တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
မိန့ လၢအသးနံၣ်အိၣ် ၄၇နံၣ်အံၤမ့ၢ်ဝဲဒၣ်မိၢ်တဂၤလၢအအိၣ်ဒီးအဖိ လွံၢ်ဂၤဒီးဟဲတုၤအိၣ်ဆိးဝဲဖဲအီစထြ့လယါကီၢ် မဲလ်ဘၢဝ့ၢ်မုၢ်နုာ် ဖဲ ၂ဝဝ၇နံၣ်အခါန့ၣ်လီၤ.
ဖဲလါစဲးပထ့ဘၢၣ် ၁၂သီအနၤန့ၣ် မိန့ ဒိးန့ၢ်ဘၣ်ဝဲ ဝ့ဒၢမ်ကီၣ်ကးလီၢ်ကဝီၤ ၂ဝ၂၅နံၣ်, Business Person of the Year Wyndham Business Award 2025 ခိၣ်ဖးတၢ်လၤကပီၤခီဖျိအဝဲတီခိၣ်ရိၤမဲပၢဆှၢတၢ်ဖဲအဝဲတၢ်ကရၢကရိလၢအအံးထွဲကွၢ်ထွဲသူၣ်က့သးပှၢ်ဒီး ပှၤလၢ နီၣ်ခိနီၣ်သး ဆူၣ်ချ့တၢ်လီၤတူာ်လီၤကာ်အိၣ်သ့ၣ်တဖၣ်အဃိန့ၣ်လီၤ.
ခီဖျိလၢဒိးန့ၢ်ဘၣ်ခိၣ်ဖးတၢ်လၤကပီၤအံၤအဃိ မိန့ ပာ်ကဖၢလၢအသးလၢအဝဲဒီး အပှၤဘၣ်မူဘၣ်ဒါပှၤမၤသကိးတၢ်ဖိကိးဂၤဒဲးအဂီၢ် မ့ၢ်လၢ တၢ်မၤသကိး တၢ်ဆီၣ်ထွဲမၤစၢၤအဃိ အဝဲဒိးန့ၢ်ဘၣ်တၢ်လၤကပီၤအံၤန့ၣ်လီၤ.
ဖဲ ၂ဝ၁၉နံၣ်န့ၣ် မိန့ တီခိၣ်ရိၤမဲဒုးအိၣ်ထီၣ်ဝဲဒၣ် တၢ်ကရၢကရိအံၤ လၢအကိးဝဲအမံၤ Comfort Care & Community Services န့ၣ်လီၤ.
၂ဝ၁၉နံၣ်မ့ၢ်ဝဲ နံၣ်တနံၣ်လၢအကီခဲလၢဟီၣ်ခိၣ်ဒီဘ့ၣ်အဂီၢ် ခီဖျိလၢ တၢ်ဆါသံသတြိာ်ခိဘံး —၁၉ ကဲထီၣ်ရၤလီၤသကုၤဟီၣ်ခိၣ်ဒီဘ့ၣ် လၢတၢ်သံတၢ်ပှၢ်ကဲထီၣ်အါအါဂီၢ်ဂီၢ် ဒီး ပနံာ်တၢ်ဖံးတၢ်မၤ အတၢ်ဝးတရံး ဒီး ပှၤကညီအတၢ်အိၣ်မူဝးတရံးသ့ၣ်တဖၣ် တၢ်ဖီၣ်ဃံာ်ပာ်အီၤဒီးအနီၣ်ထိၣ်န့ၣ်လီၤ.
ဝ့ဒၢမ် မ့ၢ်ဝဲ လီၢ်ကဝီၤကီၣ်ကးကရၢ လၢအအိၣ်ဖဲ မဲလ်ဘၢဝ့ၢ်မုၢ်နုာ် တကပၤ ဖဲတၢ်လီၢ်လၢအမ့ၢ် ကညီဖိလၢအထူအထံးဟဲန့ၢ်လၢ ဘၣ်ကီဘၣ်ခဲဒဲကဝီၤသ့ၣ်တဖၣ် ဟဲတုၤအိၣ်ဆိး အအါကတၢၢ်အလီၢ်တတီၤန့ၣ်လီၤ.
