ပှၤလိာ်ကွဲဖျၢၣ်ထူ ဖျိးစိ Harry Kane လၢအလိာ်ကွဲဖျၢၣ်ထူဖဲတၢ်မဲာ်ညါတဂၤ ပာ်ဖျါထီၣ်ဝဲအကံၢ်အစီ လၢအဂ့ၤကတၢၢ်အဃိ England ဖျၢၣ်ထူကရူၢ်အံၤ မၤနၢၤဝဲ Croatia ဖျၢၣ်ထူကရူၢ်, ဒီးမ့မ့ၢ်လၢ Portugal ဖျၢၣ်ထူကရူၢ် အတၢ်လိာ်ကွဲပြၢဒီး Democratic Republic of Congo ဖျၢၣ်ထူကရူၢ်န့ၣ် အနၢၤအရှူတအိၣ်ဘၣ်. တူၢ်လိာ်မုာ်ဘၣ်သုဖဲ ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲကိးနံၤဒဲးတၢ်ပာ်ဖျါအပူၤ. ယၤန့ၣ်မ့ၢ်ရှါဖီၤ, ဒီး အဝဲအံၤန့ၣ်မ့ၢ်ဝဲဒၣ် FIFA World Cup 2026 — ဟီၣ်ခိၣ်ဒီဘ့ၣ် ဖျၢၣ်ထူတၢ်လိာ်ကွဲပြၢ ၇သီတသီအနံၤ တၢ်ပာ်ဖျါအဘိၣ်န့ၣ်လီၤ.
England ဖျၢၣ်ထူကရူၢ်စးထီၣ်ဝဲ အဝဲသ့ၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢ ပှဲၤဒီးအဒိအတဲာ်လၢအဂ့ၤ ဒီးမၤနၢၤဝဲ Croatia ဖျၢၣ်ထူကရူၢ် ၄—၂ ဂိလ်န့ၣ်လီၤ. ဖဲတၢ်လိာ်ကွဲ တၢတကတီၢ် လီၤတဝာ်န့ၣ် Harry Kane ထူနုာ်လီၤဝဲ ဂိလ် ၂ ဖျၢၣ်န့ၣ်လီၤ. အဝဲထူနုာ်ဂိလ်အံၤပၣ်ဃုာ်ဒီး ဖဲနၢၤတံၤ—တၢ်ဟ့ၣ်လီၤတၢ်ကမၣ်တဖျၢၣ် လၢ အသီခါန့ၣ် ပှၤအိၣ်ခိးဖီၣ်ဂိလ် ဒီအီၤန့ၢ်ဝဲဒၣ် ဘၣ်ဆၣ်သနာ်သက့ က့ၤဖျိးထီၣ်ကဒါက့ၤအခါ အဝဲက့ၤထူနုာ်လီၤကဒါက့ၤအီၤန့ၢ်အဃိ ကဲထီၣ်ဝဲ ၂ဖျၢၣ်န့ၣ်လီၤ. Croatia က့ၤထူနုာ်လီၤကဒါက့ၤဝဲဒၣ်ဂိလ် ၂ဖျၢၣ်နာ်သက့ ဖဲတၢ်လိာ်ကွဲ ခံကတီၢ်တကတီၢ်န့ၣ် England ဖျၢၣ်ထူကရူၢ် ဖီၣ်ဂၢၢ်အီၤန့ၢ်ဂ့ၤဂ့ၤဒီး သွီနုာ်လီၤအါထီၣ်ကဒါက့ၤဝဲ ဂိလ်အဃိ မၤနၢၤဝဲတၢ်န့ၣ်လီၤ.
