ဖျၢၣ်ထူတၢ်လိာ်ကွဲလၢတၢ်သးပ့ၤနီၣ်အီၤတန့ၢ်ဘၣ် လၢအယံၤတလါ ဒီး တၢ်ကွဲပြၢအဘျီ ၁ဝ၄ ဘျီဝံၤအလီၢ်ခံ, စပ့ၣ် ကဲထီၣ်ဝဲဒၣ် ၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ—FIFA World Cup 2026 ခၠၣ်ပံၣ်ယၣ်—ပှၤဖျိးစိ, လၢအမၤနၢၤကွံာ်ဝဲဒၣ် အးကၠ့းထံနါကရူၢ် ၁—ဝ ဖဲ ဖဲးနၢၤ တၢ်ပြၢအပတီၢ် ဒီး စိာ်ထီၣ်ဘၣ်ဝဲဖျၢၣ်ထူခိၣ်ဖးအဒိၣ်ကတၢၢ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ လၢခံကတၢၢ်တသီတၢ်ပာ်ဖျါအဘိၣ်န့ၣ်လီၤ.
အဝဲသ့ၣ်တၢ်စံၣ်စိၤတဲစိၤအပူၤန့ၣ် မ့ၢ်ဝဲအတၢ်ကဲထီၣ်ဘၣ် ဟီၣ်ခိၣ်ဒီဘ့ၣ် ပှၤဖျိးစိကတၢၢ် ခံဘျီတဘျီဒီး အဝဲအံၤန့ၣ်မ့ၢ်ဝဲဒၣ် ‘La Roja’ စပ့ၣ်ကီၢ်ဖျၢၣ်ထူကရူၢ် စိာ်ထီၣ်ဝဲဒၣ် FIFA World Cup တၢ်မၤနၢၤအခိၣ်ဖးန့ၣ်လီၤ.
အဝဲအံၤန့ၣ်မ့ၢ်တၢ်မၤနၢၤလၢ ဒုးကဲထီၣ်စ့ၢ်ကီးဝဲဒၣ် စပ့ၣ်မ့ၢ်ဖျၢၣ်ထူကရူၢ်တဖုလၢ အတၢ်လိာ်ကွဲပြၢ ၃၈ ဘျီအပူၤ အရှူတအိၣ်နီတဘျီဘၣ် ဒီး မၤနၢၤဝဲတၢ်ကိးဘျီဒဲး တပယူၤဃီန့ၣ်လီၤ.
အခဲအံၤန့ၣ် စပ့ၣ်ဖျၢၣ်ထူ ပိာ်ခွါကရူၢ်ဒီး ပိာ်မုၣ်ကရူၢ် ခံဖုလၢၤ မၤန့ၢ်ဝဲဒၣ် FIFA World Cup ခိၣ်ဖးတၢအဃိ, လၢတၢ်စံၣ်စိၤတဲစိၤအပူၤန့ၣ် စပ့ၣ် ကဲထီၣ်ဝဲ ထံကီၢ်တဘ့ၣ် လၢအဒိးန့ၢ်ဘၣ် ခိၣ်ဖးတၢ ခံခါလၢၤအံၤတဘျီဃီန့ၣ်လီၤ.
အဝဲအံၤန့ၣ်မ့ၢ်ဝဲဒၣ် တၢ်ပာ်ဖျါလၢခံကတၢၢ်န့ၣ်လီၤ.
ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲ — FIFA World Cup အတၢ်ပြၢလၢခံကတၢၢ် လၢအမ့ၢ် ယူရပၤ ခၠၣ်ပံၣ်ယၣ်—ပှၤဖျိးစိ စပ့ၣ်ဖျၢၣ်ထူကရူၢ် ဒီး ပှၤဒီသဒၢ ခၠၣ်ပံၣ်ယၣ်—ပှၤဖျိးစိ အးကၠ့းထံနါ ဖျၢၣ်ထူကရူၢ်သ့ၣ်တဖၣ် အတၢ်ပြၢလိာ်သးန့ၣ် ဘၣ်တၢ်မၤအီၤဖဲ နယူယီၣ်ခ် နယူကၠၢၤစံၤ တၢ်လိာ်ဘျီၣ်ဖးဒိၣ်အပူၤဒီး ပှၤဟဲကွၢ်အီတၢ်အိၣ်အါန့ၢ် ၈၂, ဝဝဝ ဂၤန့ၣ်လီၤ.
