ໃນວັນທີ 30 ຕຸລາ ວິທຍຸ SBS ໄດ້ໄປຮ່ວມບຸນມະຫາກະຖິນທີ່ວັດປ່າ ພຸທລາວັນ ທີ່ Wedderburn. ມື້ນັ້ນໂຊກດີຢ່າງຫຼາຍເພາະຝົນທີ່ໄດ້ຕົກມາເປັນເວລາເກືອບອາທິດກໍໄດ້ເຊົາຕົກ ແລະເຮັດໃຫ້ມີບ່ອນຈອດຣົດໄດ້ອີກຫຼາຍຮ້ອຍຄັນ.
ຕອນເຊົ້າ ກໍໄດ້ມີການໄຫວ້ພຣະ ບຳເພັນສິນ ແລ້ວກໍມີການຕັກບາດ ຕາມປະເພນີ.
ຫຼັງຈາກນັ້ນ ກໍນິມົນພຣະສັນເພນ ແລະຜູ້ມາຮ່ວມທຳບຸນ ກໍກິນເຂົ້າຮ່ວມກັນ.
ເມື່ອພຣະສັນເພນຮຽບຮ້ອຍແລ້ວ ແລະ ຜູ້ໄປທຳບຸນກໍ ກິນເຂົ້າແລ້ວໆ ກໍໄດ້ເລີກຍາມແຫ່ກອງກະຖິນ.
ການແຫ່ນີ້ ໄດ້ແຫ່ອ້ອມ ສິມທີ່ສ້າງໃໝ່ (ແຕ່ບໍ່ທັນໄດ້ສລອງເທື່ອ) ສາມຮອບ. ຫຼັງຈາກນັ້ນກໍໄດ້ກັບຄືນມາທີ່ ຫໍແຈກ ເພື່ອ ທຳພິທີມອບອົງກະຖິນແດ່ ພຣະສົງ.
ງານມະຫາກະຖິນຂອງວັດປ່າປີນີ້ ກໍເສັດສິ້ນໄປດ້ວຍດີ. ຜູ້ມາຮ່ວມທຳບຸນກໍກັບເມືອດ້ວຍຄວາມ ອີ່ມອົກອີ່ມໃຈ ທີ່ໄດ້ມາຮ່ວມບຸນທີ່ມີຂຶ້ນພຽງປີລະເທື່ອ.
ຜູ້ມາຮ່ວມງານບຸນປີນີ້, ນອກຈາກຈະມີຊາວພຸດລາວແລ້ວ ຍັງມີ ຊາວໄທ, ຊາວວຽດນາມ, ຊາວຂເມນ, ຊາວອິນເດັຍ, ຊາວ ສີລັງກາ, ຊາວ ບັງຄລາເທດ ແລະ ຊົນຊາດອື່ນທີ່ເຫຼືອມໃສໃນພຣະພຸທສາສນາ ໃດ້ພາກັນມາຮ່ວມກວ່າພັນຄົນ.
ຂໍອະນຸໂມທະນານຳທຸກໆທ່ານ.
ນອກຈາກນີ້, ທາງ SBS ຍັງໄດ້ສຳພາດ ທ່ານມະຫາ ອຸດົມ ພົມມະວົງສາ ກ່ຽວກັບຄວາມເປັນມາຂອງກະຖິນ ອີກດ້ວຍ.
ວິທຍຸ SBS ພາກພາສາລາວ ຂໍຂອບໃຈ ວັດພຸທລາວັນ ທີ່ໃຫ້ໂອກາດແກ່ SBS ໄດ້ມາຮ່ວມໃນງານບຸນຄັ້ງນີ້ດ້ວຍ.
ຣາຍງານ ແລະຜລິດໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ
