တၢ်ကလုၢ်တဖၣ်: https://www.sbs.com.au/language/ karen/ kar/collection/podcast/0ms9u5vjn
လၢ Jackie Henderson အဂီၢ်န့ၣ်, မ့ၢ်ဝဲတၢ်လီၤကမၢကမၣ် လီၤပျံၤလီၤဖုး လၢအဂီၢ်ဒိၣ်မးတခါ ဖဲလၢအဝဲသ့ၣ်ညါလီၤအသးလၢအအိၣ်ဒီး ခဲစၢၣ်တၢ်ဆါအခါန့ၣ်လီၤ.
“ခီဖျိလၢ တၢ်အံၤတချုးကဲထီၣ်ဒ်ဘၣ်အခါန့ၣ်, ယဆိကမိၣ်လီၤတ့ၢ်လၢ ယမ့ၢ်ပှၤအိၣ်ဆူၣ်အိၣ်ချ့လၢအတယၢၢ်အိၣ် ၇၈ ကံလိတဂၤန့ၣ်လီၤ. ဖဲန့ၣ်အလီၢ်ခံ ယတယၢၢ်လီၤဝဲဒၣ်ဆူ ၅၃ ကံလိန့ၣ်လီၤ. အဃိန့ၣ် ယဆိကမိၣ်လီၤယသး ဘၣ်မနုၤအဃိလၢယတယၢၢ်လီၤစှၤအါမးလဲၣ်. တၢ်အံၤမ့ၢ်ဝဲတၢ်လီၤပျံၤလီၤဖုးတခါန့ၣ်လီၤ.”
တၢ်ဃုထံၣ်န့ၢ်လၢအဝဲန့ၣ် အအိၣ်ဒီး သွံၣ်ခဲစၢၣ်တၢ်ဆါတလုာ် လၢတၢ်ကိးအမံၤ—non-Hodgkin lymphoma ဒီးမ့ၢ်ဝဲဒၣ် သွံၣ်ခဲစၢၣ်တၢ်ဆါတကလုာ်လၢ လၢအဆူၣ်မးဒီးဒိၣ်ထီၣ်ချ့မးန့ၣ်လီၤ.
တၢ်တာ်တၢ် တၢ်ကီတၢ်ခဲ ဆူမဲာ်ညါတဆီန့ၣ် မ့ၢ်ဝဲဒၣ် တၢ်ဘၣ်ကွၢ်ဆၢၣ်မဲာ်ဒီး တၢ်လဲၤထီၣ်က့ၤလီၤ — တၢ်လၢာ်ဘူၣ်လၢာ်စ့ — ဒီး တၢ်အိၣ်တမုာ်တလာ် အိၣ်တဆူၣ်ဘၣ်န့ၣ်လီၤ.
“ယတၢ်အိၣ်သးန့ၣ်တထီၣ်ဘးလၢ ယကဒိးန့ၢ်ဘၣ် မှံၤတုၤပှၢ်လဲာ် စ့တၢ်န့ၢ်ဘျုး မ့တမ့ၢ် Centrelink တၢ်န့ၢ်ဘျုးန့ၢ်ဖှိၣ်သ့ၣ်တဖၣ်ဘၣ်, အဃိ လၢကကျၢၢ်ဘၢ ယတၢ်ကူာ်ကွဲးသးသ့ၣ်တဖၣ်အဂီၢ်န့ၣ် ယဘၣ်သူဝဲဒၣ် ယမံၤတုၤပှၢ်တီၤကတီၢ်အဂီၢ်စ့ပာ်ဖှိၣ်—superannuation န့ၣ်လီၤ. ယဟ့ၣ်လီၤစ့ဆူ ဆူၣ်ချ့တၢ်အုၣ်ကီၤ ပှၤနီၣ်တဂၤပၢ ကျိၣ်စ့တၢ်မၤစၢၤ—private fund