ဒ်အမ့ၢ် တၢ်မၤလၤကပီၤ ပှၤမုာ်သးမၤကလီသ့ၣ်တဖၣ် အတၢ်ဖံးတၢ်မၤ တၢ်ဂဲၤလိာ်အသးနၢၣ် လၢတၢ်သူၣ်ထီၣ်ပှၤတဝၢအတၢ်ဂံၢ်တၢ်ဘါကဆူၣ်ဒိၣ်ထီၣ်အဂီၢ်ဒီး တၢ်မၤစၢၤပှၤကညီတဂၤဒီးတဂၤအတၢ်ဘျးစဲလိာ်အသးအဂီၢ် တနံၣ်အံၤတၢ်မၤလၤကပီၤအခိၣ်တီန့ၣ်မ့ၢ်ဝဲ, Connecting Communities န့ၣ်လီၤ.
ဘၣ်ဆၣ်သနာ်က့ စးထီၣ်ဖဲအပူၤကွံာ်စှၤကိးနံၣ်န့ၣ် အီစထြ့လယါကီၢ်ပူၤအံၤ ပှၤမုာ်သးမၤကလီ အနီၣ်ဂံၢ်န့ၣ်လီၤစှၤအဃိ, ဒုးအိၣ်ထီၣ် တၢ်ဃ့ထီၣ်ပဒိၣ်လၢ ကဟ့ၣ်လီၤအါထီၣ် တၢ်ဆီၣ်ထွဲမၤစၢၤဆူပှၤလၢအဟ့ၣ်လီၤကလီ အတၢ်ဆၢကတီၢ်ဒီး အတၢ်သ့တၢ်ဘၣ်သ့ၣ်တဖၣ်အဂီၢ်န့ၣ်လီၤ.
Dave Paulsen မ့ၢ်ပှၤမုာ်သးမၤကလီ လၢအသးနံၣ်အိၣ် ၇၅နံၣ်တဂၤ မၤစၢၤဝဲတၢ်ဖဲ Orange Sky တၢ်ကရၢကရိ လၢအအိၣ်ဖဲ Northern Rivers စးထီၣ်လၢ ၂ဝ၁၉နံၣ်အခါလံ ဒီး တၢ်မၤလၢအဝဲမၤအီၤန့ၣ်မ့ၢ်ဝဲဒၣ် ပှၤလၢအဟံၣ်တအိၣ်ဃီတအိၣ် ဒီး ပှၤလဲၤခီဖျိဘၣ် တၢ်နးတၢ်ဖှီၣ် နးနးကလဲာ်သ့ၣ်တဖၣ် အတၢ်ဆှုၣ်ကူကၤဒီး လုၢ်ထံလုၢ်နိအဂီၢ်န့ၣ်လီၤ.
အဝဲစံးဝဲဒၣ်,“တၢ်အံၤတနံၤအဂီၢ်န့ၣ်ဟ့ၣ်ဆူၣ်ထီၣ်အဝဲသ့ၣ်အသး, အဝဲသ့ၣ်တူၢ်ဘၣ်ဒ်သိး အလီၤဂာ်ဒ်သိးပှၤဂုၤပှၤဂၤ လၢအဆှုၣ်ဘၣ်အကူအကၤကိးမုၢ်နံၤ မ့တမ့ၢ် လုၢ်ဘၣ်ထံကိးမုၢ်နံၤဒဲးသ့ၣ်တဖၣ်န့ၣ်လီၤ. ပှၤဟဲဖဲအံၤတနီၤနီၤန့ၣ်, အတန့ၢ်ဆှုၣ်ဘၣ်အကူအကၤဘၣ်အိၣ်ဝဲခံနွံသၢနွံလံန့ၣ်လီၤ.”
ပှၤအီစထြ့လယါ လၢအဟံၣ်ဃီတအိၣ်ဘၣ်န့ၣ် အိၣ်အါန့ၢ် ၁၂၂,ဝဝဝ ဂၤန့ၣ်လီၤ.
