ကတီၢ်ဖဲလၢပဒိၣ်မၤတၢ်လၢအထုးန့ၢ်ဝဲဒၣ် ယီၤကူၣ်ဆး—AI ခီပနံၣ်သ့ၣ်တဖၣ် အတၢ်ဘျၢနုာ်လီၤတၢ်ဖံးတၢ်မၤဒိၣ်ဒိၣ်မုၢ်မုၢ်အခါ, အိၣ်စ့ၢ်ကီးဝဲဒီး တၢ်ဆၢတဲာ်ပာ်သးကျၢၤမုဆှုလၢ တၢ်ပာ်လိၤတၢ်ပညိၣ်ဖဲ တၢ်ဒီသဒၢဃံးဃီၣ်ဒီၣ်လၢ ပှၤအီစထြ့လယါဖိ အတၢ်တ့ဒုးအိၣ်ထီၣ်တၢ် ကွဲးဒိခွဲး မ့တမ့ၢ် ခွဲးယာ်ဒိ သ့ၣ်တဖၣ်အဂီၢ်န့ၣ်လီၤ. ပှၤလၢအမ့ၢ် ကွဲးဒိခွဲးအကစၢ်သ့ၣ်တဖၣ် အဝဲသ့ၣ်နီၣ်ကစၢ်ပၢအတၢ်ဂ့ၢ်တၢ်ကျိၤသ့ၣ်တဖၣ်န့ၣ် ဒ်သိးတၢ်ဟံးန့ၢ်သူအီၤလၢ တၢ်သိၣ်လိမၤယုၤ ယီၤကူၣ်ဆး — AI အသုတန့ၢ်တဂ့ၤအဂီၢ်ဒီး ပှၤဂုၤပှၤဂၤသ့ၣ်တဖၣ် ဟံးန့ၢ်သူအီၤ သုတန့ၢ်တဂ့ၤအဂီၢ် တၢ်ကပာ်လီၤဝဲ opt-out - တၢ်ဟးထီၣ်ကွံာ်လၢတၢ်ပၣ်ဃုာ်သနူအပူၤ က့ၢ်ဂီၤ အကျိၤအကျဲတခါန့ၣ်လီၤ. တၢ်အဝဲအံၤန့ၣ် ကဲထီၣ်အသး ဖဲလၢပဒိၣ်မၤဝဲ တၢ်တၢၣ်ပီၣ်ထိၣ်ဃူဒီး စဲးဖီကဟၣ်ခီပနံၣ်ဖးဒိၣ်သ့ၣ်တဖၣ် လၢအတၢ်ကျဲးစၢးမၤန့ၢ် တၢ်ဘျၢနုာ်လီၤတၢ်ဖံးတၢ်မၤဒီး တၢ်ဂ့ၢ်ထၢဖှိၣ်ဝဲၤလီၢ်သ့ၣ်တဖၣ်အဂီၢ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
“အီစထြ့လယါပှၤကွဲးလံာ်ဖိသ့ၣ်တဖၣ်, ပှၤဒ့တၢ်အူတၢ်ဖိသ့ၣ်တဖၣ်, ပှၤခဲၣ်တၢ်ဂီၤဒွဲလၤကစၢ်သ့ၣ်တဖၣ် ဒီး ပှၤကွဲးတၢ်စီၣ်သ့ၣ်တဖၣ် အဝဲသ့ၣ်တၢ်ဖံးတၢ်မၤလၢအတ့ဒုးအိၣ်ထီၣ်ဝဲသ့ၣ်တဖၣ်န့ၣ် ကဆဲးဖီၣ်ဂၢၢ်ဟံးဃာ်ဘၣ်ဝဲ ဒ်သိးတၢ်ကဲအကစၢ်အသိးန့ၣ်လီၤ. ပကပာ်လီၤဝဲသဲစးတၢ်ဘျၢ လီၤတံၢ်လီၤဆဲး တဲာ်တဲာ်ဖျုဖျုန့ၣ်လီၤ.”
အဝဲအံၤန့ၣ်မ့ၢ် ကိတိာ်ခိၣ်ကျၢၢ် အဲးသနံး အဲးလ်ဘနံးစံၤ (Anthony Albanese) အတၢ်ကတိၤန့ၣ်လီၤ.