တခါပူၤ, ဘၣ်ဆၣ်သနာ်က့ အဝဲသ့ၣ်န့ၣ် အတဟ့ၣ်လီၤစ့လၢတၢ်အံၤအဂီၢ်ဘၣ်အဃိန့ၣ် ယဘၣ်အိၣ်ခိးဒၣ်တၢ်ဖဲ ကမျၢၢ်ဆူၣ်ချ့သနူတၢ်အံးထွဲကွၢ်ထွဲအပူၤန့ၣ်လီၤ. ယအိၣ်ခိးမၤအီၤဒ်အံၤဒၣ်လဲာ်န့ၣ် တၢ်လၢာ်ဘူၣ်လၢာ်စ့သ့ၣ်တဖၣ်န့ၣ် လီၤလၢအါမး. ယဘၣ်ဟ့ၣ်လီၤစ့လၢ ကသံၣ်သရၣ်ကူာ်ကွဲတၢ်လီၤဆီအဂီၢ်, ကသံၣ်ဆဲးသးပ့ၤနီၣ်ကွံာ်သးအဂီၢ်, တၢ်ဆါဟံၣ်အပှ့ၤ, ကသံၣ်ကသီလၢ နီၣ်ကစၢ်ဘၣ်ပှ့ၤအီၣ်အီၤ, တၢ်ဒ်အံၤသ့ၣ်တဖၣ်န့ၣ်လီၤ.”
ပှၤလၢအဘၣ်ဝံ တၢ်အိၣ်ဒီးခဲစၢၣ်တၢ်ဆါ အတၢ်ဝံတၢ်ယိာ်ဃၢအံၤန့ၣ် အတမ့ၢ် Jackie ထဲတဂၤဧိၤဘၣ်.
လၢခဲစၢၣ်ပှၤဆါသ့ၣ်တဖၣ်အဂီၢ် ကမျၢၢ်ဆူၣ်ချ့တၢ်အံးထွဲကွၢ်ထွဲ သနူန့ၣ် ကျၢၢ်ဘၢမၤစၢၤဝဲ တၢ်လၢာ်ဘူၣ်လၢာ်စ့ အိၣ်အကလုာ်အါမး.
ဘၣ်ဆၣ်သနာ်က့ McCabe Centre ပှၤပၢဆှၢတၢ်အခိၣ်ဒိၣ် Hayley Jones စံးဝဲဒၣ် အီစထြ့လယါခဲစၢၣ်ကီၣ်ကးကရၢ အတၢ်ဃိထံသ့ၣ်ညါပာ်ဖျါအသီအပူၤန့ၣ် ဒုးနဲၣ်ဖျါအသးလၢ ပှၤအိၣ်ဒီးခဲစၢၣ်တၢ်ဆါ ၉၉ မျးကယၤန့ၣ် အဝဲသ့ၣ်မ့ၢ်လဲၤကူစါယါဘျါအသးဒီး ကမျၢၢ်ဆူၣ်ချ့တၢ်ကူစါယါဘျါ အကျိၤအကျဲဒၣ်လဲာ်န့ၣ် ဘၣ်ကွၢ်ဆၢၣ်မဲာ်ဒီး တၢ်လၢာ်ဘူၣ်လၢာ်စ့ လၢနီၣ်ကစၢ်ဒၣ်ဝဲ စ့ထၢၣ်ပူၤန့ၣ် အိၣ်ဝဲဒၣ်ဒိၣ်ဒိၣ်မုၢ်မုၢ်န့ၣ်လီၤ.
“တၢ်အံၤပၣ်ဃုာ်ဝဲဒီး တၢ်လၢာ်ဘူၣ်လၢာ်စ့ လၢတၢ်ဆါအံၤအဂီၢ်လိၤလိၤ ဒီး လၢအတမ့ၢ်လိၤလိၤဘၣ်ခံခါလၢာ်အဂီၢ် — လၢအပၣ်ဃုာ် တၢ်ဘၣ်တူၢ်ရှူကွံာ် ကျိၣ်စ့တၢ်ဟဲနုာ် မ့ၢ်လၢအဝဲသ့ၣ် လဲၤမၤတၢ်မၤတကဲဘၣ်ခီဖျိအိၣ်တဆူၣ်ဘၣ်အဃိန့ၣ်လီၤ.”
