ဖဲအပူၤကွံာ်တယံၤဒ်ဘၣ် One Nation အတၢ်ဂဲၤထၢၣ်အဃိ ပာ်လီၤဝဲဒၣ် ပှၤဟဲနုာ်လီၤဆူထံကီၢ်အပူၤဂ့ၢ်ဝီ, ဒီကလုာ်တၢ်ဘံၣ်တၢ်ဘၢဂ့ၢ်ဝီ, ဒီး ကလုာ်ဒူၣ်ဆဲးလၤအါကလုာ်သနူဂ့ၢ်ဝီသ့ၣ်တဖၣ် ဖဲတၢ်တၢၣ်ပီၣ်တဲသကိးစရီအပူၤ, ဘၣ်ဆၣ်သနာ်က့ ပှၤသ့ပှၤဘၣ်စဲၤနီၣ်သ့ၣ်တဖၣ်စံးလၢ တၢ်အံၤမ့ၢ်ဝဲဒၣ် နံၣ်ဆံဖှိၣ်အါမးအတီၢ်ပူၤ တၢ်သဘံၣ်သဘုၣ်လၢ တၢ်ပာ်လီၤတ့ၢ်အီၤဒီးအကျိၤအကျဲမူးမူးနီၣ်နီၣ်အံၤ ဟဲမူထီၣ်ဂဲၤထီၣ်ဒီးအိၣ်ဖျါထီၣ်ဝဲန့ၣ်လီၤ. လ့ၢ်ဘရၢၢ်ကရၢခိၣ် Angus Taylor ဂ့ၢ်လိာ်ဝဲတၢ်ဖီၣ်လိာ်စုမၤသကိးတၢ်ဒီး စုထွဲသနူပၣ်တံၣ်အံၤ, နာ်သက့ တၢ်အိၣ်သးအိၣ်ဒံးလၢ အကဃုထၢ မၤန့ၢ်ဝဲဒၣ်တၢ်သးလီၤပလိာ် လၢကမၤသကိးတၢ်အဂီၢ်သ့ၣ်တဖၣ်န့ၣ်လီၤ. One Nation အံၤ ပာ်ဒ့ၣ်ပာ်ကမၣ်ဝဲ ကရၢစၢဖှိၣ်လၢ အမၤဒိန့ၢ် အဝဲသ့ၣ် သနူသ့ၣ်တဖၣ်န့ၣ်လီၤ. တၢ်အဝဲအံၤန့ၣ်မ့ၢ်တၢ်ပာ်ဖျါထီၣ် One Nation ထံရူၢ်ကီၢ်သဲး အတၢ်ပညိၣ်ကွၢ်စိ တၢ်သူၣ်ဆူၣ်သးဂဲၤသ့ၣ်တဖၣ် ဒီး ပၣ်တံၣ်အံၤ အတၢ်စိကမီၤလုၢ်ဘၢန့ၣ် အခီပညီကအိၣ်ဒီး ဆူမဲာ်ညါတဘျီ တၢ်ဃုထၢအဂီၢ်ဒ်လဲၣ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
ထံဂုၤကီၢ်ဂၤကိတိာ် Penny Wong ဟ့ၣ်ပလီၢ်တ့ၢ်ဝဲဒၣ်လၢ "monoculturalism" တၢ်ဆဲးတၢ်လၤထဲတကလုာ်ဧိၤသနူန့ၣ် ကမ့ၢ်ဝဲတၢ်မၤပျံၤမၤဖုးလၢ ဒီကလုာ်တၢ်ဘံၣ်တၢ်ဘၢအဂီၢ်န့ၣ်လီၤ.
ဖဲအဝဲကတိၤလီၤတၢ်ဖဲ Lowy Institute အခါန့ၣ် အဝဲစံးဝဲဒၣ် ပှၤအီစထြ့လယါဖိသ့ၣ်တဖၣ်န့ၣ် ပာ်လုၢ်ပာ်ပှ့ၤဒံးဝဲဒၣ် ဒံၣ်မိၣ်ခြ့ၣ်စံၣ်ဒီး ကလုာ်ဒူၣ်ဆဲးလၤအါကလုာ်သနူန့ၣ်လီၤ.