Mr Paulsen စံးဝဲဒၣ်, တၢ်လီၢ်အံၤ ဟ့ၣ်လီၤဝဲ ပှၤဟံၣ်ဃီတအိၣ်ဘၣ်သ့ၣ်တဖၣ် လၢကဟဲဆှုၣ်အဝဲသ့ၣ်ကူကၤလုၢ်ထံလုၢ်နိ, ဟ့ၣ်လီၤအဝဲသ့ၣ်တၢ်လီၢ်လၢအပှဲၤဒီးတၢ်ပူၤဖျဲး တကးဘၣ်အမဲာ်ညါန့ၣ် ဟ့ၣ်လီၤစ့ၢ်ကီးအဝဲသ့ၣ်တၢ်ခွဲးတၢ်ယာ်လၢကဘျးစဲလိာ်သးဒီးပှၤဂုၤပှၤသ့ၣ်တဖၣ်န့ၣ်လီၤ.
“အဝဲသ့ၣ်ဆှုၣ်တၢ်မၤကဆှဲကဆှီသးကဝံၤအဂီၢ် ညီနုၢ်န့ၣ် ယံၤဝဲဒၣ် တနၣ်ရံၣ်, တနၢ်ရံၣ်ဒီးအမံးနံး ၁ဝ န့ၣ်လီၤ. အဝဲသ့ၣ်ဆှုၣ်တၢ်ဒီးမၤဃ့ထီၣ်အသးမ့ၢ်ဝံၤခဲလၢာ်န့ၣ် — အဝဲသ့ၣ်ဆ့ၣ်နီၤတဲပၠးပှၤအဝဲသ့ၣ်အဂ့ၢ်အကျိၤ မ့တမ့ၢ် တဲသကိးတၢ်ဂ့ၢ်အဂုၤအဂၤစ့ၢ်ကီးသ့န့ၣ်လီၤ. ပှၤကညီလၢအဆ့ၣ်နီၤဒီးတဲသကိးတၢ်န့ၣ်အိၣ်အါမး. ပှၤလၢအဆှုၣ်တၢ်မၤကဆှီသးတဝံၤဘၣ်စ့ၢ်ကီးအိၣ်အါမး. တနွံအတီၢ်အပူၤ တၢ်တနံၤအံၤ ပကဟဲန့ၣ် အဝဲသ့ၣ် သ့ၣ်ညါဝဲဒၣ်အဃိ အဝဲသ့ၣ် ဟဲဒီး တဲသကိးတၢ်တစဲးတမွဲးဖိစ့ၢ်ကီးအိၣ်ဝဲန့ၣ်လီၤ.”
တၢ်ဒုးအိၣ်ထီၣ်တၢ်ခွဲးတၢ်ယာ်လၢတၢ်ဘျးစဲလိာ်အသးအဂီၢ်န့ၣ် မ့ၢ်စ့ၢ်ကီးဝဲဒၣ် ပှၤမုာ်သးမၤကလီ Rheanca Lincoln လၢအသးနံၣ်အိၣ် ၁၉နံၣ်တဂၤမၤအီၤ ဖဲအဝဲအပှၤတဝၢ လၢအအိၣ်ဖဲ Toowoomba အပူၤန့ၣ်လီၤ.
အဝဲဒီးပှၤသူၣ်ဘီၣ်သးစၢ်အဂုၤအဂၤသ့ၣ်တဖၣ် ဒုးအိၣ်ထီၣ်ဝဲဒၣ် We Are Not Alone, တၢ်ကရၢကရိ လၢအဟဲစိာ်ဃုာ်ပှၤသူၣ်ဘီၣ်သးစၢ် လၢအအိၣ်ဒီးနီၣ်ခိတၢ်ဂံၢ်စၢ်ဘါစၢ် လၢခိခိၣ်ဟီၣ်ကဝီၤသဝီသ့ၣ်တဖၣ်အပူၤ တပူၤဃီ ဒီး မၤန့ၢ်ဝဲ တၢ်တၢၣ်ပီၣ်တဲသကိးဖုၣ်ကိးဒီး ပှၤဂ့ၢ်ဝီ တၢ်ဟူးတၢ်ဂဲၤမူးသ့ၣ်တဖၣ်န့ၣ်လီၤ.