ခဲစၢၣ်ကီၣ်ကးကရၢ အတၢ်ပဲၤထံနီၤဖးအပူၤန့ၣ် ထံၣ်ဘၣ်ဝဲလၢ တၢ်ဘၣ်တူၢ်ရှူကွံာ် ကျိၣ်စ့တၢ်ဟဲနုာ် မ့တမ့ၢ် တၢ်ဖံးတၢ်မၤ အတၢ်တံာ်မုၢ်တံာ်တာ်သ့ၣ်တဖၣ်န့ၣ် မ့ၢ်ဝဲဒၣ် ကျိၣ်စ့တၢ်လၢာ်ဘူၣ်လၢာ်စ့ လၢအညီနုၢ်ကဲထီၣ်အသးအါကတၢၢ်တခါ, ဒီးပှၤအီစထြ့လယါဖိ လၢအဘၣ်ခဲစၢၣ်တၢ်ဆါ သၢပူတပူန့ၣ် ဘၣ်ကွၢ်ဆၢၣ်မဲာ်ဒီး တၢ်အိၣ်သးအံၤန့ၣ်လီၤ.
ဒီး Hayley Jones စံးဝဲဒၣ် တၢ်ဒ်အံၤန့ၣ် မ့ၢ်တၢ်လၢအမၤနးဒိၣ်ထီၣ်တၢ်အိၣ်သး, မ့ၢ်လၢ တၢ်ဘၣ်တူၢ်ရှူကွံာ် ကျိၣ်စ့တၢ်ဟဲနုာ်အံၤ အတမ့ၢ်တၢ်တစိၢ်တလီၢ်တခါဘၣ်အဃိန့ၣ်လီၤ.
“မ့ၢ်ကွၢ်လၢခဲကနံၣ်အံၤ အီစထြ့လယါကီၢ်န့ၣ် ပှၤအိၣ်မူလီၤတဲာ်တ့ၢ်လၢတၢ်ဆါအံၤအနီၣ်ဂံၢ်နီၣ်ဒွးန့ၣ် အိၣ်အါထီၣ် — အဝဲသ့ၣ်တၢ်ကူစါယါဘျါ အဆၢလၢအဟဲထီၣ်သ့ၣ်တဖၣ်အဖီခိၣ်, အဝဲသ့ၣ်ခဲစၢၣ်တၢ်ဆါအံၤမ့ၢ်ဘျါတဲာ်ကွံာ်ဒၣ်လဲာ် — လၢအခီပညီမ့ၢ်ဝဲ အဝဲသ့ၣ်အိၣ်မူဘၣ်တၢ်ဆၢကတီၢ်ယံၤထီၣ်ဝဲဒၣ်, နာ်သက့န့ၣ် တၢ်အံၤအခီပညီမ့ၢ်ဝဲဒၣ်လၢ အဝဲသ့ၣ်န့ၣ် ဘၣ်အိၣ်မူဃုာ်ဒီး ဆူၣ်ချ့တၢ်ဘၣ်ဒိဘၣ်ထံးအဂုၤအဂၤသ့ၣ်တဖၣ်ကအိၣ်ဝဲ လၢအကဲထီၣ်တၢ်တြီလၢအဝဲသ့ၣ်က့ၤနုာ်လီၤမၤကဒါက့ၤ တၢ်ဖံးတၢ်မၤတသ့လၢၤဘၣ်န့ၣ်လီၤ.”
Bill Stavreski လၢ Leukaemia Foundation စံးဝဲဒၣ် သွံၣ်ခဲစၢၣ်တၢ်ဆါ — လၢအမ့ၢ်ဒ်သိး Jackie ဒိးန့ၢ်ဘၣ်အီၤတကလုာ်အံၤ - ပၣ်ဃုာ်ဝဲဒၣ်ဖဲ တၢ်ကူစါယါဘျါဘၣ်အီၤအပှ့ၤဒိၣ်ကတၢၢ်အကျါန့ၣ်လီၤ.
