စပ့ၣ်ဖျၢၣ်ထူကရူၢ် မၤန့ၢ်ဝဲဒၣ် တၢ်လီၢ်ဖဲ FIFA World Cup—ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ လၢခံကတၢၢ်—ဖဲးနၢၤ အပတီၢ် မ့ၢ်လၢ အမၤနၢၤဝဲဒၣ် ဖြၣ်စ့ၣ်ဖျၢၣ်ထူကရူၢ် ၂—ဝ ကိ ဖဲအဝဲသ့ၣ် ဆံးမံဖဲးနၢၤအပတီၢ် တၢ်ပြၢအပူၤန့ၣ်လီၤ. တၢ်ရှူတဘျီအံၤန့ၣ် မ့ၢ်ဝဲဒၣ် တၢ်မၤကတၢၢ်ကွံာ် Les Bleus—ဖြၣ်စ့ၣ်ဖျၢၣ်ထူကရူၢ် အတၢ်မုၢ်လၢ် လၢကစိာ်ထီၣ်ဘၣ် World Cup ခိၣ်ဖးတၢ သၢဘျီတဘျီ, ဒီးခဲကနံၣ်အံၤန့ၣ် အဝဲသ့ၣ် ဘၣ်သုးကွံာ်အတၢ်သးစၢၢ်ဆၢဆူ ခိၣ်ဖးသၢ တၢ်လိာ်ကွဲပြၢ လၢကဘၣ်လိာ်ကွဲဝဲဖဲ မုၢ်ဘူၣ်—မုၢ်ဃုနံၤန့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၃၄သီတသီတၢ်ပာ်ဖျါအဘိၣ်န့ၣ်လီၤ.
———
ဒ်သိးကန့ၢ်ဘၣ်တၢ်လီၢ်ဖဲ FIFA World Cup—ဟီၣ်ခိၣ်ဒီဘ့ၣ်ဖျၢၣ်ထူတၢ်ပြၢ အလီၢ်ခံကတၢၢ် အပတီၢ်အဂီၢ် ယူရပၤ ဖျၢၣ်ထူကရူၢ်ဖးဒိၣ်ခံဖု ထူပြၢလိာ်အသးဖဲ ကမျၢၢ်ဟဲကွၢ်ကီတၢ်အါန့ၢ် ၇ဝ,ဝဝဝ ဂၤအမဲာ်ညါ, ဒီး စပ့ၣ်ဖျၢၣ်ထူကရူၢ် မၤနၢၤဝဲဒၣ် ဖြၣ်စ့ၣ် ဖျၢၣ်ထူကရူၢ်န့ၣ်လီၤ.
စပ့ၣ်ဖျၢၣ်ထူကရူၢ်အံၤ တၢ်လိာ်ကွဲပြၢဒီတကတီၢ်န့ၣ် ဖီၣ်ဂၢၢ်ဝဲန့ၢ်အသိး, တၢ်ခွဲးတၢ်ယာ်သ့ၣ်တဖၣ်န့ၣ် အါတက့ၢ် အဝဲသ့ၣ် စှိာ်ဃာ်ဝဲဒၣ်အီၤဒီး အတပျဲ ဖြၣ်စ့ၣ် မၤဆူၣ်ထီၣ်အဂံၢ်အဘါ ဒ်လၢအလီၢ်အိၣ်အသိးဘၣ်န့ၣ်လီၤ.
ဖဲတၢ်လိာ်ကွဲပြၢတုၤလီၤ ၂၂မံးနံးန့ၣ် ပှၤလိာ်ကွဲဖိ Lamine Yamal န့ၢ်ဘၣ်ဝဲ ဖဲးလ်နၢၤတံၤ ဖျၢၣ်ထူတဖျၢၣ် ဒီး ဘၣ်တၢ်ထူနုာ်လီၤဝဲဒၣ်အီၤလၢ ပှၤလိာ်ကွဲလၢတၢ်မဲာ်ညါ Mikel Oyarzabal န့ၣ်လီၤ. ဖဲန့ၣ်အလီၢ်ခံဖဲတၢ်ပြၢတုၤလီၤ ၅၈ မံးနံးန့ၣ် Pedro Porro ထူနုာ်လီၤကဒီးဝဲဒၣ် ကိခံဖျၢၣ်တဖျၢၣ် လၢစပ့ၣ်ကရူၢ်အဂီၢ်န့ၣ်လီၤ.