“ပှၤအီစထြ့လယါဖိအတၢ်သ့တၢ်ဘၣ်လၢ အဘျးစဲဒီး ပှၤကညီလၢ သကုၤဟီၣ်ခိၣ်ဒီဖျၢၣ်အပူၤန့ၣ် ယနာ်ထီဘိလၢအမ့ၢ်ဝဲဒၣ် ဒီကလုာ်အတၢ်န့ၢ်သါတခါ, ဒီကလုာ်အတၢ်န့ၢ်သါတနမံၤလၢ အမၤလဲၢ်ထီၣ် ပတၢ်ဃုထၢသ့ၣ်တဖၣ်ဖဲဟီၣ်ခိၣ်ဒီဖျၢၣ်အပူၤအံၤန့ၣ်လီၤ. တၢ်ဃ့ထီၣ်လၢ တၢ်ဆဲးတၢ်လၤထဲတမံၤဧိၤသနူန့ၣ် မ့ၢ်ဝဲတၢ်ဃ့ထီၣ်အီစထြ့လယါကီၢ်လၢ အကပတုာ်ကွံာ်ပတၢ်ဃုထၢသ့ၣ်တဖၣ်ဒီး ဒီၣ်တဲာ်ကွံာ်ပတၢ်ဘျးစဲသ့ၣ်တဖၣ်န့ၣ်လီၤ. မ့ၢ်ဘၣ်တဲအီၤပျီပျီန့ၣ်မ့ၢ်ဝဲ, တဘၣ်အိၣ်ဒီးတံၤသကိးလၢကဘၣ်မၤသကိးဃုာ်တၢ်အဂီၢ်ဘၣ်, တဘၣ်အိၣ်ဒီး တၢ်ကူၣ်လဲၤမၤကၤ ပှၤမၤသကိးတၢ်သ့ၣ်တဖၣ်ဘၣ် ဒီး တဘၣ်အိၣ်ဒီး တၢ်ဒိၣ်ထီၣ်ထီထီၣ် အတၢ်ခွဲးတၢ်ယာ်သ့ၣ်တဖၣ်ဘၣ်န့ၣ်လီၤ. မ့ၢ်ဝဲတၢ်တခါလၢ ကဘၣ်အိၣ်လီၤဖျဲၣ်လီၤဟိ အိၣ်သယုၢ်ထဲတဂၤဧိၤ ဖဲဟီၣ်ခိၣ်လၢအပှဲၤဒီး တၢ်လီၤဘၣ်ယိၣ်ဘၣ်ဘှီအံၤအပူၤန့ၣ်လီၤ.”
အဝဲတၢ်ကတိၤလီၤအံၤအပူၤန့ၣ် အတတဲဖျါထီၣ်ဝဲဒၣ် One Nation မ့တမ့ၢ် Pauline Hanson အမံၤဘၣ် နာ်သက့ ဟ့ၣ်လီၤဝဲ ပၣ်တံၣ်တၢ်ဂဲၤလိာ်အကျိၤအကျဲ တၢ်ပဲၤထံနီၤဖးသ့ၣ်တဖၣ်, လၢအပၣ်ဃုာ် တၢ်အဝဲအံၤန့ၣ်မ့ၢ်တၢ်ဒုးအိၣ်ထီၣ်တၢ်လီၤဘၣ်ယိၣ်ဒီး အီစထြ့လယါကီၢ် အတၢ်အိၣ်ဆၢထၢၣ်ဖဲဟီၣ်ခိၣ်ဖျၢၣ်အပူၤန့ၣ်လီၤ.
ဖဲအပူၤကွံာ်ခံလါန့ၣ်, One Nation ကရၢခိၣ် Pauline Hanson ဂဲၤဆၢၣ်တၢ်တဲလီၤတၢ်ဖဲ— Press Club အပူၤဒီးစံးဝဲဒၣ်:
“ပကဲကလုာ်ဒူၣ်ဆဲးလၤအါကလုာ်ပှၤကရၢကရိတသ့ဘၣ်. ပမ့ၢ်ကလုာ်ဒူၣ်ဆဲးအါအကလုာ် အပှၤကရၢကရိတခါ နာ်သက့ ပကဘၣ်မ့ၢ်ဝဲဒၣ် တၢ်ဆဲးတၢ်လၤထဲတကလုာ်န့ၣ်လီၤ.”
အဝဲဃ့ထီၣ်လၢ တၢ်ကဒီၣ်တဲာ်စှၤကွံာ် တၢ်တူၢ်လိာ်ပှၤကညီဖဲ အီစထြ့လယါကီၢ် ပှၤသုးလီၢ်အိၣ်ဆိးအတၢ်ရဲၣ်တၢ်ကျဲၤအပူၤ— လၢအမ့ၢ် တနံၣ်န့ၣ်ကပာ်အနီၣ်ဂံၢ် ၁၃ဝ,ဝဝဝ ဂၤ, ဒီး ဃ့ထီၣ်စ့ၢ်ကီးဝဲလၢ တၢ်ကမၤဟးဂီၤမၤလီၤပှီၢ်ကွံာ် တၢ်လၢအဝဲကိးအီၤ 'illegals' တဖိးသဲစးတၢ်ဘျၢဘၣ်သ့ၣ်တဖၣ်န့ၣ်လီၤ.
ကရၢစၢဖှိၣ်စ့ၢ်ကီး အဲၣ်ဒိးဝဲလၢ တၢ်ကဒီၣ်တဲာ်စှၤလီၤကွံာ် ပှၤသုးလီၢ်အိၣ်ဆိးအနီၣ်ဂံၢ်, ဒီး ပှၤထီဒါတၢ်ကရၢ ဟံၣ်ဃီဂ့ၢ်ဝီကိတိာ် Andrew Bragg ပာ်ဖျါထီၣ်ဝဲတၢ်ပနီၣ်လၢ တၢ်ကထုးစှၤလီၤစှၤကွံာ် ပှၤသုးလီၢ်အိၣ်ဆိးအနီၣ်ဂံၢ်, လၢတနံၣ်အဂီၢ်န့ၣ် ကတူၢ်လိာ်ပာ်ပနီၣ်အီၤထဲဒၣ် ၁၈ဝ,ဝဝဝ ဂၤန့ၣ်လီၤ.