စးထီၣ်လၢအဝဲမၤတၢ်အၢၣ်လီၤ ဘၣ်ဃးဒီး ပဒိၣ် အတၢ်ပာ်လီၤ ယီၤကူၣ်ဆး—AI တၢ်မၤသနၢၣ်အကျိၤအကျဲ လၢအကတိၤလီၤတၢ်ဖဲဆ့ၣ်ဒနံၤအခါန့ၣ် ခဲကနံၣ်နံၣ်အံၤတၢ်ဆၢကတီၢ်န့ၢ်ဝဲ ခံလါဃၣ်ဃၣ်လံန့ၣ်လီၤ.
“ဒွဲလၤအကစၢ်တဂၤ အတၢ်ကျဲးစၢးတ့ဒုးအိၣ်ထီၣ်တၢ်န့ၣ် မ့ၢ်ဝဲအဝဲသ့ၣ် အတၢ်မၤဒီး အတၢ်စုလီၢ်ခီၣ်ခိၣ်န့ၣ်လီၤ. ပှၤအီစထြ့လယါဖိအလံာ်သ့ၣ်တဖၣ်, အတၢ်ဒ့တၢ်အူ, အတၢ်ဂီၤခဲၣ် မ့တမ့ၢ် တၢ်ကစီၣ် သ့ၣ်တဖၣ်န့ၣ် ဒွဲလၤပီညါအကစၢ် အတၢ်ဖီၣ်ဂၢၢ်မ့ၢ်တအိၣ်ဘၣ်န့ၣ် လၢတၢ်သူၣ်ထီၣ် မ့တမ့ၢ် သိၣ်လိန့ၢ် ယီၤကူၣ်ဆး—AI အဂီၢ် ခီပနံၣ်သ့ၣ်တဖၣ် လ့ၤတက့ၤသူအီၤတန့ၢ်ဘၣ်. တၢ်အဝဲန့ၣ်ပၣ်ဃုာ်ဒီး ဒွဲလၤပီညါအကစၢ်အံၤ အတၢ်ဖီၣ်ဂၢၢ် အဝဲသ့ၣ်တၢ်မၤ အလုၢ်အပှ့ၤ ဒီး အပှ့ၤအဘူးအလဲန့ၣ်လီၤ. မ့ၢ်တမၤထွဲဝဲဒ်အံၤဘၣ်န့ၣ် တၢ်ကပာ်အီၤဒ်အမ့ၢ် တၢ်ဟုၣ်န့ၢ်ပှၤဂၤအတၢ်န့ၣ်လီၤ.”
ခဲကနံၣ်အံၤန့ၣ်, တၢ်ဂ့ၢ်တၢ်ကျိၤအသီသ့ၣ်တဖၣ်ဟဲပၢၢ်ထီၣ်ဝဲဒၣ် လၢအမ့ၢ်တၢ်တၢၣ်ပီၣ်တဲသကိးဘၣ်ဃး ခီပနံၣ်သ့ၣ်တဖၣ် မ့ၢ်သူအဝဲသ့ၣ် အတၢ်တ့ဒုးအိၣ်ထီၣ်သ့ၣ်တဖၣ်လၢ တၢ်သိၣ်လိယုၤ ယီၤကူၣ်ဆး—AI က့ၢ်ဂီၤကလုာ်အဂီၢ်တခီ ပှၤတ့ဒုးအိၣ်ထီၣ်တၢ်သ့ၣ်တဖၣ် တၢ်ကဟ့ၣ်လီၤအဝဲသ့ၣ်အခွဲးလၢကဖီၣ်ဂၢၢ် အနီၣ်ကစၢ်ပၢတၢ်စုလီၢ်ခီၣ်ခိၣ်အံၤဒ်လဲၣ် ဒီး တၢ်လုၢ်သ့ၣ်ခါပတာ်တၢ်သိၣ်တၢ်သီမ့ၢ်အိၣ်ထီၣ်န့ၣ် တၢ်ကဟ့ၣ်လီၤအဝဲသ့ၣ်စ့တၢ်လိးက့ၤဒ်လဲၣ်န့ၣ်လီၤ.
