ဝံးထိရံယါကညီကျိာ်ကၠိ စိာ်မူစိာ်ဂဲၤ ကညီလံာ်လဲၢ်ဒီးတၢ်ဆဲးတၢ်လၤ

ဖဲလါစဲးပထ့ဘၢၣ် ၁၁သီ မုၢ်ဘူၣ် — မုၢ်ဃုနံၤန့ၣ် ကညီကျိာ်ကၠိလၢအအိၣ်ဖဲမဲလ်ဘၢမုၢ်နုာ်တပၤ အိၣ်ဒီး ကၠိဖိ ၁၂တီၤသ့ၣ်တဖၣ် အတၢ်ဖျိထီၣ်ကၠိ အမူးန့ၣ်လီၤ. တနံၣ်အံၤပှၤကၠိဖိလၢ အဖျိထီၣ်ကညီကျိာ်ကၠိ ၁၂တီၤသ့ၣ်တဖၣ်အိၣ်ဝဲအဂၤ ၁ဝဘျဲၣ်န့ၣ်လီၤ.

ပှၤ ၁၂ တီၤကၠိဖိသးဝံၣ်သကိးတၢ်ဖဲအဝဲသ့ၣ်ဖျိထီၣ်ကၠိအမူး. Photo: Shah Paung/SBS Karen

တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn

ဖဲတၢ်ဖျိထီၣ်ကၠိမူးအကတီၢ်အံၤ တၢ်ပာ်ဖျါထီၣ်ဝဲ ကၠိဖိသ့ၣ်တဖၣ် အတၢ်ဟူးတၢ်ဂဲၤ, ကညီလုၢ်လၢ်ဆဲးလၤတၢ်ဂဲၤကလံၣ် တကးဘၣ် ကၠိဖိမိၢ်ပၢ်ဒီး ကၠိသရၣ် သရၣ်မုၣ်လီၢ်လံၤသ့ၣ်တဖၣ်စ့ၢ်ကီး ဟဲထီၣ် ဟ့ၣ်ဂံၢ်ဟ့ၣ်ဘါဝဲ တၢ်ဖျိထီၣ်ကၠိအမူးအံၤန့ၣ်လီၤ.

ပှၤ ၁၂ တီၤကၠိဖိ ပာ်ဖျါထီၣ် ကညီလုၢ်လၢ်ဆဲးလၤ ဒိ တၢ်ဂဲၤကလံၣ်. Photo: Shah Paung/SBS Karen

ဖဲလၢထံၣ်လိာ်သံကွၢ်သံဒိးဒီး SBS ကညီကျိာ်တၢ်ရဲၣ်တၢ်ကျဲၤအဆၢကတီၢ် သရၣ်စီၤသးတီကူးနူ လၢအမ့ၢ်ကၠိသရၣ်ဖဲ ကညီကျိာ်ကၠိအံၤ စံးဝဲဒၣ် ကၠိအံၤ အိၣ်ဝဲဒၣ်ဖဲ Victoria School of Langauges — တၢ်ရဲၣ်တၢ်ကျဲၤအဖီလာ် လၢအပၣ်ဃုာ်ဒီးကျိာ်အဂုၤအဂၤအါမး, ဒီး လၢအအိၣ်ဝဲဒၣ်ဖဲ ဝံးထိရံယါကီၢ်စဲၣ်တၢ်ကူၣ်ဘၣ်ကူၣ်သ့ဝဲၤကျိၤအတၢ်ပၢအပူၤ ဒီး မ့ၢ်ဝဲကၠိတဖျၢၣ်လၢ ပဒိၣ်ပာ်ပနီၣ်အီၤန့ၣ်လီၤ.

၁၂ တီၤကၠိဖိ တၢ်ဟ့ၣ်လၤကပီၤက့ၤ ကၠိသရၣ် သရၣ်မုၣ် လီၢ်လံၤဒီး ခဲကနံၣ်အံၤသ့ၣ်တဖၣ် Photo: Shah Paung/ SBS Karen

ကညီကၠိလၢအစးထီၣ်အသးဖဲ ၂ဝဝ၇ ဒီး ခဲကနံၣ်အံၤ တုၤလီၤဝဲဒၣ်ဆူ ၂ဝ၂၅နံၣ်ဘူးကကတၢၢ်အံၤန့ၣ် ကၠိဖိအတၢ်ဟဲနုာ်လီၤထီၣ်ကၠိန့ၣ် အတၢ်အိၣ်သး ဆီတလဲအသးမ့ၢ်အိၣ် နာ်သက့ သရၣ်သးတီ အိၣ်ဝဲဒီးတၢ်ထံၣ်လၢအဂ့ၤတကပၤန့ၣ်လီၤ.

ဖဲပှၤကၠိဖိ ၁၂တီၤ ဖျိထီၣ်အတီၢ်အံၤန့ၣ် ကၠိသရၣ်မုၣ်လီၢ်လံၤသရၣ်မုၣ် ဘ့ဘံၣ် လၢအဘၣ်တၢ်သ့ၣ်ညါစ့ၢ်ကီးအီၤလၢ ဖံဘ့ဘံၤ ကတိၤဟ့ၣ်ဂံၢ်ဟ့ၣ်ဘါစ့ၢ်ကီးဝဲဒၣ် ပှၤကၠိဖိသ့ၣ်တဖၣ် လၢကအဲၣ်ကၢၤဃာ်ကညီဖိလံာ်လဲၢ် တၢ်ဆဲးတၢ်လၤ တကးဘၣ် ကစိာ်ခီအီၤခါဆူညါဒီး ဟ့ၣ်နီၤသကိးအီၤဆူအခိၣ်အဃၢၤန့ၣ်လီၤ.