“လၢတၢ်ထိၣ်ဃူနီၣ်ဂံၢ်အဖီခိၣ်န့ၣ်, ဟံၣ်ဖိဃီဖိတဒူၣ်စုာ်စုာ် — ပှၤဆါတဂၤစုာ်စုာ် — ဘၣ်ထုးထီၣ်ဝဲစ့လၢအနီၣ်ကစၢ်စ့ထၢၣ်အပူၤန့ၣ် အိၣ်ဘူးထီၣ်လၢ ဒီလၣ် ၈ဝဝဝ န့ၣ်လီၤ... အခီပညီတမ့ၢ်လၢ ပှၤဆါကိးဂၤဒဲး ဒီး ဟံၣ်ဖိဃီဖိကိးဒူၣ်ဒဲး ကဘၣ်လဲၤခီဖျိဘၣ်အီၤဘၣ်. နာ်သက့န့ၣ် လၢပှၤတနီၤနီၤအဂီၢ် — အဂၤ ၁ဝ အကျါတဂၤ — အဝဲသ့ၣ် ဘၣ်လဲၤခီဖျိဘၣ်ဝဲ တၢ်ထုးထီၣ်ဟ့ၣ်လီၤစ့ဖဲနီၣ်ကစၢ်စ့ထၢၣ်ပူၤန့ၣ် အိၣ်အါန့ၢ် ဒီလၣ် ၂ဝ,ဝဝဝ န့ၣ်လီၤ.”
တၢ်ဂ့ၢ်တၢ်ကျိၤနီၣ်နီၣ်သ့ၣ်တဖၣ်အကျါတခါ လၢအဒုးကဲထီၣ် တၢ်ကူစါယါဘျါခဲစၢၣ်တၢ်ဆါ အတၢ်လၢာ်ဘူၣ်လၢာ်စ့ အိၣ်အါန့ၣ် မ့ၢ်ဝဲဒၣ် ပှၤဆါအဝဲန့ၣ် အိၣ်ယံၤဝဲဒၣ်ဒီး တၢ်ကူစါဘျါ အဝဲၤလီၢ်သ့ၣ်တဖၣ်အဃိန့ၣ်လီၤ.
ခီဖျိလၢတၢ်အိၣ်သးဒ်အံၤအဃိ မ့ၢ်ထိၣ်သတြီၤ အီစထြ့လယါ ပှၤထူလံၤဖိအပှၤတဝၢ ဒီး ပှၤအီစထြ့လယါဖိ လၢအတမ့ၢ် ပှၤထူလံၤဖိဘၣ်သ့ၣ်တဖၣ်န့ၣ်, ကရၢအံၤစံးဝဲဒၣ်လၢ ပှၤထူလံၤဖိအပှၤတဝၢအတၢ်အိၣ်သးန့ၣ် နးဒိၣ်ဝဲဒၣ်န့ၣ်လီၤ.
Leukaemia Foundation ကရၢအံၤ ထုးထီၣ်ရၤလီၤဝဲ အနီၣ်ကစၢ်ဒၣ်ဝဲ အတၢ်ဃိထံသ့ၣ်ညါတခါ လၢအစံးဝဲဒၣ် ပှၤထူလံၤဖိ လွံၢ်ဂၤအကျါသၢဂၤ လၢအဘၣ် သွံၣ်ခဲစၢၣ်တၢ်ဆါန့ၣ် ဖဲအဘၣ်တၢ်ဆါအံၤအကတီၢ် အဝဲသ့ၣ်အိၣ်ဆိးဝဲဒၣ်ဖဲ တၢ်လီၢ်ဖဲ အယံၤဒီးခူပူၤဝ့ၢ်ပူၤ မ့တမ့ၢ် အိၣ်ဆိးဝဲဖဲ အီစထြ့လယါကီၢ် ခိခိၣ် ပှၢ်လၢ်ကျါအဟီၣ်ကဝီၤန့ၣ်လီၤ.