တၢ်ပြၢတဘျီအံၤ မ့ၢ်လၢ ကီၢ်အမဲရကၤကီၢ်ခိၣ် Donald Trump ဟဲထီၣ်ကွၢ်ကီအီၤဒီး တၢ်မၤဃံးဒိၣ်ထီၣ်ဝဲဒၣ် တၢ်ဘံၣ်တၢ်ဘၢအဃိ, တချုးတၢ်လိာ်ကွဲအံၤစးထီၣ်ဒ်ဘၣ်န့ၣ် ပှၤကလဲၤနုာ်လီၤကွၢ်ကီတၢ်သ့ၣ်တဖၣ်ဘၣ်အိၣ်ခိးဝဲဒၣ်တၢ်ဖးယံၤန့ၣ်လီၤ.
ဘၣ်ဆၣ်သနာ်က့ တုၤလၢတၢ်လိာ်ကွဲပြၢအံၤစးထီၣ်တဘျီန့ၣ် ပှၤကိးဂၤဒဲးအမဲာ်ချံန့ၣ်အိၣ်ဝဲဒၣ်ဖဲဖျၢၣ်ထူအံၤ ခိၣ်ဖးအဒိၣ်ကတၢၢ် အလိၤန့ၣ်လီၤ.
တၢ်လိာ်ကွဲပြၢလၢအန့ၢ်တၢ်မၤနၢၤအကိ ထဲကိအံၤ မ့မ့ၢ် တၢ်ပြၢလၢအဃံးမးတခါနာ်သက့ တၢ်ပြၢဒီတကတီၢ်န့ၣ် စပ့ၣ် မ့ၢ်ပှၤလၢ အဒိၣ်စိလုၢ်ဘၢဝဲတၢ်ပြၢအံၤန့ၣ်လီၤ. အဝဲသ့ၣ် ကရူၢ်လၢအအိၣ်ပှဲၤဒီး တၢ်ဒီသဒၢလီၤအသးဂ့ၤမးအံၤ ကာ်တံာ်လီၤကွံာ်ဝဲဒၣ် အးကၠ့းထံနါ အတၢ်ထီၣ်ဒုး ဒီး တုၤလၢ တၢ်ဆၢကတီၢ်အပိၣ် တၢ်ထူပြၢအပူၤတစုန့ၣ် ဒီဃာ်ဝဲဒၣ် ခၠၣ်ပံၣ်ယၣ်—ပှၤဖျိးစိအံၤန့ၢ်ဂ့ၤဂ့ၤ တုၤလၢအတန့ၢ်ဘၣ်ကိနီတဖျၢၣ်ဘၣ်န့ၣ်လီၤ.
တကတီၢ်ဃီန့ၣ် စပ့ၣ်ကရူၢ်အံၤ အတၢ်အိၣ်သးအိၣ်လၢ ကသွီကိန့ၣ် အိၣ်ဝဲဒၣ်လၢ အဖျၢၣ် ၂ဝ ဃၣ်ဃၣ်နာ်သက့, တၢ်ထူနုာ်လီၤကိ ၁၁ဖျၢၣ်န့ၣ် ပှၤဖီၣ်ကိ Emi Martínez ဖီၣ်အီၤန့ၢ်ဝဲဒၣ်ကိးဖျၢၣ်ဒဲးအဃိ မ့ၢ်ဝဲဒၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ လၢခံကတၢၢ်အတၢ်ပြၢ World Cup ဖဲးနၢၤ အပတီၢ် တၢ်ဖီၣ်ကိန့ၢ်အအါကတၢၢ် — လၢအပာ်မူပာ်ဂဲၤဝဲဒၣ် အးကၠ့းထံနါ ဖျၢၣ်ထူ အတၢ်မုၢ်လၢ်န့ၣ်လီၤ.
