စပ့ၣ် ဖျၢၣ်ထူကရူၢ် မၤနၢၤဝဲတၢ်ပြၢဒီး အခဲအံၤန့ၣ် ဖဲကရူၢ်—H အပူၤအဝဲသ့ၣ် အိၣ်ဝဲဖဲအထီကတၢၢ်အလီၢ်, ဖဲ Cabo Verde ဒီး အူရူကွ့ တၢ်လိာ်ကွဲပြၢလိာ်အသးအပူၤန့ၣ် အနၢၤအရှူတအိၣ်ဘၣ် လၢအဒိးန့ၢ်ဘၣ် ဝဲ ၂ကိစုာ်စုာ် ဒီး တၢ်နုာ်လီၤလိာ်ကွဲပြၢဖဲ FIFA World Cup အပူၤတဘျီအံၤန့ၣ် မ့ၢ်ဝဲတၢ်အဆိကတၢၢ်တဘျီလၢ Cabo Verde ဖျၢၣ်ထူကရူၢ်အဂီၢ်န့ၣ်လီၤ. ဖဲကရူၢ် — G အပူၤန့ၣ်, ဘဲးလ်ကၠံၤယၢၤဒီး Iran တၢ်ပြၢအပူၤန့ၣ် တန့ၢ်လိာ်သးနီတကိဘၣ်ဒီး အနၢၤအရှူတအိၣ်ဘၣ်. ဖဲတၢ်ပြၢခံတီၤတတီၤအပူၤ အဝဲသ့ၣ် လိာ်ကွဲဂ့ၤဒိၣ်ထီၣ်က့ၤအဃိ Egypt မၤနၢၤဝဲ New Zealand ဖျၢၣ်ထူကရူၢ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်ကမုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၁၁ သီတသီ တၢ်ပာ်ဖျါအဘိၣ်န့ၣ်လီၤ.
ဖဲအဝဲသ့ၣ်လိာ်ကွဲဖဲ Atlanta အပူၤန့ၣ် Spain မၤနၢၤဝဲ Saudi Arabia ၄—ဝ အဃိ ကရူၢ်—H အပူၤန့ၣ်အဝဲထီၣ်ဆူတၢ်ဖီခိၣ်ကတၢၢ်, ဒီးအဝဲသ့ၣ် ကိ အဆိကတၢၢ် တဖျၢၣ်န့ၣ် ဘၣ်တၢ်ထူနုာ်လီၤအီၤလၢ ဆံဆဲၣ်နံၣ်ပှၤလိာ်ကွဲဖိ Lamine Yamal ဒီး မ့မ့ၢ်ကိအဂၤခံဖျၢၣ်တခီ ဘၣ်တၢ်ထူနုာ်လီၤအီၤလၢ Mikel Oyarzabal န့ၣ်လီၤ.
အဝဲသ့ၣ်အတၢ်မၤနၢၤအံၤ ကဲထီၣ်ဝဲဒၣ် Spain ကရူၢ် ဒိးန့ၢ်ဘၣ်အမးလွံၢ်မး ဒီး အဝဲသ့ၣ် လဲၤထီၣ်ဝဲဒၣ်ဆူတၢ်မဲာ်ညါတဆီ လၢအမ့ၢ် တၢ်လိာ်ကွဲကရူၢ် ၃၂ ဖု အတၢ်ပြၢအပတီၢ်န့ၣ်လီၤ.
တကတီၢ်ဃီန့ၣ်, ဖဲလၢ Cabo Verde ဖျၢၣ်ထူကရူၢ် ပြၢလိာ်သးဒီး အူရူကွ့ ဖျၢၣ်ထူကရူၢ် တၢ်ပြၢအပူၤန့ၣ် အဝဲသ့ၣ် ဖီၣ်ဂၢၢ်ဝဲဒၣ် ပှၤဖျိးစိ (champion) လီၢ်အံၤန့ၢ်ဝဲဒၣ်, လၢအမ့ၢ် ခံကရူၢ်ဒဲးအံၤ န့ၢ်ဝဲဒၣ် ၂—၂ကိစုာ်စုာ် ဒီး အနၢၤအရှူတအိၣ်ဘၣ်န့ၣ်လီၤ.