“ယဆိကမိၣ် အခဲအံၤန့ၣ် တၢ်အိၣ်သယုၢ်အိၣ်လီၤဖျဲၣ်လီၤဧိထဲတဂၤဧိၤန့ၣ် မ့ၢ်တၢ်အါအကတၢၢ်လၢအမၤအသးဒီးပှၤသူၣ်ဘီၣ်သးစၢ်, ဒီးယဆိကမိၣ် တၢ်မုာ်သးမၤကလီန့ၣ် ဟ့ၣ်လီၤနၤ တၢ်တ့ဒုးအိၣ်ထီၣ်ကျိၤကျဲလၢအဒုးထီတၢ်တၢ်သ့ၣ်တဖၣ်အံၤန့ၣ်လီၤ. လၢယဂီၢ်န့ၣ်, တၢ်အံၤ အပျဲယၤလၢ ယကဘ့ၣ်လီၤကွံာ် ယကုလၢအအိၣ်ကျၢၢ်ဘၢပာ် ယၤ ၁၄နံၣ်အံၤဒီး ကွၢ်ကီဟီၣ်ခိၣ်တၢ်လီၢ်အဂုၤအဂၤသ့ၣ်တဖၣ် လၢကျိၤကျဲလီၤဆီလိာ်အသး, ဒီးမ့ၢ်တၢ်တခါလၢ အတ့ဒုးအိၣ်ထီၣ်ဝဲယတၢ်လဲၤကျဲလၢယလဲၤအီၤခဲကနံၣ်အံၤန့ၣ်လီၤ.”
Stephanie Harvey, မ့ၢ်ဝဲဒၣ် Bidjara ကလုာ်ဒူၣ်မုၣ်တဂၤ အိၣ်ဟဲန့ၢ်လၢ ခွံစလဲခၢၣ်သးဒီး မ့ၢ်ဝဲဒၣ် ပှၤထူလံၤဖိတီခိၣ်ရိၤမဲတၢ်ကရၢကရိ, Community First Development ကရၢအခိၣ်ဒိၣ်တဂၤ, ဒီးလၢအဝဲအဂီၢ်န့ၣ် တၢ်မုာ်သးမၤကလီန့ၣ် မ့ၢ်တၢ်ရ့ာ်လိာ်မုာ်လိာ် ခံခီယၢ်ခီတခါန့ၣ်လီၤ.
တၢ်ကရၢကရိအံၤဟဲစိာ်ဝဲ ပှၤမုာ်သးမၤကလီ လၢအအိၣ်ဒီးတၢ်သ့တၢ်ဘၣ်သ့ၣ်တဖၣ် — စးထီၣ်လၢ ပီၢ်ရီဒီး တုၤလီၤဆူ ပှၤသူၣ်ထီၣ်ဘှီထီၣ်တၢ်သူၣ်ထီၣ်, ပှၤသ့စဲးဖီကဟၣ်ဒီး သရၣ် သရၣ်မုၣ်သ့ၣ်တဖၣ် — လၢအဟဲသကိးတပူၤဃီဖဲပှၤထူလံၤဖိအပှၤတဝၢသ့ၣ်တဖၣ်အံၤအပူၤဒီး မၤသကိး တၢ်တိာ်ကျဲၤ အကလုာ်ကလုာ် အတၢ်ဖံးတၢ်မၤသ့ၣ်တဖၣ်န့ၣ်လီၤ.