လံာ်တၢ်မၤနီၣ်မၤဃါလၢတၢ်တီၣ်ဖျါထီၣ်အီၤဖဲဘျီၣ်ဒိၣ်ထးခီအအိၣ်န့ၣ် ပၣ်ဃုာ်ဝဲဒီး တၢ်ဃုထၢအကျိၤအကျဲ အတၢ်ပဲၤထံနီၤဖး လၢအဘၣ်တၢ်ကွဲးအီၤလၢ စံၣ်ညီၣ်ကွီၣ်ခိၣ်ကျၢၢ် အဝဲၤကျိၤန့ၣ်လီၤ.
ဒီးအဝဲသ့ၣ်န့ၣ်ဘၣ်သဂၢၢ်ဝဲဒီး ဘျီၣ်ဒိၣ်ထးခီ ဘျီၣ်ဒိၣ်ခၢၣ်စးသဘျ့ David Pocock အတၢ်ပဲၤဖးနီၤဖးန့ၣ်လီၤ.
“တၢ်လၢပဒိၣ်ဆှၢနုာ်အီၤအံၤ အကမၤကတၢၢ်ကွံာ်ဝဲဒၣ် တၢ်ကွဲးဒိခွဲး ဒ်သိးလၢပသ့ၣ်ညါပာ်အီၤဖဲထံကီၢ်အံၤအပူၤန့ၣ်လီၤ. လၢအကဒိးသန့ၤအသးလၢ ကွဲးဒိခွဲးသဲစး (Copyright Act) အလီၢ်န့ၣ်, အဝဲသ့ၣ်ကပာ်ထီၣ်ဝဲမူဒါတၢ်မၤတခါလၢ ကွဲးဒိခွဲး အကစၢ်သ့ၣ်တဖၣ် ဒီး ပှၤအီစထြ့လယါဖိကိးဂၤလၢ အအဲၣ်ဒိးကၢၤဃာ် အနီၣ်ကစၢ်ကွဲးဒိခွဲးသ့ၣ်တဖၣ်ကဘၣ်မၤအီၤ, ဒ်သိး ယီၤကူၣ်ဆး— AI ခီပနံၣ်သ့ၣ်တဖၣ် အသုတဟံးန့ၢ်သူကလီအဝဲသ့ၣ်တၢ်ဂီၤတဂ့ၤန့ၣ်လီၤ.”
ဖဲလံာ်တၢ်ဘိးဘၣ်ရၤလီၤတၢ်ကစီၣ်အပူၤန့ၣ် စံၣ်ညီၣ်ကွီၣ်ခိၣ်ကျၢၢ်ဝဲၤဒၢး အပှၤကတိၤတၢ်ပၢ Michelle Rowland စံးဝဲဒၣ်, ပဒိၣ်န့ၣ် ကဆီၣ်ထွဲမၤစၢၤဝဲ တၢ်ဖီၣ်ဂၢၢ်တၢ် ဒီး စ့တၢ်ဘၣ်လိးက့ၤ လၢအအိၣ်ဒီးတၢ်ဘၣ်ဘျီးဘၣ်ဒါသ့ၣ်တဖၣ်န့ၣ်လီၤ.
ဖဲတၢ်မၤဝဲ တၢ်တၢၣ်ပီၣ်ထိၣ်ဃူဒီး တၢ်သိၣ်လိအီစထြ့လယါကီၢ်ပူၤ ယီၤကူၣ်ဆး—AI အက့ၢ်အဂီၤ အကလုာ်သ့ၣ်တဖၣ်အခါ, တၢ်တၢၣ်ပီၣ်တဲသကိးတၢ်ဒီး ယီၤကူၣ်ဆးခီပနံၣ်, ပှၤတ့ဒုးအိၣ်ထီၣ်တၢ်သ့ၣ်တဖၣ် ဒီး တၢ်ကစီၣ်တဝၢကရူၢ်သ့ၣ်တဖၣ် ဘၣ်တၢ်ဆဲးမၤအီၤကွ့ၢ်ကွ့ၢ်န့ၣ်လီၤ.
David Pocock စံးဝဲဒၣ် ပဒိၣ်အံၤ အိၣ်ဖျါလၢ အအဲၣ်ဒိးဟ့ၣ်လီၤတၢ်အခွဲးသ့ၣ်တဖၣ်အါမးန့ၣ်လီၤ.
