တၢ်ကလုၢ်တဖၣ်: https://www.sbs.com.au/language/ karen/ kar/collection/podcast/0ms9u5vjn
ဖဲလါဒံၤစဲဘၢၣ် ၁၄သီ မုၢ်ဒဲး—မုၢ်ခီၣ်ထံးနံၤ မုၢ်ဃ့ၢ်လီၤအဆၢကတီၢ် တၢ်နုာ်လီၤခးတၢ်အဃိ ခဲကနံၣ်အံၤ တၢ်ပာ်ဂၢၢ်ပာ်ကျၢၤလၢ ပှၤသံအိၣ်ဝဲဒၣ် ၁၆ဂၤလံ ဒီး တၢ်ခးတၢ်ကဲထီၣ်တဘျီအံၤ နယူဆီၣ်သ်ဝံပၢၤကီၢ် ပာ်ပနီၣ်ဒီး ဘိးဘၣ်ရၤလီၤဝဲဒၣ်ဒ်အမ့ၢ် တၢ်မၤတၢ်စုဆူၣ်ခီၣ်တကးအတၢ်မၤန့ၣ်လီၤ.
တၢ်နုာ်လီၤခးတၢ်အံၤကဲထီၣ်အသးဖဲ ဖဲပှၤကၠူသ့ၣ်တဖၣ် မၤဘူၣ်ဝဲဒၣ် ဟးနူၣ်ခါ မူးအဆၢကတီၢ်န့ၣ်လီၤ.
ဖဲမုၢ်ဒဲး—မုၢ်ခီၣ်ထံးနံၤ တၢ်ဘိးဘၣ်ရၤလီၤတၢ်ကစီၣ်အပူၤန့ၣ်, ကိးတိာ်ခိၣ်ကျၢၢ် Anthony Albanese စံးဝဲဒၣ်လၢ တၢ်ကဲထီၣ်သးအံၤ မ့ၢ်ဝဲဒၣ် တၢ်ဒုးထီဒါတၢ်လၢအပာ်တၢ်ပညိၣ်လီၤဖဲပှၤကၠူ—အီစထြ့လယါသ့ၣ်တဖၣ်အလိၤန့ၣ်လီၤ.
“တၢ်အံၤမ့ၢ်ဝဲ တၢ်ဒုးထီဒါလၢ အပာ်တၢ်ပညိၣ်လီၤဖဲ ပှၤကၠူ—အီစထြ့လယါသ့ၣ်တဖၣ်အလိၤ ဖဲတၢ်မၤဘူၣ် ဟးနူၣ်ခၣ် အမူး စးထီၣ်အခီၣ်ထံးတသီ, လၢအကြၢးမ့ၢ်ဝဲဒၣ်မုၢ်နံၤလၢအပှဲၤဒီးတၢ်သူၣ်ဖှံသးညီ, တၢ်မၤလၤကပီၤတၢ်စူၣ်တၢ်နာ်န့ၣ်လီၤ. တၢ်အၢတၢ်သီအတၢ်မၤ, တၢ်ထီဒါပှၤယူဒၤဖိအသနူ, တၢ်မၤတၢ်စုဆူၣ်ခီၣ်တကးသနူအံၤ ဟဲနုာ်လီၤမၤဟးဂီၤဝဲဒၣ်ပထံကီၢ်အသူၣ်ကံၢ်သးလဲလိၤလိၤန့ၣ်လီၤ.”
ပှၤဘၣ်မူဘၣ်ဒါသ့ၣ်တဖၣ် ပာ်ဂၢၢ်ပာ်ကျၢၤဝဲဒၣ်လၢ ပှၤသံသ့ၣ်တဖၣ်အကျါန့ၣ် ပၣ်ဃုာ်ဒီး ပှၤလၢအနုာ်လီၤခးတၢ်အံၤတဂၤ, ဒီး ဖဲတၢ်ကဲထီၣ်သးအံၤအပူၤန့ၣ် ပၢၤကီၢ်စ့ၢ်ကီးသံဝဲဒၣ်တဂၤန့ၣ်လီၤ. ပှၤနုာ်လီၤခးတၢ်အံၤအကျါတဂၤန့ၣ် အိၣ်ဝဲဒၣ်ဖဲပၢၤကီၢ်တၢ်ဖီၣ်ဒုးဃာ်အပူၤ, ဒီး ပၢၤကီၢ်ဆဲးမၤဝဲတၢ်ဃိထံသ့ၣ်ညါ မ့ၢ်ပှၤပၣ်ဃုာ်ဖဲပှၤခးတၢ်အံၤကအိၣ်တဂၤဒ်ဧါန့ၣ်လီၤ.
ပှၤလၢအဘၣ်ဒိဘၣ်ထံး ခီဖျိတၢ်ခးတၢ်အံၤအဃိ ၂၉ဂၤန့ၣ် ကူစါယါဘျါအသးဖဲတၢ်ဆါဟံၣ်သ့ၣ်တဖၣ်အပူၤ ဒီး ပှၤဘၣ်ဒိဘၣ်ထံးသ့ၣ်တဖၣ်အံၤအကျါ ခံဂၤန့ၣ်မ့ၢ်ဝဲပၢၤကီၢ်ပှၤဘၣ်မူဘၣ်ဒါန့ၣ်လီၤ.
တၢ်ဂ့ၢ်တၢ်ကျိၤခါဆူညါလၢ အဘၣ်ဃးတၢ်ခးကဲထီၣ်အဂ့ၢ်အံၤ ပကဆဲးပာ်ဖျါအီၤဆူညါကွ့ၢ်ကွ့ၢ်..........