ဖဲန့ၢ်အလီၢ်ခံ Yamal ထူနုာ်လီၤစ့ၢ်ကီးဝဲဒၣ် ကိတဖျၢၣ် နာ်သက့ ဘၣ်တၢ်ဆၢတဲာ်အီၤလၢ အအိၣ်ဝဲဒၣ်လၢ စံချၢ ဒီး ကိအံၤအတကိဘၣ်န့ၣ်လီၤ.
မ့ၢ်လၢ စပ့ၣ်ဖျၢၣ်ထူကရူၢ် ပှၤလိာ်ကွဲဖဲတၢ်ခၢၣ်သးသ့ၣ်တဖၣ် လူၤပိာ်ထွဲတၢ်လိာ်ကွဲတၢ်သိၣ်တၢ်သီဂ့ၤဂ့ၤ ဒီး လိာ်ကွဲပြၢဝဲဒ်သိး ပှၤတူၢ်ခီၣ်တၢ်တခီအဃိ ကးတံာ်ဝဲဒၣ် ဖြၣ်စ့ၣ်ကရူၢ် ပှၤလိာ်ကွဲဖျိးစိ လၢအလိာ်ကွဲဖဲတၢ်မဲာ်ညါ ဒီး ခီၣ်ဖံးထူခိၣ်ဖးကစၢ် Kylian Mbappé အတၢ်လိာ်ကွဲ, လၢအလိာ်ကွဲဝဲန့ၢ်ဒၣ်ထဲစှၤကိးဖိန့ၣ်လီၤ.
SBS ဖျၢၣ်ထူ ပှၤပဲၤထံနီၤဖးတၢ် ဒီး ကါနါ ထံဂုၤကီၢ်ဂၤ ပှၤထူဖျၢၣ်ထူလီၢ်လံၤ Kevin-Prince Boateng စံးဝဲဒၣ် တၢ်ပြၢတဘျီအံၤ စပ့ၣ်လိာ်ကွဲအီၤ န့ၢ်ဂ့ၤဒိၣ်မးန့ၣ်လီၤ.
“စပ့ၣ်ကရူၢ်အံၤ ဆီၣ်တံၢ်လီၤအဝဲသ့ၣ်ဒီဖျၢၣ်ထူန့ၢ်ဝဲဒၣ်, လၢအတစိာ်ဃုာ်ဖျၢၣ်ထူဘၣ်ဒီး အိးထီၣ်န့ၢ်ကျဲလၢတဂၤဒီးတဂၤကဟ့ၣ်လီၤသးအဂီၢ်, မ့ၢ်တၢ်လၢအလီၤပတြၢၤဒိၣ်မး. အဝဲသ့ၣ်ဒီသဒၢလီၤသးဒ်လဲၣ်, အဝဲသ့ၣ်လိာ်ကွဲအီၤချ့ချ့ဒ်လဲၣ်, က့ၤဟံးန့ၢ်ကဒါဝဲဖျၢၣ်ထူဒီး အဝဲသ့ၣ်ထုးကွံာ်ဝဲပှၤလိာ်ကွဲဖဲတၢ်မဲာ်ညါလွံၢ်ဂၤ, ဒီး ထူနုာ်လီၤဝဲဒၣ်ကိခံဖျၢၣ်န့ၣ်လီၤ. အဝဲသ့ၣ်န့ၣ် တန့ၢ်သွီဘၣ်ကိလိၤလိၤဘၣ်နာ်သက့ လိာ်ကွဲဝဲဒၣ်မူးမူးနီၣ်နီၣ်. မ့ၢ်ဝဲစပ့ၣ်အတၢ်လိာ်ကွဲတခါလၢအဂ့ၤဒိၣ်မး. အဝဲသ့ၣ်မ့ၢ်လိာ်ကွဲဒ်သိးအံၤတဘျီကဒီးန့ၣ်, အဝဲသ့ၣ်ကမၤနၢၤဝဲဒၣ်တၢ်ဒီတကျဲ, ဒီးပတဲအီၤသ့လၢ အဝဲသ့ၣ်န့ၣ်မ့ၢ်ဝဲဒၣ် ဖျၢၣ်ထူကရူၢ်ထဲတဖုဧိၤလၢ အမၤနၢၤဝဲဒၣ် ဖြၣ်စ့ၣ်ဖျၢၣ်ထူကရူၢ်န့ၣ်လီၤ. နာ်သက့ အဝဲသ့ၣ် ဘၣ်လိာ်ကွဲဝဲဒၣ်ဂ့ၤဂ့ၤ ဒီး တနံၤအံၤန့ၣ် အဝဲသ့ၣ်မၤအီၤန့ၢ်ဝဲန့ၣ်လီၤ.”