ပှၤလိာ်ကွဲဖိ Kevin Pina မ့ၢ်ဝဲ ပှၤထူနုာ်လီၤ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ကိအဆိကတၢၢ်တဖျၢၣ် လၢပှၤကီးဖိဖျၢၣ်ထူကရူၢ်အံၤအဂီၢ်ဒီး ပှၤထူနုာ်လီၤ ကိခံဖျၢၣ်တဖျၢၣ်န့ၣ်မ့ၢ်ဝဲ Hélio Varela န့ၣ်လီၤ.
———
ဖဲကရူၢ်— G အပူၤ, Belgium ဒီး Iran တၢ်လိာ်ကွဲပြၢအပူၤ တန့ၢ်လိာ်သးနီတကိဘၣ်, နာ်သက့ Belgium အံၤနုာ်လီၤလိာ်ကွဲဝဲဒ်သိး တၢ်လိာ်ကွဲပြၢတခါလၢတၢ်ကွၢ်ကီအီၤမုာ်တဖုန့ၣ်လီၤ.
Belgium အံၤ ဖဲတၢ်ပြၢတဘျီအံၤအပူၤ တထူနုာ်လီၤဘၣ်ဝဲဒၣ် ကိနီတဖျၢၣ်ဒ်ဘၣ် ဒီး ဖဲအဝဲသ့ၣ် တၢ်လိာ်ကွဲပြၢ အဆိကတၢၢ်တဝီအပူၤန့ၣ် ဒိးန့ၢ်ဘၣ်ဝဲဒၣ် ကိတဖျၢၣ် လၢအမ့ၢ် ပှၤလၢအထူပြၢဒီးအဝဲသ့ၣ် တကပၤန့ၣ် က့ၤသွီနုာ်လီၤကဒါက့ၤလၢအနီၣ်ကစၢ်ဒၣ်ဝဲကိပူၤအဃိန့ၣ်လီၤ.
မ့မ့ၢ်လၢ New Zealand ဖျၢၣ်ထူကရူၢ် အတၢ်ပြၢဒီး Egypt ဖျၢၣ်ထူကရူၢ်န့ၣ် အဝဲသ့ၣ်သွီနုာ်ဆိဝဲဒၣ်ကိနာ်သက့န့ၣ် လၢခံ Egypt က့ၤလူၤထီၣ်ကဒါအဝဲသ့ၣ်ဒီး မၤနၢၤဝဲ အဝဲသ့ၣ် ၃—၁ကိန့ၣ်လီၤ. ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢအပူၤ New Zealand ဖျၢၣ်ထူကရူၢ် သွီနုာ်ဆိကိဒ်အံၤန့ၣ် မ့ၢ်ဝဲတၢ်အဆိကတၢၢ်တဘျီ လၢအဝဲသ့ၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ တၢ်စံၣ်စိၤတဲစိၤအပူၤန့ၣ်လီၤ.
———
မ့ၢ်ကွၢ်ကဒါလၢ Socceroos တကပၤန့ၣ်…
အီစထြ့လယါဖျၢၣ်ထူကရူၢ်အံၤ အိၣ်ကတဲာ်ကတီၤထီၣ်အသးလၢ အဝဲသ့ၣ်ကဘၣ်ထူဒီး ပးရးကွ့ဖျၢၣ်ထူကရူၢ် လၢအဝဲသ့ၣ် ကဘၣ်မၤနၢၤဝဲအီၤ ခီဖျိလၢ တၢ်ပြၢအံၤ မ့ၢ်ဝဲဒၣ် ပှၤလၢအရှူန့ၣ် ကဘၣ်ဟးထီၣ်ကွံာ်ဖဲဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢတဘျီအံၤအပူၤအဃိန့ၣ်လီၤ.