အပှၤမၤသကိးတၢ်သ့ၣ်တဖၣ် တတူၢ်လိာ်ဝဲဒၣ် နီၣ်ဂံၢ်နီၣ်ဒွးအံၤဘၣ်, နာ်သက့ တသီဝံၤအလီၢ်ခံ ဖဲအကတိၤလီၤတၢ်ဖဲ ဒီကလုာ်တၢ်ပာ်ဖျါထီၣ်တၢ်ကစီၣ်အလီၢ်—National Press Club အပူၤန့ၣ်, Mr Bragg ပာ်ဖျါထီၣ်ဝဲအတၢ်ထီဒါန့ၣ်လီၤ.
“တၢ်အံၤန့ၣ်မ့ၢ်ဝဲတၢ်ပာ်ပနီၣ်အတကွီၣ်သ့ၣ်တဖၣ်န့ၣ်လီၤ. နမ့ၢ်အဲၣ်ဒိးကးတံာ်လီၤကွံာ် ဟံၣ်ဃီဒီး ပှၤသုးလီၢ်အိၣ်ဆိး အတၢ်လီၤဖျဲၣ်လီၤဟိန့ၣ်, တၢ်ဂ့ၢ်ကီလၢနဘၣ်ကျဲးစၢးဘှါရှဲအီၤ, လၢပဘၣ်တဲအီၤရှဲရှဲန့ၣ်မ့ၢ်ဝဲဒၣ်, လ့ၢ်ဘၢၣ် အပှၤသုးလီၢ်အိၣ်ဆိးတၢ်ရဲၣ်တၢ်ကျဲၤန့ၣ် တလၢပှဲၤထီၣ်ဘးဘၣ် ဒီး တၢ်လီၤဖျဲၣ်လီၤဟိအိၣ်ထီၣ် လၢအဟ့ၣ်လီၤ ပှၤကညီအဂၤ ၃၅ဝ တုၤလၢ ၄ဝဝ,ဝဝဝ ဟံၣ်ဃီလီၢ်အိၣ်လီၢ်ဆိးတန့ၢ်ဘၣ်, မ့ၢ်ဝဲတၢ်ဂ့ၢ်အံၤန့ၣ်လီၤ.”
အဝဲစံးစ့ၢ်ကီးဝဲဒၣ်လၢ ပှၤအီစထြ့လယါဖိလၢ အတၢ်ဟဲနုာ်အိၣ်စှၤသ့ၣ်တဖၣ် ဘၣ်သ့ၣ်သ့ၣ်န့ၣ် အကဘၣ်တူၢ်လိာ်ဝဲဒၣ် ဟံၣ်ဃီလၢအပတီၢ်တထီၣ်ဘးဘၣ်သ့ၣ်တဖၣ် — ဘၣ်ဆၣ်သနာ်က့ တၢ်ဆှၢနုာ်လီၤသ့ၣ်တဖၣ်အံၤန့ၣ် အပှၤမၤသကိးတၢ်ဒီးအီၤသ့ၣ်တဖၣ် တတူၢ်လိာ်အီၤဂ့ၤဂ့ၤဘၣ်.
ဖဲလၢအဟးထီၣ်ကွံာ်လၢ Nationals ကရၢပူၤဝံၤအလီၢ်အခံ, ခဲကနံၣ်အံၤ One Nation ဘျီၣ်ဒိၣ်ခၢၣ်စး Barnaby Joyce စံးဝဲဒၣ် ကရၢစၢဖှိၣ်သနူအပူၤ တၢ်ဆီတလဲအိၣ်ထီၣ်ဒ်အံၤန့ၣ် မ့ၢ်ဝဲတၢ်ဂ့ၤတမံၤန့ၣ်လီၤ.
“အဝဲန့ၣ်အိၣ်ဖဲကျဲခိၣ်လၢ အကမၤဒိးဝဲဒၣ် One Nation — တၢ်အဝဲန့ၣ်မ့ၢ်တၢ်လၢအလီၤပတြၢၤဒိၣ်မးန့ၣ်လီၤ.”
ဘျီၣ်ဒိၣ်ထးခီခၢၣ်စး Hanson အံၤ ပာ်ဒ့ၣ်ပာ်ကမၣ်စ့ၢ်ကီးဝဲ ကရၢစၢဖှိၣ်လၢ အမၤဒိန့ၢ်အဝဲအသနူသ့ၣ်တဖၣ်, ဒီးတကတီၢ်ဃီန့ၣ်စံးဝဲဒၣ်လၢ ပၣ်တံၣ်ဖးဒိၣ်သ့ၣ်တဖၣ်န့ၣ် တအိၣ်ဒီးတၢ်ဂ့ၢ်လီၤတံၢ်လီၤဆဲးလၢအဘၣ်နီတဘျီဘၣ်.
ခဲၤဘၤရၤ ဖၠၣ်စိမိၤ, ထံရူၢ်ကီၢ်သဲးဂ့ၢ်ဝီ ပှၤစဲအ့ၣ်ဖိ Dr Jordan McSwinney စံးဝဲဒၣ်, တၢ်ဂံၢ်တၢ်ဘါသ့ၣ်တဖၣ်အံၤန့ၣ် က့ၤကဒါဝဲဒၣ်ဆူအလီၢ်ခံ လၢအပူၤကွံာ် အနံၣ် ၃ဝ အခါန့ၣ်လီၤ.