ခဲကနံၣ်အံၤန့ၣ် စပ့ၣ်လဲၤထီၣ်ဘၣ်ဝဲဆူ World Cup—ဟီၣ်ခိၣ်ဒီဘ့ၣ်ဖျၢၣ်ထူတၢ်ပြၢ ဖဲးနၢၤလ် အပတီၢ် ဒီး မ့ၢ်ဝဲဒၣ် အဝဲသ့ၣ်တၢ်ထီၣ်ဘၣ်ဖဲပတီၢ်အံၤ ခံဘျီတဘျီန့ၣ်လီၤ. အဝဲသ့ၣ်ထီၣ်ဘၣ်ဆူ ဟီၣ်ခိၣ်ဒီဘ့ၣ်ဖျၢၣ်ထူတၢ်ပြၢ ဖဲးနၢၤလ် အပတီၢ် အဆိကတၢၢ်တဘျီန့ၣ်မ့ၢ်ဝဲဒၣ်ဖဲ ၂ဝ၁ဝနံၣ်အခါန့ၣ်လီၤ.
တၢ်ရှူတဘျီအံၤန့ၣ် မ့ၢ်ဝဲဒၣ် တၢ်မၤနီၣ်လၢ တၢ်မၤကတၢၢ်ကွံာ်ဝဲဒၣ် စိၤတစိၤ လၢဖြၣ်စ့ၣ်အဂီၢ်, လၢအဝဲသ့ၣ် ဖျၢၣ်ထူပှၤနဲၣ်တၢ် Didier Deschamps ဟးထီၣ်ကွံာ်လၢအမူဒါလီၢ်လၤအပူၤ ဖဲလၢအဝဲတီခိၣ်ရိၤမဲဝဲ ဖျၢၣ်ထူကရူၢ်အံၤ ၁၄နံၣ်ဝံၤအလီၢ်ခံန့ၣ်လီၤ.
ဖဲအဝဲ အတၢ်တီခိၣ်ရိၤမဲအဖီလာ်အပူၤ ဖြၣ်စ့ၣ်ဖျၢၣ်ထူကရူၢ်အံၤ အစှၤကတၢၢ်န့ၣ် လဲၤထီၣ်တုၤဘၣ်ဝဲဒၣ်ဆူ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ကွးတါ ဖဲးလ်နၢၤအပတီၢ်ကိးဘျီဒဲး လၢအမ့ၢ်: ဖဲ ၂ဝ၁၄နံၣ်န့ၣ် ထီၣ်ဝဲတုၤဖဲ ကွးတါဖဲးလ်နၢၤအပတီၢ်, ၂ဝ၁၈နံၣ်န့ၣ် န့ၢ်ဘၣ်ဝဲဒၣ် ခၠၣ်ပံၣ်ယၣ်—ခိၣ်ဖးတၢ, ၂ဝ၂၂နံၣ်န့ၣ် န့ၢ်ဘၣ်ဝဲဒၣ်ခိၣ်ဖးသၢ ဒီး ဖဲ ၂ဝ၂၆နံၣ်အံၤန့ၣ် ထီၣ်ဘၣ်ဝဲဒၣ်တုၤလၢ ဆံးမံဖဲးလ်နၢၤ အပတီၢ်န့ၣ်လီၤ.