ဘၣ်ဆၣ်သနာ်က့ မ့ၢ်လၢ အးကၠ့းထံနါ ကရူၢ် အပှၤလိာ်ကွဲဖျၢၣ်ထူ Enzo Fernández တဂၤ ဖဲလၢအဒိးန့ၢ်ဘၣ်ဝဲဒၣ် ကးဒ်အလွဲၢ်ဘီခံဘ့ၣ် ဝံၤအလီၢ်ခံ န့ၢ်ဘၣ်ဝဲ ကးဒ်အလွဲၢ်ဂီၤဒီး ဘၣ်တၢ်ထုးထီၣ်ကွံာ်အီၤလၢ တၢ်လိာ်ကွဲပျီပူၤအဃိ အးကၠ့းထံနါကရူၢ်အံၤ ဖဲတၢ်ဟ့ၣ်လီၤအါထီၣ်တၢ်ဆၢကတီၢ် တၢ်ထူပြၢအပူၤန့ၣ် ဘၣ်လိာ်ကွဲက့ၤဝဲဒၣ်ဒီး အပှၤလိာ်ကွဲဖိထဲအဂၤတဆံန့ၣ်လီၤ.
ဖဲန့ၣ်တဘျီ စပ့ၣ် အပှၤလိာ်ကွဲဖိ Ferran Torres လၢအဘၣ်တၢ်လဲလိာ်ဒုးနုာ်လီၤအီၤတဂၤ ထူနုာ်လီၤဝဲဒၣ် ကိတဖျၢၣ် ဝံၤအလီၢ်ခံ မၤကၢ်ကွံာ်ဝဲဒၣ် တၢ်အိၣ်ထီၣ်ထူၣ်လိာ်အသးအံၤ ဒီး န့ၢ်ဘၣ်ဝဲကိထဲတဖျၢၣ်ဧိၤဖဲတၢ်လိာ်ကွဲပြၢ လၢခံကတၢၢ် အပူၤအံၤန့ၣ်လီၤ.
တၢ်အူသီၣ်ထီၣ် မီကိလံ ဖဲပျီပူၤလၢခံကတၢၢ်တဝီ, စပ့ၣ် အပှၤလိာ်ကွဲဖိသ့ၣ်တဖၣ် သူၣ်ခုသးခု မၤလၤကပီၤ အဝဲသ့ၣ်တၢ်မၤနၢၤအခါ, မ့မ့ၢ် Lionel Messi ဒုအိၣ်ဘှ့ၣ်ကလးဒီး ဆှိလီၤအခိၣ် လၢအပာ်ဖျါထီၣ် အသးတၢ်တူၢ်ဘၣ် လၢအမ့ၢ် ပှၤအါဂၤနာ်လၢ တၢ်လိာ်ကွဲတဘျီအံၤန့ၣ် မ့ၢ်ဝဲဒၣ် အဝဲတၢ်နုာ်လီၤလိာ်ကွဲဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢအပူၤ လၢခံကတၢၢ်တဘျီန့ၣ်လီၤ.
လၢန့ၣ်အမဲာ်ညါတၢ်လိာ်ကွဲပြၢတဘျီအံၤ စပ့ၣ် ကရူၢ် မ့ၢ်ပှၤလၢ အဒိးန့ၢ်ဘၣ်ခိၣ်ဖးတၢ်ဟ့ၣ်ကနၢၤ အအါကတၢၢ်န့ၣ်လီၤ.