“တၢ်လၢယအဲၣ်ဒိးတဲအီၤန့ၣ်မ့ၢ်ဝဲ တၢ်ဂ့ၢ်အံၤန့ၣ် တမ့ၢ်လၢတမၤတသ့ တၢ်ကဘၣ်မၤအီၤနီၣ်နီၣ်တခါဘၣ်အသိး, တမ့ၢ်လၢတၢ်ကမၤအီၤလၢတၢ်ကးတံာ်တြဲၤအလီၢ်ခံဘၣ်. နီၣ်နီၣ်တခီမ့ၢ်ဝဲ ဒ်ထံကီၢ်တဘ့ၣ်အသိး တၢ်ကဘၣ်တၢၣ်ပီၣ်တဲသကိးအီၤဖျိးဖျိးဖျါဖျါ. တၢ်လၢပပာ်လုၢ်ပာ်ပှ့ၤအီၤန့ၣ်မ့ၢ်မနုၤလဲၣ်. ယသ့ၣ်ညါလၢ ပှၤအီစထြ့လယါဖိသ့ၣ်တဖၣ်န့ၣ် ပာ်လုၢ်ပာ်ပှ့ၤဝဲ အပှၤတ့ဒုးအိၣ်ထီၣ်တၢ်သ့ၣ်တဖၣ်, ပှၤကွဲးလံာ်ဖိသ့ၣ်တဖၣ်, ပှၤကွဲးတၢ်ကစီၣ်ဖိသ့ၣ်တဖၣ်. ဒ်ထံကီၢ်တဘ့ၣ်အသိး ပဘၣ်ပာ်လုၢ်ပာ်ပှ့ၤအဝဲသ့ၣ်, ဒီး ပကြၢးဘၣ်တဲဘၣ်ဝဲ ယီၤကူၣ်ဆးခီပနံၣ်သ့ၣ်တဖၣ်အံၤလၢ, ပအိၣ်ဒီးတၢ်တခါခါ လၢသုဘၣ်သးအီၤ, နာ်သက့ နမ့ၢ်အဲၣ်ဒိးသူအဝဲသ့ၣ်တၢ်တခီ, အလီၢ်အိၣ်လၢ နကဘၣ်လဲၤတၢၣ်ပီၣ်တဲသကိးတၢ်ဒီး ကွဲးဒိခွဲး အကစၢ်သ့ၣ်တဖၣ်အံၤန့ၣ်လီၤ.”
တၢ်တၢၣ်ပီၣ်တဲသကိးလံာ်တၢ်မၤနီၣ်မၤဃါန့ၣ် ဒုးနဲၣ်ဖျါဝဲတၢ်ဆှၢနုာ်လီၤခံခါ, ဒီးအဝဲသ့ၣ်ခံခါလၢၤအံၤ ဒိးသန့ၤခီၣ်အသးလၢ opt-out system— တၢ်ဟးထီၣ်ကွံာ်လၢတၢ်ပၣ်ဃုာ်ဖဲသနူအပူၤ လၢကွဲးဒိခွဲးအကစၢ် မ့တမ့ၢ် ပှၤအိၣ်ဒီး ကွဲးဒိခွဲးတၢ်ခွဲးတၢ်ယာ်သ့ၣ်တဖၣ် ဒ်သိးကဒီသဒၢအဝဲသ့ၣ်တၢ်ပီးတၢ်လီ တၢ်စုလီၢ်ခီၣ်ခိၣ်သ့ၣ်တဖၣ်အဂီၢ် အလီၢ်အိၣ်လၢ အနီၣ်ကစၢ်ဒၣ်ဝဲ ဘၣ်ဟးထီၣ်ကွံာ်ဖဲ တၢ်ပၣ်ဃုာ်သနူအပူၤန့ၣ်လီၤ.
လၢကသိၣ်လိ ယီၤကူၣ်ဆး—AI က့ၢ်ဂီၤကလုာ်သ့ၣ်တဖၣ်အဂီၢ် တချုးဖဲ အဝဲသ့ၣ် မၤန့ၢ် တၢ်ပီးတၢ်လီကွဲးဒိခွဲး လၢကွဲးဒိခွဲးအကစၢ် လၢအတဟးထီၣ်ကွံာ်ဖဲတၢ်ပၣ်ဃုာ်သနူအပူၤသ့ၣ်တဖၣ်အအိၣ်ဒ်ဘၣ်အခါန့ၣ် စဲးဖီကဟၣ်ခီပနံၣ်သ့ၣ်တဖၣ်အံၤ အလီၢ်အိၣ်လၢ အကဘၣ်လူၤပိာ်ထွဲမၤထွဲဝဲ တၢ်သိၣ်တၢ်သီတၢ်ဘျၢသ့ၣ်တဖၣ်န့ၣ်လီၤ.