Bill Stavreski စံးဝဲဒၣ် မ့ၢ်လၢ ကအိၣ်ဘူးဒီးတၢ်ကူစါယါဘျါအလီၢ်အဂီၢ် တၢ်ခွဲးတၢ်ယာ်တအိၣ်ဘၣ်အဃိ ပှၤကညီသ့ၣ်တဖၣ် တၢ်ခွဲးတၢ်ယာ်အိၣ်ဝဲထဲတဆဲးဖိလၢအမ့ၢ် ဘၣ်လ့ၢ်လိၤဝဲဒၣ် တဘျီတခီၣ်န့ၣ် အဝဲသ့ၣ် ဘၣ်လ့ၢ်ထီၣ်လ့ၢ်လိၤ လၢအကံလိမံထၢၣ် အကထိအါမး — လၢအဘၣ်လ့ၢ်လိၤဝဲဒၣ် ထဲလၢအဝဲသ့ၣ် အနီၣ်ကစၢ်ဒၣ်ဝဲ — လၢအယံၤဒီး ပှာ်ဘျးစဲ တၢ်ဆီၣ်ထွဲမၤစၢၤအဝဲသ့ၣ်န့ၣ်လီၤ.
“တၢ်ကူစါယါဘျါ သွံၣ်ခဲစၢၣ်တၢ်ဆါန့ၣ် ညီနုၢ်န့ၣ် ယံၤဝဲဒၣ် လၢအနွံအါမး မ့တမ့ၢ် လၢအလါအါမးန့ၣ်လီၤ. အဃိတၢ်အံၤ အခီပညီန့ၣ် အါတက့ၢ် နဘၣ်လဲၤဒၣ်နတၢ်ထဲတဂၤဧိၤ မ့တမ့ၢ် နဟံၣ်ဖိဃိဖိ တဂၤ ကလဲၤပိာ်နခံန့ၣ်လီၤ. တကတီၢ်ဃီန့ၣ် နကဘၣ်ကွၢ်ဃုဝဲဒၣ်တၢ်အိၣ်တၢ်ဆိး တၢ်အိၣ်ပတုာ်အလီၢ် - ဒီး ဝံစိာ်တီဆှၢအတၢ်အိၣ်သး — မ့ၢ်တၢ်လၢအပှ့ၤဒိၣ်မးန့ၣ်လီၤ.”
ခဲစၢၣ်ကရၢအံၤ ဃိထံသ့ၣ်ညါဘၣ်ဝဲလၢ တၢ်အိၣ်ဖျါအက့ၢ်အဂီၤန့ၣ် လီၤပျံၤဒိၣ်န့ၢ်ဒံးလၢ တၢ်ဆိကမိၣ်ပာ်အီၤ, လၢအမ့ၢ် ပှၤထူလံၤဖိ ပှၤဆါသ့ၣ်တဖၣ် အတၢ်သံတၢ်ပှၢ်အနီၣ်ဂံၢ်န့ၣ် အါန့ၢ်ဒံး ပှၤဂုၤပှၤဂၤ ယဲၢ်ဆးန့ၣ်လီၤ.
“ဖဲန့ၣ်, န့ၣ် တၢ်ဂ့ၢ်တၢ်ကျိၤသ့ၣ်တဖၣ် ဟးထီၣ်အိၣ်ထဲတစွဲးတမွဲးဖိ ဒီး တၢ်ဃိထံသ့ၣ်ညါအံၤ ပာ်တၢ်ပညိၣ်လီၤဝဲဒၣ်ဖဲ တၢ်အိၣ်သးအံၤ မ့ၢ်အလီၤပျံၤထဲ, ထဲလဲၣ်န့ၣ်လီၤ. ပသ့ၣ်ညါလၢ တၢ်အိၣ်သးန့ၣ် လီၤပျံၤလီၤဖုး နာ်သက့ မ့ၢ်အနးထဲလဲၣ်န့ၣ် ပတသ့ၣ်ညါဘၣ်အီၤဘၣ်.”
