Spain ဒီး Belgium ဖျၢၣ်ထူကရူၢ်သ့ၣ်တဖၣ်လဲၤထီၣ်ဘၣ်ဝဲဒၣ်ဆူ ခွးတါ—ဖဲးလ်နၢၤ လံ, ဒီးမ့မ့ၢ်လၢ World Cup—ဟီၣ်ခိၣ်ဒီဘ့ၣ်ဖျၢၣ်ထူ အဟံၣ်ကစၢ် ကီၢ်အမဲရကၤဖျၢၣ်ထူကရူၢ်ဒီး Cristiano Ronaldo ပှၤလိာ်ကွဲဖျၢၣ်ထူဖိအ Portugal ဖျၢၣ်ထူကရူၢ်န့ၣ် အဝဲသ့ၣ်အတၢ်ပြၢဘၣ်ကတၢၢ်ကွံာ်ဝဲဒီးတၢ်သးသဘှံးန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၂၆ သီတသီ တၢ်ပာ်ဖျါအဘိၣ်န့ၣ်လီၤ.
———
Portugal ဒီး Spain လၢအမ့ၢ်ခိၣ်ဃၢၤထံကီၢ်ခံဘ့ၣ် အဖျၢၣ်ထူကရူၢ်သ့ၣ်တဖၣ် ထူပြၢလိာ်အသးဖဲ Dallas ပျီပူၤ ဒ်သိးကထီၣ်ဘၣ်ဝဲဒၣ်ဆူ ကွးတါဖဲးလ်နၢၤ အဂီၢ် န့ၣ်လီၤ.
အဝဲသ့ၣ်အတၢ်လိာ်ကွဲပြၢန့ၣ် ဘူးထီၣ်လၢ အကဘၣ်လိာ်ကွဲဝဲဒၣ်တုၤလၢ တၢ်ဟ့ၣ်အါထီၣ်တၢ်ဆၢကတီၢ်, နာ်သက့ ဖဲလၢတၢ်ပာ်ဖှိၣ်ဃုာ်ဝဲဒၣ် စပ့ၣ်ကရူၢ် တၢ်လဲလိာ်ပှၤလိာ်ကွဲခၢၣ်စးသ့ၣ်တဖၣ်ဒီး တၢ်ဘၣ်ဒိဘၣ်ထံးအဆၢကတီၢ်သ့ၣ်တဖၣ်အတီၢ်ပူၤန့ၣ်, Ferran Torres ဆှၢဃီၤဝဲဒၣ် ဖျၢၣ်ထူဆူ Mikel Merino အအိၣ်ဒီး အဝဲသွီနုာ်လီၤဝဲဒၣ်ကိ လၢအထံးနုာ်လီၤဝဲဒၣ်ဒီးအခိၣ်သၣ်ဃံ, ဒီး ဒိးန့ၢ်ဘၣ်ဝဲတၢ်မၤနၢၤအကိ ၁—ဝ ကိန့ၣ်လီၤ.
တၢ်လိာ်ကွဲရှူတဘျီအံၤန့ၣ် မ့ၢ်ဝဲတၢ်မၤကတၢၢ်ကွံာ် အတၢ်မၤနီၣ်တခါလၢ Cristiano Ronaldo အဂီၢ်, မ့ၢ်လၢပီးတူးကံး ဖျၢၣ်ထူကရူၢ် အကရူၢ်ခိၣ်အံၤ တချုးလၢ အဝဲဟဲနုာ်လီၤလိာ်ကွဲဖဲတၢ်ပြၢတဘျီအံၤအပူၤဒ်ဘၣ်န့ၣ်, အဝဲစံးတ့ၢ်ဝဲဒၣ်လၢ တၢ်လိာ်ကွဲပြၢတဘျီအံၤန့ၣ် မ့ၢ်ဝဲဒၣ် အဝဲ World Cup တၢ်လိာ်ကွဲပြၢလၢခံကတၢၢ်တဘျီန့ၣ်လီၤ.
ဖဲလၢပှၤစံၣ်ညီတဲာ်တၢ်ဖဲပျီပူၤ အူသီၣ်ထီၣ်ဝဲဒၣ် ဝံစၢၤလ် လၢတၢ်လိာ်ကွဲပြၢအံၤဝံၤလံတဘျီအခါ ပှၤလိာ်ကွဲဖျၢၣ်မံၤဟူသၣ်ဖျါလၢအသးနံၣ်အိၣ် ၄၁နံအံၤ ဟးထီၣ်ကွံာ်ဝဲဒၣ်လၢပျီပူၤ ပှဲၤဒီးမဲာ်ထံန့ၣ်လီၤ. ဖဲတၢ်လိာ်ကွဲပြၢအံၤဝံၤအလီၢ်ခံ တကတီၢ်ဃီန့ၣ် Portugal ဖျၢၣ်ထူကရူၢ် အပှၤနဲၣ်တၢ် Roberto Martínez ဘိးဘၣ်သ့ၣ်ညါလီၤစ့ၢ်ကီးဝဲဒၣ် အဝဲတၢ်အိၣ်ဘှံးကွံာ်ဖဲတၢ်လိာ်ကွဲအပူၤန့ၣ်လီၤ.