Ms Harvey စံးဝဲဒၣ် ပှၤမုာ်သးမၤကလီသ့ၣ်တဖၣ်ဒီး ပှၤတဝၢသ့ၣ်တဖၣ်အဘၢၣ်စး =တၢ်သးစဲဘူးလိာ်သးန့ၣ်မ့ၢ်ဝဲနီၣ်ဝံာ်ခံခိၣ်သ့ၣ်လၢအဟဲမၤအဝဲသ့ၣ်တၢ်တိာ်ကျဲၤတၢ်ဖံးတၢ်မၤသ့ၣ်တဖၣ်န့ၣ်လီၤ.
“တၢ်မုာ်သးမၤကလီတၢ်ဖဲပှၤထူလံၤဖိအပှၤတဝၢသ့ၣ်တဖၣ်အပူၤန့ၣ်, မ့ၢ်ဝဲတၢ်မၤဝံၤအီၤလၢကျိၤကျဲအဘၣ်, တမ့ၢ်တၢ်လၢအဘၣ်ဃးဒီးတၢ်ဟ့ၣ်လီၤတၢ်ဘၣ်, အတဘၣ်ဃးပှၤဂ့ၢ်ဝီတၢ်မၤစၢၤဘၣ်, ဒီး လီၤတံၢ်တခါန့ၣ် အတမ့ၢ်တၢ်မၤလီၤတူာ်ကွံာ်တၢ်ဘၣ်န့ၣ်လီၤ. မ့ၢ်တၢ်လၢအဘၣ်ဃးဒီး တၢ်ဘျးစဲဒီး တၢ်ရ့လိာ်မုာ်လိာ်အမ့ၢ်အတီနီၣ်နီၣ်န့ၣ်လီၤ. ပပှၤမုာ်သးမၤကလီတၢ်သ့ၣ်တဖၣ်န့ၣ် အတမၤစၢၤတၢ်ဘၣ်, အဝဲသ့ၣ်မၤသကိးဃုာ်တၢ်တပူၤဃီဒီး ပှၤတဝၢကရၢဖိသ့ၣ်တဖၣ်, မၤလိန့ၢ်တၢ်လၢတဂၤဒီးတဂၤအအိၣ်ဒီး သူၣ်ထီၣ်သကိးတၢ်ရ့လိာ်မုာ်လိာ်န့ၣ်လီၤ. တၢ်အံၤမ့ၢ်ဝဲ တၢ်ဆီတလဲနီၤလီၤ ခံခီယၢ်ခီနီၣ်နီၣ်တခါ, လၢအမ့ၢ် ပှၤမုာ်သးမၤကလီသ့ၣ်တဖၣ်ဟ့ၣ်နီၤလီၤအဝဲသ့ၣ်တၢ်သ့တၢ်ဘၣ်ဒီးအတၢ်လဲၤခီဖျိသ့ၣ်တဖၣ်, လၢအအိၣ်စ့ၢ်ကီးဒီးတၢ်သ့ၣ်ညါနၢ်ပၢၢ်လုၢ်လၢ်ဆဲးလၤဒိၣ်ဒိၣ်ယိာ်ယိာ်, ပှဲၤဒီးတၢ်ပာ်ကဲဒီး တၢ်ဘျးစဲလိာ်သးတဂၤဒီးတဂၤန့ၣ်လီၤ.”
အီစထြ့လယါကီၢ်ပူၤအံၤ ပှၤမုာ်သးမၤကလီ ယဲၢ်ပူတပူန့ၣ် နုာ်လီၤပၣ်ဃုာ်ဖဲပှၤတဝၢဝဲၤကျိၤ တၢ်မၤသ့ၣ်တဖၣ်အပူၤ, ပှၤဂ့ၢ်ဝီဝဲၤကျိၤ, ဒီး တၢ်မၤစၢၤ ပှၤဟံၣ်တအိၣ်ဃီတအိၣ်ဘၣ်ဝဲၤကျိၤသ့ၣ်တဖၣ်အပူၤ ဒီး ပှၤမုာ်သးမၤကလီအဂၤတဖုန့ၣ် နုာ်လီၤမၤဝဲဒၣ်တၢ်ဒိၣ်ဒိၣ်မုၢ်မုၢ်ဖဲတၢ်မၤစၢၤ ဂ့ၢ်ဂီၢ်အူအဂီၢ်ဒီး န့ဆၢၣ်တၢ်တတၢၤတနါ အဂီၢ်န့ၣ်လီၤ.