ပှၤဂဲၤလိာ်န့ၢ်တၢ်လၢ ခဲစၢၣ်ပှၤဆါသ့ၣ်တဖၣ်အဂီၢ် ဒ်သိး Bill ဒီး Hayley သ့ၣ်တဖၣ် ဃ့ထီၣ်ဝဲဒၣ်ပဒိၣ်လၢ ကအိၣ်ဒီး တၢ်ဟူးတၢ်ဂဲၤ တၢ်မၤစၢၤအါထီၣ်, ခဲစၢၣ် အတၢ်မၤအၢမၤနးဒီး တၢ်လၢာ်ဘူၣ်လၢာ်စ့လၢတၢ်ဘၣ်ကွၢ်ဆၢၣ်မဲာ်အီၤသ့ၣ်တဖၣ်န့ၣ် အကထံၣ်ဝဲဒ်သိး ထံကီၢ်ဒီဘ့ၣ် ကမျၢၢ်ဆူၣ်ချ့ ဒီး တၢ်တုၤသိးထဲသိး အတၢ်ဂ့ၢ်ကီတခါအသိးန့ၣ်လီၤ.
Ms Jones စံးဝဲဒၣ် ကျိၣ်စ့ တၢ်ဟ့ၣ်ကူၣ်ဟ့ၣ်ဖးန့ၣ် မ့ၢ်ဝဲ ကျိၤကျဲတဘိ လၢကမၤစၢၤပှၤဆါသ့ၣ်တဖၣ်ဒီး အဝဲသ့ၣ်အဟံၣ်ဖိဃီဖိသ့ၣ်တဖၣ်, ဘၣ်ဆၣ်သနာ်က့ တၢ်မၤစၢၤအဂုၤအဂၤလၢ တၢ်မၤအီၤသ့နီၣ်နီၣ်ကီၢ်ကီၢ်သ့ၣ်တဖၣ် အိၣ်ဝဲဒၣ်န့ၣ်လီၤ.
“ပဆိကမိၣ်န့ၣ်, ပှၤအီစထြ့လယါဖိကိးဂၤဒဲးလၢ အဘၣ်ကူစါယါဘျါအသးလၢခဲစၢၣ်န့ၣ် ကြၢးဘၣ် ဘျးစဲပာ်အသးဒီး ကျိၣ်စ့တၢ်ဆီၣ်ထွဲမၤစၢၤ ဆိဆိ, ဒ်သိးအဝဲသ့ၣ် ကဒိးန့ၢ်ဘၣ် ခဲစၢၣ်တၢ်အံးထွဲကွၢ်ထွဲလၢအဂ့ၤကတၢၢ် လၢအတဘၣ်အိၣ်ဒီး တၢ်ဘၣ်ယိၣ်ဘၣ်ဘှီ ခီဖျိ ကျိၣ်စ့တၢ်ဘၣ်ဒိဘၣ်ထံးဘၣ်န့ၣ်လီၤ... ဖဲလၢအဝဲသ့ၣ် ဘၣ်ကွၢ်ဆၢၣ်မဲာ်ဒီး ခဲစၢၣ်တၢ်ဆါအခါန့ၣ် ဘၣ်မၤလီၤတံၢ်လၢ ပှၤကညီသ့ၣ်တဖၣ် အိၣ်ဒီး တၢ်ဟံးခွဲးန့ၢ် လၢလၢပှဲၤပှဲၤ, ခီဖျိလၢ တၢ်အိၣ်သးသ့ၣ်တဖၣ် ဆီတလဲအသး တတီၤဘၣ်တတီၤအဃိန့ၣ်လီၤ. ပှၤကညီသ့ၣ်တဖၣ် ဘၣ်သူဝဲဒၣ် အဝဲသ့ၣ် တၢ်ဟံးခွဲးန့ၢ် အဆၢကတီၢ်သ့ၣ်တဖၣ်, လၢလၢာ်ကွံာ်ချ့မး ... တၢ်ဂ့ၢ်ကီအဂၤတခါလၢ ပသ့ၣ်ညါပာ်သူၣ်ပာ်သးနီၣ်နီၣ်တခါန့ၣ်မ့ၢ်ဝဲဒၣ် တၢ်ဖံးတၢ်မၤသဲစးတၢ်ဘျၢ- တနံၣ်တဘျီအဂီၢ်တဟံးခွဲးန့ၢ်သ့ၣ်တဖၣ်န့ၣ် - တၢ်ဟ့ၣ်ထဲလၢပှၤလၢအမၤတၢ်မၤဒ်သိး တၢ်ဖံးတၢ်မၤလီၤစိၤ—permanent job သ့ၣ်တဖၣ်အဂီၢ်န့ၣ်လီၤ. ပှၤကညီလၢအမၤတၢ်ဒ်သိး casual work မ့တမ့ၢ် တၢ်ဆၢကတီၢ်ဖုၣ်ကိးအဂီၢ်သ့ၣ်တဖၣ် အိၣ်အါမး ဒီးအဝဲသ့ၣ်န့ၣ်အတဒိးန့ၢ်ဘၣ်ဝဲသဲစးတၢ်ဒီသဒၢသ့ၣ်တဖၣ်အံၤဘၣ်.”