ဖျၢၣ်ထူကရူၢ်ခိၣ် Rodri န့ၢ်ဘၣ်ဝဲဒၣ် Golden Ball — ဖျၢၣ်ထူခိၣ်ဖးထူ ဒ်သိးတၢ်ပြၢတဘျီအံၤ ပှၤလိာ်ကွဲအဂ့ၤကတၢၢ်တဂၤ ဒီး Unai Simón န့ၣ် ဒိးန့ၢ်ဘၣ်ဝဲ Golden Glove — စုဖျီၣ်ထူ ဒ်သိးတၢ်ပြၢတဘျီအံၤ ပှၤဖီၣ်ကိအဂ့ၤကတၢၢ်တဂၤန့ၣ်လီၤ.
မ့မ့ၢ်လၢ Pau Cubarsí န့ၣ် ဒိးန့ၢ်ဘၣ်ဝဲဒၣ် Best Young Player Award—သးစၢ်ပှၤလိာ်ကွဲအဂ့ၤကတၢၢ်ခိၣ်ဖး, လၢမၤနၢၤကွံာ်ဝဲဒၣ် အတံၤသကိးပှၤလိာ်ကွဲတကရူၢ်ဃီ Lamine Yamal လၢအသးနံၣ်အိၣ် ၁၉နံၣ်န့ၣ်လီၤ.
မ့မ့ၢ်လၢ ဖြၣ်စ့ၣ် ဖျၢၣ်ထူ အကရူၢ်ခိၣ် Kylian Mbappé န့ၣ် ဒိးန့ၢ်ဘၣ်ဝဲဒၣ် Golden Boot — ခီၣ်ဖံးထူခိၣ်ဖး, ဒီးကဲထီၣ်ဝဲဒၣ် ပှၤလိာ်ကွဲလၢအဒိးန့ၢ်ဘၣ်ခိၣ်ဖးအံၤ ခံဘျီ တပယူၤဃီ လၢအသွီနုာ်လီၤဝဲကိ န့ၢ် အဖျၢၣ် ၁ဝ, လၢအအါန့ၢ် အးကၠ့းထံနါ ဖျၢၣ်ထူကရူၢ် Lionel Messi န့ၣ်လီၤ.
SBS ဖျၢၣ်ထူဂ့ၢ်ဝီ ပှၤပဲာ်ထံနီၤဖးတၢ် ဂါနါ ထံဂုၤကီၢ်ဂၤပှၤလိာ်ကွဲဖိလီၢ်လံၤ Kevin-Prince Boateng စံးဝဲဒၣ် စပ့ၣ် ဟီၣ်ခိၣ်ဒီဘ့ၣ်ဖျၢၣ်ထူ အတၢ်မၤနၢၤအံၤ စးထီၣ်အသးလၢ ပှၤသးစၢ်ကရူၢ် ဒီး တုၤဝဲဒၣ်ဆူ ပှၤသးပှၢ်ကရူၢ်တစု ၁၃နံၣ်အတီၢ်ပူၤန့ၣ် အိၣ်ဝဲဒၣ်ဒီး တၢ်ဂုၤထီၣ်ပသီထီၣ် လၢအဆီတလဲအသးတဆီဘၣ်တဆီန့ၣ်လီၤ.