“One Nation အတၢ်စံၣ်စိၤတဲစိၤန့ၣ် အိၣ်ဝးတရံးဝဲအသးဖဲ Coalition အပူၤန့ၣ်လီၤ.”
တၢ်လၢ Pauline Hanson အံၤ အခီၣ်ထံးခီၣ်ဘိန့ၣ် မ့ၢ်ဝဲဒၣ် လ့ၢ်ဘရၢၢ်—Liberal ခၢၣ်စးတဂၤ နာ်သက့ တချုးဖဲ ၁၉၉၆နံၣ် တၢ်မၤတၢ်ဃုထၢဒ်ဘၣ်အခါန့ၣ် ဘၣ်တၢ်ထုးထီၣ်ကွံာ်အီၤလၢ ကရၢအံၤအပူၤန့ၣ်လီၤ.
ဖဲ ၂ဝဝ၁နံၣ်န့ၣ်, John Howard သဆၣ်ထီၣ်ဝဲ ပှၤဟ့ၣ်တၢ်ဖးသ့ၣ်တဖၣ်လၢ ကပာ်ဝဲဒၣ် One Nation ပၣ်တံၣ်လၢတၢ်လီၢ်ခံကတၢၢ်, နာ်သက့ Dr McSwinney စံးဝဲဒၣ် လ့ၢ်ဘရၢၢ် ကိတိာ်ခိၣ်ကျၢၢ်လီၢ်လံၤအံၤ တအိၣ်ဒီးတၢ်ဒုးလိာ်သးဒီး ပၣ်တံၣ်အံၤထီဘိဘၣ်.
“နီၣ်နီၣ်န့ၣ် ဒိးသန့ၤထီၣ်အသးလၢ နသံကွၢ်မတဂၤလဲၣ်အဖီခိၣ် ခီဖျိလၢ တၢ်အိၣ်သးတနီၤန့ၣ်, အဝဲသ့ၣ်န့ၣ် အဝဲသ့ၣ်ထီဒါဝဲဒၣ် One Nation အံၤဖးဆူၣ်ဖိညါ. တဲဝဲလၢအဝဲသ့ၣ်န့ၣ်အတမၤတၢ်ဒ်သိး တၢ်ဃုထၢတၢ်ဂ့ၢ်လၢတၢ်ကဘၣ်မၤဆိအီၤသ့ၣ်တဖၣ် အတၢ်သးလီၤပလိာ်ဘၣ်. နာ်သက့ ယဆိကမိၣ်န့ၣ်, မ့ၢ်ကွၢ်ကဒါက့ၤလၢတၢ်ဂ့ၢ်အံၤန့ၣ်, ပကထံၣ်ဘၣ်ဝဲဒၣ် Howard အတၢ်ပၣ်ဃုာ်တဆဲးဖိ, ဒီး အပူၤကွံာ်လၢညါ ကရၢစၢဖှိၣ်ပဒိၣ်န့ၣ် ပထံၣ်ဘၣ်အမၤတၢ်လၢအလီၤဂာ်ဒ်သိး One Nation တဲဘၣ်ဃးတၢ်ဂ့ၢ်သ့ၣ်တဖၣ် ဒီး အတၢ်ရဲၣ်တၢ်ကျဲသ့ၣ်တဖၣ် ဖးအါဖိညါ, နာ်သက့ အဝဲသ့ၣ်န့ၣ်အိၣ်ဒီးတၢ်ခူသူၣ်ဒီး သူဝဲတၢ်ကတိၤလၢအကပုာ်န့ၣ်လီၤ.”
အဝဲစံးဝဲဒၣ်, ဘၣ်ဃးဒီး Howard ပဒိၣ် ကျဲးစၢးမၤဟါမၢ်ကွံာ် သနူအတၢ်ဂ့ၢ်ကီခိၣ်သ့ၣ် လၢအတအိၣ်ဒီးပၣ်တံၣ်တၢ်တၢၣ်ပီၣ်တဲသကိး လၢအဖိသဲစးတၢ်ဘျၢဘၣ်န့ၣ် မ့ၢ်ဝဲတၢ်မၤလိတခါလၢကရၢစၢဖှိၣ်အဂီၢ်န့ၣ်လီၤ.
ပှၤထီဒါတၢ်ကရၢခိၣ် Angus Taylor ဆၢတဲာ်လၢ အတမၤသကိးတၢ်ဒီး ကရၢစၢဖှိၣ်အပၣ်တံၣ်ဖိအံၤဘၣ်, နာ်သက့ LNP ကရၢဖိသ့ၣ်တဖၣ် ဆှၢလီၤဝဲ အဝဲသ့ၣ် တၢ်ကစီၣ်လၢအအိၣ်ကျဲၣ်ကျီအသး, လၢအဘၣ်ဃးဒီး တၢ်ဃုထၢတၢ်ဂ့ၢ်လၢတၢ်ကမၤဆိအီၤသ့ၣ်တဖၣ်, ဒီး အဝဲသ့ၣ်န့ၣ် သးအိၣ်လၢကမၤသကိးတၢ်ဒီး One Nation န့ၣ်လီၤ.