Mr Stavreski စံးဝဲဒၣ် တၢ်အံၤန့ၣ် မ့ၢ်ဝဲဒၣ် တၢ်အိၣ်သးလၢ တၢ်မၤအီၤလၢအဆိအချ့တခါ ခီဖျိလၢ အီစထြ့လယါကီၢ်ပူၤအံၤ ပှၤဘၣ်ခဲစၢၣ် အနီၣ်ဂံၢ်နီၣ်ဒွးသ့ၣ်တဖၣ်ဟဲအါထီၣ်ဝဲဒၣ်ကွ့ၢ်ကွ့ၢ်အဃိန့ၣ်လီၤ.
“အီစထြ့လယါကီၢ်ပူၤအံၤ သွံၣ်ခဲစၢၣ်တၢ်ဆါန့ၣ် မ့ၢ်ဝဲခဲစၢၣ်တၢ်ဆါတကလုာ်လၢ အကဲထီၣ်ညီနုၢ် အါတကတၢၢ် သၢခါတခါန့ၣ်လီၤ... အပူၤကွံာ်အနံၣ် ၂ဝ ဘျဲၣ်အတီၢ်ပူၤန့ၣ် ပှၤဘၣ်သွံၣ်ခဲစၢၣ်တၢ်ဆါဟဲအါထီၣ် ဘူးထီၣ်လၢ အမျးကယၤ ၇ဝန့ၣ်လီၤ. ဖဲ ၂ဝဝ၆နံၣ် အခါန့ၣ် ပှၤအီစထြ့လယါဖိလၢအဘၣ်တၢ်ဆါအံၤအိၣ်ဝဲဒၣ်ဘူးထီၣ်လၢ ၁ဝ,၅ဝဝ ဂၤ. မ့မ့ၢ်ဖဲအပူၤကွံာ်တနံၣ်န့ၣ်, အိၣ်အါန့ၢ်ဝဲဒၣ် ၂ဝ,ဝဝဝ ဂၤန့ၣ်လီၤ.”
တၢ်အိၣ်သးမ့မ့ၢ်ဒ်လဲၣ်ဂ့ၤဘၣ်ဆၣ်, Jackie Henderson ဆိကမိၣ်လီၤဒံးဝဲဒၣ်အသးလၢအမ့ၢ်ပှၤတၢ်ဘူၣ်ဂ့ၤတဂၤ, ခီဖျိလၢ ဖဲလၢအဝဲဘၣ်လဲၤ ကသံၣ်ကသီတၢ်သ့ၣ်ဖးမုၢ်နံၤအဆၢကတီၢ်အခါဒီး တၢ်လဲၤကူစါယါဘျါသးလၢ ခံမိးသရဖံးဒီး အံးမျူးနိးသရဖံး အခါ အဝဲန့ၢ်ဘၣ်တ့ၢ် တၢ်ဆီၣ်ထွဲမၤစၢၤလၢအဝၤအအိၣ်အဃိန့ၣ်လီၤ.