Harmandeep Singh Sidhu လၢအအိၣ်ဖဲ Coffs Harbour တဂၤ မ့ၢ်ဝဲပှၤမုာ်သးမၤကလီတၢ်ဖဲ Rural Fire Service, ခိခိၣ်ဒူသဝီမ့ၣ်အူဝဲၤကျိၤ အပူၤန့ၣ်လီၤ.
ဖဲတယံၤဒ်ဘၣ်န့ၣ် အဝဲဒိးန့ၢ်ဘၣ်ဝဲ တၢ်လၤကပီၤခိၣ်ဖး မ့ၢ်လၢအဝဲမၤပူၤဖျဲး ပှၤမၤသံမ့ၣ်အူဖိအဂၤတဂၤ အသးသမူ ဖဲလၢအဝဲသ့ၣ်မၤသံပှၢ်မ့ၣ်အူအီၣ်တၢ်ဖဲ Clarence Valley တၢ်လီၢ် ဖဲ၂ဝ၂၃နံၣ်အခါန့ၣ်လီၤ.
Mr Sidhu တဲဘၣ်ဝဲ SBS Punjabi တၢ်ရဲၣ်တၢ်ကျဲၤ လၢအဘၣ်ဃးအဝဲတၢ်ဆၢတဲာ်လၢ အကဆီၣ်ထွဲမၤစၢၤပှၤတဝၢ လၢအဘၣ်ကွၢ်ဆၢၣ်မဲာ် န့ဆၢၣ်တၢ်တတၢၤတနါ သ့ၣ်တဖၣ် — လၢအမ့ၢ်တၢ်ရဲၣ်တၢ်ကျဲၤတခါလၢအဝဲအပာ်လီၤသးလၢကမၤအီၤတုၤအဝဲမၤအီၤတုၤလၢ ယမၤအီၤကဲတစုန့ၣ်လီၤ.
“ယနုာ်လီၤဖဲ RFS အပူၤဖဲ ၂ဝ၂ဝ နံအခါ, ယဆိကမိၣ်ထဲဒၣ်လၢ ယကဘၣ်မၤသံစၢၤမ့ၣ်အူဖဲယကျီးယဟံၣ်လီၢ်အခိၣ်အဃၢၤဝးဝးသ့ၣ်တဖၣ်န့ၣ်လီၤ. နာ်သက့ လၢခံန့ၣ် ယသးအိၣ်မၤဝဲဝဲၤကျိၤတၢ်မၤအံၤ လၢအဝဲသ့ၣ်မၤစၢၤတၢ်ဖဲ တၢ်အိၣ်သးလၢအအိၣ်ဒီးတၢ်လီၤဘၣ်ယိ ဒီး တၢ်ဂံၢ်စၢ်ဘါစၢ်အကတီၢ်န့ၣ်လီၤ. ဖဲ ၂ဝ၂၂နံၣ် Lismore ထံဒိၣ်ထီၣ်အခါ ယမၤစၢၤတၢ်စ့ၢ်ကီးန့ၣ်လီၤ. ဖဲန့ၣ်အလီၢ်ခံ, ယဆၢတဲာ်လၢယကနုာ်လီၤဖဲဝဲၤကျိၤအံၤအပူၤတစိၤသးန့ၣ်လီၤ.”