“တၢ်အဝဲအံၤ ဘၣ်တၢ်မၤကဲထီၣ်အီၤဒ်လဲၣ်န့ၣ်, အဝဲအံၤန့ၣ်မ့ၢ်ဝဲဒၣ် တၢ်အဒိအတဲာ်ဖးဒိၣ်တခါ လၢထံကီၢ်အဂုၤအဂၤခဲလၢာ်သ့ၣ်တဖၣ်အဂီၢ်န့ၣ်လီၤ. မ့ၢ်တၢ်သူၣ်ထီၣ်လၢအစးထီၣ်အသးလၢသးစၢ်အပတီၢ်, လၢအဟဲစိာ်ထီၣ်အဝဲသ့ၣ်ပှၤလိာ်ကွဲဖိသ့ၣ်တဖၣ်တဆီဘၣ်တဆီ, အိၣ်ဒီးတၢ်နာ်လၢအဝဲသ့ၣ်အဖီခိၣ်, အိၣ်ဒီးတၢ်နာ်လၢ အဝဲသ့ၣ် ဖျၢၣ်ထူပှၤနဲၣ်တၢ်သ့ၣ်တဖၣ်အဖီခိၣ်. ဘၣ်မနုၤလဲၣ်န့ၣ် တၢ်လၢဖျၢၣ်ထူန့ၣ်မ့ၢ်တၢ်တခါလၢအချ့မး. အဆၢအိၣ်ဖျါထီၣ်တခါ, ဒီးအမ့ၢ်တဂ့ၤဘၣ်န့ၣ်, တၢ်ထုးထီၣ်ကွံာ်နၤန့ၣ်လီၤ. ထဲဒၣ်ပှၤလိာ်ကွဲဖိသ့ၣ်တဖၣ်န့ၣ် အတမ့ၢ်တၢ်အဂ့ၤလၢပှဲၤဘၣ်. အဝဲသ့ၣ်အိၣ်ဒီးတၢ်နာ်ဒီး တၢ်လၢအဝဲသ့ၣ်မၤအီၤ ဒီး ဒုးစဲထီဝဲအသးဒီးတၢ်အံၤန့ၣ်လီၤ. ပှၤပဲၤဖးနီၤဖးတၢ်သ့ၣ်တဖၣ် တဲအီၤထဲလဲၣ်ဂ့ၤ ထဲလဲၣ်ဂ့ၤန့ၣ် အဝဲသ့ၣ် တကနၣ်ဃုာ်ဝဲဘၣ်. အဝဲသ့ၣ် ဒုးစဲထီဒၣ်အသးဖဲတၢ်လိာ်ကွဲပူၤ. ဒီးလၢခံကတၢၢ်န့ၣ် အဝဲသ့ၣ် မၤလၤကပီၤဘၣ်ဝဲ ခိၣ်ဖးတၢ်လၤကပီၤ အဒိၣ်ကတၢၢ်တခါ လၢဟီၣ်ခိၣ်ဒီဘ့ၣ်အပူၤ. ဒီးကြၢးဝဲဒၣ်ဂ့ၤဂ့ၤန့ၣ်လီၤ.
စပ့ၣ် အတၢ်ဒိးန့ၢ်ဘၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ခိၣ်ဖး ခံဘျီတဘျီအံၤ မ့ၢ်ဝဲဒၣ်တၢ်ရဲၣ်ကျဲၤလီၤပာ်လီၤပာ်တၢ်လၢအနံၣ်အါမး အတၢ်တုၤထီၣ်ထီၣ်ဘးတခါ, နာ်သက့ ဖဲတၢ်ပြၢတဘျီအံၤန့ၣ် အဝဲသ့ၣ်မ့ၢ်ဝဲဒၣ် ပှၤလိာ်ကွဲဖိသ့ၣ်တဖၣ်လၢအသးစၢ်ကတၢၢ်အဃိ, တၢ်အဝဲအံၤန့ၣ် ကမ့ၢ်ဝဲဒၣ် ဟီၣ်ခီၣ်ဒီဘ့ၣ်ဖျၢၣ်ထူ စိၤအသီတစိၤ အတၢ်စးထီၣ် သ့ဝဲစ့ၢ်ကီးန့ၣ်လီၤ.
ဘၣ်ဃးဒီး FIFA World Cup 2026—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် တၢ်အဝဲအံၤန့ၣ်မ့ၢ်တၢ်ပာ်ဖျါလၢပအိၣ်ခဲလၢာ်န့ၣ်လီၤ. ယၤန့ၣ်မ့ၢ် ရှါဖီၤ ဒီး တၢ်ဘျုးလၢသုဒိကနၣ်ပှၤန့ၣ်လီၤ.
မ့ၢ်အဲၣ်ဒိးက့ၤကွၢ်ကဒါက့ၤ FIFA World Cup 2026™ အတၢ်ပြၢသ့ၣ်တဖၣ်န့ၣ် နက့ၤကွၢ်ကဒါအီၤဖဲ SBS On Demand အပူၤသ့ဝဲခဲလၢာ်န့ၣ်လီၤ.