တၢ်ဆှၢနုာ်လီၤက့ၢ်ဂီၤတၢတခါန့ၣ်မ့ၢ်ဝဲ, ခီပနံၣ်သ့ၣ်တဖၣ် အကဘၣ်မၤန့ၢ်ဝဲ တၢ်ပှ့ၤတၢ်ဆါတၢ် အတၢ်သးလီၤပလိာ်ဒီး တၢ်ဃုထၢပာ်ဖှိၣ်န့ၢ်ကွဲးဒိခွဲးအလုၢ်အပှ့ၤကျိၣ်စ့ကရူၢ်ကရၢ 'collecting societies' လၢအမ့ၢ်တၢ်ကဲခၢၣ်စးလၢ ကွဲးဒိခွဲးအဂီၢ် — လီၤဂာ်ဒ်သိးတၢ်ဒ့တၢ်အူ အလံာ်ဖျၢၣ် လၢအအိၣ်ဒီး အတကွီၣ်လဲၢ်မးသ့ၣ်တဖၣ်န့ၣ်လီၤ.
က့ၢ်ဂီၤခံခါတခါန့ၣ်မ့ၢ်ဝဲ, စဲးဖီကဟၣ်ခီပနံၣ်ဖးဒိၣ်သ့ၣ်တဖၣ် လၢအကဟ့ၣ်လီၤတၢ်သိၣ်လိဖဲလီမုၢ်ပျီအပူၤအဂီၢ် တချုးလၢအဝဲသ့ၣ်မၤန့ၢ် တၢ်ဂ့ၢ်ထၢဖှိၣ်သ့ၣ်တဖၣ်ဒ်ဘၣ်အခါ အစှၤကတၢၢ်န့ၣ် အကဘၣ်မၤဝဲ တၢ်ပှ့ၤတၢ်ဆါတၢ် အတၢ်သးလီၤပလိာ်ဒီး ခီပနံၣ်စှၤကိးဖျၢၣ် လၢတၢ်ဆၢကတီၢ်အစှၤကတၢၢ်တခါအတီၢ်ပူၤန့ၣ်လီၤ.
ဘျီၣ်ဒိၣ်ထးခီခၢၣ်စး Pocock စံးဝဲဒၣ် ဒ်သိးစဲးဖီကဟၣ်ခီပနံၣ်သ့ၣ်တဖၣ် ကဟ့ၣ်လီၤတၢ်အပှ့ၤအဂီၢ် အလီၢ်အိၣ်လၢ ပဒိၣ်ကဘၣ်မၤအါထီၣ်ဒ်ဝဲတၢ်မၤသ့ၣ်တဖၣ်န့ၣ်လီၤ.
“ဘၣ်ဃးတၢ်ဂ့ၢ်အံၤ အဝဲသ့ၣ်တၢၣ်ပီၣ်တဲသကိးတၢ်န့ၢ်ဖးယံၤလံ, နာ်သက့ ယတနၢ်ပၢၢ်ဘၣ်တခါန့ၣ်မ့ၢ်ဝဲ, ဘၣ်မနုၤအဃိလၢ အမၤဝဲဖဲတၢ်ကးတံာ်ဃာ်တြဲၤအလီၢ်ခံလဲၣ်. ပျဲပစးထီၣ်တၢၣ်ပီၣ်တဲသကိးအီၤ. ခီပနံၣ်လၢ အလဲၤဆူ အမဲရကၤ ဒီလၣ် ထြံလယၢၢ် ပနံာ်ပာ်ဖှိၣ် တၢ်ဆါတၢ်ပှ့ၤဖၠါအပူၤအံၤ, လီၤဂာ်ဒ်သိးအတဲဘၣ်ပှၤ "အိ, လၢပကသူအဝဲသ့ၣ်တၢ်စုလီၢ်ခီၣ်ခိၣ်အံၤအဂီၢ်ပဟ့ၣ်လီၤအဝဲသ့ၣ် တၢ်တ့ဒုးအိၣ်ထီၣ်တၢ်အဘူးအလဲတန့ၢ်ဘၣ်", ဒ်န့ၢ်အသိးန့ၣ်လီၤ. အဃိ ဒ်ထံကီၢ်တဘ့ၣ်အသိးန့ၣ် ပကဘၣ်သူဝဲဒၣ်ပစိကမီၤဂံၢ်ဘါလၢအအိၣ်ဒီးပှၤအံၤ ဒီး ဆီၣ်သနံးဆူၣ်အဝဲသ့ၣ်န့ၣ်လီၤ.”