Les Bleus—ဖြၣ်စ့ၣ်ဖျၢၣ်ထူကရူၢ်အံၤ အခဲအံၤန့ၣ် အဝဲသ့ၣ်ကဘၣ်ဃၣ်ကဒါအဝဲသ့ၣ်အတၢ်သးစၢၢ်ဆၢဖဲ ခိၣ်ဖးသၢ အပတီၢ် တၢ်လိာ်ကွဲပြၢ လၢတၢ်ကလိာ်ကွဲအီၤဖဲ မုၢ်ဘူၣ်—မုၢ်ဃုနံၤ, ဒ်အမ့ၢ် အဝဲသ့ၣ် တၢ်ခွဲးတၢ်ယာ် လၢခံကတၢၢ်တဘျီ လၢကမၤကတၢၢ်ဝဲ အဝဲသ့ၣ်ပှၤဖျိးစိအံၤ ပှဲၤဒီးကံၢ်စီ လၢအပတီၢ်ထီန့ၣ်လီၤ.
———
ခဲမုၢ်ဆ့ၣ် တၢ်လိာ်ကွဲပြၢအပူၤန့ၣ်, မ့ၢ်ဝဲဒၣ် Argentina ဒီး England အတၢ်ထူပြၢလိာ်အသးဖဲဆံးမံဖဲးလ်နၢၤအပတီၢ် ဒီး မ့ၢ်ဝဲဒၣ် အဝဲသ့ၣ်ခံဖုအံၤအတၢ်တိနိၣ်လိာ်အသးဖဲပတီၢ်အံၤ ခံဘျီတဘျီန့ၣ်လီၤ.
ဒ်သိးလၢ အံးထလံး ဒီး ဘရၤစံလ် ထံကီၢ်သ့ၣ်တဖၣ်အသိး, အးကၠ့းထံနါအံၤ ကျဲးစၢၤလူၤပိာ်ဝဲဒၣ်တၢ်စံၣ်စိၤတဲစိၤ လၢအအိၣ်ဒီးတၢ်ပညိၣ်ဒ်သိးကကဲထီၣ်ဘၣ် ထံကီၢ်သၢဘ့ၣ်တဘ့ၣ် လၢအဒီသဒၢ ပိာ်ခွါဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ခိၣ်ဖးတၢ ခၠၣ်ပံၣ်ယၣ်—ပှၤဖျိးစိ န့ၢ်ဝဲန့ၣ်လီၤ.
မ့မ့ၢ်လၢ England ခီတက့န့ၣ်, ကျဲးစၢးမၤကတၢၢ်ကွံာ်ဝဲဒၣ် နံၣ် ၆ဝ အတၢ်အိၣ်ခိးမၤန့ၢ် ဟီၣ်ခိၣ်ဒီဘ့ၣ်ဖျၢၣ်ထူတၢ်ပြၢ အခိၣ်ဖးတၢန့ၣ်လီၤ.
စးထီၣ်လၢ ၁၉၆၆နံၣ် အဝဲသ့ၣ်န့ၢ်ဘၣ်ခိၣ်ဖးတၢ တဘျီဝံၤအလီၢ်ခံန့ၣ် Three Lions—အဲးကလံး ဖျၢၣ်ထူကရူၢ်အံၤ ဟဲထီၣ်ဘၣ်ဝဲတုၤဖဲ ဆံးမံဖဲးနၢၤအပတီၢ် အိၣ်ဝဲဒၣ်ထဲခံဘျီဧိၤ, လၢအမ့ၢ်ဝဲဒၣ်ဖဲ ၁၉၉ဝ နံၣ်ဒီး ၂ဝ၁၈ နံၣ်အခါန့ၣ်လီၤ.
ဖဲလါယူၤလံ ၁၆သီ, မုၢ်လ့ၢ်ဧိၤ—မုၢ်လွံၢ်နံၤ စးထီၣ်လၢ ဂီၤခီ ၄နၣ်ရံၣ်န့ၣ် SBS ဒီး SBS On Demand ကစးထီၣ်ဒုးနဲၣ်ဝဲဒၣ် တၢ်ပြၢလိာ်သးအဂ့ၢ်အံၤန့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၃၂ သီအနံၤအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
