शुक्रवार राति १२ बजे देखि लागु हुने गरी राज्य पाँच दिने लकडाउनमा जाने त्यहाँका प्रिमीयर ड्यानिएल एन्ड्रीउजले बताएका छन् ।
“भिक्टोरीयालीहरु यस अघि पनि यो अवस्थाबाट गुज्रिसकेका छन् ,जनतालाई थाहा छ यो रणनीतिले काम गर्दछ ।” उनले भने ।
“मलाई थाहा छ यो समाचार भिक्टोरीयालीहरुले आज सुन्न चाहेका थिएनन्, यो स्थानमा हामी आउन चाहेका थिएनौ,हामीले बनाएको कुरालाई यथावत् राख्न हामीले यो निर्णय गर्नै पर्छ ।” प्रिमीयरले भने ।
लकडाउनका दौरान,विद्यालय र अति आवश्यक बाहेकका पसलहरू बन्द रहनेछन् ।
मेलर्वन क्षेत्र गत अगस्ट महिनामा भएको लकडाउनको जस्तै अवस्थामा रहने भएको छ ।
रेस्टुरेन्ट लगायतका आतिथ्य क्षेत्रका सेवाहरू टेक–अवे सेवामा मात्र सीमित हुनेछन् ।
घर छाड्नका लागि चार निर्दिष्ट कारणहरू हुनु पर्नेछन् – आवश्यक सामाग्रीको किनमेल, हेरचाह, दिनको दुई घण्टा व्यायामका र घरबाटै काम वा पढाई गर्न नमिल्ने अवस्थामा मात्र घर बाहिर निस्कन पाइनेछ ।
धार्मिक एवम् भेला एवम् सेवाहरू बन्द रहनेछन् भने अन्तिम संस्कारमा १० जना मानिस मात्र भेला हुन पाउनेछन् ।
होलिडे इन होटेल सँग सम्बन्धित सङ्क्रमितको सङ्ख्या १३ पुगेपछि अन्य क्षेत्रमा पनि सङ्क्रमणको जोखिम बढ्ने भन्दै शुक्रवारको मन्त्रीपरिषदबाट उक्त निर्णय भएको हो ।
बेलायती नयाँ भाइरस तीव्र गतिमा बढिरहेकाले पुरै भिक्टोरिया जोखिममा रहेको त्यहाँका प्रिमीयरले बताए ।
“हामीले कुनै एक व्यक्तिमा सङ्क्रमण भएको नतिजा नपाउँदै उसले आफ्ना नजिकका मानिसहरूलाई सारिसकेको हुन्छ ।” प्रिमीयरले भने ।
प्रधानमन्त्री स्कट मोरीसनले सङ्क्रमणलाई मध्यनजर गदै उपयुक्त कदम चाल्न आग्रह गरेपछि राज्यको मन्त्रीपरिषद् बैठकले यस्तो निर्णय गरेको हो ।