ဖဲတနွံအံၤန့ၣ် Pauline Hanson ဆှၢနုာ်လီၤစ့ၢ်ကီးဝဲ ဒီကလုာ်တၢ်ဘံၣ်တၢ်ဘၢသဲစးတၢ်ဘျၢ ဆူဘျီၣ်ဒိၣ်ထးခီအပူၤန့ၣ်လီၤ.
“One Nation အသဲစးတၢ်ဘျၢ အတၢ်ပညိၣ်န့ၣ်မ့ၢ်ဝဲ တသ့ဖဲအသ့န့ၣ် တၢ်ကပာ်လီၤ တၢ်တြီ အဝဲသ့ၣ်တၢ်ဟဲက့ၤနုာ်လီၤဒီး တၢ်ဒီသဒၢ ပှၤအီစထြ့လယါဖိသ့ၣ်တဖၣ်န့ၣ်လီၤ. သဲစးတၢ်ဘျၢအံၤဒုးအိၣ်ထီၣ်ဝဲတၢ်ဟ့ၣ်လီၤတၢ်ကလုၢ်အသီ လၢတၢ်တပျဲနုာ်လီၤ ထံဂုၤကီၢ်ဂၤ ပှၤမၤတၢ်စုဆူၣ်ခီၣ်တကးသ့ၣ်တဖၣ် ဒီး ဘၣ်ဃးဒီးတၢ်ကလုၢ်အံၤ ဘၣ်သ့ၣ်သ့ၣ်န့ၣ် ကိတိာ်ပတံထီၣ်မၤန့ၢ်အီၤလၢကီၢ်စၢဖှိၣ်စံၣ်ညီၣ်ကွီၣ်ဘျီၣ်အအိၣ်န့ၢ်ဝဲန့ၣ်လီၤ. ပတြီၤဆိသဲစးတၢ်ဘျၢအံၤ ဒုးအိၣ်ထီၣ် တၢ်ပာ်လီၤသဲစးတၢ်ဘျၢလၢအဆူၣ်ထီၣ်သ့ၣ်တဖၣ်, ဒုးအိၣ်အါထီၣ်ပှၤတဝၢတၢ်ပူၤဖျဲး ဒီး ဒီကလုာ် တၢ်ဘံၣ်တၢ်ဘၢ, လၢအမ့ၢ်ဝဲတၢ်ဂ့ၢ်လၢအရ့ဒိၣ်ကတၢၢ်သ့ၣ်တဖၣ်န့ၣ်လီၤ. ပှၤတဂၤဂၤ လၢ တၢ်မ့ၢ်လိာ်ဘၢလိာ်ကွီၣ်အီၤ မ့တမ့ၢ် တၢ်ဟ့ၣ်လီၤအီၤတၢ်ကမၣ် ခီဖျိအမၤကမၣ် တၢ်မၤတၢ်စုဆူၣ်ခီၣ်တကးသဲစးတၢ်ဘျၢ မ့တမ့ၢ် တၢ်ကဘၣ်သူဝဲဒၣ် တၢ်ဘၣ်နီဟးထီၣ်ကွံာ်တၢ်ကလုၢ်န့ၣ် ကိတိာ်အံၤ အတၢ်စိတၢ်ကမီၤအိၣ်လၢ ကဂ့ၢ်လိာ်ကွံာ်, ထုးသံကွံာ် မ့တမ့ၢ် ဆိကတီၢ်ကွံာ် ပှၤအဝဲန့ၣ် အလံာ်ဟးကီၢ် (passport) သ့ၣ်တဖၣ်န့ၣ်လီၤ.”
ပတြီာ်ဆိသဲစးတၢ်ဘျၢအံၤ ဒုးအိၣ်ထီၣ်စ့ၢ်ကီးဝဲ တၢ်မၤကမၣ်သဲစးတၢ်ဘျၢတခါ လၢအမ့ၢ်, ပှၤလၢအမၤစၢၤ ပှၤဆီၣ်ထွဲထံချၢကီၢ်ချၢ ပှၤမၤတၢ်စုဆူၣ်ခီၣ်တကးကရူၢ်အတၢ်ဟဲက့ၤနုာ်လီၤကဒါန့ၣ် ကမ့ၢ်ဝဲပှၤလၢအမၤကမၣ်သဲစးတၢ်ဘျၢန့ၣ်လီၤ.
လ့ၢ်ဘၢၣ်ဒီး ကြံစ် ကရၢသ့ၣ်တဖၣ် စံးလၢ သဲစးတၢ်ဘျၢအံၤ ဘၣ်သ့ၣ်သ့ၣ်န့ၣ် အတဘၣ်လိာ်အသးဒီး ထံကီၢ်သဲစးတၢ်ဘျၢခိၣ်သ့ၣ်ဘၣ်, နာ်သက့ ကရၢစၢဖှိၣ် ဘျီၣ်ဒိၣ်ခၢၣ်စးအါဂၤ ပာ်ဖျါထီၣ်ဝဲ အဝဲသ့ၣ်တၢ်ဘၣ်သး လၢအကမၤသကိးဃုာ်တၢ်ဒီး One Nation န့ၣ်လီၤ.