လၢ စပ့ၣ်အဂီၢ်န့ၣ် စးထီၣ်လၢ ၂ဝ၁ဝ နံၣ် အဝဲသ့ၣ် ဒိးန့ၢ်ဘၣ် ခိၣ်ဖးတၢဝံၤအလီၢ်ခံန့ၣ်, ခဲကနံၣ်အံၤ အဝဲသ့ၣ် တၢ်လဲၤထီၣ်ဘၣ်ဆူ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ကွးတါဖဲးလ်နၢၤ အပတီၢ်အံၤ မ့ၢ်ဝဲတၢ်အဆိကတၢၢ်တဘျီန့ၣ်လီၤ.
ဖဲဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢအံၤအပူၤန့ၣ် စပ့ၣ်ဖျၢၣ်ထူကရူၢ်အံၤ လဲၤထီၣ်ဘၣ်ဝဲဒၣ်ဆူ ကွးတါဖဲးလ်နၢၤ လံနာ်သက့န့ၣ် အတဘၣ်ဟ့ၣ်လီၤကွံာ်ဝဲဒၣ် ကိနီတဖျၢၣ်ဒ်ဘၣ်န့ၣ်လီၤ.
———
မ့မ့ၢ်လၢ ကီၢ်အမဲရကၤ ဒီး Belgium ဖျၢၣ်ထူကရူၢ် အတၢ်ထူပြၢန့ၣ် တချုးလၢ တၢ်ပြၢစးထီၣ်ဒ်ဘၣ်အခါ တၢ်သးစၢၢ်ဆၢအိၣ်ဝဲလၢအဝဲသ့ၣ်တၢ်ပြၢအံၤအဖီခိၣ်အါမး မ့ၢ်လၢ FIFA လဲလိာ်ကွံာ်ဝဲဒၣ် အမဲရကၤပှၤလိာ်ကွဲဖျၢၣ်ထူ Folarin Balogun အတၢ်ဒိးန့ၢ်ဘၣ် ကးဒ်အဂီၤ—red-card, ဒီး တၢ်ပဲၤအၢပဲၤသီသ့ၣ်တဖၣ်မ့ၢ်အိၣ်ဒီးတၢ်ဆၢတဲာ်အံၤနာ်သက့ ပျဲဝဲဒၣ်လၢ အကနုာ်လီၤလိာ်ကွဲဖဲတၢ်ပြၢအပူၤန့ၣ်လီၤ.
တၢ်ပဲၤအၢပဲၤသီ သ့ၣ်တဖၣ်မ့ၢ်အိၣ်ထဲလဲၣ်နာ်သက့ Belgium ဖျၢၣ်ထူကရူၢ်အံၤ ပာ်လီၤတဲာ်ကွံာ်တၢ်ဂ့ၢ်အံၤဆူတၢ်ကပၤဒီး မၤနၢၤဝဲဒၣ်တၢ်ပြၢအံၤ ၄—၁ ကိ လၢအဒုးဟးထီၣ်ကွံာ်ဝဲဒၣ်ဟံၣ်ကစၢ်အံၤဖဲတၢ်လိာ်ကွဲပြၢတဘျီအံၤအပူၤန့ၣ်လီၤ.
ပှၤလိာ်ကွဲဖိ Charles De Ketelaere ထူနုာ်ဆိန့ၢ်ဝဲဒၣ်ကိတဖျၢၣ် လၢ Belgium အဂီၢ် တချုးဖဲ အမဲရကၤဖျၢၣ်ထူကရူၢ် က့ၤသွီကဒါက့ၤတကိ လၢအမ့ၢ်ဝဲဒၣ်ဖဲ တၢ်လိာ်ကွဲပြၢ တုၤလီၤ ၃၁ မံးနံးအခါ, နာ်သက့ ၂မံးနံးအလီၢ်ခံန့ၣ် De Ketelaere ထူနုာ်ကဒီးဝဲဒၣ်ကိတဖျၢၣ်ကဒီးန့ၣ်လီၤ.