ခီဖျိတၢ်ဒိးန့ၢ်ဘၣ်ခိၣ်ဖးတၢ်လၤကပီၤအံၤအဖီခိၣ် မိန့ ဟ့ၣ်ဂံၢ်ဟ့ၣ်ဘါစ့ၢ်ကီးဝဲဒၣ် ကညီဖိ လၢအမၤပနံာ်တၢ်ဖံးတၢ်မၤသ့ၣ်တဖၣ် ကသုးဘူးအသးဒီး နုာ်လီၤပၣ်ဃုာ်ပၣ်ဂီၢ်ဖဲ တဝၢ မိၢ်ပှၢ် အပူၤ ခီဖျိလၢ ကညီဖိလၢ အမၤပနံာ်တၢ်ဖံးတၢ်မၤသ့ၣ်တဖၣ် အိၣ်ဝဲဒၣ်အါမးအဃိန့ၣ်လီၤ.
တဘၣ်တဲလၢ ခိၣ်ဖးတၢ်လၤကပီၤလၢ ပနံာ်တၢ်ဖံးတၢ်မၤ အဂ့ၢ်တဂ့ၤ, မိန့ အတၢ်အိၣ်မူအပူၤ အဝဲတဆိကမိၣ်ဘၣ်လၢ အဒိကန့ၢ်ဘၣ်ခိၣ်ဖးတၢ်လၤကပီၤနီတဘျီဘၣ်.
ထီဘိန့ၣ် အဝဲသးစဲဒီးသးအိၣ်ဒၣ်လၢ ကမၤတၢ်ဖံးတၢ်မၤလၢအဘၣ်ဃးပှၤတဝၢတၢ်ဖံးတၢ်မၤ လၢအမ့ၢ်ကျဲတဘိလၢ အမၤစၢၤပှၤဂုၤပှၤဂၤ လၢအလိၣ်ဘၣ်တၢ်မၤစၢၤသ့ၣ်တဖၣ်န့ၣ်လီၤ.
အဝဲအတၢ်သးစဲလၢပှၤတဝၢတၢ်ဖံးတၢ်မၤအံၤ တမ့ၢ်အစးထီၣ်အသးဖဲအဝဲဟဲသုးအိၣ်ဆိးဖဲအီစထြ့လယါကီၢ်ပူၤဘၣ်.
နီၣ်နီၣ်တခီမိန့မ့ၢ်တ့ၢ်ဝဲ ကညီပိာ်မုၣ်ကရၢ ဘၣ်ကီဘၣ်ခဲဒဲကဝီၤခၢၣ်စးတဂၤ လၢတၢ်မၤစၢၤကွၢ်ထွဲ ဖိၣ်ဃဲ, ပိာ်မုၣ်ဒီး ပှၤသူၣ်က့သးပှၢ်သ့ၣ်တဖၣ် လၢအဝဲအိၣ်ဆိးတ့ၢ်ဖဲ မဲၢ်လးဒဲဝီၤအခါလံၤလံၤလံန့ၣ်လီၤ.
ဖဲအဝဲဟဲတုၤ အီစထြ့လယါအခါ ဒ်သိးပှၤဘၣ်ကီဘၣ်ခဲ အါဂၤသ့ၣ်တဖၣ်အသိး အဝဲဘၣ်စးထီၣ်လၢအခီၣ်ထံး မၤလိအဲကလံးကျိာ် ဒီး ဃုဖံးဃုမၤ လၢတၢ်သူၣ်ထီၣ် တၢ်အိၣ်မူအသီဖဲထံကီၢ်တၢ်လီၢ်လၢ လုၢ်လၢ်ဆဲးလၤ တဒ်သိး ကျိးတဒ်သိးဘၣ်အံၤအပူၤန့ၣ်လီၤ.
တၢ်အံးထွဲကွၢ်ထွဲမၤစၢၤ သူၣ်က့သးပှၢ်ဒီး ပှၤတဝၢတၢ်ဖံးတၢ်မၤအမဲာ်ညါ ခါဆူညါန့ၣ် မိန့ မုၢ်လၢ်ဒီး ကျဲးစၢးဝဲဒၣ်လၢအကန့ၢ်ဘၣ် လံာ်ပျဲ လၢတၢ်သူၣ်ထီၣ်ဆီလီၤ ပနံာ်တၢ်မၤ လၢအံးထွဲကွၢ်ထွဲသူၣ်က့သးပှၢ်ဝဲၤကျိၤအဂီၢ်န့ၣ်လီၤ.