ပှၤသ့ၣ်တဖၣ်အကျါတဂၤန့ၣ် ပၣ်ဃုာ်ဒီး ပှၤထီဒါတၢ်ကရၢ တၢ်ဒီသဒၢဝဲၤကျိၤကိတိာ် James Paterson န့ၣ်လီၤ.
“ပသးခုလၢ ပကမၤသကိးတၢ်ဒီး ပှၤတဂၤလၢ်လၢ် လၢအအဲၣ်ဒိးဒီသဒၢ အီစထြ့လယါကီၢ်, လၢတၢ်မၤပျံၤမၤဖုး ဒီကလုာ်တၢ်ဘံၣ်တၢ်ဘၢ ခီဖျိပှၤဟဲက့ၤနုာ်လီၤလၢအအိၣ်ဒီးတၢ်ထံၣ်တခီတၢၤသ့ၣ်တဖၣ်ဒုးအိၣ်ထီၣ်အီၤန့ၣ် ပတဲအီၤထီဘိ, ဒီး ပဆီၣ်ထွဲဝဲဒၣ် တၢ်စးထီၣ်ဒုးအိၣ်ထီၣ် သဲစးတၢ်ဘျၢသ့ၣ်တဖၣ်အံၤ ဒီး ဆှၢဃီၤသဲစးတၢ်ဘျၢသ့ၣ်တဖၣ်အံၤဆူကမံးတံးသ့ၣ်တဖၣ်အအိၣ် ပတဲအီၤထီဘိစ့ၢ်ကီးန့ၣ်လီၤ. ယဆိကမိၣ် တၢ်အဝဲအံၤန့ၣ် မ့ၢ်ကျိၤကျဲဘၣ်ဘျီးဘၣ်ဒါတဘိ လၢတၢ်ကမၤကွၢ် ထံကီၢ်သဲစးတၢ်ဘျၢ အတၢ်ဂ့ၢ်ကီလၢ အအဟဲပၢၢ်ထီၣ်အံၤန့ၣ်လီၤ. လၢတၢ်အံၤအဂီၢ်န့ၣ် ပတအဲၣ်ဒိးဟံးန့ၢ် Tony Burke အတၢ်ကတိၤဘၣ်, မ့ၢ်လၢ အပူၤကွံာ် ပှၤသုးလီၢ်အိၣ်ဆိး သဲစးတၢ်ဘျၢ ဖဲထံကီၢ်သဲစးတၢ်ဘျၢခိၣ်သ့ၣ်အပူၤန့ၣ် လဲၤကမၣ်တ့ၢ်အသးတဘျုးဘျီ ခီဖျိလၢပဒိၣ်အတၢ်တီခိၣ်ရိၤမဲကမၣ်အဃိန့ၣ်လီၤ.”
Anne Twomey မ့ၢ်ဝဲ ထံကီၢ်သဲစးတၢ်ဘျၢခိၣ်သ့ၣ်တၢ်မၤလိလံာ်ကလုာ် သရၣ်မုၣ်ဒိၣ်စိတဂၤဖဲ ဆ့ၣ်ဒနံၤ ဖၠၣ်စိမိၤန့ၣ်လီၤ.
အဝဲစံးဝဲဒၣ် သဲစးတၢ်ဘျၢအံၤ ဒုးနဲၣ်ဖျါထီၣ်ဝဲတၢ်ဂ့ၢ်ကီ လၢစံၣ်ညီၣ်ကွီၣ်ဘျီၣ်ထးခီ တဆၢတဲာ်ပာ်လီၤဘၣ်အီၤနီတဘျီဘၣ်န့ၣ်လီၤ.
“အဃိ, တၢ်သံကွၢ်န့ၣ်မ့ၢ်ဝဲ သဲစးတၢ်ဘျၢလၢ အတြီပှၤအီစထြ့လယါထံဖိကီၢ်ဖိ အတၢ်ဟဲက့ၤနုာ်လီၤအိၣ်ဆိးဖဲအီစထြ့လယါကီၢ်ပူၤန့ၣ် နပာ်လီၤအီၤန့ၢ် တန့ၢ် န့ၣ်လီၤ.”
တၢ်မ့ၢ်တဆၢတဲာ်ဘၣ်အီၤလၢအဖိးဒီးသဲစးဒ်ဘၣ်နာ်သက့န့ၣ်, သရၣ်မုၣ်ဒိၣ်စိ Twomey စံးဝဲဒၣ်, အပူၤကွံာ် စံၣ်ညီၣ်ကွီၣ်သ့ၣ်တဖၣ် အတၢ်ကတိၤအပူၤန့ၣ် စံးဝဲလၢ ထံဖိကီၢ်ဖိန့ၣ် အတၢ်ခွဲးတၢ်ယာ်အိၣ်လၢ အကဟဲက့ၤနုာ်လီၤကဒါဆူအထံအကီၢ်အပူၤန့ၣ်လီၤ.