မ့မ့ၢ်လၢ ကရူၢ်—K, Portugal ဖျၢၣ်ထူကရူၢ် အတၢ်ထူပြၢဒီး Democratic Republic of Congo ဖျၢၣ်ထူကရူၢ် ဖဲ Houston ဝ့ၢ်န့ၣ် န့ၢ်ဝဲဒၣ်တကပၤ ၁—၁ဂိလ်စုာ်စုာ်ဒီးအနၢၤအရှူတအိၣ်ဘၣ်. မ့ၢ်ဝဲတၢ်လိာ်ကွဲပြၢတဘျီ လၢတၢ်လီၤသးတမံတအိၣ်ဒီး Portugal ဖျၢၣ်ထူကရူၢ် ပှၤလိာ်ကွဲလၢအမံၤဟူသၣ်ဖျါ Cristiano Ronaldo အဂီၢ်, လၢအလိာ်ကွဲဝဲဒၣ်တၢ်ဆၢကတီၢ်ပှဲၤပှဲၤ အမံးနံး ၉ဝ န့ၣ်လီၤ.
အးဖြံကး ထံကီၢ် အဂၤတဘ့ၣ်လၢ အမၤလၤကပီၤဘၣ် တၢ်မၤနၢၤန့ၣ်မ့ၢ်ဝဲဒၣ် Ghana ကီၢ်, လၢအမၤနၢၤဝဲဒၣ် Panama ဖျၢၣ်ထူကရူၢ် ၁—ဝ ဂိလ်, လၢအလိာ်ကွဲဝဲဒၣ်ဖဲ ကီၢ်ခဲနဒၣ် ဝ့ၢ် Toronto ဒီးအဝဲသ့ၣ်တၢ်လိာ်ကွဲကရူၢ်အံၤ မ့ၢ်ဝဲဒၣ် ကရူၢ်—L န့ၣ်လီၤ.
တနံၤအံၤတၢ်လိာ်ကွဲန့ၣ် ဝံၤဝဲဒၣ်ဒီး Colombia ဖျၢၣ်ထူကရူၢ် မၤနၢၤဝဲဒၣ် Uzbekistan ဖျၢၣ်ထူကရူၢ် ၃—၁ ဂိလ်န့ၣ်လီၤ.
ဒီးအခဲအံၤန့ၣ် ပကကွၢ်သကိးဝဲဒၣ် Socceroos ဖျၢၣ်ထူကရူၢ် အတၢ်အိၣ်သးလၢခံကတၢၢ်န့ၣ်လီၤ.
Socceroos ဖျၢၣ်ထူကရူၢ်အံၤ မၤဝဲဒၣ် တၢ်ဒုးခိၣ်ဖီလာ် ဒၢးပူၤ တၢ်ဂဲၤလိ ဖဲ Oakland ဝ့ၢ်, California ကီၢ်စဲၣ်အပူၤ, တချုးဖဲလၢအဝဲသ့ၣ် ကစးထီၣ် ထူပြၢဒီး ဟံၣ်ကစၢ် USA ဖျၢၣ်ထူကရူၢ်ဒ်ဘၣ်အခါန့ၣ်လီၤ.
ဖဲလၢအဝဲသ့ၣ်မၤနၢၤ Türkiye ဖျၢၣ်ထူကရူၢ်ဝံၤအလီၢ်ခံ အီစထြ့လယါဖျၢၣ်ထူကရူၢ်အံၤစံးဝဲလၢ အဝဲသ့ၣ် တူၢ်ဘၣ်ဒ်သိး အအိၣ်ဒိးတၢ်နာ်န့ၢ်လီၤသးအါထီၣ် ဒီး သူၣ်ဆူၣ်သးဂဲၤဒိၣ်မးလၢ အကဂဲၤလိာ်ကွဲပြၢဒီး USA ဖဲ Seattle ဝ့ၢ်န့ၣ်လီၤ.
ပှၤလိာ်ကွဲဖိ Kai Trewin, လၢအလိာ်ကွဲဖဲ Major League Soccer လၢ New York City FC ဖျၢၣ်ထူကရူၢ်အဂီၢ်တဂၤ ဆီၣ်ထွဲဝဲတၢ်တူၢ်ဘၣ်အံၤန့ၣ်လီၤ.