တၢ်သ့ၣ်တဖၣ်အံၤန့ၣ် မ့ၢ်ဝဲဒၣ် ကိးနံၣ်ဒဲး အီစထြ့လယါပှၤမုာ်သးမၤကလီတၢ်ဖိဘူးထီၣ်အဂၤ ၆ကကွဲၢ်ဃၣ်ဃၣ် အဂ့ၢ်အကျိၤ အတၢ်ဃဲၤပူတနီၤန့ၣ်လီၤ.
ဖဲတၢ်မၤလၤကပီၤ မုာ်သးမၤကလီအနွံ အကတီၢ် Volunteering Australia တၢ်ကရၢကရိအခိၣ်ဒိၣ် Mark Pearce စံးလၢ ပှၤမုာ်သးမၤကလီတၢ်သ့ၣ်တဖၣ် အနီၣ်ဂံၢ်စှၤလီၤဝဲဒၣ်ကွ့ၢ်ကွ့ၢ်န့ၣ်လီၤ.
“ပှၤမုာ်သးမၤကလီ လၢပပာ်ပနီၣ်အီၤဖိးဒီးသဲစးတၢ်ဘျၢအနီၣ်ဂံၢ်န့ၣ် ဒ်ယံၤဒ်စှၤလီၤန့ၣ်လီၤ. ပှၤသ့ၣ်တဖၣ်အံၤန့ၣ်မ့ၢ်ပှၤလၢအမုာ်သးမၤကလီဟ့ၣ်လီၤတၢ်ဆၢကတီၢ်ဖဲ တၢ်ကရၢကရိသ့ၣ်တဖၣ်အပူၤဒီး ပှၤတဝၢအပူၤန့ၣ်လီၤ. မ့ၢ်ကွၢ်လၢအမျးကယၤအဖီခိၣ်န့ၣ်, အပူၤကွံာ် အနံၣ်တဆံအခါ, ယဲၢ်နံၣ်အခါဒီး သၢနံၣ်အခါ ပှၤမုာ်သးမၤကလီသ့ၣ်တဖၣ်န့ၣ် အနီၣ်ဂံၢ်စှၤလီၤဝဲကွ့ၢ်ကွ့ၢ်န့ၣ်လီၤ.”
လၢကနုာ်လီၤပၣ်ဃုာ်ဖဲတၢ်မုာ်သးမၤကလီအပူၤအဂီၢ် တၢ်တြီတံာ်တာ်သ့ၣ်တဖၣ်န့ၣ်မ့ၢ်ဝဲ, ဘၣ်ထုးထီၣ်ကျိၣ်စ့တၢ်လၢၤဘူၣ်လၢၤစ့ဖဲနီၣ်ကစၢ်ဒၣ်ဝဲအထၢၣ်ပူၤဒီး ဝဲၤကျိၤဝဲဒ့လၢတၢ်လိၣ်ဘၣ်နီၣ်နီၣ်သ့ၣ်တဖၣ်အပူၤ ကနုာ်လီၤမုာ်သးမၤကလီတၢ်အဂီၢ် တၢ်မၤလၢတၢ်ဘၣ်မၤအီၤသ့ၣ်တဖၣ်န့ၣ် တၢ်ဟ့ၣ်လီၤတၢ်သိၣ်လိတအိၣ်ဘၣ်အဃိ Volunteering Australia စံးလၢ တၢ်အံၤ မ့ၢ်စ့ၢ်ကီးတၢ်ဂ့ၢ်တၢ်ကျိၤတခါလၢ အဒုးစှၤလီၤ ပှၤမုာ်သးမၤကလီတၢ်ဖိသ့ၣ်တဖၣ်အနီၣ်ဂံၢ်န့ၣ်လီၤ.
Mr Pearce စံးဝဲဒၣ်လၢ လိၣ်ဘၣ်အါထီၣ် ကျိၣ်စ့တၢ်ဆီၣ်ထွဲ ဒ်သိးကမၤလီၤတံၢ် ပှၤမုာ်သးမၤလီသ့ၣ်တဖၣ်န့ၢ်ဘၣ်တၢ်ဆီၣ်ထွဲမၤစၢၤ လၢအကဟ့ၣ်လီၤအဝဲသ့ၣ်တၢ်ဆၢကတီၢ် ဒီးမၤစၢၤပှၤဂုၤပှၤဂၤအဂီၢ်န့ၣ်လီၤ.