“ယဆိကမိၣ်န့ၣ် တၢ်အံၤမ့ၢ်ဝဲတၢ်လၢ အအိၣ်ဒီးအဂ့ၢ်အကျိၤတခါ လၢစံၣ်ညီၣ်ကွီၣ်ဘျီၣ်ထးခီန့ၣ် အကဆၢတဲာ်ဝဲဒၣ်,— 'ထံဖိကီၢ်ဖိန့ၣ် အမၤတၢ်တခါလၢ်လၢ် မ့ၢ်သ့န့ၣ်, တၢ်အံၤအခီပညီမ့ၢ်ဝဲ အတၢ်ခွဲးတၢ်ယာ်အိၣ်လၢ အကနုာ်လီၤဒီး အိၣ်ဆိးဝဲဖဲထံကီၢ်လၢ အဝဲသ့ၣ်ကဲအထံဖိကီၢ်ဖိ အပူၤန့ၣ်လီၤ.' မ့ၢ်တမ့ၢ်တၢ်ကဲထံဖိကီၣ်ဖိန့ၣ် အဘျုးတအိၣ်နီတစဲးဖိဘၣ်. အခီပညီတအိၣ်နီတစဲးဖိဘၣ်. ဘၣ်ဆၣ်သနာ်က့ ဘျီၣ်ဒိၣ်ထးခီအံၤ မ့ၢ်ဃုထံၣ်န့ၢ်အီၤဒ်အံၤတခီ တၢ်အိၣ်သးအိၣ်အါလၢအကစံးဝဲဒၣ်, —“တၢ်ခွဲးတၢ်ယာ်လၢအမၤတၢ်န့ၢ်ကိးမံၤကိးဆ့န့ၣ်အတအိၣ်ဘၣ်, အကအိၣ်ဒီး တၢ်မၤကွၢ်တနီၤလၢအဘၣ်ဘျီးဘၣ်ဒါလိာ်အသးန့ၣ်လီၤ. အဃိန့ၣ် အကတဲဝဲလၢ, ”
'တၢ်ဂ့ၢ်တနီၤနီၤန့ၣ်တၢ်မၤကဲထီၣ်အီၤလၢအဖိးသဲစးတၢ်ဘျၢကန့ၢ်အဂီၢ်, မ့ၢ်သဲစးတၢ်ဘျၢအံၤ လုၢ်ဖိဟံးန့ၢ်ဝဲ တၢ်ဂ့ၢ်တၢ်ကျိၤလၢအဘၣ်ဘျီးဘၣ်ဒါသ့ၣ်တဖၣ်ကန့ၢ်စ့ၢ်ကီးဧါ' န့ၣ်လီၤ.”
ကိတိာ်န့ၣ် အတၢ်စိတၢ်ကမီၤအိၣ်ပာ်လံလၢ အကပာ်လီၤဝဲဒၣ် တၢ်တြီဃာ်တၢ်စိၢ်တလီၢ် — ထီၣ်ဘးတုၤလၢခံနံၣ်, ဒီး သရၣ်မုၣ်ဒိၣ်စိ Twomey စံးဝဲဒၣ် တၢ်ဂ့ၢ်အံၤတၢ်မ့ၢ် သုးဟ့ၣ်လီၤအီၤဆူ စံၣ်ညီကွီၣ်ဘျီၣ်သ့ၣ်တဖၣ်အအိၣ်န့ၣ် အကတံာ်တာ်ယံၤဒိၣ်ထီၣ်ဝဲန့ၣ်လီၤ.
Dr McSwinney စံးဝဲဒၣ် သဲစးတၢ်ဘျၢအံၤအဂ့ၢ်န့ၣ် တအိၣ်ဖျါလၢ တၢ်ကတၢၣ်ပီၣ်တဲသကိးအီၤဖဲလ့ၢ်ဘၢၣ်ဖီၣ်ဂၢၢ် ဘျီၣ်ဒိၣ်လာ်ခီအပူၤနီတဘျီဘၣ်, ဒီး တၢ်ဂ့ၢ်ကီအံၤ မ့ၢ်ဝဲတၢ်တာ်တၢ် တၢ်ကီတၢ်ခဲနီၣ်နီၣ်ကီၢ်ကီၢ်တခါ လၢကရၢစၢဖှိၣ်အဂီၢ်န့ၣ်လီၤ.
“တၢ်အဝဲအံၤန့ၣ်မ့ၢ်ဝဲ တၢ်ရဲၣ်တၢ်ကျဲၤခိၣ်သ့ၣ်တခါလၢ One Nation အဂီၢ်, မ့ၢ်ကျိၤကျဲဂ့ၤမးတဘိလၢ ကကျဲးစၢး ဒီး ကၣ်တံၢ်ဃာ်ဝဲဒၣ် ကရၢစၢဖှိၣ်, ခီဖျိလၢ ကရၢစၢဖှိၣ်န့ၣ် အတအဲၣ်ဒိး ဒီကလုာ်တၢ်ဘံၣ်တၢ်ဘၢအတၢ်ဂံၢ်စၢ်ဘါစၢ်ဘၣ်, မ့ၢ်လၢတၢ်အဝဲန့ၣ်မ့ၢ်ဝဲဒၣ် ကရၢစၢဖှိၣ်အဂံၢ်အဘါတခါန့ၣ်လီၤ. ဘၣ်ဆၣ်သနာ်က့ ကရၢစၢဖှိၣ်န့ၣ် အိၣ်ဖျါလၢ အပလီၢ်အသးဒီး တၢ်ဟ့ၣ်လီၤ တၢ်ဆီၣ်ထွဲမၤစၢၤ မ့တမ့ၢ် တၢ်ပာ်ဂၢၢ်ပာ်ကျၢၤ Hanson ဒီး One Nation တၢ်ပာ်လီၤသဲစးတၢ်ရဲၣ်တၢ်ကျဲၤအံၤ, ခီဖျိလၢအကဒုးကဲထီၣ်အဝဲသ့ၣ်လၢ အဖျါလီၤဂာ်ဒ်အမ့ၢ် ထံရူၢ်ကီၢ်သဲးတၢ်ဆၢတဲာ်ပာ်လီၤလၢအဖိးသဲစးဒီး သနူပှၤဂဲၤဒိန့ၣ်လီၤ.”
