တၢ်စံၣ်စိၤတဲစိၤအိၣ်ထီၣ်ဖဲတချုးတၢ်လိာ်ကွဲဝံၤဒ်ဘၣ်စှၤကိးမံးနံးအတီၢ်ပူၤ လၢအမ့ၢ် Canada ဖျၢၣ်ထူကရူၢ် မၤသဘှံးကွံာ်ဝဲဒၣ် South African အသး ခီဖျိအမၤနၢၤတၢ်ဖဲတၢ်ပြၢအံၤဘူးကဝံၤအခါအဃိန့ၣ်လီၤ. လၢဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢအပူၤန့ၣ် တၢ်မၤနၢၤ ဖဲပတီၢ်တဘျီအံၤ မ့ၢ်ဝဲတၢ်အဆိကတၢၢ်လၢ ကီၢ်ခဲနဒၢ်အဂီၢ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
တူၢ်လိာ်ကမုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ၂ဝ၂၆နံၣ် ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၁၈ သီတသီ တၢ်ပာ်ဖျါအဘိၣ်န့ၣ်လီၤ.
———
Canada ဒီး South Africa ဖျၢၣ်ထူကရူၢ် တိနိၣ်လိာ်အသးဖဲ ရှူဟးထီၣ်တၢ်ပြၢအပတီၢ် ဒီး ခဲနဒၢ်ဖျၢၣ်ထူကရူၢ်မၤနၢၤတၢ်အဃိ လဲၤထီၣ်ဘၣ်ဝဲဆူညါတပတီၢ် လၢမ့ၢ် ကရူၢ် ၁၆ဖုတၢ်လိာ်ကွဲပြၢအပတီၢ်န့ၣ်လီၤ. အဝဲသ့ၣ်တၢ်လိာ်ကွဲပြၢတဘျီအံၤန့ၣ် ဘၣ်တၢ်တူၢ်လိာ်ခီၣ်ဆၢမၤအီၤဖဲ Los Angeles ဝ့ၢ် လၢအမ့ၢ်တၢ်အဆိကတၢၢ်တဘျီလၢဝ့ၢ်အံၤတူၢ်လိာ် တၢ်လိာ်ကွဲပြၢ ဖဲအပတီၢ်အံၤန့ၣ်လီၤ.
ဒ်သိးအဝဲသ့ၣ်မ့ၢ်စ့ၢ်ကီး ပှၤတူၢ်လိာ် ဟီၣ်ခိၣ်ဒီဘ့ၣ်ဖျၢၣ်ထူတၢ်ပြၢ အဟံၣ်ကစၢ်တဖုအသိးန့ၣ် ကီၢ်ခဲနဒၢ်အံၤ ဒုးအိၣ်ထီၣ်စ့ၢ်ကီးဝဲ စံၣ်စိၤလၢတၢ်တအဲၣ်ဒိးအီၤဘၣ် လၢအမ့ၢ် ဘၣ်ထူပြၢဝဲဒၣ် ရှူဟးထီၣ် တၢ်ပြၢအပတီၢ်န့ၣ်ဖဲ အဝဲသ့ၣ်ကီၢ်ဆၢအချၢခီတက့န့ၣ်လီၤ.
တၢ်ခွဲးတၢ်ယာ်အါမးဒီး တၢ်ဒီးသဒၢအီၤ ဆူၣ်ဆူၣ်ဝံၤအလီၢ်ခံ, တၢ်ပြၢအံၤ ဘၣ်မၤန့ၢ်အါထီၣ်ဝဲတၢ်ဆၢကတီၢ်န့ၣ်လီၤ.
ဘၣ်ဆၣ်သနာ်က့ ဖဲတၢ်ဟ့ၣ်လီၤအါထီၣ်တၢ်ဆၢကတီၢ်လၢတၢ်ဘၣ်ဒိဘၣ်ထံးအဂီၢ် အိၣ်တ့ၢ်က့ၤစှၤကိးမံးနံးဖိ တချုးလၢ ပှၤစံၣ်ညီၣ်တဲာ်တၢ်ဖဲပျီပူၤ အူသီၣ်ထီၣ်တၢ်ဒ်ဘၣ်အခါန့ၣ် ကီၢ်ခဲကဒၢ်ဖျၢၣ်ထူကရူၢ်အံၤ မၤကၢ်ကွံာ်ဝဲ တၢ်အိၣ်ဖ့ၣ်ဆၢလၢအထီၣ်ထူၣ်ခံခီလၢာ်အံၤန့ၣ်လီၤ.