တၢ်တၢၣ်ပီၣ်တဲသကိးလၢအဘၣ်ဃးဒီး ကွဲးဒိခွဲး အဂ့ၢ်အံၤ စးထီၣ်အိၣ်ထီၣ်ဝဲဒၣ်ဖဲလၢ အဲးလ်ဘနံးစံၤပဒိၣ် ကျဲးစၢးမၤန့ၢ် တၢ်ဘျၢနုာ်လီၤကျိၣ်စ့တၢ်ဖံးတၢ်မၤ ဒီး တၢ်သူၣ်ထီၣ်ဆီလီၤ တၢ်ဂ့ၢ်ထၢဖှိၣ် အဝဲၤလီၢ်သ့ၣ်တဖၣ်န့ၣ်လီၤ.
ဖဲလါယူၤလံအတီၢ်ပူၤန့ၣ် ကိတိာ်ခိၣ်ကျၢၢ် ဆှၢနုာ်လီၤဝဲ ထံကီၢ်ဒီဘ့ၣ်အပတီၢ် ကီၢ်စၢဖှိၣ်တၢ်ဖံးတၢ်မၤတကွီၣ်ဒိတခါ လၢကပၢဆှၢဝဲဒၣ်တၢ်ဂ့ၢ်လၢအဘၣ်ဃးဒီး ဂံၢ်သဟီၣ်, ထံဒီး တၢ်ဃုထၢ တၢ်သူၣ်ထီၣ်ဘှီထီၣ်အလီၢ်န့ၣ်လီၤ.
အဝဲစံးဝဲဒၣ် တၢ်ဂ့ၢ်ထၢဖှိၣ်ဝဲၤလီၢ်သ့ၣ်တဖၣ်အံၤ လၢလီမ့ၣ်အူဂံၢ်အဂီၢ်န့ၣ် အကဘၣ်အိၣ်ဒီး အနီၣ်ကစၢ်ဒၣ်ဝဲ လီမ့ၣ်အူစဲးခိၣ်လၢၢ်သ့ၣ်တဖၣ်, ဒီးအကဘၣ်မ့ၢ်က့ၤဟ့ၣ်လီၤမၤစၢၤတၢ်လၢ ဂံၢ်သဟီၣ်လၢအက့ၤပှဲၤထီၣ်ကဒါက့ၤဒၣ်အတၢ်သ့သ့ၣ်တဖၣ်အအိၣ် — လၢအမ့ၢ်တၢ်ဆှၢနုာ်တခါလၢ အထုးန့ၢ်ဝဲဒၣ် ခွံစလဲဒီး NT—ကလံၤစိၤကဝီၤဒိၣ်တၢ်ပၢ သ့ၣ်တဖၣ်အသးန့ၣ်လီၤ.
လၢ OpenAI အဂီၢ်န့ၣ်, တၢ်ခွဲးတၢ်ယာ်သ့ၣ်တဖၣ် ဒိးသန့ၤထီၣ်ဝဲအသးဒီး တၢ်မၤစၢ်လီၤ ကွဲးဒိခွဲး သဲစးတၢ်ဘျၢသ့ၣ်တဖၣ် န့ၣ်လီၤ.
ဘၣ်ဃးဒီး အဝဲသ့ၣ် ယီၤကူၣ်ဆး—AI တၢ်မၤတကွီၣ်ဒိအသီအံၤ ပဒိၣ်မုၢ်လၢ်လၢ ကန့ၢ်ပာ်လီၤဘၣ်ဝဲဖဲဆူမဲာ်ညါတနံၣ် နံၣ်စးထီၣ်သီအခါန့ၣ်လီၤ.