ပှၤဃိထံသ့ၣ်ညါတၢ်လီၢ်ဒိၣ်အံၤစံးဝဲဒၣ် တၢ်အဝဲအံၤန့ၣ်မ့ၢ်ဝဲတၢ်အပတီၢ်ဆူမဲာ်ညါတပတီၢ် လၢအကလဲၤဆူ ဂံၢ်ခီၣ်ထံး တၢ်မၤဘၣ်လိာ်ကဒါက့ၤတၢ် ဖဲထံရူၢ်ကီၢ်သဲး လၢအဒ့ခံအသးဆူ စုထွဲသနူခီတက့န့ၣ်လီၤ.
“ဖဲ ၂ဝ၂၅နံၣ် ကီၢ်စၢဖှိၣ်တၢ်ဃုထၢအပူၤ ကရၢစၢဖှိၣ်လီၤပှီၢ်ကွံာ်န့ၣ် မ့ၢ်ဝဲဒၣ် တၢ်စးထီၣ်အခီၣ်ထံးခီၣ်ဘိနီၣ်နီၣ်တခါ, ခီဖျိလၢအမ့ၢ်ဝဲဒၣ် တၢ်ဆၢကတီၢ်တခါ, ဖဲလၢပှၤဟ့ၣ်တၢ်ဖးလၢအအိၣ်ဒီးတၢ်ထံၣ်သံလၢပျၢၤဖဲအီစထြ့လယါကီၢ်ပူၤသ့ၣ်တဖၣ်ပာ်လီၤအသးလၢ,— 'ဂ့ၤလံ, ပာ်တံၣ်လၢ ပနာ်အီၣ်ညီနုၢ်အီၤအံၤ ပဟ့ၣ်လီၤအီၤတၢ်ဖးတသ့လၢၤဘၣ် မ့ၢ်လၢအဝဲသ့ၣ်န့ၣ် အဟးမၤဘံဘူးခွဲးခွးတၢ်. အခဲအံၤန့ၣ်ပကကွၢ်ဃုကဒါကျိၤကျဲလၢအဂၤသ့ၣ်တဖၣ်.' ဒီးဖဲတၢ်အိၣ်သးအံၤအပူၤန့ၣ် One Nation အံၤမၤန့ၢ်ဝဲတၢ်လီၢ်ဂ့ၤဂ့ၤန့ၣ်လီၤ. တၢ်နုာ်လီၤခးတၢ်ကဲထီၣ်အသးဖဲ Bondi န့ၣ် လၢ One Nation, လီၤဆီဒၣ်တၢ်လၢ Hanson ဒီဒ Joyce အဂီၢ်, အဝဲသ့ၣ် စွံနုာ်လီၤအသးဖဲတၢ်ဂ့ၢ်လိာ်ဘှီလိာ်အံၤအပူၤန့ၢ်ဝဲမူးမူးနီၣ်နီၣ်ဒီး ကဲထီၣ်ဝဲတၢ်မၤစၢၤလၢအဝဲသ့ၣ် တၢ်ဃၣ်ကဒါက့ၤအသးလၢ တၢ်ဂ့ၢ်လိာ်ဘှီလိာ်ဘၣ်ဃး ပှၤသုးလီၢ်အိၣ်ဆိးဂ့ၢ်ဝီ, ဒီကလုာ် တၢ်ဘံၣ်တၢ်ဘၢဂ့ၢ်ဝီ, ဒီး အံးစလါမ်—Islam ဂ့ၢ်ဝီဖဲအီစထြ့လယါကီၢ်ပူၤအံၤန့ၣ်လီၤ. ဒီးတၢ်အဂၤတမံၤန့ၣ်မ့ၢ်ဝဲဒၣ် စ့သိၣ်သွံ စ့အလုၢ်အပှ့ၤလီၤတၢ်အိၣ်သးဒီး တၢ်သးစၢၢ်ဆၢသ့ၣ်တဖၣ်န့ၣ် ဟဲအါအိၣ်အါထီၣ်ဝဲဒၣ်ဖဲ အီစထြ့လယါကီၢ်ပူၤ ဟံၣ်ဃီတၢ်ဂ့ၢ်ကီသ့ၣ်တဖၣ်န့ၣ်လီၤ.”