Socceroos အံၤ ရှူကွံာ်ဝဲဒၣ် ကီၢ်အမဲရကၤဖျၢၣ်ထူကရူၢ် ၂—ဝ နာ်သက့န့ၣ် ပှၤဆီၣ်ထွဲမၤစၢၤ ပှၤနဲၣ်တၢ် Mile Jedinak မုၢ်လၢ်ပာ်ဝဲလၢ တၢ်လိာ်ကွဲပြၢဒီး အမဲရကၤ ကလံၤထံး ဖျၢၣ်ထူကရူၢ်အပူၤ အကမ့ၢ်ဝဲဒၣ် တၢ်ပြၢတခါလၢ အကီဒီး တၢ်တာ်တၢ် တၢ်ကီတၢ်ခဲကအိၣ်ဒီး နီၣ်ခိတၢ်ဟူးတၢ်ဂဲၤ အတၢ်လိာ်ကွဲတခါန့ၣ်လီၤ.
“ဖဲလၢလိာ်ကွဲပြၢဒီး အမဲရကၤကလံၤထံးဖျၢၣ်ထူကရူၢ်အခါ တၢ်သူၣ်ဆူၣ်သးဆူၣ်သ့ၣ်တဖၣ်အိၣ်ဒ်လဲၣ်န့ၣ် ပသ့ၣ်ညါအီၤ, တၢ်ခွဲးတၢ်ယာ်ကိးခါဒဲးန့ၣ် အဝဲသ့ၣ်ကကျဲးစၢးအီၤသပှၢ်ကတၢၢ်, ဒီးပဝဲနာ်က့န့ၣ် အတလီၤဆီလိာ်သးဒီးအဝဲသ့ၣ်ဘၣ်, ပနီၣ်ကစၢ်ဒၣ်ဝဲစ့ၢ်ကီး ပတဃ့လၢ အလီၤဆီလိာ်အသးဘၣ်, ကဒိးသန့ၤထီၣ်အသးလၢ, ဖဲပခီၣ်ဆၢကဒါက့ၤအဝဲသ့ၣ်အခါ ပနီၣ်ကစၢ်ဒၣ်ဝဲ ပကပာ်လီၤ ပက့ၢ်ပဂီၤဒ်လဲၣ်န့ၣ်လီၤ.”
ဖဲလါယူၤ ၂၆သီအနံၤန့ၣ် Socceroos ကဘၣ်ထူဒီး Paraguay ဖဲမုၢ်ထီၣ်နီၣ်ထိၣ် ဂီၤခီ ၁၁နၣ်ရံၣ် ဒီး နကွၢ်ကီအီၤဖဲ SBS အပူၤသ့ဝဲန့ၣ်လီၤ.
———
မ့မ့ၢ်လၢ FIFA World Cup တၢ်ပြၢ ၁၂သီတသီ အဂီၢ်န့ၣ် ကရူၢ်— I ဒီး ကရူၢ်— J ကအိၣ်ဝဲဒၣ်ဖဲ တၢ်ပြၢ ပျဲၢ်စီၣ်အဖီခိၣ်န့ၣ်လီၤ.
ကရူၢ်— I, ဖြၣ်စ့ၣ်ဖျၢၣ်ထူကရူၢ်န့ၣ် ကဘၣ်တိနိၣ်လိာ်အသးဒီး Iraq, ဒီး Norway န့ၣ် ကဘၣ်ထူပြၢဝဲဒီး Senegal န့ၣ်လီၤ.
မ့မ့ၢ်လၢ ကရူၢ်— J တခီ, Argentina ကထံၣ်လိာ်သးဒီး Austria တချုးဖဲလၢ Jordan ထူပြၢလိာ်အသးဒီး Algeria ဒ်ဘၣ်အခါန့ၣ်လီၤ.
———
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၁၁ သီတသီအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