“တၢ်မုာ်သးမၤကလီန့ၣ်မ့ၢ်ဝဲပှၤတဝၢကိးခါဒဲးဆူၣ်ချ့ဒီးအတၢ်အိၣ်မုာ်ဆိးပၢၤအဂံၢ်ခီၣ်ထံးန့ၣ်လီၤ. လၢတၢ်ပိာ်ထွဲသးအံၤအဖီခိၣ်, ဒ်သိးအဝဲသ့ၣ်တဖၣ်အံၤတဲဝဲလၢ, 'ယအိၣ်ဒီးတၢ်ပာ်သးကျၢၤမုစုလၢကမၤစၢၤယပှၤတဝၢ' ကသ့အဂီၢ်န့ၣ် ကီၢ်စၢဖှိၣ် ဃုာ်ဒီး ကီၢ်စဲၣ်ဒီး ကဝီၤဒိၣ်တၢ်ပၢပဒိၣ်သ့ၣ်တဖၣ် မူဒါအိၣ်လၢ ကထုးကွံာ် စုလၢအမၤစၢၤ ပှၤဂုၤပှၤသ့ၣ်တဖၣ်အံၤ အတၢ်ဝံတၢ်ယိာ်ဃၢန့ၣ်လီၤ.”
အဝဲစံးဝဲဒၣ် ဖဲမုာ်သးမၤကလီအနွံအံၤ မ့ၢ်တၢ်ခွဲးတၢ်ယာ်ဂ့ၤတခါလၢ ကပတုာ်ဒီးဆိကမိၣ်ထီၣ် ပှၤလၢအပာ်သးကျၢၤမုဆှု ဟ့ၣ်လီၤသး မုာ်သးမၤကလီတၢ် လၢတၢ်ဆီတလဲကအိၣ်ထီၣ်အဂီၢ် ကိးဂၤဒဲးန့ၣ်လီၤ.
“အဝဲသ့ၣ်န့ၣ်, ဟ့ၣ်နၤသးအတၢ်သ့ၣ်ညါ လၢအမ့ၢ် တၢ်မၤအီၤန့ၢ်မၤအီၤသ့သ့ၣ်တဖၣ် မ့ၢ်မနုၤလဲၣ်. တၢ်ဆၢကတီၢ် တတီၤ မ့တမ့ၢ် တတီၤန့ၣ် ပတူၢ်ဘၣ်ဒ်သိး ပှၤမၤစၢၤပှၤတအိၣ်ဘၣ်, တၢ်မုာ်သးမၤကလီန့ၣ် မ့ၢ်ဝဲကျိၤကျဲလီၤဆီတခါ လၢအဟ့ၣ်လီၤပှၤ ဝဲၤဒ့လၢကမၤတၢ်လၢအကါဒိၣ် လၢပဂီၢ်တခါခါ, ဒ်သိးကပတုာ် တၢ်တူၢ်ဘၣ်လၢ တၢ်မၤစၢၤတအိၣ်ဘၣ်ဒီး ဟ့ၣ်လီၤစ့ၢ်ကီးပှၤတၢ်ခွဲးတၢ်ယာ်လၢကနုာ်လီၤပၣ်ဃုာ်ပၣ်ဂီၢ်ဘၣ်ဖဲပှၤကျါန့ၣ်လီၤ. ဒီးတၢ်ဂ့ၢ်သ့ၣ်တဖၣ်အံၤန့ၣ်မ့ၢ်တၢ်ဆဲးကလၤက့ၤတၢ်အိၣ်သးသ့ၣ်တဖၣ်အံၤန့ၣ်လီၤ.”
