျိၤကျဲသ့ၣ်တဖၣ်အံၤ ကြၢးဘၣ်မ့ၢ်ဝဲဒၣ်ပှၤလၢ အပာ်ဖျါထီၣ် အတၢ်ထံၣ်တၢ်ဆိကမိၣ်န့ၣ်လီၤ.”
နၤ မ့တမ့ၢ် ပှၤလၢနသ့ၣ်ညါအီၤတဂၤဂၤ အဲၣ်ဒိးတဲသကိးဘၣ်ဃး မုၣ်ခွါက့ၢ်ဂီၤ တၢ်မၤဆူးမၤဆါ မ့တမ့ၢ် တၢ်မၤမဲာ်ဆှးသ့ၣ်တဖၣ်, ဟံၣ်ဖိဃီဖိ မ့တမ့ၢ် ဟံၣ်ပူၤဃီပူၤ တၢ်မၤဆူၣ်မၤဆီးသ့ၣ်တဖၣ်အဂ့ၢ်န့ၣ်, ကိးဘၣ် 1800RESPECT ဖဲလီတဲစိနီၣ်ဂံၢ် ၁၈ဝဝ ၇၃၇ ၇၃၂ မ့တမ့ၢ် လဲၤနုာ်လီၤအိၣ်သကိးဘၣ် www.1800RESPECT.org.au တက့ၢ်. တၢ်အိၣ်သးမ့ၢ်အိၣ်လၢ ဂ့ၢ်ဂီၢ်အူအပူၤတခီ, ကိးဘၣ် ဝးသၢဖျၢၣ် — 000 တက့ၢ်.