“အခဲအံၤန့ၣ် အိၣ်ဖျါမူးနီၣ်လၢ ပတၢ်လိာ်ကွဲအံၤ ပစးထီၣ်လိာ်ကွဲအီၤန့ၢ်ဂ့ၤဂ့ၤ. ဒီးပတဲပာ်လံအီၤလၢ ပကဆဲးကလိာ်ကွဲအီၤဆူၣ်ဆူၣ်. ပအဲၣ်ဒိးမၤအီၤ ဂ့ၤဒိၣ်န့ၢ်ဒ်လၢ အပူၤကွံာ် ပမၤတ့ၢ်အီၤအဂ့ၤကတၢၢ်ဖဲ World Cup တၢ်ပြၢသ့ၣ်တဖၣ်အပူၤ. ဒီးတၢ်အဝဲန့ၣ် မ့ၢ်ဝဲဒၣ် ဖဲပပြၢလိာ်သးဒီး U.S. န့ၣ် ပကမၤန့ၢ်ကဒီးဝဲတၢ်ဆၢလၢအဂ့ၤတခါ ဒီးလဲၤထီၣ်တလၢကွံာ် ကရူၢ်အပတီၢ်အံၤန့ၢ်ဝဲဒၣ်. နာ်သက့ ယဆိကမိၣ် ဖဲတၢ်လိာ်ကွဲပြၢဒီး Turkey အပူၤန့ၣ် တၢ်လၢအဂ့ၤသ့ၣ်တဖၣ်အိၣ်ဝဲအါမး ဒီး လၢတၢ်အံၤအဖီခိၣ်န့ၣ် ပကမၤဂ့ၤဒိၣ်ထီၣ်ကဒီးအီၤ. ဒီးဒ်ယတဲတ့ၢ်အီၤအသိး, ကကျဲးစၢးအီၤဒ်သိး ကမၤန့ၢ် တၢ်အဆၢလၢအဂ့ၤ တဘျီကဒီးန့ၣ်လီၤ.”
အစထြ့လယါဒီး USA ကဘၣ်ထူပြၢလိာ်အသးဖဲ မုၢ်ဘူၣ်— မုၢ်ဃုနံၤ လါယူၤ အသီ ၂ဝ ဂီၤခီ ၅ နၣ်ရံၣ် ဒီး တၢ်ဘိးဘၣ်ရၤလီၤဒုးနဲၣ်အီၤတဘျီဃီဖဲ SBS အပူၤန့ၣ်လီၤ.
ခဲမုၢ်ဆ့ၣ်န့ၣ်, Czechia ကဘၣ်ထံၣ်လိာ်သးဒိး South Africa; မ့မ့ၢ် Switzerland န့ၣ် ကဘၣ်တိနိၣ်လိာ်အသးဒီး Bosnia ဒီး Herzegovina; ကီၢ်ခဲနဒၣ်န့ၣ် ကဘၣ်တိနိၣ်လိာ်အသးဒီး Qatar; ဒီးမ့မ့ၢ်လၢ Mexico န့ၣ်ကဘၣ်လိာ်ကွဲပြၢဒီး Korea Republic န့ၣ်လီၤ.
အခဲအံၤန့ၣ်နဒိကနၣ်ဝဲဒၣ် World Cup Daily Update တၢ်ရဲၣ်အတၢ်ကျဲၤ ၇သီတသီအတၢ်ပြၢတၢ်ကစီၣ်. ယၤန့ၣ်မ့ၢ် ရှါဖီၤ.
FIFA World Cup 2026™—၂ဝ၂၆နံၣ် ဟီၣ်ခိၣ်ဒီဘ့ၣ်ဖျၢၣ်ထူတၢ်လိာ်ကွဲပြၢန့ၣ် နကွၢ်ကီ ကလီအီၤ ဖဲ SBS ဒီး SBS On Demand အပူၤ သ့ဝဲကိးဆၢကတီၢ်ဒဲးန့ၣ်လီၤ.