မ့ၢ်လၢ ပှၤဖီၣ်ကိ အတၢ်မၤကမၣ်တၢ်တၢ်ဒိၣ်ဒိၣ်မုၢ်မုၢ်အဃိ ကဲထီၣ်ဝဲဒၣ် တၢ်မၤစၢၤလၢ Belgium အဂီၢ်, ဒီး Romelu Lukaku သွီနုာ်လီၤဝဲဒၣ်ကိလွံၢ်ဖျၢၣ်တဖျၢၣ် လၢအကဲထီၣ်ဝဲဒၣ် တၢ်မၤနၢၤကိန့ၣ်လီၤ.
ဖဲတၢ်လိာ်ကွဲအံၤဝံၤအလီၢ်ခံန့ၣ် ကီၢ်အမဲရကၤ ဖျၢၣ်ထူပှၤနဲၣ်တၢ် Mauricio Pochettino အၢၣ်လီၤဝဲလၢ အဝဲသ့ၣ်ခီတက့န့ၣ် ပာ်ဖျါထီၣ်အတၢ်လိာ်ကွဲအက့ၢ်အဂီၤတန့ၢ်ဘၣ်န့ၣ်လီၤ.
“လၢအစးထီၣ်အခီၣ်ထံးအခါလံ. ပတၢ်ဘျးစဲတအိၣ်ဒီးတၢ်ပြၢအံၤဘၣ်. ပဖီၣ်ဂၢၢ်တၢ်လိာ်ကွဲအံၤတန့ၢ်ဘၣ်. ပက့ၤသွီနုာ်ကဒါက့ၤ ကိန့ၢ်ဝဲဒၣ် ၁—၁ ကိ နာ်က့န့ၣ် ပဘၣ်က့ၤဟ့ၣ်လီၤကဒါက့ၤအီၤတဘျီကဒီး. တၢ်လိာ်ကွဲကဒါလၢခံသ့ၣ်တဖၣ်န့ၣ် အဖးကီဖိညါ. ပပာ်ကဖၢလၢသးလၢ ဘဲးလ်ကၠံၤယါမ်အဂီၢ်. အဝဲသ့ၣ်လိာ်ကွဲဂ့ၤန့ၢ်ပှၤ. ယဆိကမိၣ်န့ၣ်တၢ်အံၤတမ့ၢ်ဝဲဒၣ်မုၢ်နံၤလၢပဂီၢ်ဘၣ်. တၢ်အံၤတမ့ၢ်လၢပဟးဃုတၢ်ပျဲပူၤပခိၣ် မ့တမ့ၢ် ဟးဆှးတၢ်ဂ့ၢ်လိာ်ဘှီလိာ်ဘၣ်. ဘၣ်မနုၤအဃိလဲၣ်န့ၣ် တၢ်လၢပညီနုၢ်ဒုးနဲၣ်ဖျါအီၤန့ၢ်သ့ၣ်တဖၣ်န့ၣ် ပဒုးနဲၣ်ဖျါတ့ၢ်အီၤတန့ၢ်ဘၣ်, ဒီးတၢ်အံၤမ့ၢ်ဝဲဒၣ်တၢ်နီၣ်ကီၢ်န့ၣ်လီၤ.”
ခဲကနံၣ်အံၤန့ၣ် Belgium ကဘၣ်တိနိၣ်လိာ်အသးဒီး Spain ဖဲ ဆံးမံဖဲးလ်နၢၤ အပတီၢ်န့ၣ်လီၤ.
———
မ့ၢ်ကွၢ်လၢ မုၢ်ပျဲၤ—မုၢ်သၢနံၤ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ၂၇သီအနံၤ တၢ်ပြၢအဂီၢ်န့ၣ်, Argentina ကဘၣ်ထူပြၢဒီး Egypt, လၢအမ့ၢ်ဖျၢၣ်ထူကရူၢ်လၢအဟဲထီၣ်တုၤဖဲ ၁၆ကရူၢ် တၢ်ပြၢအပတီၢ်အဆိကတၢၢ်တဘျီန့ၣ်လီၤ.
မ့မ့လၢတၢ်ပြၢအဂၤတကရူၢ်န့ၣ် မ့ၢ်ဝဲဒၣ် Switzerland ကဘၣ်ထူပြၢဒီး Colombia, တၢ်လိာ်ကွဲပြၢတဘျီအံၤအပူၤန့ၣ် ဖျၢၣ်ထူကရူၢ်သ့ၣ်တဖၣ်အံၤ အရှူတအိၣ်နီတဘျီဒ်ဘၣ် ဒီးအဝဲသ့ၣ်ကဘၣ်လိာ်ကွဲဝဲဒၣ် လၢကမၤန့ၢ်ဘၣ်အလီၢ်ဖဲ ကွးတါဖဲးလ်နၢၤ အပတီၢ် အဂီၢ်န့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၂၆ သီအနံၤအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