ဖဲလၢ ဖျၢၣ်ထူကရူၢ်အံၤ တီၤတဲာ်ဝဲဒၣ်ဖဲ Stephen Eustáquio အအိၣ် ဖဲကိမဲာ်ညါစံပူၤ တၢ်နၢၣ်ထံးအခါ တချုးအဝဲထူနုာ်လီၤအီၤဒီး ကမၤန့ၢ် တၢ်မၤနၢၤလၢဟံၣ်အဂီၢ်ဒ်ဘၣ်အခါ အဝဲဖီၣ်ဂၢၢ်အီၤဒီး အသးနါပှၢ်န့ၣ်လီၤ.
ခဲနဒၢ်ဖျၢၣ်ထူကရူၢ် ပှၤလိာ်ကွဲဖိ လၢအလိာ်ကွဲလၢတၢ်ခၢၣ်သးစံးဝဲဒၣ်, အဝဲသ့ၣ်မၤနၢၤတၢ်အံၤမ့ၢ်ဝဲအရူၢ်တၢ်ထဲးဂံၢ်ထဲးဘါအဃိန့ၣ်လီၤ.
“လၢကန့ၢ်ဘၣ်တၢ်မၤနၢၤအံၤအဂီၢ်န့ၣ် ပမၤတ့ၢ်တၢ်အါမး. တၢ်မၤနၢၤတဘျီအံၤန့ၣ် ပအဲၣ်ဒိးဟ့ၣ်လီၤအီၤဆူပှၤ ခဲနဒၢ် ဖိကိးဂၤဒဲး. ပဆဲးအိၣ်ဒီးတၢ်နာ်, ဒီး ကျဲးစၢဆီၣ်ဖျိးအီၤသပှၢ်ပှၢ်. ကျိၤကျဲအဂုၤအဂၤန့ၣ် ပဆိကမိၣ်ထီၣ်အီၤမးတဘၣ်ဘၣ်. ယဆိကမိၣ်မ့ၢ်ဝဲဒၣ် ကိလၢအဂ့ၤမးတဖျၢၣ်. ဘၣ်ဆၣ်သနာ်က့ ဖဲယထူနုာ်လီၤအိၤအခါန့ၣ်, ယတူၢ်ဘၣ်ဒ်သိးပှၤကိးဂၤဒဲးနဲးထူနုာ်လီၤအီၤတပူၤဃီဒီးယၤန့ၣ်လီၤ. လၢတၢ်အံၤအဂီၢ် ပှၤကိးဂၤဒဲး မၤဆူၣ်ထီၣ်ဝဲအဂံၢ်အဘါ. ဒီးနုာ်လီၤဝဲဒၣ်ဆူကိပူၤ. အဃိယသးခုဒိၣ်မး.”
Canada ဖျၢၣ်ထူကရူၢ်အံၤ အကဘၣ်လဲၤဝဲဒၣ်ဆူ Houston ဝ့ၢ် လၢ ကရူၢ် ၁၆ဖု တၢ်ပြၢအပတီၢ်အဂီၢ် လၢကဘၣ်တိနိၣ်လိာ်အသးဒီး ပှၤလၢအမၤနၢၤဝဲဒၣ် မုၢ်ခံနံၤတၢ်ပြၢ လၢအမ့ၢ် Morocco ဒီး Netherlands ကရူၢ် အတၢ်ထူပြၢလိာ်အသးန့ၣ်လီၤ.
———
ခဲကနံၣ်အံၤ Socceroo န့ၣ် အိၣ်ကတဲာ်ကတီၤပာ်အသးလၢ အဝဲသ့ၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ဆူမဲာ်ညါတပတီၢ်အဂီၢ်န့ၣ်လီၤ.
အဝဲသ့ၣ်အိၣ်ဖဲ Oakland, California အပူၤ ဘူးထီၣ်လၢသၢနွံဃၣ်ဃၣ်ဝံၤအလီၢ်ခံ, ဖဲမုၢ်လ့ၢ်ဧိၤ—မုၢ်သၢနံၤန့ၣ် အဝဲသ့ၣ်ကဟးထီၣ်လဲၤဝဲဒၣ်ဆူ Dallas ဝ့ၢ်လၢအဝဲသ့ၣ်ကထူပြၢဒီး Egypt ဖဲမုၢ်ဘူၣ်—မုၢ်ဃုနံၤ ဒ်သိး ကရူၢ် ၃၂ဖု တၢ်ပြၢအပတီၢ်အသိးန့ၣ်လီၤ.
အဝဲသ့ၣ်ကလိာ်ကွဲဝဲဒၣ် လၢအတဘၣ်ပှၤလိာ်ကွဲဖိလၢအဘၣ်ဒိဘၣ်ထံးခံဂၤ, Mathew Leckie ဒီး Jacob Italiano, နာ်သက့ အဝဲသ့ၣ်အကရူၢ် အတၢ်နာ်န့ၢ်လီၤသးန့ၣ် အတစၢ်လီၤဘၣ်.
