കൊറോണവൈറസ് ബാധ നിയന്ത്രണത്തിലേക്ക് വന്നതോടെ ഓസ്‌ട്രേലിയയില്‍ നിയന്ത്രണങ്ങളില്‍ ഇളവു നല്കുന്ന കാര്യം സര്‍ക്കാര്‍ പരിഗണിച്ചു തുടങ്ങി.
വെള്ളിയാഴ്ച ചേരുന്ന ദേശീയ ക്യാബിനറ്റ് യോഗം ഇതിനുള്ള നടപടികള്‍ പ്രഖ്യാപിക്കും.
തൊഴില്‍ നഷ്ടമായ പത്തു ലക്ഷത്തോളം പേരെ തിരികെ തൊഴില്‍രംഗത്തേക്ക് എത്തിക്കുക എന്നതാണ് മുഖ്യലക്ഷ്യമെന്ന് പ്രധാനമന്ത്രി പ്രഖ്യാപിച്ചിട്ടുണ്ട്.
പക്ഷേ, കൊറോണക്കാലത്തിനു ശേഷമുള്ള ജോലി സ്ഥലങ്ങള്‍ - പ്രത്യേകിച്ചും ഓഫീസുകള്‍ - മുമ്പുള്ളതുപോലെ ആയിരിക്കില്ല എന്ന കാര്യം ഉറപ്പാണ്. കൊവിഡ്-സുരക്ഷിത ജോലിസ്ഥലങ്ങളാകണം ഓസ്‌ട്രേലിയയില്‍ ഉണ്ടാകേണ്ടത് എന്ന് സര്‍ക്കാര്‍ നിര്‌ദ്ദേശിച്ചിട്ടുണ്ട്.
ജോലി സമയം മാറും
ഓരോ തൊഴില്‍മേഖലയിലും എന്തൊക്കെ മാറ്റങ്ങള്‍ വരുത്തണം എന്ന കാര്യം നിര്‍ദ്ദേശിക്കാന്‍ സേഫ് വര്‍ക് ഓസ്‌ട്രേലിയയോടാണ് സര്‍ക്കാര്‍ ആവശ്യപ്പെട്ടിരിക്കുന്നത്.
23 തൊഴില്‍ മേഖലകളിലായി, 1300 പേജുള്ള നിര്‍ദ്ദേശങ്ങളാണ് സേഫ് വര്‍ക്ക് ഓസ്‌ട്രേലിയ തയ്യാറാക്കുന്നത്. ജൂലൈ മാസത്തോടെ കൊവിഡ്-സുരക്ഷിത തൊഴില്‍സ്ഥലങ്ങള്‍ പൂര്‍ണ്ണസജ്ജമാക്കാനാണ് ലക്ഷ്യം.
ഓഫീസുകളിലെ ശുചീകരണവും, സാമൂഹികമായ അകലം പാലിക്കലുമായിരിക്കും ഇതില്‍ ഏറ്റവും പ്രധാനം.
Businessman doing online banking, he is making e-payments with a credit card and his laptop, online business and finance concept Source: element envato
ജീവനക്കാര്‍ക്ക് വ്യത്യസ്ത തൊഴില്‍ സമയം അനുവദിക്കുന്നത് സുപ്രധാന നടപടിയാണെന്ന് ചീഫ് മെഡിക്കല്‍ ഓഫീസര്‍ ബ്രെന്‍ഡന്‍ മര്‍ഫി ചൂണ്ടിക്കാട്ടി. ഒരു തൊഴില്‍സ്ഥലത്തെ എല്ലാ ജീവനക്കാരും ഒരുമിച്ച് ജോലി തുടങ്ങുകയും അവസാനിപ്പിക്കുകയും ചെയ്യുന്ന രീതി ഉണ്ടാകില്ല.
അതിനു പകരം വ്യത്യസ്ത ഓഫീസ് സമയമായിരിക്കും വ്യത്യസ്ത ജീവനക്കാര്‍ക്കുള്ളത്.
പൊതുഗതാഗത സംവിധാനങ്ങളില്‍ എല്ലാവരും കൂടി ഇടിച്ചുകയറുന്ന സാഹചര്യം അനുവദിക്കാനാവില്ലെന്ന് ബ്രെന്‍ഡന്‍ മര്‍ഫി പറഞ്ഞു.