တချုးမုၢ်ဃုနံၤ တၢ်ပြၢဒ်ဘၣ်အခါ တၢ်သံကွၢ်အဒိၣ်ကတၢၢ်တဖျၢၣ်န့ၣ်မ့ၢ်ဝဲဒၣ် မ့ၢ်အံကၠ့ၤ ကရူၢ်ပှၤထူဖျၢၣ်ထူအမံၤဟူသၣ်ဖျါ Mohamed Salah ကဟဲက့ၤဂ့ၤထီၣ်ကဒါက့ၤ လၢအဘၣ်ဒိဘၣ်ထံးပာ်အပူၤစ့ၢ်ဧါန့ၣ်လီၤ. အဝဲဘၣ်ဒိဘၣ်ထံးတ့ၢ်ဝဲဒၣ်ဖဲကရူၢ်အပတီၢ်တၢ်လိာ်ကွဲပြၢ လၢခံကတၢၢ်တဘျီအခါန့ၣ်လီၤ.
ဘၣ်ဆၣ်သနာ်က့ အီစထြ့လယါကီၢ်ဖျၢၣ်ထူကရူၢ် ပှၤနဲၣ်တၢ်အခိၣ်—၂ Hayden Foxe စံးဝဲဒၣ် Socceroos အံၤ အိၣ်ကတဲာ်ကတီၤအသးလၢ တၢ်လိာ်ကွဲပြၢ လၢအမ့ၢ်တၢ်ပြၢတခါလၢအကီမးလၢအဝဲသ့ၣ်အဂီၢ်, ဒီးပာ်ပနီၣ်စ့ၢ်ကီးဝဲဒၣ် Egypt ဖျၢၣ်ထူကရူၢ်န့ၢ်ဒ်သိးကရူၢ်လၢအဂံၢ်ဆူၣ်တဖုန့ၣ်လီၤ.
“အဝဲသ့ၣ်န့ၣ်မ့ၢ်ကရူၢ်တဖုလၢအလိာ်ကွဲဂ့ၤမး, ဂ့ၤဒိၣ်မးတဖု, အဝဲသ့ၣ်န့ၣ် အန့ဆၢၣ်ဒၣ်ဝဲန့ၣ် အိၣ်ဒီးကျိၤကျဲတၢ်သ့တၢ်ဘၣ်ဂ့ၤမး, ဖဲအလိာ်ကွဲပြၢဒီး အးဖြံးကး ဒီးအးရၣ်ဘ် သ့ၣ်တဖၣ်အခါန့ၣ် လိၣ်ကွဲဝဲဒၣ်လၢအတအိၣ်ဒီးတၢ်ပျံၤတၢ်နီတစဲးဘၣ်.”
———
ဖဲမုၢ်ယူၤ— မုၢ်ခံနံၤ, ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ၁၉သီ တသီအနံၤန့ၣ်, Brazil ကဘၣ်ထူပြၢဒီး ယပၣ် ဒ်သိးကရူၢ် ၃၂ဖုတၢ်ပြၢ ရှူဟးထီၣ်ပတီၢ်အသိးန့ၣ်လီၤ.
ယပၣ်ကရူၢ်အံၤ ဖဲအစးထီၣ်နုာ်လီၤသီန့ၣ်အကစးထီၣ်ဝဲဒ်သိးပှၤဂံၢ်စၢ်တဖုအသိး, နာ်သက့ အဝဲသ့ၣ်န့ၣ် အဟဲနုာ်လီၤတၢ်ပြၢတဘျီအံၤန့ၣ် ပှဲၤဒီးတၢ်နာ်န့ၢ်လီၤသး မ့ၢ်လၢအဝဲသ့ၣ်န့ၢ် အိၣ်ဒီးတၢ်မၤနီၣ်မၤဃါလၢ အမၤနၢၤတ့ၢ်ပာ်လံဝဲဒၣ် ပှၤယူရပၤဖိဖျၢၣ်ထူကရူၢ် ၁၁ဖု တပယူၤဃီလၢအရှူတအိၣ်နီတဘျီဘၣ်န့ၣ်လီၤ.
Germany ဖျၢၣ်ထူကရူၢ်န့ၣ် ကဘၣ်တိနိၣ်လိာ်အသးဒီး Paraguay ဒီးစးထီၣ်လၢ အဝဲသ့ၣ်ဒိးန့ၢ်ဘၣ် World Cup ခိၣ်ဖးတၢဖဲ၂ဝ၁၄နံၣ်ဝံၤအလီၢ်ခံန့ၣ် အဝဲသ့ၣ်ခံဖုတၢ်တိနိၣ်လိာ်အသးအံၤ မ့ၢ်ဝဲတၢ်အဆိကတၢၢ်တဘျီန့ၣ်လီၤ.
မ့မ့ၢ် Netherlands န့ၣ်ဘၣ်ထူပြၢဝဲဒီး Morocco န့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၁၈ သီတသီအတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