ഓഫീസുകളില്‍ ജീവനക്കാര്‍ക്കുള്ള ഉച്ചഭക്ഷണ സമയത്തിലും ഇതേ മാറ്റമുണ്ടാകും. എല്ലാവര്‍ക്കും ഒരുമിച്ചാകില്ല ഉച്ചഭക്ഷണ ഇടവേള ലഭിക്കുന്നത്.
Chief medical officer Professor Brendan Murphy Source: AAP
ഹോട്ട് ഡെസ്‌കുകള്‍ മാറണം
എല്ലാ ഓഫീസുകളിലും ഹാന്‍ഡ് സാനിട്ടൈസറുകല്‍ നിര്‍ബന്ധമാക്കുമെന്നും മെഡിക്കല്‍ ഓഫീസര്‍ സൂചിപ്പിച്ചു. മറ്റു ശുചീകരണ നടപടികളും നിര്‍ബന്ധമാക്കും.
ഹോട്ട് ഡെസ്‌ക് രീതിയില്‍ മാറ്റമുണ്ടാക്കണമെന്നും നിര്‍ദ്ദേശമുണ്ട്.
സ്ഥിരമായി ഒരു സീറ്റോ, ഡെസ്‌കോ ഇല്ലാതെ, ഒഴിവുള്ള ഏതു സീറ്റിലുമിരുന്ന് ലാപ്‌ടോപ് ഉപയോഗിച്ച് ജോലി ചെയ്യുന്നതാണ് ഹോട്ട്‌ഡെസ്‌ക്.
ഹോട്ട് ഡെസ്‌ക് ഉപയോഗിക്കുകയോ, ഓഫീസിലെ മറ്റ് സ്ഥലങ്ങള്‍ പലരും ഉപയോഗിക്കുകയോ ചെയ്യുന്നെങ്കില്‍ അവയുടെ ശുചീകരണം നിര്‍ബന്ധമാക്കും.
വര്‍ക്ക് ഫ്രം ഹോം സാധ്യമായ സാഹചര്യങ്ങളില്‍ അത് അനുവദിക്കണമെന്നതും സ്ഥിരം നിര്‍ദ്ദേശമാകും.
ഓഫീസുകളിലെ ഹസ്തദാനം ഒഴിവാക്കേണ്ടി വരുമെന്നും ബ്രെന്‍ഡന്‍ മര്‍ഫി സൂചിപ്പിച്ചു.
ഓഫീസ് മീറ്റിംഗുകളിലും മാറ്റം വരണം എന്നാണ് നിര്‍ദ്ദേശം. ചെറിയ മീറ്റിംഗ് മുറികളില്‍ നിരവധി പേര്‍ ഒരുമിച്ച് ഇരിക്കുന്നത് ഒഴിവാക്കേണ്ടിവരും. സാധ്യമായ സാഹചര്യങ്ങളില്‍ വീഡിയോ മീറ്റിംഗുകള്‍ നടത്തണം.
വീഡിയോ മീറ്റിംഗുകള്‍ നടത്താന്‍ കഴിയാത്ത സാഹചര്യങ്ങളില്‍ മാത്രമാകണം മറ്റു സംസ്ഥാനങ്ങളിലുള്ള ഓഫീസുകളിലേക്ക് യാത്ര ചെയ്യുന്നതെന്നും ചീഫ് മെഡിക്കല്‍ ഓഫീസര്‍ നിര്‌ദ്ദേശിച്ചു.
നിയന്ത്രണങ്ങള്‍ ഇളവു ചെയ്യുന്നതിനുള്ള പദ്ധതി പ്രഖ്യാപിക്കുമ്പോള്‍ ഇതിന്റെ കൂടുതല്‍ വിശദാംശങ്ങളും സര്‍ക്കാര്‍ നല്കും എന്നാണ് സൂചന.
People in Australia must stay at least 1.5 metres away from others. Check your state’s restrictions on gathering limits.
Testing for coronavirus is now widely available across Australia. If you are experiencing cold or flu symptoms, arrange a test by calling your doctor or contact the Coronavirus Health Information Hotline on 1800 020 080.
The federal government's coronavirus tracing app COVIDSafe is available for download from your phone's app store.
SBS is committed to informing Australia’s diverse communities about the latest COVID-19 developments. News and information is available in 63 languages at sbs.com.au/coronavirus.
